SIFUNDVO 13
Indlela Inkholo Yemanga Lemmelela Kabi Ngayo Nkulunkulu
Nangabe Nkulunkulu alutsandvo, kungani tinkholo letitsi timelela yena tenta tintfo letimbi kangaka? Kalula nje, leti tinkholo temanga, futsi timmelele kabi Nkulunkulu. Timmelele kabi ngayiphi indlela? Yena utiva njani ngaloko? Yini latawuyenta ngako?
1. Inkholo yemanga immelela kabi ngayiphi indlela Nkulunkulu ngaloko lekufundzisako?
Inkholo yemanga ‘ikhetse kukholwa emanga kunekutsi ikholwe liciniso lelivela kuNkulunkulu.’ (KubaseRoma 1:25) Sibonelo saloko kutsi, tinkholo letinyenti atiwafundzisi emalunga ato ligama laNkulunkulu. Nobe kunjalo, liBhayibheli litsi ligama laNkulunkulu kufanele lisetjentiswe. (KubaseRoma 10:13, 14) Labanye baholi benkholo batsi nakwenteka tintfo letimbi, kusuke kuyintsandvo yaNkulunkulu, kodvwa loko akusilo liciniso. Nkulunkulu akatibangeli tintfo letimbi. (Fundza Jakobe 1:13.) Lokubuhlungu kutsi emanga enkholo ente bantfu bakhwesha kuNkulunkulu.
2. Lokwentiwa yinkholo yemanga kummelela kabi ngayiphi indlela Nkulunkulu?
Inkholo yemanga ayibaphatsi bantfu ngendlela Nkulunkulu labaphatsa ngayo. LiBhayibheli litsi tono tenkholo yemanga “setincwabelene taze tefika ezulwini.” (Sembulo 18:5) Sekuphele iminyaka leminyenti tinkholo tingenela tepolitiki, tisekela timphi, futsi tibangela kufa kwebantfu labanyenti. Labanye baholi benkholo baphila imphilo lentofontofo, futsi bafuna emalunga etinkholo tabo abanike imali. Letento tabo tifakazela kutsi abamati Nkulunkulu, futsi bete nelilungelo lekummelela.—Fundza 1 Johane 4:8.
3. Nkulunkulu utiva njani ngenkholo yemanga?
Nangabe tintfo letentiwa yinkholo yemanga tikutfukutselisa, ucabanga kutsi Jehova yena utiva njani? Uyabatsandza bantfu, kodvwa ubatfukutselele baholi benkholo labammelela kabi futsi labahlupha bantfu lababaholako. Wetsembisa kutsi inkholo yemanga itawubhujiswa futsi “ngeke iphindze itfolakale.” (Sembulo 18:21) Madvutane, Nkulunkulu utawucedza yonkhe inkholo yemanga.—Sembulo 18:8.
CHUBEKA UFUNISISA
Chubeka ufundza ngekutsi Nkulunkulu utiva njani ngenkholo yemanga. Fundza lokunyenti lokwentiwa yinkholo yemanga, nekutsi kungani loko kungakafaneli kukwente uyekele kufuna kwati Jehova.
4. Akusito tonkhe tinkholo letemukelwa nguNkulunkulu
Bantfu labanyenti bakholelwa kutsi tinkholo tifana netindlela letehlukahlukene letiya kuNkulunkulu. Kuliciniso yini loko? Fundza Matewu 7:13, 14, bese nicoca ngalombuto:
-
LiBhayibheli liyichaza njani indlela leya ekuphileni?
Dlala le-VIDEO, bese nicoca ngalombuto lolandzelako.
-
LiBhayibheli liyasho yini kutsi tinyenti tinkholo letijabulisa Nkulunkulu?
5. Inkholo yemanga ayilukhombisi lutsandvo Nkulunkulu lanalo
Tinkholo timmelela kabi Nkulunkulu ngetindlela letinyenti. Indlela lembi kakhulu, kungenela kwayo timphi. Kuze utfole sibonelo saloko, dlala le-VIDEO, bese nicoca ngalemibuto lelandzelako.
-
Yini leyentiwa masontfo lamanyenti Ngemphi Yelive Yesibili?
-
Wena utiva njani ngaloko lakwenta?
Fundza Johane 13:34, 35 na-17:16, bese nicoca ngalemibuto:
-
Ucabanga kutsi Jehova utiva njani nangabe tinkholo tingenela timphi?
-
Inkholo yemanga ngiyo lebangela tintfo letinyenti letimbi. Yini wena loyibone yentiwa masontfo lekhombisa kutsi ete lutsandvo lolunjengelwa Nkulunkulu?
Inkholo yemanga ayikalukhombisi lutsandvo Nkulunkulu lanalo
6. Nkulunkulu ufuna kusita bantfu kutsi baphume enkholweni yamanga
Fundza Sembulo 18:4, a bese nicoca ngalombuto:
-
Kwati kutsi Nkulunkulu ufuna kusita bantfu labadukiswe yinkholo yemanga, kukwenta utive njani?
7. Chubeka ufundza ngaNkulunkulu weliciniso
Tintfo letimbi inkholo yemanga letentako naletishoko, kufanele yini titsintse indlela lotiva ngayo ngaNkulunkulu? Cabanga ngababe lonendvodzana lelihlongandlebe, leshiya likhaya, ihambe iyophila imphilo lembi. Lobabe akavumelani naloko lokwentiwa yindvodzana yakhe. Kungani kungeke kube kahle kusola lobabe ngendlela indvodzana yakhe levukelako lephila ngayo?
-
Kungaba kahle yini kutsi sisole Jehova ngaloko lokwentiwa yinkholo yemanga, bese siyayekela kufundza ngaye?
LABANYE BANTFU BATSI: “Angifuni kumati Nkulunkulu ngobe inkholo ibangele tintfo letinyenti letimbi.”
-
Utiva kanjalo yini nawe?
-
Kungani loko lokwentiwa yinkholo yemanga kungakafaneli kutsintse indlela lesitiva ngayo ngaJehova?
LOKO LESICOCE NGAKO
Inkholo yemanga immelele kabi Nkulunkulu ngekufundzisa emanga nangekwenta tintfo letimbi, futsi Nkulunkulu utayibhubhisa.
Yini Loyifundzile?
-
Utiva njani ngaloko lokufundziswa yinkholo yemanga kanye naloko lekwentile?
-
Jehova utiva njani ngenkholo yemanga?
-
Nkulunkulu utayentani inkholo yemanga?
LOKUNYE LONGAKUHLOLA
Fundza tindlela letimbili tinkholo letinyenti letingamjabulisi ngato Nkulunkulu.
“Tonkhe Tinkholo Tiyafana Yini? Nkulunkulu Utemukela Tonkhe Yini?” (Sihloko lesiku-internet)
Kungani Jehova afuna simkhonte sikanye nalabanye?
“Kubalulekile Yini Kutsi Ube Lilunga Lenkholo?” (Sihloko lesiku-internet)
Umphristi abekhatsatekile ngenca yenkholo yakhe. Kodvwa loko akuzange kumvimbe kutsi afundze liciniso ngaNkulunkulu.
“Okwenza Umpristi Washiya ISonto Lakhe” (Phaphama! yaFebruary 2015, letfolakala ngesiZulu)
Sekuphele sikhatsi lesidze emasontfo akhuluma emanga ngaNkulunkulu, lokwente bantfu bacabanga kutsi akanendzaba nabo futsi unelunya. Fundza liciniso ngalamatsatfu awo.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
