Thimothi bekalijaha lebelikujabulela kusita bantfu. Wahamba tindzawo letinyenti kuze abasite. Ngenca yaloko, imphilo yakhe beyijabulisa kakhulu. Ungatsandza yini kufundza ngemphilo yaThimothi?—

Thimothi wakhulela edolobheni lokutsiwa yiListra. Ngesikhatsi asemncane, gogo wakhe Lowisi namake wakhe Yunisi, bamfundzisa ngaJehova. Njengobe Thimothi akhula, waba nesifiso sekusita bantfu kutsi bafundze ngaJehova.

Ngesikhatsi Thimothi aselijaha, Pawula wamcela kutsi ahambe naye kute bayewushumayela kuletinye tindzawo. Thimothi waphendvula watsi: ‘Yebo, ngitawuhamba nawe!’ Besekakulungele kuhamba naPawula ayewusita bantfu.

Thimothi wahamba naPawula baya edolobheni  lebeliseMasedoniya lelibitwa ngekutsi yiThesalonika. Kuze bafike lapho, bekudzingeka kutsi bahambe libanga lelidze baphindze bagibele nemkhumbi. Nabefika kuleyo ndzawo, basita bantfu labanyenti kutsi bafundze ngaJehova. Kodvwa labanye bantfu babatfukutselela futsi betama kubalwisa. Ngaleso sizatfu, Pawula kanye naThimothi besuka lapho bayoshumayela kuletinye tindzawo.

Ngemuva kwetinyanga letimbalwa, Pawula wacela Thimothi kutsi abuyele eThesalonika kuze abone kutsi bazalwane bebachuba njani. Thimothi bekadzinga kuba nesibindzi kuze abuyele kulelidolobha lebeliyingoti. Kodvwa wabuyela kulo ngobe bekasolo acabanga ngebazalwane lebebalapho. Nakabuya kuPawula bekamphatsele tindzaba letimnandzi. Letindzaba letimnandzi betitsi bazalwane baseThesalonika bebasachuba kahle.

Thimothi wasebenta naPawula iminyaka leminyenti. Ngalesinye sikhatsi, Pawula wabhala ngaThimothi watsi nguye lametsemba kakhulu langamtfuma kuze ayewusita emabandla. Thimothi bekatsandza Jehova kanye nebantfu.

Uyabatsandza yini bantfu futsi uyafisa yini kubasita kutsi bafundze ngaJehova?— Nangabe ubatsandza futsi ufisa kubasita, ungajabula kakhulu futsi ube nemphilo lemnandzi lefanana neyaThimothi.