1. Ngutiphi tinhlobo letimbili tetinkholo liVi laNkulunkulu lelitsi kuphela kwato?

JESU watsi: “Ngenani ngelisango lelincane, ngobe lisango libanti nendlela ibanti leyisa ekubhujisweni, banyenti labangena ngalo. Kepha lisango lincane nendlela yincane leyisa ekuphileni, nebantfu labayitfolako bambalwa.” (Matewu 7:13, 14) LiVi laNkulunkulu lisitjela kutsi timbili kuphela tinhlobo tetinkholo: lenye yeliciniso, lenye yemanga; lenye ilungile, lenye ayikalungi; lenye iyisa ekuphileni, lenye iyisa ekubhujisweni.

2. ImiBhalo ikukhombisa njani kutsi akusito tonkhe tinkholo letijabulisa Nkulunkulu?

² Labanye bantfu bacabanga kutsi tonkhe tinkholo tiyamjabulisa Nkulunkulu. Lamavesi eliBhayibheli langentasi akhombisa kutsi loku akusilo liciniso:

• “Baka-Israyeli baphindza benta lokubi emehlweni aSimakadze. Bakhonta boBhali, nabo-Ashtarothe, nabonkulunkulu base-Aramu, nabonkulunkulu baseSidoni, nabonkulunkulu baseMowabi, nabonkulunkulu bema-Amoni, nabonkulunkulu bemaFilisti. Baka-Israyeli bafulatsela Simakadze, bamyekela, bangabe basamkhonta, ngako Simakadze wabatfukutselela.” (Tikhulu 10:6, 7) Nasikhonta tithico nome labanye bonkulunkulu esikhundleni saJehova, ngeke asemukele.

• “Lesive singidvumisa ngetindzebe temilomo, kepha tinhlitiyo taso tikhashane nami. Bangikhonta ngelite, ngobe bafundzisa imitsetfo leshaywe bantfu, bente shangatsi iphuma kimi!” (Makho 7:6, 7) Nangabe bantfu labatsi bakhonta Nkulunkulu bafundzisa imicondvo yabo esikhundleni saloko lokufundziswa liBhayibheli, kumkhonta kwabo kulite. Akwemukeleki kuNkulunkulu.

• “Nkulunkulu unguMoya, nalabo labamkhontako bafanele kumkhonta ngaMoya nangeliciniso.” (Johane 4:24) Indlela lesikhonta ngayo Nkulunkulu kufanele ivumelane neliciniso leliseVini laKhe.

3. Singawubona njani umehluko emkhatsini wenkholo yeliciniso neyemanga?

³ Singabona ngani kutsi inkholo letsite iyamjabulisa yini Nkulunkulu nome cha? Jesu watsi: “Sihlahla lesimnandzi sitsela titselo letimnandzi, kantsi sihlahla lesibi sitsela titselo letimbi . . . Ngako-ke baphrofethimbumbulu niyawubati ngetitselo tabo.” Loku kusho kutsi inkholo levela kuNkulunkulu itawutsela titselo letinhle; kantsi levela kuSathane itawutsela titselo letimbi.—Matewu 7:15-20.

4. Bantfu baJehova banebuntfu lobunjani?

⁴ Inkholo yeliciniso yenta emalunga ayo atsandzane, aphindze atsandze labanye. Loku kwentiwa kutsi Jehova unguNkulunkulu lonelutsandvo. Jesu watsi: “Nanitsandzanako, bonkhe bantfu bayawunati kutsi nibafundzi bami.” Tinkholo tiyakhona yini kukwenta loku?—Johane 13:35; Lukha 10:27; 1 Johane 4:8.

5. Lenye i-encyclopedia ikuchaza kanjani kutsengiswa kwebantfu base-Afrika bayewuba tigcila?

⁵ Ase ucabange ngekutsengiselwa kwebantfu base-Afrika ebugcilini. Incwadzi lenesihloko lesitsi The New Encyclopædia Britannica itsi: “Bantfu base-Afrika labacishe babe ngu-18 000 000 batsengiselwa emaMoslem ngale kweSahara [nelwandle] i-Indian Ocean kusukela nga-650 kuya ku-1905. Eminyakeni lengetulu kwemakhulu lasihlanu leyengcile, bantfu baseYurophu bacala kutsengiselana bantfu base-Afrika elusebeni lwelwandle lwase-Afrika lolungasenshonalanga. Kwatsi nakufika 1867, besekuhanjiswe  ngemikhumbi bantfu base-Afrika labangaba ngu-7 000 000 kuya ku-10 000 000 kuyewuba tigcila [evekatini laseMelika].”

6. Inkholo yaba nasiphi sandla ekutsengisweni kwebantfu base-Afrika babe tigcila?

⁶ Nakutsatfwa emadvodza, bafati, nebantfwana, behlukaniswe nemindeni yabo, baboshwe ngemaketange, bagcivitwe ngetinsimbi letishisako, futsi kutsengiselwane ngabo kuhle kwemihlambi yetinkhomo, inkholo beyitsini? Nankha emavi labhalwa nguBethwell Ogot ephepheni letindzaba laseNairobi, eKenya, i-Daily Nation: “BuKhristu nebuMoslem bufundzisa ngebunye bebantfu, kepha kokubili kwaveta imimango lebeyigcwele tigcila futsi inelubandlululo. . . . Kufanele sikuvume kutsi buKhristu nebuMoslem, emave aseMphumalanga Lesekhatsi (indzawo lesukela eGibhithe kuya e-Iran) newaseNshonalanga anelicala, sikuvume nekutsalalisa kwabo lokwaholela ekuhluphekeni lokungenakulinganiswa kwebantfu base-Afrika emakhulukhulu eminyaka.”

7. Baholi betinkholo babe nasiphi sandla etimphini?

⁷ Inkholo yemanga itsele titselo tayo letimbi nangaletinye tindlela. Nome liBhayibheli litsi “ubotsandza makhelwane wakho,” baholi betinkholo emhlabeni wonkhe bebasolo basekela futsi babhebhetela timphi ngenshiseko.—Matewu 22:39.

8. (a) Bafundisi bakusekela njani kubulalana kwebantfu etimphini tase-Afrika? (b) Lomunye umfundisi watsini ngebaholi betinkholo nakuchubeka imphi yembango eNigeria?

⁸ Kwatiwa kabanti kutsi lamanye emasisitela nebapristi baba nesandla ekubulaleni bantfu eRwanda nga-1994. Inkholo ibe nendzima lenkhulu nakuletinye timphi tase-Afrika. Ngesikhatsi kunemphi yembango leyachitsa ingati lenyenti eNigeria, kuto totimbili tinhlangotsi  lebetilwa, tinkholo betikhutsata bantfu kutsi balwe. Yatsi isachubeka leyomphi, lomunye umfundisi watsi baholi bemasontfo “besebawubeke eceleni umsebenti Nkulunkulu abebanikete wona.” Waphindze watsi: “Tsine lesitsi sitinceku taNkulunkulu sigucuke saba tinceku taSathane.”

9. LiBhayibheli litsini ngetikhonti taSathane?

⁹ LiBhayibheli lisho intfo lefanako: “NaSathane utigucula abe yingilosi yekukhanya. Ngako-ke akumangalisi nangabe tisebenti takhe titigucula tibe tisebenti tekulunga.” (2 Khorinte 11:14, 15) Njengoba vele bantfu lababi bayaye bativete shengatsi balungile, naSathane ukhohlisa bantfu ngetikhonti takhe letibonakala tilungile, kepha tibe tinemisebenti lengakalungi netitselo letimbi.

10. Baholi betinkholo bamphike ngayiphi indlela Nkulunkulu?

¹⁰ Baholi betinkholo emhlabeni wonkhe bashumayela ngendzaba yelutsandvo, kuthula, nekulunga, kepha bangenela timphi, banelubandlululo, nekungamhloniphi Nkulunkulu. LiBhayibheli libachaza kahle. Litsi: “Bavuma ngemlomo kutsi bayamati Nkulunkulu, kepha ngetento tabo bayamphika.”—Thithusi 1:16.

11. LiBhayibheli liyichaza njani inkholo yemanga?

¹¹ Ngekufundza incwadzi yeSembulo eBhayibhelini, singaba nalo lwati ngekutsi Jehova ucabangani ngenkholo yemanga. Kuleyoncwadzi, inkholo yemanga ibonakala ingumfati lobitwa ngeligama lelitsi “iBhabhulona lenkhulu.” (Sembulo 17:5) Ase unake indlela Nkulunkulu lamchaza ngayo:

• “[Ingwadla] leyatiwa kakhulu . . . Emakhosi emhlaba aphingana nayo.” (Sembulo 17:1, 2) Esikhundleni sekutsi yetsembeke kuNkulunkulu, inkholo yemanga ingenele tembusave, yaze yacondzisa nabohulumende kutsi benteni ngaletinye tikhatsi.

• “Kwatfolakala kuwe ingati yebaphrofethi, neyalabangcwele, neyabo bonkhe lababulawa emhlabeni.” (Sembulo 18:24) Inkholo yemanga ishushise yaphindze yabulala tinceku taNkulunkulu letetsembekile. Inesandla nasekufeni kwetigidzi tebantfu etimphini.

• ‘Abetiphakamisa futsi atamasa.’ (Sembulo 18:7) Inkholo yemanga inemcebo lomnyenti lowenta baholi bayo baphile kuphila kwekutamasa.

• “Wedukisa tonkhe tive ngebutsakatsi [bakhe].” (Sembulo 18:23) Inkholo yemanga ikhutsate tonkhe tinhlobo tebutsakatsi, kwesatjwa kwalabafile, nekukhontwa kwemadloti ngalemfundziso yayo yekutsi umphefumulo awufi.

12. LiBhayibheli likhokha siphi sicwayiso ngenkholo yemanga?

¹² LiBhayibheli likhipha sicwayiso lesinemandla sekutsi bantfu baphume enkholweni yemanga. Litsi: “Phumani kuyo, ningahlanganyeli nayo etonweni tayo, funa nehlelwe kuhlushwa kanye nayo.”—Sembulo 18:4, 5.

13. Kutawentekani enkholweni yemanga nakulabo labayichubako?

¹³ Esikhatsini lesesisedvute, iBhabhulona lenkhulu, lehlanganisa tonkhe tinkholo temanga temhlaba, itawubhujiswa iphele. LiBhayibheli litsi: “Tinhlupheko tayo tiyawufika ngalanga linye: kufa, lusizi, nendlala. Iyawushiswa ngemlilo, ngobe inemandla iNkhosi Nkulunkulu leyehlulelako.” (Sembulo 18:8) Nangabe sifuna kuphepha kuletinhlupheko letitawuyehlela, kufanele sicedze bonkhe budlelwane nenkholo yemanga, singahlanganyeli nakancane emikhubeni, emikhosini, nasetinkholelweni tayo letingamjabulisi Nkulunkulu. Kuyaphutfuma loku. Kuphila kwetfu kusengotini!—2 Khorinte 6:14-18.