INCENYE 19
Jesu Ubiketela Ngetintfo Letitakwenteka Esikhatsini Lesitako
Jesu ubiketela ngekuba khona kwakhe kanye nekuphela kwelive
NGESIKHATSI Jesu aseNtsabeni Yemincumo, abuke buhle beliJerusalema nelithempeli lalo, baphostoli bakhe labane bambuta babodvwa ngaletinye tetintfo lebekatishito ngembili. Bekabatjele ngekubhujiswa kweliJerusalema, futsi ngalesinye sikhatsi wabatjela ‘ngekuphela kwelive.’ (Matewu 13:40, 49) Baphostoli bakhe bambuta batsi: ‘Yini leyawukhombisa kutsi sesikhatsi sekubuya kwakho nekutsi sekuphela kwetikhatsi?’
Lapho abaphendvula, Jesu wabatjela kutsi kuyawukwentekani ngembi kwekubhujiswa kweliJerusalema. Loko lakusho bekuhlanganisa tintfo letinyenti. Kwakuyawuba nekugcwaliseka lokukhulu kwaleso sibiketelo sakhe. Jesu wabiketela ngetentakalo lebetiyawuba sibonakaliso sekubuya kwakhe. Leso sibonakaliso sasiyawubonisa labo labasemhlabeni kutsi kuba khona kwakhe njengeNkhosi sekucalile. Ngalamanye emagama, besiyawubonisa kutsi Jehova Nkulunkulu sewumbekile kutsi abe yiNkhosi yeMbuso waMesiya lewawutsenjisiwe kusukela kadzeni. Lesibonakaliso besiyawusho kutsi sekusedvute kutsi loMbuso ucedze bubi, futsi uletse kuthula lokungukonakona. Letintfo Jesu lakhuluma ngato, tatisho kuphela kwalelive lelidzala, njengenkholo, tepolitiki, netenhlalakahle talelive, futsi emva kwaloko kufike live lelisha.
Jesu wachaza kutsi kutakwentekani emhlabeni lapho asayiNkhosi ezulwini. Watsi kuyawuba netimphi emhlabeni wonkhe, indlala, kutamatama lokukhulu kwemhlaba, kwandza kwetifo nekungabi nemtsetfo. Bafundzi bakhe labacotfo babeyawushumayela liVangeli ngeMbuso waNkulunkulu emhlabeni wonkhe. Tonkhe letintfo tatiyawulandzelwa “kuhlupheka lokukhulu” lebekungazange sekube khona.
Balandzeli baJesu bebayawukwati ngani kutsi loko kuhlupheka sekusedvute? Jesu watsi ‘abafundze sifundvo ngesihlahla semkhiwa.’ (Matewu 24:32) Kuhluma kwemacembe emkhiwa kubonisa kutsi lihlobo selidvutane. Ngalokufanako-ke, kubona letintfo Jesu lebekatibiketele tenteka, kubonisa kutsi kuphela kwelive sekusedvute. Kute lomunye ngaphandle kwaBabe lowati lilanga lelicondzile nesikhatsi lokuyawucala ngaso kuhlupheka lokukhulu. Ngako-ke, Jesu wacela bafundzi bakhe kutsi ‘bahlale bacaphele, ngoba abati kutsi leso sikhatsi siyawufika nini.’
^ sig. 14 Kute wandzise lwati lwakho ngalesibiketelo saJesu, fundza esehlukweni 9 encwadzi letsi: “Lifundisani Ngempela IBhayibheli?” ngesiZulu leshicilelwe boFakazi BaJehova.