Bobani emabito alamadvodza lowabona kulesitfombe?— BoMatewu, Makho, Lukha, Johane, Phetro, Jakobe, Juda naPawula. Onkhe lamadvodza abephila ngesikhatsi saJesu, futsi abhala ngaye. Asesifundze kabanti ngawo.

Lamatsatfu kuwo abebaphostoli labashumayela naJesu. Uyati yini kutsi bobani?— BoMatewu, Johane naPhetro. Umphostoli Matewu kanye naJohane bebamati kahle Jesu, futsi bobabili babhala tincwadzi lebetikhuluma ngekuphila kwakhe. Umphostoli Johane waphindze wabhala incwadzi  yeSembulo naletinye tincwadzi letintsatfu lokutsiwa Yincwadzi Yekucala YaJohane, Yincwadzi Yesibili YaJohane kanye Nencwadzi Yesitsatfu YaJohane. Umphostoli Phetro wabhala tincwadzi letimbili letiseBhayibhelini. Tibitwa ngekutsi Yincwadzi Yekucala YaPhetro kanye Nencwadzi Yesibili YaPhetro. Encwadzini yakhe yesibili, Phetro wabhala mayelana nesikhatsi lapho Jehova bekakhuluma khona ngaJesu asezulwini, atsi: ‘Lena yindvodzana yami. Ngiyayitsandza futsi ngiyatigcabha ngayo.’

Lalamanye emadvodza lowabona kulesitfombe nawo asifundzisa ngaJesu kuletincwadzi latibhala. Lenye yawo nguMakho. Kungenteka kutsi bekakhona ngesikhatsi Jesu aboshwa futsi wakubona konkhe lokwenteka. Lomunye nguLukha. Bekangudokotela futsi kungenteka kutsi waba ngumKhristu ngemuva kwekufa kwaJesu.

Labanye babhali lababili lobabona kulesitfombe bekubanakaboJesu labancane kunaye. Bekubobani emabito abo?— BekunguJakobe kanye naJuda. Ekucaleni bebangamkholwa Jesu. Bebacabanga nekutsi uyahlanya. Kodvwa ngekuhamba kwesikhatsi, bamkholwa futsi baba ngemaKhristu.

Lolomunye umbhali weliBhayibheli lokulesitfombe nguPawula. Ngesikhatsi asengakabi ngumKhristu, libito lakhe bekunguSawula. Bekawatondza emaKhristu futsi awaphatsa kabi. Yini leyenta Pawula waba ngumKhristu?— Ngalelinye lilanga Pawula asendleleni, weva umuntfu lotsite losezulwini akhuluma naye. BekunguJesu loyo. Wabuta Pawula watsi: ‘Ubaphatselani kabi kangaka labantfu labakholwa kimi?’ Ngemuva kwaloko, Pawula washintja futsi waba ngumKhristu. Wabhala tincwadzi teliBhayibheli letingu-14, kusukela kubaseRoma kuya encwadzini yemaHebheru.

Siyalifundza yini liBhayibheli malanga onkhe?— Nasilifundza IiBhayibheli, sifundza tintfo letinyenti ngaJesu. Ungatsandza yini kufundza lokunyenti ngaJesu?—