SIFUNDVO 22
Ungabatjela Njani Labanye Tindzaba Letimnandzi?
Njengobe ufundza emaciniso laseBhayibhelini, ungahle ucabange, ‘Wonkhe umuntfu kufanele ati ngaloku!’ Kuliciniso kutsi bonkhe bantfu kufanele bawati! Nobe kunjalo, ungahle utive wesaba kutjela labanye loko lokufundzile. Asesicoce ngekutsi ungakuncoba njani lokwesaba, futsi ngenjabulo, ucale ucocele labanye tindzaba letimnandzi letiseBhayibhelini.
1. Ungabacocela njani bantfu lobatiko loko lokufundzile?
Bafundzi baJesu batsi: “Tsine ngeke siyekele kukhuluma ngetintfo lesitibonile nalesitivile.” (Imisebenti 4:20) Bakutsandza kakhulu loko Jesu labafundzisa kona kangangekutsi bebafuna kutjela bonkhe bantfu ngako. Utiva ngaleyondlela yini nawe? Nangabe kunjalo, funa ematfuba ekutjela umndeni kanye nebangani bakho loko lokufundzile, kodvwa loko ukwente ngenhlonipho.—Fundza KubaseKolose 4:6.
Tindlela letingakusita ucale
-
Nawucoca nelilunga lemndeni, cala ngekutsi: “Kukhona lokujabulisako lengikufundze kuleliviki.”
-
Cocela umngani wakho logulako nobe lokhatsatekile ngembhalo lokhutsatako.
-
Nabakuvusela losebenta nabo, batjele ngaloko lokutfole nawutadisha liBhayibheli nobe lokufundze emhlanganweni welibandla.
-
Tjengisa bangani bakho i-website letsi jw.org.
-
Mema labanye kutsi babe khona nawufundzelwa liBhayibheli nobe ubakhombise kutsi bangasicela njani sifundvo seliBhayibheli ku-website letsi jw.org.
2. Kungani kushumayela nelibandla kungumgomo lokahle longatibekela wona?
Bafundzi baJesu benta lokungetulu nje kwekumane batjele bantfu lababatiko tindzaba letimnandzi. Jesu ‘wabatfuma ngababili kutsi bahambe embikwakhe baye kuwo onkhe emadolobha’ kuze bayoshumayela. (Lukha 10:1) Lendlela lehlelekile yekushumayela yaniketa bantfu labanyenti litfuba lekuva tindzaba letimnandzi. Kushumayela ndzawonye kwabajabulisa kakhulu bafundzi baJesu. (Lukha 10:17) Wena ungatibekela yini umgomo wekushumayela nelibandla?
CHUBEKA UFUNISISA
Fundza kutsi yini lengakusita uncobe kwesaba futsi utfole injabulo ngekutjela labanye tindzaba letimnandzi.
3. Jehova utakusita
Labanye labafuna kushumayela bangesaba kutsi batawukhuluma kahle yini nekutsi bantfu batawubatsatsa njani.
-
Uyesaba yini kucocela labanye loko lokufundzile? Yini lekwenta utsi yebo nobe utsi cha?
Dlala le-VIDEO, bese nicoca ngalombuto lolandzelako.
-
LaboFakazi labasebasha bakuncoba njani kwesaba?
Fundza Isaya 41:10, bese nicoca ngalombuto:
-
Kungani kufanele uthantaze nawesaba kushumayela?
Bewati yini?
BoFakazi BaJehova labanyenti bebacabanga kutsi angeke babe nesibindzi sekushumayela. Sibonelo saloko nguSergey, lobekatibukela phansi futsi akutfola kumatima kukhuluma nalabanye bantfu. Wase ucala kutadisha liBhayibheli. Utsi: “Ngisho nobe bengesaba, ngacaIa kucocela labanye ngaloko bengikufundza. Lokwangimangalisa kakhulu kutsi kucocela labanye ngeliBhayibheli kwangenta ngangasatibukeli phansi. Kwaphindze kwacinisa nekukholwa kwami kuletintfo letinsha lebengitifundza.”
4. Bani nenhlonipho
Nawucocela labanye tindzaba letimnandzi, ungagcini nje ngekucabanga kutsi utawutsini, kodvwa phindze ucabange nangekutsi utakusho njani. Fundza 2 KuThimothi 2:24 na-1 Phetro 3:15, bese nicoca ngalemibuto:
-
Ungawasebentisa njani lamavesi nawucocela labanye ngeliBhayibheli?
-
Lamanye emalunga emndeni nobe bangani bangase bakuphikise. Yini longayenta? Yini lokungakafaneli uyente?
-
Yini leyenta kube ncono kusebentisa imibuto ngekuhlakanipha kunekubaphocelela kutsi bakholelwe loko lokushoko?
5. Kucocela labanye tindzaba letimnandzi kuletsa injabulo
Jehova waniketa Jesu umsebenti wekutjela labanye tindzaba letimnandzi. Jesu wawutsatsa njani lomsebenti? Fundza Johane 4:34, bese nicoca ngalemibuto:
-
Nasidla kudla lokunemphilo siba nemphilo lenhle futsi siyajabula. Yini leyenta Jesu watsi kwenta loko Nkulunkulu latsi asikwente, njengekushumayela tindzaba letimnandzi, kufana nekudla?
-
Kucocela labanye tindzaba letimnandzi kungakwenta njani ujabule?
Longakwenta
-
Emhlanganweni wasekhatsi neliviki, buka tindlela longacalisa ngato tincociswano nalabanye.
-
Khuluma naloyo lokufundzelako umbute kutsi yini longayenta kuze ukhone kubeka tinkhulumo emihlanganweni yasekhatsi neliviki. Tabelo lotawunikwa tona titakusita ukulungele kucocela labanye loko lokufundzile.
-
Sebentisa incenye letsi “Labanye Bantfu Batsi” nobe letsi “Lomunye Angase Akubute” lekuto tonkhe letifundvo, kuze uphrakthize kutsi ungayiphendvula njani leminye imibuto levamile kanye nekuphikiswa.
LOMUNYE ANGASE AKUBUTE: “Sewushintjiswe yini?”
-
Ungalisebentisa njani lelitfuba kuze ucocele lomuntfu loko lokufundzile nawutadisha liBhayibheli?
LOKO LESICOCE NGAKO
Kucocela labanye tindzaba letimnandzi kuletsa injabulo, futsi akusilukhuni.
Yini Loyifundzile?
-
Kungani kufanele ucocele labanye tindzaba letimnandzi?
-
Ungakwenta njani loko ngenhlonipho?
-
Ungakuncoba njani kwesaba kushumayela lokungenteka unako?
LOKUNYE LONGAKUHLOLA
Buka tindlela letine letimelula longatisebentisa kuze ucocele labanye tindzaba letimnandzi usebentisa likhadi le-jw.org.
Fundza ngebuntfu lobune lobungakusita kutsi ukhone kucocela labanye tindzaba letimnandzi.
“Ukulungele Yini Kuba Ngumdwebi Webantfu?” (Sicongosekulindza, saSeptember 2020)
Buka kutsi sibonelo lesiseBhayibhelini singasiniketa njani sibindzi sekucocela labanye tindzaba letimnandzi ngisho nobe sisebancane.
Tfola kutsi emalunga emndeni wakho langakase afundze ngaJehova, ungawacocela njani ngeliBhayibheli.
“Kufinyelela Tinhlitiyo Tetihlobo Letingesibo BoFakazi” (Sicongosekulindza, saMarch 15, 2014)
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
