Kushayela ifulegi indesheni. BoFakazi BaJehova bakholelwa kutsi kukhotsamela ifulegi nobe kuyishayela indesheni, lokuvame kuhambisana nekuhlabela ingoma yesive, kusento senkholo lesikhombisa kutsi umuntfu uyakholelwa kutsi uMbuso nobe baholi bawo ngibo labatawuletsa insindziso hhayi Nkulunkulu. (Isaya 43:11; 1 Khorinte 10:14; 1 Johane 5:21) Lomunye umholi lobekanjalo yiNkhosi Nebukhadnezari waseBhabhulona lasendvulo. Kute ikhombise bantfu kutsi yona yayiyinkhulu kangakanani nekutsi yayishisekela kangakanani inkholo, leNkhosi lenemandla yamisa sitfombe lesikhulu yaphocelela bantfu kutsi basikhotsamele ngesikhatsi umculo lowawufanana nengoma yesive udlala. Nobe kunjalo, emaHebheru lamatsatfu—lokuboShadraki, Mishaki, kanye na-Abednego—awazange avume kusikhotsamela lesitfombe ngisho nalapho kutsiwa abetawujeziswa kabuhlungu futsi abulawe.—Danyela, sehluko 3.

Satimlandvo Carlton Hayes sabhala kutsi esikhatsini setfu “luphawu lwesive loluyinhloko lolukhombisa kuba nelukholo futsi lokuyintfo lekhontwa kakhulu, yifulegi.” “Emadvodza etfula tigcoko lapho kwendlula ifulegi; timbongi tona tibhala tinkondlo kantsi bantfwana bona bahlabele tingoma.” Waphidze wengeta kutsi buve “bunemalanga langcwele,” njengelinga la-July 4 eveni lase United States, “naboSanta nemachawe,” “emathempeli,” nobe tindzawo letibhekwa njengetekukhontela. Emcimbini lotsite lowawuseBrazil, umcondzisi wemphi wavuma: “Ifulegi iyahlonishwa  futsi iyakhulekelwa . . . Njengobe nje neLive Labokhokho betfu likhontwa.” I-The Encyclopedia Americana yatsi: “Ifulegi ifanana nesiphambano, nayo ingcwele.”

Muva nje, yona le-encyclopedia lesikhulume ngayo ngetulu yabonisa kutsi “ingoma yesive ibonisa lutsandvo ngalelo live, futsi esikhatsini lesinyenti ihlanganisa kwenta umthandazo wekutsi Nkulunkulu acondzise futsi avikele babusi balo.” Ngaleso sizatfu, tinceku taJehova tiyalinganisela etindzabeni letimayelana nebuve, letihlanganisa kushayela ifulegi indesheni kanye nekuhlabela ingoma yesive. Empeleni, lapho lencwadzi i-The American Character ikhuluma ngendzaba yekutsi kungani bantfwana baboFakazi BaJehova e-United States bangafuni kushayela ifulegi indesheni nobe kwenta sifungo sekutinikela, yatsi: “Kutsi lemikhuba yamalanga onkhe imikhuba yenkholo kuye kwacinisekiswa yiNkantolo lePhakeme eluchungechungeni lwemacala.”

Nanobe bangahlanganyeli emikhosini labayitsatsa njengemikhosi lemelene nemibhalo, bantfu baJehova bayalihlonipha lilungelo lebantfu lekwenta loko labakufunako. Baphindze bawahloniphe nemafulegi emave njengetimphawu tawo, futsi bayacaphela kutsi imibuso isetikhundleni tayo ‘njengetiphatsimandla tembuso’ futsi ikhona ‘njengetisebenti taNkulunkulu.’ (Roma 13:1-4) Kungaleso sizatfu boFakazi BaJehova bakhutsatwa kutsi bathandazele “emakhosi nabo bonkhe labasetikhundleni letiphakeme.” Sisusa setfu sikutsi “sitewuphila imphilo yekuthula, ngekwesaba Nkulunkulu nangako konkhe kuhlonipheka.”—1 Thimothi 2:2.

Kuvota elukhetfweni lwetepolitiki. Kuliciniso kutsi emaKhristu eliciniso ayalihlonipha lilungelo lalabanye lekuvota. Akamelani nelukhetfo, futsi ayabambisana netiphatsimandla letikhetsiwe. Nanobe kunjalo, akahlanganyeli etindzabeni tembangalive. (Matewu 22:21; 1 Phetro 3:16) Yini umKhristu langayenta nangabe ahlala endzaweni lapho aphocelelwe khona kutsi avote, nobe lapho labo labangayi kuyovota bashushiswa kabuhlungu khona? Akhumbula kutsi Shedraki, Mishaki, na-Abednigo baya ematsafeni aseDura, umKhristu losesimeni lesifananako angakhetsa kuya endzaweni yekuvota nangabe nembeza wakhe umvumela kwenta kanjalo. Nobe kunjalo, utawucaphela kutsi angahlanganyeli  ekuvoteni. Kufanele acabangele nati timiso letisitfupha letilandzelako:

1. Balandzeli baJesu ‘abasibo belive.’—Johane 15:19.

2. EmaKhristu amelela Khristu neMbuso wakhe.—Johane 18:36; 2 Khorinte 5:20.

3. Libandla lebuKhristu likholelwa tintfo letifananako, futsi nemalunga alo ahlanganiswa lutsandvo lolunjengelwaKhristu.—1 Khorinte 1:10; Kholose 3:14.

4. Labo labakhetsa umuntfu lotsite, bahlanganyela naye kuto tonkhe tintfo latentako.—Caphela simiso lesisekela lamavi, lasencwadzini ya-1 Samuweli 8:5, 10-18; 1 Thimothi 5:22.

5. Jehova wabona sifiso sema-Israyeli sekuba nenkhosi njengeluphawu lwekutsi abesamlahlile.—1 Samuweli 8:7.

6. EmaKhristu kufanele abenenkhululeko yekukhuluma lapho akhuluma nebantfu betepolitiki ngahulumende weMbuso waNkulunkulu.—Matewu 24:14; 28:19, 20; Hebheru 10:35.

Kusebentela sive. Kulamanye emave, uMbuso uye utsi bantfu labangafuni kungena emasotjeni, kufanele basebentele sive sikhatsi lesitsite. Lapho kudzingeka sente sincumo lesinjalo, kufanele sithandaze ngalendzaba, mhlawumbe sikhulume nangayo kumKhristu lovutsiwe, bese senta sincumo lesisekelwa bonembeza betfu.—Taga 2:1-5; Filiphi 4:5.

LiVi laNkulunkulu lisitjela kutsi ‘sitfobele babusi netiphatsimandla, silungele kwenta yonkhe imisebenti lemihle, . . . Futsi sibeketele.’ (Thithusi 3:1, 2) Sinaloko engcondvweni, singatibuta lemibuto lelandzelako: ‘Nangabe ngiwemukela lomsebenti, loko kutawusho kutsi ngitsatsa luhlangotsi yini, nobe ngihlanganyele enkholweni yemanga?’ (Mikha 4:3, 5; 2 Khorinte 6:16, 17) ‘Kwenta lomsebenti kutawukwenta kutsi kube lukhuni yini ngami kuyifeza imitfwalo yami yebuKhristu nobe kutawungenta ngingayifezi kwasanhlobo?’ (Matewu 28:19, 20; Efesu 6:4; Hebheru 10:24, 25) ‘Ngakulokunye, kuwemukela lomsebenti kutawungivumela yini kutsi ngandzise inkonzo yami, ngite ngihlanganyele ngalokugcwele emsebentini wekushumayela?’—Hebheru 6:11, 12.

Nangabe nembeza wemKhristu amvumela kutsi asebentele sive  kunekutsi aye ejele, lamanye emaKhristu kufanele asihloniphe sincumo sakhe. (Roma 14:10) Kepha nangabe anemuva wekutsi angeke akwati kuwenta lomsebenti, labanye kufanele basihloniphe sincumo sakhe.—1 Khorinte 10:29; 2 Khorinte 1:24.