1. Yini Jesu layigcizelela ngebusuku bakhe bekugcina asemhlabeni njengemuntfu?

NGEBUSUKU bekugcina asemhlabeni njengemuntfu, Jesu waveta kukhatsateka kwakhe ngelikusasa lebalandzeli bakhe. Waze wathandaza kuBabe wakhe ngalendzaba, watsi: “Angiceli kutsi ubasuse eveni, kodvwa ngicela kutsi ubalondvolote bangatfunjwa nguLomubi. Njengobe nami ngingesiye walelive, nabo abasibo balelive.” (Johane 17:15, 16) Kulesicelo lesitsintsa inhlitiyo, Jesu waveta lutsandvo lwakhe lolujulile ngebalandzeli bakhe nekubaluleka kwemavi labewakhulume ngaphambilini, latsi: “Anisibo belive.” (Johane 15:19) Kuyacaca kutsi kwakuyintfo lebalulekile kuJesu kutsi balandzeli bakhe batigcine behlukile eveni.

2. Liyini ‘live’ Jesu lakhuluma ngalo?

² ‘Live’ Jesu lakhuluma ngalo lisho sintfu lesehlukanisiwe naNkulunkulu, lesibuswa nguSathane, futsi lesitigcili temoya wakhe webugovu newekutigabisa. (Johane 14:30; Efesu 2:2; 1 Johane 5:19) Kuliciniso vele kutsi “kutsandzana [nalelo] live kubutsa kuNkulunkulu.” (Jakobe 4:4) Kungenteka njani kutsi labo labafuna kutigcina elutsandvweni lwaNkulunkulu bahlale eveni kepha batigcine behlukile kulo? Sitawucabangela tindlela letisihlanu lesingakwenta ngato loku: Ngekuhlala njalo sicotfo eMbusweni waNkulunkulu loholwa nguKhristu futsi singabi nencenye etindzabeni tembusave, ngekumelana nemoya welive, ngekuba nesizotsa endleleni lesigcoka futsi sitilungise ngayo, ngekugcina liso letfu lilula, nangekutsi sihlome tikhali tetfu temphi.

3. (a) Jesu abetibheka njani tembusave tesikhatsi sakhe? (b) Kungashiwo njani kutsi balandzeli baJesu labagcotjiwe bangemancusa? (Hlanganisa nembhalo longentasi.)

³ Kunekuba abenencenye etindzabeni tembusave tesikhatsi sakhe, Jesu wanaka umsebenti wekushumayela ngeMbuso waNkulunkulu. Lona kwakunguhulumende wasezulwini wesikhatsi lesitako, Jesu labetawuba yiNkhosi yawo. (Danyela 7:13, 14; Lukha 4:43; 17:20, 21) Kungako lapho eme embikweMbusi waseRoma Phontiyusi Philatu, atsi: “Umbuso wami awusiwo wakulelive.” (Johane 18:36) Balandzeli bakhe labetsembekile balingisa sibonelo sakhe, ngekwetsembeka kuye naseMbusweni wakhe, kanye nasekumemeteleni ngalowoMbuso eveni. (Matewu 24:14) Umphostoli Pawula wabhala: ‘Singemancusa aKhristu . . . Sinincenga egameni laKhristu sitsi: “Buyisanani naNkulunkulu”’ *—2 Khorinte 5:20.

4. EmaKhristu eliciniso akubonise njani kwetsembeka eMbusweni waNkulunkulu? (Fundza libhokisi lelinesihloko lesitsi “ EmaKhristu Ekucala Akazange Abe Nencenye Eveni.”)

⁴ Ngenca yekutsi emancusa emave amelele emave lasuka kuwo, awahlanganyeli futsi awabi nencenye etindzabeni talawo mave lasuke asebentela kuwo. Nobe kunjalo, emancusa ayabamelela bohulumende bemave lasuka kuwo. Kuyafanana nangebalandzeli baKhristu labagcotjiwe, labo ‘likubo lisezulwini.’ (Filiphi 3:20) Ngenca yekushiseka ekushumayeleni ngeMbuso, sebasite tigidzi ‘taletinye timvu’ taKhristu kutsi nato ‘tite titewubuyisana naNkulunkulu.’ (Johane 10:16; Matewu 25:31-40) Leletinye timvu tisebenta njengetitfunywa taKhristu, tisekela banakaboJesu labagcotjiwe. Njengemhlambi munye, bonkhe bamelela uMbuso waMesiya,  futsi womabili lamacembu atigcina ete incenye etindzabeni tembusave.—Fundza Isaya 2:2-4.

5. Lehluke njani libandla lebuKhristu nalicatsaniswa nema-Israyeli asendvulo, futsi lomehluko ubonakala njani?

⁵ Kwetsembeka kuKhristu akusiso sizatfu lekukuphela  kwaso lesenta emaKhristu angabi nencenye etindzabeni telive. Ngekungafanani nema-Israyeli asendvulo, Nkulunkulu labewanikete indzawo letsite yekuhlala, tsine siyincenye yebuzalwane bemhlaba wonkhe. (Matewu 28:19; 1 Phetro 2:9) Ngako-ke, nangabe besingasekela emacembu etembangalive, inkhululeko yetfu yekukhuluma ngesigijimi seMbuso kanye nebunye betfu bebuKhristu bebungaphatamiseka. (1 Khorinte 1:10) Ngetulu kwaloko, lapho sekuvela imphi, sitawulwa nebazalwane betfu, labo lesiyalwa kutsi sibatsandze. (Johane 13:34, 35; 1 Johane 3:10-12) Ngako-ke, ngetizatfu letinhle, Jesu watjela bafundzi bakhe kutsi bangayiphatsi inkemba. Wabatjela nekutsi batsandze titsa tabo.—Matewu 5:44; 26:52; fundza libhokisi lelitsi: “ Ngite Yini Incenye Etindzabeni Telive?”

6. Kutinikela kwakho kuNkulunkulu kubutsintsa njani buhlobo bakho naKhesari?

⁶ NjengemaKhristu eliciniso, sinikele kuphila kwetfu kuNkulunkulu hhayi kumuntfu, tinhlangano tebantfu, nobe esiveni lesitsite. Incwadzi ya-1 Khorinte 6:19, 20 itsi: “Anisibo benu . . . Natsengwa ngelinani lelikhulu.” Lapho baniketa “Khesari” lokukwakhe, kungaba ludvumo, umtselo, nobe kutitfoba lokuvunyelwa nguNkulunkulu, balandzeli baJesu baphindze banikete “naNkulunkulu kwaNkulunkulu.” (Makho 12:17; Roma 13:1-7) Loku kuhlanganisa kukhulekela kwabo, lutsandvo lwabo lwemphefumulo wonkhe, kanye nekulalela kwabo ngekwetsembeka. Nangabe kudzingeka, batimisele kufa ngenca yaNkulunkulu.—Lukha 4:8; 10:27; fundza Imisebenti 5:29; Roma 14:8.

7, 8. Uyini “umoya welive,” futsi usebenta njani kubantfu?

⁷ Lenye yetindlela emaKhristu latehlukanisa ngayo eveni, kumelana nemoya walo lomubi. Pawula wabhala watsi: ‘Tsine asikanikwa umoya . . . welive; kepha sinikwe umoya lovela kuNkulunkulu.’ (1 Khorinte 2:12) Encwadzini  leya ebandleni lase-Efesu watsi: “Lebenikadze nihamba kuto ngekwendlela yalomhlaba, ngekwembusi wemandla emkhatsi, umoya losasebenta kubantfu labangalaleli Nkulunkulu.”—Efesu 2:2, 3.

⁸ “Umoya” walelive, ungemandla langabonakali, lasiyengela ekutseni singamlaleli Nkulunkulu, lakhutsata ‘inkhanuko yenyama, nenkhanuko yemehlo.’ (1 Johane 2:16; 1 Thimothi 6:9, 10) Lomoya usebentisa ‘ligunya’ lawo ngekukhanga inyama lenesono, ngekungabonakali melula, ngekuphikelela, futsi njengemoya lovamile usakateke kuyo yonkhe indzawo. Ngetulu kwaloko, ‘usebenta’ kumuntfu ngekuchubeka umfunta ngetento letingamjabulisi Nkulunkulu letinjengebugovu, kutigabisa, kufisa inzuzo lembi, kanye nangemoya wekutibusa newekuvukela. * Kuyacaca kutsi lomoya walelive uchubekela embili nekusakata imikhuba yaDeveli kute igcwale etinhlitiyweni tebantfu.—Johane 8:44; Imisebenti 13:10; 1 Johane 3:8, 10.

9. Umoya welive ungakheka ngayiphi indlela etingcondvweni nasetinhlitiyweni tetfu?

⁹ Umoya welive ungakheka yini engcondvweni nasenhlitiyweni yakho? Yebo ungakheka! Kepha loko kungenteka kuphela nangabe wena sewuyekele kunaka. (Fundza Taga 4:23.) Kuyenga kwawo kucala kancane kancane, mhlawumbe ngebangani lababonakala shengatsi balungile, kantsi abamtsandzi Jehova. (Taga 13:20; 1 Khorinte 15:33) Ungawutfola lomoya lomubi nangekufundza tincwadzi letingafaneleki kumaKhristu, kubukela titfombe letingcolile kanye nekufundza tindzaba tetihlubuki ku-Internet, kutijabulisa lokulimatako, kanye nemidlalo yemincintiswane. Kuliciniso kutsi singawutfola lomoya, nakunobe ngabe ngubani, kunobe ngabe yini leyendlulisela kucabanga kwaSathane nekwelive lakhe.

10. Singamelana njani nemoya welive?

 ¹⁰ Singamelana njani nemoya walelive loyingoti futsi sitigcine elutsandvweni lwaNkulunkulu? Ngekuwasebentisa ngalokunenzuzo emalungiselelo aJehova akamoya, kanye nangekuthandaza njalo. Jehova mkhulu kakhulu kunaDeveli nobe lelive lakhe lelibi lalicondzisako. (1 Johane 4:4) Kubalulekile-ke ngatsi kutsi sihlale sisondzelene naJehova ngemthandazo.

11. Umoya welive uyitsintse njani indlela bantfu labembatsa ngayo?

¹¹ Luphawu lolubonakala melula lwekutsi umuntfu unawo yini umoya welive nobe cha, yindlela yakhe yekwembatsa, kutilungisa, kanye nekuhlanteka kwakhe. Emaveni lamanyenti, indlela yekugcoka iya ngekuya iba yimbi, kangangekutsi lomunye umphatsi weluhlelo lwethelevishini watsi madvutane nje tingwandla titawugcine setite timphahla tekwembatsa, ngobe wonkhe umuntfu sewembatsa njengato. Lomunye umbiko lovela ephephandzabeni watsi: Ngisho nemantfombatane lamancane asagcoka ngalendlela, alandzela titayela ‘tekuveta umtimba.’ Lesinye sitayela lesigcwele, kugcoka timphahla letinkhulu nekugcoka ngebudlabha, lokungulenye yetintfo letiveta kuvukela, kanye nekubate kwesizotsa nekutitsandza.

12, 13. Ngutiphi timiso lekufanele tilawule indlela yetfu yekugcoka neyekutilungisa?

¹² Njengetinceku taJehova sifuna kubukeka kahle ngaso sonkhe sikhatsi, lokusho kutsi kufanele sembatse timphahla letinesizotsa, letihlobile, naletingabakhubi labanye, futsi letivumelana nesimo. Ngaso sonkhe sikhatsi, kubukeka kwetfu kufanele kubonise ‘kuhlonipheka [nekuhluteka kwengcondvo, NW],’ lekutsi nakuhambisana “netento letinhle” kufanele bonkhe “labatsi besaba Nkulunkulu,” lokungaba besilisa nobe besifazane. Inhloso yetfu akusiko kubukwa, kepha ‘kutigcina elutsandvweni lwaNkulunkulu.’ (1 Thimothi 2:9, 10; Juda 21) Sifuna kutsi buhle betfu kube kuhloba “kwemuntfu longekhatsi . . . , lokuligugu lelimcoka emehlweni aNkulunkulu.”—1 Phetro 3:3, 4.

¹³ Khumbula futsi nekutsi titayela tetfu tekwembatsa netekutilungisa tingayitsintsa indlela bantfu labakubheka ngayo kukhonta kweliciniso. Ligama lesiGriki lelihunyushwe ngekutsi ‘hlonipheka,’ lapho lisetjentiswa endzabeni yekutiphatsa, liveta umcondvo wekuhlonipha imibono yalabanye nendlela  labativa ngayo. Ngako-ke, umgomo wetfu kufanele kube kucabangela bonembeza balabanye. Ngetulu kwako konkhe, sifuna kuletsa ludvumo kuJehova nakubantfu bakhe, futsi sifuna kutiveta sitikhonti takhe ngato tonkhe tikhatsi, ‘konkhe sikwentele ludvumo lwaNkulunkulu.’—1 Khorinte 4:9; 10:31; 2 Khorinte 6:3, 4; 7:1.

14. Endzabeni yekubukeka kanye nenhlaneko yetfu, ngumiphi imibuto lekufanele sitibute yona?

¹⁴ Kugcoka, kutilungisa, kanye nekuhloba kwetfu kubaluleke nakakhulu lapho siya emsebentini wekushumayela, nobe lapho sisemihlanganweni yebuKhristu. Tibute: ‘Indlela lengibukeka ngayo kanye nenhlanteko yami, ingindvonsela emehlo ebantfu ngalokungenasidzingo yini? Ayibabangeli yini emahloni labanye bantfu? Ngitsatsa emalungelo ami njengalabaluleke kakhulu yini kulendzaba, kwendlula kubaluleka kwekufanelekela kwenta imisebenti letsite ebandleni?’—Tihlabelelo 68:6; Filiphi 4:5; 1 Phetro 5:6.

15. Kungani liVi laNkulunkulu lingabeki luhla lwemitsetfo yekwembatsa, yekutilungisa, kanye neyekuhlanteka?

¹⁵ LiBhayibheli aliwabekeli emaKhristu luhla lwemitsetfo yekwembatsa, kutilungisa kanye neyenhlanteko. Jehova akafisi nakancane kusemuka inkhululeko yekutikhetsela, nobe yekusebentisa emandla etfu ekucabanga. Kunaloko, ufuna kutsi sibe bantfu labavutsiwe, labasebentisa timiso  teliBhayibheli futsi ‘labanemicondvo lehlutekile, leseyikwati kwehlukanisa lokuhle nalokubi.’ (Hebheru 5:14) Ngetulu kwaloko, ufuna kutsi sibuswe lutsandvo—lokulutsandvo ngaNkulunkulu nangabomakhelwane betfu. (Fundza Makho 12:30, 31.) Ngisho nobe Jehova asibekele leto timiso, singakwati kukhetsa tinhlobonhlobo tetintfo lesifuna kutigcoka kanye netintfo tekutilungisa. Bufakazi baloko bubonakala ebantfwini baJehova, endleleni lenhle labembatsa ngayo, nobe ngabe ngukuphi lapho bahlangana khona.

16. Umoya welive uphikisana njani nemfundziso yaJesu, futsi ngumiphi imibuto lekufanele sitibute yona?

¹⁶ Umoya walelive uyadukisana, futsi ubangela tigidzi tebantfu kutsi tetsembele emalini nasetintfweni talelive kute titfole injabulo. Kungako Jesu atsi: “Imphilo yemuntfu ayinconotiswa  bunjinga bakhe.” (Lukha 12:15) Nanobe Jesu abengakhutsati buphuya, nobe kutihluphekisa, abefundzisa kutsi imphilo kanye nenjabulo sibili itfolwa ngulabo “labalambele futsi bomele kulunga” labagcina liso labo “liphilile,” lababubeka embili buhlobo babo naNkulunkulu. (Matewu 5:6; 6:22, 23) Tibute: ‘Ngiyakukholelwa yini loko Jesu lakufundzisa, nobe mhlawumbe sengiyengwe nguloyo ‘longuyise wawo onkhe emanga’? (Johane 8:44) Yini levetwa ngemavi, imigomo, lokuta kucala ekuphileni kwami, kanye nendlela yami yekuphila?’—Lukha 6:45; 21:34-36; 2 Johane 6.

17. Asewusho letinye tetibusiso letijatjulelwa ngulabo labagcina liso labo liphilile.

¹⁷ Jesu watsi: “Kuhlakanipha kwaNkulunkulu kubonakala kuliciniso ngemiphumela yako.” (Matewu 11:19) Asewucabange ngetinzuzo letijatjulelwa ngulabo labagcina liso labo liphilile. Batfola injabulo sibili emsebentini wabo wekushumayela ngeMbuso. (Matewu 11:29, 30) Bagwema kutikhatsata ngetintfo letilite, ngalendlela, bativikela ekucindzetelekeni kwengcondvo nekwemvelo. (Fundza 1 Thimothi 6:9, 10.) Bayenetiseka ngetintfo letidzingekako kute baphile, futsi banesikhatsi lesinyenti sekuba nemindeni yabo nesekuba nalamanye emaKhristu. Loko kubenta kutsi balale kahle nobe babe nebutfongo lobuhle. (Umshumayeli 5:12) Batfola injabulo lenkhulu leletfwa kupha, futsi loko bakwenta ngato tonkhe tindlela. (Imisebenti 20:35) ‘Bayaphuphuma etsembeni,’ futsi batfola kuthula nekwenetiseka. (Roma 15:13; Matewu 6:31, 32) Uyabona-ke kutsi kute lokungafananiswa naletibusiso?

18. LiBhayibheli lisichaza njani sitsa setfu, tindlela taso, kanye neluhlobo lwemphi lesikuyo?

¹⁸ Labo labatigcina elutsandvweni lwaNkulunkulu bajabulela nesivikelo sakamoya kuSathane lofuna kwemuka emaKhristu, hhayi injabulo yodvwana, kepha nekuphila lokuphakadze. (1 Phetro 5:8) Pawula watsi: “Asilwi nebantfu,  kodvwa silwa netikhulu temimoya, nemandla, nebabusi bendalo yalobumnyama, nemabutfo abomoya lababi labasemkhatsini.” (Efesu 6:12) Ligama lelitsi “silwa,” lichaza kutsi lokulwa kwetfu akusiko kulwa nemuntfu lokhashane nobe kulwa usendzaweni lefihlekile, kepha kulwa nemuntfu losedvutane nobe kulwa ngekubambana ngetandla. Ngetulu kwaloko, emagama latsi “netikhulu,” “nemandla,” “nebabusi” abonisa kutsi lokuhlasela lokuvela endzaweni yemimoya kuhlelwe kahle futsi kwentiwa ngenhloso.

19. Asewuchaze tonkhe tikhali taNkulunkulu.

¹⁹ Nangetulu kwebutsakatsaka kanye nekulinganiselwa kwemandla ebantfu, singakwati kuncoba. Njani? Ngekuhloma “tikhali tonkhe taNkulunkulu.” (Efesu 6:13) Nayichaza letikhali, incwadzi yebase-Efesu 6:14-18 ifundzeka kanje: ‘Manini tinkhalo tenu tiboshwe ngeliciniso, nifake sivikelo sesifuba lesikulunga, tinyawo tenu tigcokiswe kulungela kushumayela livangeli lekuthula. Kunako konkhe, nitsatse lihawu lelikukholwa, lenitawuba nemandla ekucima ngalo tonkhe tikhali letivutsako taLomubi. Nitsatse impantitje leyinsindziso, nenkemba yemoya lelivi laNkulunkulu. Khulekani ngaso sonkhe sikhatsi nikumoya ngekukhuleka konkhe nekuncenga.’

20. Simo setfu sehluke njani kuleso selisotja lelivamile?

²⁰ Njengobe letikhali tisipho lesivela kuNkulunkulu, titawusivikela kuphela nasitawuchubeka sihlala sitihlomile. Ngalokungafanani nemasotja lavamile, wona laba netikhatsi lapho angalwi khona, emaKhristu asemphini lechubekako, lengeke iphele kuze kube ngulapho Nkulunkulu abhubhisa live laSathane futsi aphonse yonkhe imimoya lemibi emgodzini longenamkhawulo. (Sembulo 12:17; 20:1-3) Ngako-ke, ungapheli emandla nangabe ulwa nekungapheleli nobe tifiso letimbi, ngobe sonkhe kufanele ‘siticindzetele’ kute sihlale setsembekile kuJehova. (1 Khorinte 9:27) Empeleni, kufanele sikhatsateke kuphela lapho sesikuyekele kulwa!

21. Nguyiphi indlela lekukuphela kwayo lesingancoba ngayo kulemphi yakamoya?

 ²¹ Lokubaluleke nakakhulu, kutsi angeke sikwati kuyincoba lemphi ngemandla etfu. Kungaleso sizatfu Pawula asikhumbuta kutsi kufanele sichubeke sithandaza kuJehova ‘ngaso sonkhe sikhatsi sikumoya.’ Ngesikhatsi lesifananako, kufanele simlalele Jehova ngekufundza liVi lakhe, nangekuhlanganyela nalamanye ‘emasotja’ lakulemphi ngaso sonkhe sikhatsi, ngobe asisodvwa kulemphi. (Filemoni 2; Hebheru 10:24, 25) Labo labetsembekile kulendzaba, angeke bancobe nje kuphela, kepha batawukwati nekululwela ngemandla lukholo lwabo lapho luvivinywa.

22, 23. (a) Kungani kufanele sihlale sikulungele kulwela lukholo lwetfu, futsi ngumiphi imibuto lokufanele sitibute yona? (b) Nguyiphi indzaba lesitawucoca ngayo esehlukweni lesilandzelako?

²² Jesu watsi: “Kodvwa anisibo belive . . . . Ngako-ke live liyanitondza.” (Johane 15:19) EmaKhristu kufanele ngaso sonkhe sikhatsi ahlale akulungele kulwela lukholo lwawo, futsi loko akwente ngenhlonipho nangebumnene. (Fundza 1 Phetro 3:15.) Tibute: ‘Ngiyacondza yini kutsi kungani boFakazi BaJehova ngaletinye tikhatsi benta tintfo ngendlela leyehlukile kuleyo leyemukelwa bantfu labanyenti? Nangibhekene netimo letinjalo, ngiyaciniseka yini kutsi loko lokushiwo liBhayibheli nesisebenti lesetsembekile kuliciniso? (Matewu 24:45; Johane 17:17) Nakufanele ngente lokulungile emehlweni aJehova, ngikulungele yini kungabi ngulohlukile nje kuphela kepha futsi ngijabule ngaloko?’—Tihlabelelo 34:2; Matewu 10:32, 33.

²³ Ngalokuvamisile, tifiso tetfu tekutigcina sehlukile kulelive tivivinyeka nangaletinye tindlela letibhacile. Asewucabange nganasi sibonelo: Njengobe sibonile ekucaleni, Develi wetama kudukisa tinceku taJehova kute tingene shi ekutijabuliseni kwalelive. Singatikhetsa njani tindlela tekutijabulisa letitawusenta sijabule futsi sibe nabonembeza labahlantekile? Lendzaba sitawucoca ngayo esehlukweni lesilandzelako.