SIFUNDVO 03
Ungakwetsemba Yini Loko Lokushiwo LiBhayibheli?
LiBhayibheli linetetsembiso neteluleko letinyenti. Kungenteka uyatsandza kufundza ngato, kodvwa usengakatetsembi ngalokuphelele. Ungatetsemba yini tetsembiso neteluleko tencwadzi lendzala kangaka? Ungakwetsemba yini loko lokushiwo liBhayibheli mayelana nekujabulela kuphila nyalo nasesikhatsini lesitako? Bantfu labanyenti bayakwetsemba. Asesibone kutsi ungakwetsemba yini nawe.
1. Tindzaba lesitifundza eBhayibhelini tenteka mbamba yini?
LiBhayibheli ‘linemavi laliciniso, lanjengobe anjalo.’ (Umshumayeli 12:10) Likhuluma ngetintfo lebetenteka mbamba, tentiwa bantfu bakadzeni. (Fundza Lukha 1:3; 3:1, 2.) Tati temlandvo kanye nebavubukuli labanyenti batsi tikhatsi, bantfu, tindzawo, kanye netintfo letenteka lokukhulunywa ngato eBhayibhelini, tiliciniso.
2. Yini lesenta sitsi liBhayibheli alikaphelelwa sikhatsi futsi singaletsemba?
Tikhatsi letinyenti liBhayibheli likhuluma ngetintfo lebetingatiwa ngesikhatsi lisabhalwa. Sibonelo saloko nje, kutsi likhuluma ngetindzaba letimayelana nesayensi. Bantfu bebangatetsembi tintfo letinyenti lelitishoko letimayelana nesayensi, ngesikhatsi lisabhalwa. Nobe kunjalo, loko lokushiwo yisayensi lamuhla kufakazela kutsi liBhayibheli lishaya emhlolweni. LiBhayibheli ‘lihlale letsembekile futsi litawuchubeka linjalo kuze kube phakadze.’—Tihlabelelo 111:8.
3. Singakwetsemba yini loko lokushiwo liBhayibheli ngelikusasa?
LiBhayibheli linetiphrofetho a letisitjela ‘ngetintfo letisengakenteki.’ (Isaya 46:10) Latisho ngalokucondzile tintfo letenteka kadzeni, kusasele sikhatsi lesidze kutsi tenteke. Laphindze lachaza imininingwane yetintfo lebetitakwenteka esikhatsini setfu. Kulesifundvo, sitawucoca ngaletinye taletiphrofetho letiseBhayibhelini. Kuyamangalisa kushaya emhlolweni kwaletiphrofetho!
CHUBEKA UFUNISISA
Hlolisisa indlela isayensi levumelana ngayo neliBhayibheli lamuhla, bese ufundza tiphrofetho teliBhayibheli letimbalwa letimangalisako.
4. Isayensi iyavumelana neliBhayibheli
Endvulo, bantfu labanyenti bebacabanga kutsi umhlaba uhleti entfweni letsite. Dlala le-VIDEO.
Naka loko lokwabhalwa encwadzini yaJobe eminyakeni lecishe ibe ngu-3 500 leyendlulile. Fundza Jobe 26:7, bese nicoca ngalombuto:
-
Kungani kusimangalisa kutsi ‘umhlaba ulenga eteni’?
Umjikeleto wemanti wacala kucondvwa kahle ngeminyaka yabo-1800. Kodvwa naka loko lokwashiwo liBhayibheli eminyakeni lecishe ibe ngu-3 500 leyendlulile. Fundza Jobe 36:27, 28, bese nicoca ngalemibuto:
-
Yini lekumangalisa kakhulu kulokuchazwa lokumelula lokushiwo ngulomBhalo mayelana nemjikeleto wemanti?
-
LemiBhalo lesisandza kuyifundza ikwenta ukwetsembe yiniloko lokushiwo liBhayibheli?
5. LiBhayibheli labiketela tentakalo letibalulekile
Fundza Isaya 44:27–45:2, bese nicoca ngalombuto:
-
Nguyiphi imininingwane leyabiketelwa liBhayibheli eminyakeni lengu-200 ngaphambi kwekubhujiswa kweBhabhulona?
Umlandvo ufakazela kutsi iNkhosi Khuresi, yasePheresiya, kanye nelibutfo layo yancoba lidolobha laseBhabhulona nga-539 B.C.E. b Baphambukisa umfula lobowuvikele lelidolobha. Ngemuva kwekungena kulelidolobha ngemagede lebekashiywe avulekile, balincoba ngaphandle kwekulwa. Sekuphele iminyaka lengu-2 500 lelidolobha labhujiswa, futsi solo litindzala. Naka loko lokwabiketelwa liBhayibheli.
Fundza Isaya 13:19, 20, bese nicoca ngalombuto:
-
Loko lokwenteka eBhabhulona kusigcwalisa njani lesiphrofetho?
Tindzala taseBhabhulona lamuhla e-Iraq
6. LiBhayibheli labiketela ngetintfo letenteka lamuhla
LiBhayibheli lisitjela kutsi siphila “emalangeni ekugcina.” (2 KuThimothi 3:1) Naka loko liBhayibheli lelakusho mayelana nesikhatsi setfu.
Fundza Matewu 24:6, 7, bese nicoca ngalombuto:
-
LiBhayibheli latsi ngutiphi tintfo lebetitawuba bufakazi bekutsi siphila emalangeni ekugcina?
Fundza 2 KuThimothi 3:1-5, bese nicoca ngalemibuto:
-
LiBhayibheli latsi bebatawuba njani bantfu labaphila emalangeni ekugcina?
-
Ngutiphi tintfo wena lotibonile letashiwo liBhayibheli mayelana nebantfu labaphila emalangeni ekugcina?
LABANYE BANTFU BATSI: “LiBhayibheli liyincwadzi yetinganekwane.”
-
Yini lekwenta uciniseke kakhulu kutsi ungaletsemba liBhayibheli?
LOKO LESICOCE NGAKO
Umlandvo, isayensi, netiphrofetho, konkhe kukhombisa kutsi ungaletsemba liBhayibheli.
Yini Loyifundzile?
-
LiBhayibheli liyincwadzi yetinganekwane yini?
-
Ngukuphi lapho liBhayibheli livumelana khona nesayensi?
-
Ucabanga kutsi liBhayibheli liyakhuluma yini ngelikusasa? Kungani utsi yebo, nobe utsi cha?
LOKUNYE LONGAKUHLOLA
Kukhona yini lokushiwo liBhayibheli lokungavumelani nesayensi?
“Isayensi Iyavumelana Yini NeliBhayibheli?” (Sihloko lesiku-internet)
Ngumaphi emaciniso lamayelana ‘nemalanga ekugcina’?
“Tiphrofetho TeliBhayibheli Letisitfupha Lesetigcwalisekako” (Sicongosekulindza saJune 1, 2011)
Fundza indlela tiphrofetho teliBhayibheli letimayelana neMbuso wemaGriki letagcwaliseka ngayo.
Tfola indlela tiphrofetho teliBhayibheli letawushintja ngayo umbono walenye indvodza.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
