INCENYE 2
Ungalitfola Njani Liciniso NgaNkulunkulu?
1, 2. Singafanekisa njani kute sibone kutsi sidzinga indlela lengagucuki yekwenta sincumo etindzabeni tenkholo?
NGUYIPHI indlela yekutfola lwati ngaNkulunkulu? Kudzingekile yini kutsi sihlole tonkhe timfundziso taletinkholo letinyenti kangaka? Loko ngeke sesikhone kukwenta. Nome ngabe besingakwenta, besingati ngani kutsi nguyiphi imfundziso lelungile?
2 Nasibuka lokutsi kunemibono lengafanani ngaNkulunkulu, siyabona kutsi kudzingeka indlela bonkhe bantfu labangavumelana ngayo yekwati kutsi ngukuphi lokuliciniso. Singafanekisa kanje: Ase sitsi emakethe kuphikiswana ngebudze bendvwangu letsite. Umtsengisi utsi lendvwangu ingemamitha lamatsatfu, kepha umtsengi utsi ingephasi kwaloko. Beyingasombululwa njani lendzaba? Ngekukala lendvwangu ngethephu.
3. Labhalwelani liBhayibheli?
3 Ikhona yini ithephu, nome indlela lengagucuki yekwenta sincumo etindzabeni tenkholo? Yebo, lethephu liBhayibheli. Nkulunkulu wabangela kutsi liBhayibheli libhalwe kute bonkhe bantfu bafundze liciniso ngaye. Kushicilelwe tigidzigidzi temakhophi alo. LiBhayibheli leliphelele nome incenye yalo, lihunyushwe ngetilwimi letingetulu kwa-2 100. Cishe umuntfu nemuntfu angalifundza ngelulwimi lwakhe liciniso ngaNkulunkulu.
4. Kunaluphi lwati eBhayibhelini?
4 LiBhayibheli lisipho lesiligugu lesibuya kuNkulunkulu. Lichaza tintfo lebesingeke sitati. Lisitjela ngetidalwa letihlala endzaweni yemoya. Lembula imicabango
yaNkulunkulu, buntfu bakhe, kanye netinjongo takhe. Liphindze lisitjele ngendlela lasebentelana ngayo nebantfu eminyakeni letinkhulungwane leyengca. Lisitjela ngetintfo letitawenteka esikhatsini lesitako. Likhombisa nekutsi singayitfola njani indlela leyisa ekuphileni lokuphakadze.Sizatfu Sekutsi Wetsembe LiBhayibheli
5. Ngusiphi sibonelo lesikhombisa kutsi liBhayibheli liyavumelana nesayensi?
5 Kunetizatfu letinyenti tekwetsemba kutsi liBhayibheli liliVi laNkulunkulu sibili. Lesinye sato kutsi liBhayibheli liyavumelana nalokushiwo yisayensi. Kadzeni, bantfu emhlabeni wonkhe bebacabanga kutsi umhlaba usinyiswe ngulokutsite. Sibonelo saloko kutsi eNshonalanga ye-Afrika, bantfu bebacabanga kutsi umhlaba usime ngenyoka letigocote yaba ngemaphindvo langu-3 500 ngetulu kwawo nakangu-3 500 ngephasi kwawo. Kepha eminyakeni lengetulu kwa-3 500 leyengcile, umbhali weliBhayibheli wabhala kutsi Nkulunkulu ‘ulengise umhlaba eteni,’ lokuyintfo levumelana nesayensi.—Jobe 26:7.
6. Ngubuphi bufakazi lobukhulu kunabo bonkhe bekutsi liBhayibheli libuya kuNkulunkulu?
6 Bufakazi lobukhulu kunabo bonkhe bekutsi liBhayibheli liliVi laNkulunkulu sibili ngumlandvo walo lomuhle nakutiwa ekubiketeleni lokutawenteka esikhatsini lesiseta. Nkulunkulu akafani netangoma. Ulati sibili likusasa. Yena lakushoko akuhlali kungenteki.
7. Ngutiphi letinye tiphrofetho teliBhayibheli letagcwaliseka esikhatsini lesesengca?
7 Emakhulu etiphrofetho teliBhayibheli agcwaliseka kadzeni. Sibonelo saloku kutsi kusasele iminyaka lengu-700, liBhayibheli latsi Jesu abetawutalelwa edolobheni iBhetlehema, nemambala kwenteka kona loko. (Mikha 5:2; Matewu 2:3-9) LiBhayibheli laphindze lasho letinye tiphrofetho ngaJesu, njengekutsi abetawutalwa yintfombi-ntfo, kutsi ngekuhamba kwesikhatsi atsengiswe ngetinhlavu temali yelisiliva letingu-30. Naleto tiphrofetho tagcwaliseka. Nome besingatsini, kute umuntfu labengasho letotintfo tisengakenteki!—Isaya 7:14; Zakhariya 11:12, 13; Matewu 1:22, 23; 27:3-5.
8. Ngutiphi letinye tiphrofetho teliBhayibheli letigcwaliseka lamuhla, futsi tikhombisani?
8 Tiphrofetho letinyenti teliBhayibheli tigcwaliseka esikhatsini setfu. Nati letinye tato:
-
“Sive siyawuvukela lesinye, umbuso uvukele Lukha 21:10, 11.
lomunye. Kuyawuba nekutamatama kwemhlaba lokwesabekako lokunyenti, kuvame indlala netifo letingelapheki naletitsatselwanako etindzaweni letinyenti.”— -
Bekutawuba ‘nekwandza kwekona.’—Matewu 24:12.
-
“Emalangeni ekugcina . . . bantfu bayawutitsandza, batsandze imali. . . . Bayawuba ngulabangalaleli batali babo, . . . bangatitsibi, babe nebulwane, batondze lokuhle, . . . bakhukhumukiswe kutatisa, batsandze kutijabulisa kunekutsi babe ngulabatsandza Nkulunkulu.”—2 Thimothi 3:1-5.
Awuvumi yini kutsi letintfo letishiwo ngenhla tiyenteka nyalo? Letiphrofetho teliBhayibheli letiliciniso naletingashayi phansi tikhombisa kutsi liBhayibheli alisiyo nani incwadzi levamile. LiliVi laNkulunkulu leliphefumulelwe!—2 Thimothi 3:16.
Lisenjengoba Lalinjalo Yini LiBhayibheli?
9, 10. Yini lekhombisa kutsi Nkulunkulu akakabavumeli bantfu kutsi bashintje liBhayibheli?
9 Asesitsi bewungumnikati wefemu letsite, wase unameka elubondzeni luhla lwemitsetfo lokufanele ilandzelwe tisebenti takho. Yini longayenta nangabe sitsa lesitsite sishintja loko lokubhalile? Bewungeke yini ukulungise? Ngendlela lefanako, Nkulunkulu akabavumeli bantfu kutsi balishintje liciniso leliVi lakhe liBhayibheli.
10 Labo labake betama kushintja timfundziso teliVi laNkulunkulu behlulekile. Nasibuka liBhayibheli lanyalo nemakhophi eliBhayibheli akadzeni, kute umehluko. Loku kukhombisa kutsi liBhayibheli alikashintjwa kuso sonkhe lesikhatsi.