INCWADZI yekugcina yeliBhayibheli lebitwa ngekutsi Sembulo iniketa bonkhe bantfu litsemba. Njengoba yabhalwa ngumphostoli Johane, lencwadzi icuketse imibono leyawuphetsela ekugcwalisekeni kwenjongo yaJehova.

Embonweni wekucala, Jesu lovusiwe wancoma emabandla lamanyenti, futsi wawatjela loko lokwakufanele akulungise. Umbono wesibili usibonisa sihlalo sebukhosi saNkulunkulu lesisezulwini, lapho tidalwa temoya timdvumisa khona ngenhlitiyo lephelele.

Njengoba injongo yaNkulunkulu seyitawugcwaliseka, liWundlu lelinguJesu Khristu latfola incwadzi lebeyinanyatseliswe ngetimphawu letisikhombisa. Nakuvulwa letimphawu letine tekucala, kwabese kubonakala emadvodza lamane lafaniswa nebagibeli bemahhashi. Yekucala lebeyigibele lihhashi lelimhlophe kwakunguJesu, futsi wabekwa kutsi abe yiNkhosi. Kwabese kulandzela lamanye labegibele emahhashi lanemibala leyehlukahlukene, amelela imphi, indlala, kanye nekufa. Konkhe loku kwenteka amalangeni ekugcina elive. Kuvulwa kweluphawu lwesikhombisa kwaholela ekushayweni kwemacilongo lasikhombisa, lasho kumenyetelwa kwetehlulelo taNkulunkulu. Loku kuholela etinhluphweni letisikhombisa letingumfanekiso, noma ekubonakalisweni kwentfukutselo yaNkulunkulu.

UMbuso waNkulunkulu lomelelwa luswane loludvuna wamiswa ezulwini. Kwasuka imphi ezulwini, futsi Sathane netingilosi takhe letimbi bajikijelwa phansi emhlabeni. Kwevakala livi lelikhulu litsi: “Maye kuwe, mhlaba,” ngoba Develi utfukutsele kakhulu, ngoba uyati kutsi sikhatsi sakhe sesifishane.—Sembulo 12:12.

Johane wabese ubona Jesu ezulwini lebekamelelwa liwundlu, akanye nalabangu-144 000 labakhetfwe kubantfu. Laba ‘bayawubusa njengemakhosi’ kanye naye. Sembulo siphindze sivete kutsi lencenye yesibili yalentalo iyawuba linani lelingu-144 000.—Sembulo 14:1; 20:6.

Babusi bemhlaba babutsanela ndzawonye e-Amagedoni, “imphi yelilanga lelikhulu laNkulunkulu, Somandla.” Balwa naloyo lobekagibele lihhashi lelimhlophe, lokunguJesu lebekahola emabutfo asezulwini. Bonkhe lababusi bayabhujiswa. Sathane uyaboshwa, futsi Jesu kanye nalaba labangu-144 000 babusa emhlabeni “iminyaka leyinkhulungwane.” Ekupheleni kwaleminyaka leyinkhulungwane, Sathane naye uyabhujiswa.—Sembulo 16:14; 20:4.

Iyawusho kutsini iminyaka leyiNkhulungwane yekuBusa kwaKhristu kanye nalabo labangu-144 000, kubantfu labalalelako? Johane wabhala watsi: ‘Jehova uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngoba kwakucala sekwendlulile.’ (Sembulo 21:4) Umhlaba uba lipharadisi!

Ngalawo mavi, lencwadzi yeSembulo icedzelela lomlayeto weliBhayibheli. NgeMbuso waMesiya, Jehova ungcwelisa ligama lakhe futsi bukhosi bakhe bulwelwa kuze kube phakadze!

—Lendzaba itsetfwe encwadzini yeSembulo.