Mzalwane wetfu lesimtsandzako:

Njengobe wati, liBhayibheli liyincwadzi lekhuluma kakhulu ngebantfu. Linyenti labo bekungemadvodza nebafati labetsembekile lebebahlangabetana netinkinga letifana netetfu. ‘Bebanemiva lefana neyetfu.’ (Jakobe 5:17) Labanye babo bebacindzetelwe tinkinga nekukhatsateka. Labanye bebaviswe buhlungu ngemalunga emindeni yabo noma bazalwane. Kantsi linyenti labo belicindzetelwe kutisola ngemaphutsa lebeliwentile.

Bantfu labanjalo besebamlahlile yini Jehova? Chake, bebangakamlahli. Linyenti labo belitiva njengemhlabeli lowathantaza: “Ngedukile, njengemvu lelahlekile. Ngifune, mine nceku yakho, ngobe imiyalo yakho angikayikhohlwa.” (Tihlabelelo 119:176) Kungenteka kutsi nawe utiva ngendlela lefanako.

Jehova akatikhohlwa tikhonti takhe letiphambukile esibayeni. Kunaloko uyatifuna, esikhatsini lesinyenti asebentisa emakholwa lakanye nato. Ase ucabange ngendlela Jehova lasita ngayo inceku yakhe Jobe, leyahlangabetana netinkinga letinyenti letatifaka ekhatsi bulukhuni kutemnotfo, kufelwa kanye nekugula. Yaphindze yabeketelela emavi labuhlungu lebekavela kulabo lebekufanele bamdvudvute. Kodwa Jobe akazange amlahle Jehova nanome bekake wacabanga ngendlela lengasiyo. (Jobe 1:22; 2:10) Jehova wamsita njani Jobe kutsi abuyele esimeni lesikahle?

Lenye indlela Jehova lasita ngayo Jobe kwaba kusebentisa umzalwane wakheElihu. Ngesikhatsi Jobe atfulula sifuba sakhe, Elihu wamlalela wabese uyakhuluma. Bekatawutsini? Bekatamsola yini Jobe nobe etame kumkhutsata ngendlela lebeyitawumenta adliwe ngunembeza nobe ative anemahloni? Elihu bekatikhandza ancono yini kunaJobe? Akuzange nje sekufike enhlitiyweni yakhe! Ngelusito lwemoya waNkulunkulu Elihu watsi: “Mine ngifanana nawe embikwaNkulunkulu, nami ngatatjwa ebumbeni.” Ngemuva kwaloko watsi kuJobe: “Akukadzingeki kutsi ungesabe, sandla sami ngeke sibe matima etikwakho.” (Jobe 33:6, 7) Kunekutsi engete umtfwalo kuJobe, ngelutsandvo Elihu wameluleka waphindze wamkhutsata.

Sicela wati kutsi natsi silungiselele lencwajana sinemcondvo lofanana newa-Elihu. Sicale salalela, sase sicabanga ngetimo kanye nalokushiwo ngulabanyenti labahlehlile kuJehova. (Taga 18:13) Ngemuva kwaloko, sihlole imiBhalo, sathantaza saphindze sahlolisisa tindzaba letiseBhayibhelini letiveta indlela Jehova lasita ngayo tinceku takhe esikhatsini lesendlulile natibhekene netimo letifanako. Ekugcineni sihlanganise leto tindzaba letiseBhayibhelini nalokwentekile esikhatsini salamuhla kuze sakhe lencwajana. Ngemoya lomuhle sikukhutsata kutsi uyihlolisise lencwajana. Sikutsandza kakhulu.

Sigungu Lesibusako saBoFakazi BaJehova