INCENYE 4
Kudliwa Ngunembeza—“Ngihlambulule Esonweni Sami”
“Umsebenti wami lomusha watfutfukisa lizinga lekuphila kwemndeni wami kodvwa wangiholela etintfweni letinyenti lebetingakalungi. Ngacala kugubha emaholidi, ngaba nencenye emikhosini yetepolitiki futsi ngaya nasesontfweni. Ngaphola iminyaka lengu-40. Kuchubeka kwesikhatsi kwangenta ngacabanga kutsi ngeke Jehova asangitsetselela. Bekulukhuni ngisho nekutitsetselela, ngoba vele bengilati kahle liciniso ngembikwekutsi ngitsatse indlela lengasiyo.”—Martha.
KUDLIWA NGUNEMBEZA kungafananiswa nemtfwalo losindzako. INkhosi Davide yatsi: “Tono tami tingigabhile. Ngisesiswa ngumtfwalo wato losindzako.” (Tihlabelelo 38:4) Lamanye emaKhristu acindzetelwa kutisola lokukhulu, aze acabange kutsi Jehova angeke asawatsetselela.(2 Khorinte 2:7) Kukahle yini kucabanga ngaleyondlela? Kwenta tono letinkhulu kusho kutsi sewukhweshelene kakhulu yini naJehova kangangekutsi ngeke asaphindze akutsetselele? Cha akusinjalo!
“Wotani Manje Sitewubonisana”
Jehova akatilahli toni letiphendvukako. Ecinisweni utisondzeta kuye! Emfanekisweni wendvodzana yelulahleko, Jesu wafanisa Jehova nababe lonelutsandvo lobekanendvodzana leyahamba ekhaya yayophila imphilo yekonakala. Ngekuhamba kwesikhatsi lendvodzana yabona kuncono kutsi ibuyele ekhaya. “Uyise wayibona isesekhashane, wayihawukela, wagijima wefika wayigaca futsi wayanga.” (Lukha 15:11-20) Unaso yini sifiso sekubuyela kuJehova kodvwa umane nje utiva shengatsi ‘ukhashane kakhulu’ naye? Njengalobabe Jesu lakhuluma ngaye kulomfanekiso, naJehova uyakuhawukela. Unesifiso lesikhulu sekuphindze akwemukele.
Kepha kutsiwani nangabe ucabanga kutsi tono takho tinkhulu kakhulu noma tinyenti kakhulu kutsi Jehova angatitsetselela? Sicela ucabange nganasi simemo saJehova lesibhalwe ku-Isaya 1:18: “Simakadze utsi: ‘Wotani manje sitewubonisana. Nome tono tenu tibovu njengengati, titawuba mhlophe njengangcocwane.’” Ngisho netono letibonakala kungesilula kutikhohlwa, letibovu njengengati emphahleni lemhlophe, Jehova angatitsetselela.
Jehova akafuni kutsi uhlale udliwa ngunembeza. Ungayitfola njani-ke inkhululeko letfolakala ngekutsetselelwa nguNkulunkulu nekuba nanembeza lohlobile? Cabanga ngetinyatselo letimbili iNkhosi Davide leyatitsatsa. Kwekucala yatsi: “Ngiyawutivuma kuSimakadze tono tami.” (Tihlabelelo 32:5) Khumbula kutsi Jehova sewuvele ukumemile kutsi usondzele kuye ngemthandazo kute ‘nitewubonisana’. Semukele lesimemo saJehova. Vuma tono takho kuJehova bese uyamtjela indlela lotiva ngayo. Acabanga ngaloko lobekwenteke kuye, Davide bekangasho ngekutetsemba kutsi ‘Nkulunkulu amhlambulule esonweni sakhe. Umoya lowephukile nenhlitiyo ledzabukile Nkulunkulu ngeke akubukele phansi.’—Tihlabelelo 51:2, 17.
Kwesibili, Davide wemukela lusito loluvela esitfunyweni saNkulunkulu, lebekungumphrofethi Nathani. (2 Samuweli 12:13) Lamuhla, Jehova usilungiselele labadzala emabandleni labaceceshelwe kusita toni letiphendvukile kutsi tivuselele buhlobo bato naJehova. Nawucoca nalabadzala batawusebentisa imiBhalo kanye nemithantazo lesuka enhlitiyweni kuze batsintse inhlitiyo yakho, banciphise noma basuse kutisola lonako baphindze bavuselele buhlobo bakho naJehova.—Jakobe 5:14-16.
Jehova ufuna ujabule ngekuba nanembeza lokhululekile
“Ubusisiwe Umuntfu Lotsetselelwe Tiphambuko Takhe”
Kuyavunywa kutsi kungenteka ungase ukutfole kuyintfo lematima kakhulu kuvuma tono takho kuNkulunkulu Jehova uphindze uye kulabadzala. Davide waba sesimeni lesifanako. Kwamtsatsa sikhatsi solo ‘angativumi’ tono takhe. (Tihlabelelo 32:3) Nanobe kunjalo, ngemuva kwesikhatsi wakubona kuba lusito kwekuvuma tono takhe nekulungisa indlela yakhe yekuphila.
Injabulo nguyona nzuzo lenkhulu Davide layitfola ngekuvuma tono takhe. Wabhala: “Ubusisiwe umuntfu lotsetselelwe tiphambuko takhe, nalotono takhe tisitjekelwe.” (Tihlabelelo 32:1) Wase uyathantaza utsi: ‘Awu! Jehova, vula tindzebe temlomo wami, kuze ngivakalise ludvumo lwakho.’ (Tihlabelelo 51:15) Davide wakhutsateka kutsi atjele labanye ngaJehova ngobe bekangasadliwa ngunembeza futsi wajabula ngekutsetselelwa nguNkulunkulu.
Jehova ufuna ube nenjabulo yekuba nanembeza lokhululekile. Ngetulu kwaloko ufuna utjele labanye ngaye nangetinjongo takhe, ungakwenti nganembeza lobuhlungu kodvwa ngebucotfo nenjabulo lenkhulu. (Tihlabelelo 65:1-4) Khumbula simemo lesivela kuye sekutsi siphendvuke ‘khona tono tetfu titewusulwa, kuze sikhatsi sekuvuseleleka sifike sivela kuJehova.’—Imisebenti 3:19.
Nguloko lokwenteka kuMartha. Utsi: “Indzodzana yami beyichubeka ingitfumelela Sicongosekulindza ne-“Phaphama!” Kancane kancane buhlobo bami naJehova batfutfuka. Lengakutfola kulukhuni kakhulu nangibuyela kuJehova kwaba kumcela angitsetselele tonkhe tono lebengitentile. Ekugcineni ngathantaza kuNkulunkulu ngacela intsetselelo. Ngiyamangala nangicabanga kutsi kwaphela iminyaka lengu-40 ngembikwekutsi ngibuyele kuJehova. Kuphila kwami kubufakazi bekutsi ngisho noma sekuphele iminyaka leminyenti, umuntfu usengalitfola lelinye litfuba lekukhonta Jehova aphindze abe selutsandvweni lwakhe.”
Lokunye Longatsandza Kukuhlola
SICONGOSEKULINDZA —LESIFUNDVWAKO
Kutsetselela KwaJehova Kusho Kutsini Kuwe?
Indlela Jehova laphatsa ngayo toni endvulo isifundzisa lokunyenti ngesifiso sakhe sekutsetselela.
EMA-VIDEO
Indvodzana Yelulahleko Iyabuya
Lokubuhlungu kutsi bantfu labasha bangayengwa kutsi bashiye indlela yebuKhristu labakhuliswe ngayo. Tfola tingoti bantfu labasha labahlangabetana nato lamuhla.
