SIFUNDVO 39
Umbono WaNkulunkulu Ngengati
Ingati ibaluleke kakhulu. Kute umuntfu longaphila ngaphandle kwayo. Njengobe anguMdali wetfu, Nkulunkulu unelilungelo lekusitjela kutsi kufanele isetjentiswe njani ingati. Yini layishito ngengati? Ingadliwa yini nobe ifakwe emtimbeni? Ungatenta njani tincumo letikahle kulendzaba?
1. Uyini umbono waJehova ngengati?
Jehova watjela tikhonti takhe tangesikhatsi sekubhalwa kweliBhayibheli kutsi “kuphila kwesilwane kusengatini yaso.” (Levithikhusi 17:14) KuJehova, ingati imelela kuphila. Njengobe kuphila kusipho lesiligugu lesivela kuNkulunkulu, ngako nengati iligugu kakhulu.
2. Yini Nkulunkulu langafuni kutsi yentiwe ngengati?
Jehova wayala tikhonti takhe tangaphambi kwekutsi kucale buKhristu kutsi tingayidli ingati. (Fundza Genesisi 9:4 naLevithikhusi 17:10.) Wawucinisekisa lomyalo ngesikhatsi sigungu lesibusako siyala emaKhritsu kutsi ‘achubeke . . . abalekela ingati.’—Fundza Imisebenti 15:28, 29.
Kusho kutsini kubalekela ingati? Nangabe dokotela akutjela kutsi ungabunatsi tjwala, ngeke uze ubunatse. Bewungakudla yini kudla lokunetjwala nobe ujove ngabo? Bewungeke. Ngendlela lefanako, umyalo waNkulunkulu wekubalekela ingati, usho kutsi akukafeneli sinatse ingati, sidle inyama yesilwane lesingakophiswa kahle nobe sidle kudla lokufakwe ingati.
Kutsiwani ngekwelashwa kusetjentiswa ingati? Letinye tindlela tekwelapha tiyawephula umtsetfo waNkulunkulu. Loku kufaka ekhatsi kufakelwa ingati nobe takhi tayo letinjengema-red cells, ema-white cells, ema-platelets, ne-plasma. Letinye tindlela tekwelapha tingahle tingacaci kahle kutsi tiyawephula yini umtsetfo waNkulunkulu nobe cha. Sibonelo nje, letinye tindlela tekwelapha tisebentisa incenyana yasinye setakhi tengati, kantsi letinye tifaka ekhatsi kwelashwa ngengati yakho. Ngemuva kwekucabanga ngaletindlela, wonkhe umuntfu kufanele atentele sincumo. a—KubaseGalathiya 6:5.
CHUBEKA UFUNISISA
Hlola kutsi nguyiphi indlela yekwelashwa lotayemukela.
3. Khetsa indlela yekwelashwa lejabulisa Jehova
Ungayikhetsa njani indlela yekwelashwa levumelana nembono waNkulunkulu ngengati? Dlala le-VIDEO, bese nicoca ngekubaluleka kwekutsatsa letinyatselo letilandzelako.
-
Thantaza ucele kuhlakanipha.—Jakobe 1:5.
-
Cwaninga ngetimiso teliBhayibheli nendlela letisebenta ngayo.—Taga 13:16.
-
Tfola kutsi ngutiphi tindlela tekwelapha letisetjentiswako lawuhlala khona.
-
Tfola kutsi ngutiphi kuletindlela longeke utisebentise.
-
Ciniseka kutsi sincumo lositsatsako sitakushiya unanembeza lohlantekile.—Imisebenti 24:16. b
-
Yati kutsi kute lokufanele akwentele sincumo etindzabeni letiphatselene nanembeza, kungaba ngumuntfu loshade naye, lomdzala welibandla nobe loyo lofundza naye liBhayibheli.—KubaseRoma 14:12.
-
Kubhale phansi loko lokuncumile kuze labanye bakwati.
4. BoFakazi BaJehova bafuna tindlela tekwelapha letincono kakhulu
Ungakhona kulalela umtsetfo waNkulunkulu lomayelana nengati futsi welashwe ngendlela lencono ngaphandle kwekusebentisa ingati. Dlala le-VIDEO.
Fundza KuThithusi 3:2, bese nicoca ngalombuto:
-
Kungani kufanele sibe nenhlonipho kanye nemoya lophansi nasikhuluma nabodokotela?
|
Lokungakavumeleki |
UmKhristu langatincumela kuko |
|---|---|
|
A. I-Blood plasma |
Tincenyana te-plasma |
|
B. Ema-White cells |
Tincenyana tema-white cells |
|
C. Ema-Platelets |
Tincenyana tema-platelets |
|
D. Ema-Red cells |
Tincenyana tema-red cells |
5. Nakufaka ekhatsi tincenyana tetakhi tengati
Ingati inetakhi letine, ema-red cells, ema-white cells, ema-platelets, ne-plasma. Letakhi tinetincenye letinyenti letincane, letibitwa ngekutsi tincenyana tetakhi tengati. c Letinye tincenyana tisetjentiswa ekwakheni imitsi lesita ekulweni netifo letitsite kanye nasekumiseni kopha.
Nakutiwa endzabeni yetincenyana tetakhi tengati, umKhristu ngamunye kufanele atentele sincumo asebentisa nembeza wakhe loceceshwe ngeliBhayibheli. Labanye bangahle bangavumi kwelashwa ngetincenyana tetakhi tengati, kantsi labanye nembeza wabo ungabavumela kutsi belashwe ngaletincenyana tetakhi tengati.
Cabanga nganangu umbuto nawenta sincumo:
-
Ungamchazela njani dokotela kutsi kungani wala nobe uvuma kusebentisa letinye tincenyana tetakhi tengati?
LOMUNYE ANGASE AKUBUTE: “Kubi ngani kuvuma kufakelwa ingati?”
-
Wena ucabangani?
LOKO LESICOCE NGAKO
Jehova akafuni siyisebentise kabi ingati.
Yini Loyifundzile?
-
Kungani Jehova atsatsa ingati ngekutsi ingcwele?
-
Sati ngani kutsi umyalo waNkulunkulu wekubalekela ingati uyasebenta nasendzabeni yekufakelwa ingati?
-
Ungatenta njani tincumo letikahle endzabeni yekusebentisa ingati nawelashwa?
LOKUNYE LONGAKUHLOLA
Yini lokufanele ucabange ngayo ngaphambi kwekuncuma kutsi utayemukela yini indlela yekwelashwa kusetjentiswa ingati yakho?
“Imibuzo Evela Kubafundi” (Sicongosekulindza, sa-October 15, 2000, lesitfolakala ngesiZulu)
Yini lokufanele ucabange ngayo nawukhetsa kwemukela tincenyana tetakhi tengati?
“Imibuzo Evela Kubafundi” (Sicongosekulindza, sa-June 15, 2004 lesitfolakala ngesiZulu)
Yini leyenta lomunye dokotela wakholelwa kutsi umbono waJehova ngengati uhlakaniphile?
“I Accepted God’s View of Blood” (Phaphama!, yaDecember 8, 2003 letfolakala ngesiNgisi)
Buka kutsi labadzala bemabandla labaseKomidini Lebonisana Netibhedlela babasekela njani bazalwane nabodzadze wabo.
a Buka Sifundvo 35 lesinesihloko lesitsi, “Indlela Yekwenta Tincumo Letikahle.”
b Buka sihlokwana 5 lesitsi “Nakufaka ekhatsi tincenyana tetakhi tengati” neLiphuzu 3, lelinesihloko lesitsi “Tindlela Tekwelashwa Letifaka Ekhatsi Kusebentisa Ingati” kanye kanye neMsebenti WeMbuso waNovember 2006, likhasi 3-6, lotfolakala ngesiZulu.
c Labanye bodokotela batsatsa letakhi letine tengati njengetincenyana tetakhi tengati. Ngako kutawudzingeka uchazele dokotela wakho ngesincumo sakho sekungafakelwa ingati nobe ema-red cells, ema-white cells, ema-platelets, kanye ne-plasma.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
