Asewucabange nganasi simo: Nomasontfo utsi nakatibuka esibukweni ubona emafutsa nje kuphela. Ngisho nome batali bakhe nebangani bakhe batsi uncama ufanana namanyovu, kodvwa yena uhlale atsi, ‘umuntfu kusafanele atsi kwehlisa umtimba.’

Muva nje Nomasontfo abesolo acabanga ngekutsatsa sinyatselo sekwehlisa umtimba ngemakhilogramu lasihlanu. Kuphela nje intfo lafuna kuyenta kutilambisa nje emalanga lambalwa . . .

Yini wena lobewungayenta kube nawe bewutiva ngendlela Nomasontfo lativa ngayo?

Akusiyo intfo lembi kukhatsateka ngendlela lobukeka ngayo. Ecinisweni, liBhayibheli likhuluma kahle ngendlela labanye bafati nemadvodza labebabukeka ngayo labafaka ekhatsi Sara, Rakheli, Abigayeli Josefa, naDavide. LiBhayibheli liphindze likhulume ngalelinye litjitji ‘lebelilihle kakhulu’ libito lalo bekungu-Abhishagi—1 Emakhosi 1:4.

Bantfu labasha labanyenti bakhatsateka kakhulu ngendlela lababukeka ngayo. Loku kungabangela tinkinga letinyenti. Cabanga nje nganaku:

• Kulesinye sifundvo kutsiwa emantfombatane langemaphesenti langu-58 atitjela kutsi atidudla, kantsi ecinisweni ngulangemaphesenti langu-17 kuphela lanjalo.

• Kantsi kulesinye sifundvo kutsiwa angemaphesenti langu-45 emantfombatane lancama mbamba kantsi wona atitjela kutsi akhuluphele!

• Kulomshikashika wabo wekwehlisa umtimba, labanye bantfu labasebasha sebane-anorexia—kugula lokufaka kuphila engotini lekubangwa kutibulalisa ngendlala.

 Nangabe unetimphawu te-anorexia nobe tanome nguyiphi inkinga lebangwa kungadli kahle, tfola lusito. Cala ngekubhobokela umtali wakho nobe lomunye umuntfu lomdzala lometsembako. LiBhayibheli litsi: “Umngani unelutsandvo ngaso sonkhe sikhatsi; kantsi umnakenu utalelwe kutsi netfwalisane naye tinhlupheko.”—Taga 17:17.

Ecinisweni, loko lokwenta umuntfu abemuhle nome abe mubi nguloko langiko ngekhatsi. Cabanga nga-Absalomu indvodzana yaDavide. LiBhayibheli litsi:

“Kute indvodza leyayidvume ngebuhle kwendlula Absalomu. . . . ate ngisho nalesincane sici.”—2 Samuwel 14:25.

Nobe kunjalo, lomfana abetigcabha kakhulu, afuna lokungamfaneli futsi akhohlisa! LiBhayibheli alimkhulumi kahle Absalomu; limchaza njengemuntfu longetsembeki nalobekanenzondo lembi.

Kungaleso sizatfu liBhayibheli lisiyala:

“Nigcoke buntfu lobusha”—Kholose 3:10.

“Kutihlobisa kwenu akungabi kwangaphandle . . . , kodvwa akube nguloko lokusenhlitiyweni”—1 Phetro 3:3, 4.

Ngisho nome kungasikubi kufuna kuba muhle, kodvwa lokubaluleke kakhulu kwendlula indlela lobukeka ngayo, buntfu bakho. Ngekuhamba kwesikhasi, lokutakwenta utsandzeke kutawuba tintfo letidvunyiswako ngawe letakha buntfu bakho kunesimo semtimba wakho nome lolukhalo lwakho loluhle! Intfombatane ligama layo kungu-Phylicia utsi: “Buhle buyintfo lenakwa ngekushesha, kodvwa loko longiko ngekhatsi kanye naloko lokwakhe buntfu bakho lobuhle, ngiko bantfu labakukhumbula ngako kakhulu.”

Ihlale ikudvumata yini indlela lobukeka ngayo?

Wake wakucabanga yini kuyoshintja umtimba wakho ngekuhlindvwa nobe kudla kancane kakhulu kute ulungise indlela lobukeka ngayo?

Kube bewungakhona, yini lobewungatsandza kuyishintja endleleni lobukeka ngayo? (Khetsa konkhe lokukutsintsako kuloku.)

• BUDZE

• BUKHULU BEMTIMBA

• TINWELE

• INDLELA LOME NGAYO

• BUSO

• UMBALA WEBUSO

Nangabe imphendvulo yakho inguYebo kulemibuto lemibili yekucala bese ukhetsa lokutsatfu nome lokungetulu kulombuto wesitsatfu, cabanga nganaku: Manyenti ematfuba ekutsi labanye abakuboni umubi ngendlela wena lotibona ngayo. Kumelula kutikhandza sewukhatsateka kakhulu ngendlela lobukeka ngayo.—1 Samuweli 16:7.