NGEMUVA kwekuphendvuka kwakhe, Pawula washumayela ngenshiseko, futsi loku kwabangela kutsi naye ashushiswe, lokuyintfo lake wayenta naye kulabanye. Lomphostoli lokhutsele wahamba emabanga lamadze asakata liVangeli ngeMbuso waNkulunkulu, loyawugcwalisa injongo yakhe yasekucaleni ngebantfu.

Ngesikhatsi aseListra, eluhambweni lwakhe lwekucala ashumayela, waphilisa indvodza leyayitalwe isishosha. Sicumbi lesikhulu sebantfu sacala kumemeta sitsi Pawula kanye naBhanabasi lobekahamba naye babonkulunkulu. Kwaba lukhuni ngaboPawula kuvimba labantfu ekubenteleni imihlatjelo. Sigcugcutelwa titsa taPawula, kamuva lesicumbi samgcoba ngematje futsi samshiya sesicabanga kutsi ufile. Wasindza kulokuhlaselwa, futsi wabuyela kulelo dolobha kuze ayokhutsata bafundzi.

Lamanye emaKhristu langemaJuda aphikisana ngekutsi emakholwa langasiwo emaJuda kwakufanele alalele incenye letsite kuphela yeMtsetfo waMosi. Pawula watsatsa leyondzaba wayiyisa kubaphostoli nasemadvodzeni lamadzala, eJerusalema. Ngemuva kwekuhlolisisa imiBhalo kanye nekulandzela sicondziso semoya longcwele waNkulunkulu, lamadvodza ayala emabandla kutsi agcine tintfo letidzingekile, njengekungadli kudla lokungcoliswe ngekunikelwa etithicweni, kungadli ingati, nalokucumbelene, kanye nekubalekela bugwadla. Kulalela lomyalo kwakungasho kutsi balandzele uMtsetfo waMosi.—Imisebenti YebaPhostoli 15:28, 29.

Eluhambweni lwakhe lwesibili, Pawula waya eBheriya leseveni laseGrisi. EmaJuda lebekahlala lapho alemukela ngekulangatelela lokukhulu livi, futsi onkhe emalanga abephenyisisa imiBhalo, ahlolisisa kutsi loko lokwakushiwo nguPawula kwakunjalo ngempela yini. Kuphikiswa kwaphindze kwabangela Pawula kutsi ahambe kulendzawo, aye e-Athene. Embi kwelicembu lebantfu labafundze kakhulu base-Athene, Pawula wetfula inkhulumo lenhle, leyayicacile futsi ibonisa kutsi abenelikhono lekufundzisa.

Ngemuva kweluhambo lwakhe lwesitsatfu, Pawula waya eJerusalema. Nakefika ethempelini, emaJuda latsite asusa lutfutfuva, afuna kumbulala. Emasotja aseRoma angenela futsi ahloma Pawula imibuto. Njengewekutalwa eRoma, wakhona kutivikela embi kwaFeliski, lebekanguLusibalukhulu waseRoma. EmaJuda akazange abe nebufakazi bemacala lebekamangalelwe ngawo Pawula. Kute avimbe Festusi naye lobekanguLusibalukhulu waseRoma ekumnikeleni kulamaJuda, Pawula watsi: “Ngicela kuyakwembula ingubo kuKhesari.” Festusi waphendvula watsi: “Utawuvele uhambe uye kuKhesari.”—Imisebenti YebaPhostoli 25:11, 12.

Pawula wase utsatfwa ngemkhumbi wayiswa eTaliyane lapho licala lakhe laliyochubekela khona. Batsi basahamba baphukelwa ngumkhumbi, ngako kwadzingeka kutsi bahlale busika bonkhe esichingini saseMaltha. Lapho afika eRoma, wahlala iminyaka lemibili endlini labekayicashile. Ngisho nobe abehlala agadvwe ngemasotja, lomphostoli loshisekako wachubeka ashumayela ngeMbuso waNkulunkulu kubo bonkhe bantfu lebebamvakashela.

—Lendzaba itsetfwe encwadzini Yemisebenti YebaPhostoli 11:22–28:31.