BONKHE bantfu bayakhatsateka​—ngisho nebantfu baNkulunkulu imbala. Umhlabeli wabhala watsi: “Inhlitiyo yami iphitsiteliswa ngimicabango.” (Tihlabelelo 94:19) Jesu naye washo kutsi ngemalanga ekugcina ‘tinkhatsato tekuphila’ betitawenta kube lukhuni kakhulu kukhonta Jehova. (Lukha 21:34) Kunjani kuwe? Utiva ucindzetelwe tinkinga tetimali yini, nobe tinkinga temndeni nobe tinkinga temphilo? Jehova angakusita njani kutsi ukhone kutibeketelela?

Sidzinga lusito kute silwisane nekukhatsateka. Umphostoli Pawula wabhala: “Sicindzeteleke ngato tonkhe tindlela. Sicakekile . . . ; sijikwa phansi.” Waphindze watsi ‘asikampintjeteleki ngendlela yekutsi asisakhoni nekunyakata, nome sesite nendlela yekuphuma futsi nanome sijikwa phansi kodvwa asicedvwa.’ Yini lesisita kutsi sikhone kubeketela? Sisitwa ‘ngemandla lamakhulu kakhulu kunalavamile’ lesiwatfola kuJehova Nkulunkulu Somandla.​—2 Khorinte 4:7-9.

Khumbula kutsi esikhatsini lesendlulile wawatfola njani ‘emandla lamakhulu kakhulu kunalavamile.’ Usayikhumbula yini indlela lenye yetinkhulumo letikhutsatako leyakwenta wabona ngayo lutsandvo lwaJehova lolucotfo? Kukholwa kwakho etetsembisweni taJehova akucinanga yini ngesikhatsi ufundzisa labanye ngelitsemba lekuphila ePharadisi? Nasisemihlanganweni yelibandla futsi senta umsebenti wekushumayela, sitfola emandla ekubeketelela tinkhatsato tekuphila futsi sitfola nekuthula kwengcondvo kute sikhonte Jehova sijabulile.

Kungenteka uva shengatsi kulindzeleke tintfo letinyenti kuwe ngasikhatsi sinye. Nasi sibonelo: Jehova utsi asifune uMbuso kucala futsi sichubeke senta imisebenti yebuKhristu. (Matewu 6:33; Lukha 13:24) Kodvwa kutsiwani nangabe kuphikiswa, inkinga yemphilo, nobe tinkinga temndeni kukucedza emandla? Nome, kutsiwani nangabe umsebenti lophila ngawo ucedza sikhatsi sakho nemandla akho longabe uwasebentisa ebandleni? Njengoba kukunyenti kangaka lokufanele ukwente​—kantsi sikhatsi lonaso sincane nemandla lonawo amancane kutsi ungakwenta konkhe—​loko kungakucindzetela kakhulu. Mhlawumbe sewuke watibuta nekutsi Jehova ulindzele lokungetulu kwaloko longakhona kukwenta yini.

Jehova uyaticondza timo tetfu. Akalindzeli kitsi lokungetulu kwaloko lesingakwenta. Uyati nekutsi kutsatsa sikhatsi lesidze ngatsi kutsi selulame ekucindzetelekeni kwetfu emoyeni kanye nasekuguleni.​—Tihlabelelo 103:13, 14.

Ase ucabange nje ngendlela Jehova lanakekela ngayo umphrofethi Elija. Wamtsetsisa yini Jehova lomphrofethi, amtjela kutsi abuyele esabelweni sakhe ngesikhatsi acindzetelekile futsi esaba atawuze abalekele ehlane? Cha. Jehova watfumela ingilosi kabili ku-Elija kutsi iyomvusa ngesineke futsi imnike  kudla. Ngemuva kwemalanga langu-40, Elija bekasolo acindzetelekile futsi esaba. Yini Jehova laphindze wayenta kuze amsite? Kwekucala, Jehova wakhombisa kutsi angamvikela. Kwesibili, Jehova wamdvudvuta ‘ngeliphimbo lelincane lelalikhulumela phansi.’ Kwekugcina, Jehova wamtjela kutsi bekunalabanye labatinkhulungwane letinyenti lebebamkhonta ngekwetsembeka. Ngekushesha, Elija waphindze waba ngumphrofethi lokhutsele. (1 Emakhosi 19:1-19) Ngusiphi sifundvo lesisitfolako kuloku? Sifundza kutsi ngesikhatsi Elija acindzetelekile, Jehova wamphatsa ngemusa nangeluvelo. Jehova solo akakashintji. Usikhatsalela ngendlela lefanako.

Nawucabanga ngaloko longakwentela Jehova, ungacabangi lokungetulu kwemandla akho. Ungacatsanisi lebewukwenta esikhatsini lesendlulile naloko longakwenta nyalo. Nasi sibonelo: Ingijimi leseyiyekele kugijima tinyanga nobe iminyaka angeke ivele iphindze ibuyele igijime ngendlela lebeyigijima ngayo. Kunaloko, icala ngekutibekela imigomo lemincane kute ikhone kuphindze ibe nemandla nekubeketela. EmaKhristu afanana netingijimi. Aticecesha anemigomo lecacile. (1 Khorinte 9:24-27) Nawe ungatibekela umgomo wekukhonta Nkulunkulu longakhona kusheshe uwufinyelele. Mhlawumbe ungatibekela umgomo wekuba khona kulomunye wemihlangano yelibandla. Cela Jehova akusite uwufinyelele loyo mgomo. Njengobe buhlobo bakho naye bucina, ‘utawunambitsa ubone kutsi Jehova muhle.’ (Tihlabelelo 34:8) Khumbula kutsi nome ngabe yini loyentako kute ukhombise lutsandvo lwakho ngaJehova, ngisho kungaba kuncane kangakanani kuligugu kuye.​—Lukha 21:1-4.

Jehova wamnika njani June emandla ekutsi abuyele kuye? Utsi: “Bengisolo ngithantaza kuJehova, ngimcela kutsi angisite. Makoti wakami wangitjela ngemhlangano wesigodzi lebewutawuba khona edolobheni lakitsi. Ngakhetsa kuya kulinye lilanga lalomhlangano. Kwangijabulisa kakhulu kuba nebantfu baJehova! Lowo mhlangano waba sikhutsato lebengisolo ngisidzinga. Nyalo sengiphindze ngikhonta Jehova ngenjabulo. Kuphila kwami sekuyangijabulisa. Sengiyati kutsi kute sidzingo sekutehlukanisa nebazalwane bami nekutsi ngiyaludzinga lusito lwabo. Ngiyajabula kutsi besisekhona sikhatsi sekuphindze ngibuye.”