1, 2. Yini lekukhutsata kutsi utsandze Nkulunkulu Jehova?

UYAMTSANDZA yini Nkulunkulu? Nangabe sewuvele unikele kuphila kwakho kuNkulunkulu Jehova, utawuphendvula nga yebo lomkhulu—futsi ube ucinisile! Kuyimvelo ngatsi kutsi sitsandze Jehova. Sitsandza Nkulunkulu ngobe naye asitsandza. LiBhayibheli likubeka ngalendlela loku: “Tsine sitsandza, ngobe kwacala yena [Jehova] wasitsandza.” 1 Johane 4:19.

² NguJehova locale kusikhombisa lutsandvo. Usiphe likhaya lelihle lelingumhlaba. Uyatinakekela tidzingo tetfu tenyama. (Matewu 5:43-48) Lokubaluleke nakakhulu, kutsi unakekela tidzingo tetfu takamoya. Usipha neliVi lakhe liBhayibheli. Uphindze, asikhutsate kutsi sithandaze kuye, asetsembisa kutsi utawusilalela futsi asinike umoya longcwele kutsi usisite. (Tihlabelelo 65:2; Lukha 11:13) Ngetulu kwaloko, watfumela iNdvodzana yakhe leligugu kutsi itawusifela ibe nguMhlengi wetfu kute isikhulule esonweni nasekufeni. Ase ubuke nje kutsi lungakanani lutsandvo Jehova lasikhombise lona!—Fundza Johane 3:16; Roma 5:8.

3. (a) Yini ledzingekako kitsi kute sitigcine elutsandvweni lwaNkulunkulu? (b) Ngumuphi umbuto lobalulekile lokufanele siwucabangele, futsi singayitfola kuphi imphendvulo yawo?

³ Jehova ufuna sizuze elutsandvweni lwakhe kuze kube  phakadze. Sekukitsi-ke kutsi sitawuzuza yini nome cha. LiVi laNkulunkulu liyasikhutsata: “Tigcineni elutsandvweni lwaNkulunkulu ngesikhatsi nisalindzele . . . kutsi ngemusa wayo ininike kuphila lokuphakadze.” (Juda 21) Lamavi latsi “tigcineni” akhombisa kutsi kute sihlale elutsandvweni lwaNkulunkulu kudzingeka sente lokutsite. Kufanele sikhombise ngetento tetfu kutsi siyamtsandza. Umbuto lobalulekile lokufanele uphendvulwe ngunangu: ‘Ngingalukhombisa njani lutsandvo lwami ngaNkulunkulu?’ Imphendvulo yawo itfolakala emavini laphefumulelwe emphostoli Johane: “Ngobe kutsandza Nkulunkulu kugcina imiyalo yakhe. Imiyalo yaNkulunkulu ayimatima kitsi.” (1 Johane 5:3) Kufanele sikuhlolisise loko lokushiwo ngulamavi,  ngobe sifuna kukhombisa kutsi simtsandza kangakanani Nkulunkulu.

4, 5. (a) Chaza indlela lutsandvo lwakho ngaJehova lolwacala kukhula ngayo enhlitiyweni yakho.

⁴ Enkhulumeni yakhe lecashunwe lapha ngetulu, umphostoli Johane wahlanganisa nalamavi: “Kutsandza Nkulunkulu.” Ase sibone kutsi ukuchaza njani kutsandza Nkulunkulu. Kepha ngembi kwekuba sicabange ngalombuto, ake wetame kukhumbula sikhatsi lowacala ngaso kuva lutsandvo ngaJehova lukhula enhlitiyweni yakho.

⁵ Ase ukhumbule kancane sikhatsi lowacala ngaso kufundza emaciniso ngaJehova nangetinjongo takhe, futsi wacala nekuba nelukholo. Wakucondza kutsi nanobe watalelwa esonweni futsi ungamati Nkulunkulu, ngaKhristu, Jehova wavula indlela yekutsi uphindze ube ngumuntfu lophelele lokuyintfo leyalahlwa ngu-Adamu, futsi utfole nekuphila lokuphakadze. (Matewu 20:28; Roma 5:12, 18) Wacala kucondza indlela Jehova latidzela ngayo nakatfumela iNdvodzana yakhe emhlabeni kutsi itekufela. Inhlitiyo yakho yagcwala lutsandvo ngaloNkulunkulu lokhombisa kukutsandza kangaka.—Fundza 1 Johane 4:9, 10.

6. Lutsandvo lweliciniso lubonakaliswa njani, futsi lutsandvo lwakho ngaNkulunkulu lukubangela kutsi wenteni?

⁶ Lemiva lenjalo, yayikucala kwekuba nelutsandvo lweliciniso ngaJehova. Lutsandvo alusiwo nje umuva. Lutsandvo lweliciniso ngaNkulunkulu lusho lokungetulu kwekumane nje utsi “ngiyamtsandza Jehova.” Njengekukholwa, lutsandvo lweliciniso lubonakala ngetento. (Jakobe 2:26) Ngalokucondzile, lutsandvo lubonakala ngetento letijabulisa lona lotsandvwako. Kungaleso sizatfu kwatsi ngesikhatsi lutsandvo ngaJehova lucala kukhula enhlitiyweni yakho, wacala kufuna kwenta tintfo letijabulisa Babe  wakho wasezulwini. SewunguFakazi lobhajatisiwe yini nyalo? Nangabe kunjalo, lutsandvo lwakho lolujulile nekwetsembeka kwakho kuJehova, kuye kwakwenta kutsi utsatse lesincumo lesibaluleke kangaka. Utinikele kuJehova kutsi wente intsandvo yakhe, futsi loko ukukhombise ngekubhajatiswa. (Fundza Roma 14:7, 8.) Kute sikwati kufeza lesetsembiso sekutinikela kuJehova, kudzingeka sicaphele lamavi lalandzelako lashiwo ngumphostoli Johane.

7. Ngumiphi leminye yemiyalo yaNkulunkulu, futsi kuyigcina kuhlanganisani?

⁷ Johane uchaza loko lokushiwo kutsandza Nkulunkulu, utsi: “Kugcina imiyalo yakhe.” Iyini imiyalo yaNkulunkulu? Jehova usiniketa imiyalo leminyenti ngeliVi lakhe, liBhayibheli. Sibonelo saloko kutsi uyakulahla kudzakwa, bundlundlulu, kukhonta tithico, kweba, kanye nekucala emanga. (1 Khorinte 5:11; 6:18; 10:14; Efesu 4:28; Kholose 3:9) Kulalela imiyalo yaNkulunkulu kuhlanganisa nekuphila ngekuvumelana netimiso tekutiphatsa leticondzile letiseBhayibhelini.

8, 9. Singakwati njani lokujabulisa Jehova ngisho nalapho kute umtsetfo weliBhayibheli locondzile? Niketa sibonelo.

⁸ Kepha kute sijabulise Jehova, kudzingeka sente lokungetulu kwekumane silalele lemiyalo yakhe lecondzile. Jehova akasigcishi ngemitsetfo leminyenti lelawula kuphila kwetfu kwamalanga onkhe. Ngenca yaloko, lilanga ngalinye, singahlangabetana netimo lokungakhulunywa ngato ngalokucondzile eBhayibhelini. Etimeni letinjalo, singati njani kutsi ngukuphi lokutawumjabulisa Jehova? LiBhayibheli lisibonisa ngalokucacile indlela Nkulunkulu lacabanga ngayo. Njengobe sitadisha liBhayibheli, sitawufundza ngetintfo Jehova latitsandzako nalatitondzako. (Fundza Tihlabelelo 97:10; Taga 6:16-19) Sitawufundza ngetimo tengcondvo nangetindlela tekutiphatsa latemukelako. Lapho sichubeka  sifundza ngebuntfu baJehova netindlela takhe, ngulapho siyovumela khona indlela yakhe yekucabanga icondziso tincumo tetfu, futsi itsintse nendlela lesenta ngayo tintfo. Loku kuyokwenta kutsi nalapho ungekho umtsetfo weliBhayibheli locondzile, sikhetse kwenta “loko lokuyintsandvo yeNkhosi.”—Efesu 5:17.

⁹ Sibonelo saloku kutsi liBhayibheli lite umtsetfo locondzile lositjela kutsi singatibukeli tinhlelo tethelevishini letiveta budlova nobe kutiphatsa kabi ngekwelicasi. Kepha vele siyawudzinga yini umtsetfo locondzile wekutsi singatibukeli tinhlelo letinjalo? Siyati kutsi Jehova utibheka njani tintfo letinjalo. LiVi lakhe lisitjela ngalokucacile: “[Jehova] uyamtondza lomubi nalotsandza budlova.” (Tihlabelelo 11:5) Liphindze litsi: “Nkulunkulu uyawubehlulela bonkhe labagwadlako nalabaphingako.” (Hebheru 13:4) Ngekucabanga ngalamavi laphefumulelwe, singakutfola loko lokuyintsandvo yaJehova. Ngako asitijabulisi ngekubukela titfombe letiveta tintfo letitondvwa nguNkulunkulu. Siyati nekutsi Jehova uyajabula nasiyecwaya imikhuba yekutiphatsa lengcolile, live leletama kuyiveta njengekutijabulisa lokungalimati. *

10, 11. Kungani sikhetsa kuphila ngendlela yekulalela Jehova, futsi ufuna simlalele ngayiphi indlela?

¹⁰ Ngusiphi sizatfu lesiyinhloko sekugcina imiyalo yaNkulunkulu? Kungani sifuna kutsi onkhe malanga siphile ngekuvumelana nendlela yaNkulunkulu yekucabanga? Asiyikhetsi leyondlela ngobe nje sifuna kubalekela sijeziso nobe secwaye kulimala lokungahle kufikele labo labangayinaki intsandvo yaNkulunkulu. (Galathiya 6:7) Kunaloko, sitsatsa kulalela Jehova njengelitfuba leliligugu lekutsi simkhombise indlela lesimtsandza ngayo.  Njengobe nemntfwana akutsandza kwenta babe wakhe ajabule, natsi sifuna kwenta Jehova ajabule. (Tihlabelelo 5:12) UnguBabe wetfu, futsi siyamtsandza. Kute lokusiletsela injabulo nekwenetiseka lokwendlula kwati kutsi siphila ngendlela ‘leyemukelekako kuJehova.’—Taga 12:2.

¹¹ Ngako kulalela kwetfu, asikwenti ngekucindzetelwa; nobe silalele etimeni letitsite letikhetsekile. * Asitikhetseli kutsi ngumuphi umyalo lesitawulalela, nekutsi ngumuphi lesingeke siwunake, njengalapho kulalela kutawuzuzisa tsine nobe lapho kungasilukhuni kwenta kanjalo. Ngalokwehlukile kuloko, tsine ‘silalela ngalokusuka enhlitiyweni.’ (Roma 6:17) Sitiva ngendlela umhlabeleli lativa ngayo. Wabhala: “Ngiyatfokota ngemiyalo yakho, ngobe ngiyayitsandza.” (Tihlabelelo 119:47) Yebo, natsi siyakutsandza kumlalela Jehova. Siyacaphela nekutsi uyakufanelekela kulalelwa, futsi ufuna simlalele ngalokuphelele, hhayi ngobe sitawuzuza lokutsite. (Dutheronomi 12:32) Sifuna Jehova asho emavi lafanana nalawo liVi lakhe leliwashoko ngaNowa. LiBhayibheli nalikhuluma ngaNowa lowetsembekile, lowabonisa lutsandvo lwakhe ngaNkulunkulu ngekumlalela emakhulu lamanyenti eminyaka, litsi: “Nowa wakwenta konkhe layalwa nguNkulunkulu kutsi akwente.”—Genesisi 6:22.

12. Kunini lapho kulalela kwetfu kumjabulisa khona Jehova?

¹² Utiva njani Jehova ngekufuna kwetfu kumlalela ngekutitsandzela? LiVi lakhe litsi simenta ‘ajabule.’ (Taga 27:11) Kulalela kwetfu kuyenta ijabule yini vele iNkhosi lenguMbusi wendzawo yonkhe? Yebo, ijabula sibili, futsi inetizatfu letivakalako tekujabula! Jehova wasidala saba nenkhululeko yekutikhetsela. Lokusho kutsi sikhululekile  kutikhetsela; singakhetsa kumlalela Nkulunkulu, nobe sikhetse kungamlaleli. (Dutheronomi 30:15, 16, 19, 20) Nangabe sitikhetsela kumlalela Jehova futsi umsuka waloko kuyinhlitiyo lephuphuma lutsandvo ngaye, simletsela injabulo lenkhulu Babe wetfu wasezulwini. (Taga 11:20) Ngekwenta kanjalo, siphindze sitikhetsele indlela lencono yekuphila.

13, 14. Kungani kungatsiwa ‘imiyalo yaNkulunkulu ayimatima,’ futsi loku kungabekiswa njani?

¹³ Umphostoli Johane usitjela intfo lesinika dvolocina ngalokuphatselene netimfuneko taJehova: ‘Imiyalo yakhe ayimatima kitsi.’ Ligama lesiGriki lelihunyushwe ngekutsi ‘matima’ ku-1 Johane 5:3, lisho ‘kusindza.’ * Lelinye lihumusho leliBhayibheli lifundzeka ngalendlela: “Imiyalo yakhe ayisisindzi.” (New English Translation) Timfuneko taJehova atisito letingacabangeli nobe leticindzetelako. Imiyalo yakhe kulula ngisho nangebantfu labangakapheleli kutsi bayilalele.

¹⁴ Singakubekisa ngalendlela: Umngani wakho lomkhulu ukucela kutsi umsite njengobe atfutsela kulenye indzawo. Kunencumbi yemabhokisi lokufanele atsatfwe. Lamanye awo amelula kutsi angatsatfwa ngumuntfu munye ngaphandle kwekusiphalata, kantsi lamanye ayesindza futsi adzinga bantfu lababili kute bawacukule. Umngani wakho ukukhetsela emabhokisi lafuna uwatsatse. Angakucela yini kutsi ucukule emabhokisi latiko kutsi atakwesindza? Cha! Angeke afune utilimate ngekwetama kuwacukula uwedvwana. Ngalokufananako-ke, naNkulunkulu wetfu lositsandzako angeke atsi sigcine imiyalo lematima.  (Dutheronomi 30:11-14) Angeke alokotse atsi asetfwale umtfwalo lowesindza kangako. Jehova uyakwati kulinganiselwa kwetfu, ngobe “uyakwati kubunjwa kwetfu, akhumbula kutsi silutfuli nje.”—Tihlabelelo 103:14.

15. Kungani singaciniseka kutsi imiyalo yaJehova yentelwe kuzuzisa tsine?

¹⁵ Imiyalo yaJehova empeleni ayimatima; yentelwe kusisita sibone kutsi ngukuphi lokuncono kakhulu kitsi. (Fundza Isaya 48:17.) Kungako Mosi atjela ema-Israyeli asendvulo kutsi: “Simakadze wasiyala kutsi sihloniphe tonkhe letimiso, nekutsi sesabe Simakadze Nkulunkulu wetfu, kuze sihlale sichuma njalo, njengobe kunjalo nalamuhla.” (Dutheronomi 6:24) Natsi singaciniseka kutsi ngekusinika imiyalo yakhe, Jehova abesicabangela lokuhle kodvwa—inhlalakahle yetfu yaphakadze. Empeleni bekungabuye kube yini lenye? Jehova unguNkulunkulu wekuhlakanipha lokungapheli. (Roma 11:33) Ngako-ke, uyati kutsi ngukuphi lokuncono kitsi. Jehova usibonelo lesihle selutsandvo. (1 Johane 4:8) Lutsandvo lolusimuntfutiso sakhe, lutfonya konkhe lakwentako nalakushoko. Lusisekelo sayo yonkhe imiyalo layiniketa tinceku takhe.

16. Nobe nje lelive lelonakele lisiyenga futsi sibantfu labangakapheleli, kungani singayilandzela indlela yekulalela?

¹⁶ Loku akusho kutsi kulalela Nkulunkulu kuyintfo lemelula. Kufanele silwe nekuyengwa ngulelive ‘lelingephansi kwemandla alomubi.’ (1 Johane 5:19) Kufanele silwisane nenyama yetfu lengakapheleli, lesiyengela ekutseni sephule imitsetfo yaNkulunkulu. (Roma 7:21-25) Kepha lutsandvo lwetfu ngaNkulunkulu lungancoba. Jehova uyababusisa labo lababonisa ngekumlalela kutsi bayamtsandza. Ubapha umoya wakhe longcwele ‘labo labamlalelako.’ (Imisebenti 5:32) Lowo moya utsela titselo letinhle kitsi—timfanelo letiligugu letingasisita kutsi siphishanekele kumlalela.—Galathiya 5:22, 23.

17, 18. (a) Yini lesitawuyihlola kulencwadzi, futsi yini lokufanele siyikhumbule njengobe senta kanjalo? (b) Sitawucoca ngani esehlukweni lesilandzelako?

 ¹⁷ Kulencwadzi sitawuhlola timiso taJehova tekutiphatsa kanye naletinye tindlela lasibonisa ngato intsandvo yakhe. Njengobe senta kanjalo, kufanele sikhumbule tintfo letinyentana letibalulekile. Asikhumbule kutsi Jehova akasiphoceleli kutsi silalele imitsetfo kanye netimiso takhe; ufuna kulalela lokusuka enhlitiyweni. Asingakhohlwa kutsi Jehova usicela kutsi siphile ngendlela letawusiletsela tibusiso letinyenti nyalo, futsi isinikete kuphila lokuphakadze esikhatsini lesitako. Kulalela kwetfu ngenhlitiyo yonkhe asikutsatse njengelitfuba lekukhombisa Jehova kutsi simtsandza kangakanani.

¹⁸ Kute sikhone kwehlukanisa lokuhle nalokubi, Jehova usinikete nembeza. Nembeza udzinga kuceceshwa kute ube sicondziso lesetsembekile, njengobe sehluko lesilandzelako sitawube sicoca ngaloko.