SIFUNDVO 44
Ngiyo Yonkhe Yini Imicimbi Nemaholidi Lajabulisa Nkulunkulu?
Jehova ufuna sikujabulele kuphila futsi sijabulele imicimbi letsite. Ngiyo yonkhe yini imicimbi nemaholidi lamjabulisako? Singakhombisa njani kutsi siyamtsandza Jehova kulendzaba?
1. Yini leyenta imicimbi leminyenti ingamjabulisi Jehova?
Kungase kukumangalise kutsi imicimbi leminyenti ayikasekelwa eBhayibhelini futsi ivela enkholweni yemanga. Kungenteka ihlobene nemimoya nobe imfundziso yekutsi umphefumulo awufi. Leminye imikhosi isekelwe kuma-superstition nobe enhlanhleni. (Isaya 65:11) Jehova wecwayisa tikhonti takhe: “Nitehlukanise nabo, futsi ningatsintsi lutfo lolungcolile.”—2 KubaseKhorinte 6:17. a
2. Jehova utiva njani ngemicimbi leniketa bantfu ludvumo lolungakabafaneli?
Jehova usecwayisa ngekutsi ‘singabeki litsemba letfu emandleni ebantfu.’ (Fundza Jeremiya 17:5.) Lamanye emaholidi advumisa babusi nobe emasotja. Kantsi lamanye ekudvumisa timphawu telive nobe ekugubha umkhosi wekukhululeka kwelive. (1 Johane 5:21) Ngalamanye emaholidi, bantfu benta imicimbi lesekela tinhlangano tepolitiki kanye naletinye tinhlangano. Jehova angativa njani nasinganiketa bantfu ludvumo nobe inhlangano lengahambisani nekugcwaliseka kwetinjongo takhe ludvumo lolungakabafaneli?
3. Ngutiphi tintfo letingenta imicimbi ingemukeleki?
LiBhayibheli liyakulahla “kunatsa kakhulu, imicimbi lengalawulwa, kanye nekucudzelana ngekunatsa.” (1 Phetro 4:3) Kuleminye imikhosi, bantfu benta ngendlela lengalawuleki futsi batiphatse kabi. Kuze sichubeke sibangani baJehova, kudzingeka siyibalekele imikhuba yekutiphatsa lengcolile.
CHUBEKA UFUNISISA
Tfola kutsi ungamjabulisa njani Jehova ngekwenta tincumo letihlakaniphile endzabeni yemaholidi kanye nemicimbi.
4. Yibalekele imicimbi lengamdvumisi Jehova
Fundza Kubase-Efesu 5:10, bese nicoca ngalemibuto:
-
Yini lokufanele siciniseke ngayo nasikhetsa kutsi sitaligubha yini liholidi lelitsite?
-
Ngumaphi emaholidi lavamise kugujwa lawuhlala khona?
-
Ucabanga kutsi lawo maholidi ayamjabulisa yini Jehova?
Sibonelo nje, uke watibuta yini kutsi Nkulunkulu utsini ngekugujwa kwetinsuku tekutalwa? Kute lapho liBhayibheli likhuluma khona ngesikhonti saJehova lesagubha lusuku lwaso lwekutalwa, kodvwa likhuluma ngebantfu lababili lebebangamkhonti Jehova labatigubha. Fundza Genesisi 40:20-22 naMatewu 14:6-10, bese nicoca ngalemibuto:
-
Ngukuphi kufana lokukhona kulokugujwa kwaletinsuku tekutalwa?
-
Ngekwaletindzaba letimbili letiseBhayibhelini, ucabanga kutsi Nkulunkulu utiva njani ngekugujwa kwetinsuku tekutalwa?
Nobe kunjalo, kungenteka uyatibuta: ‘Jehova unendzaba yini nekutsi ngiyatigubha tinsuku tekutalwa, nobe leminye imikhosi lengakasekelwa eBhayibhelini?’ Fundza Eksodusi 32:1-8, nidlale le-VIDEO, bese nicoca ngalemibuto lelandzelako.
-
Kungani kufanele siciniseke ngaloko lokwemukelwa nguJehova?
-
Singakwenta njani loko?
Indlela lesingati ngayo kutsi umcimbi lotsite awumjabulisi Nkulunkulu
-
Isekelwe etimfundzisweni letingekho eBhayibhelini yini? Kuze utfole imphendvulo, tfola umsuka wawo.
-
Ingabe uniketa bantfu, tinhlangano, nobe timphawu telive ludvumo lolungakafaneli yini? NguJehova kuphela lesimniketa ludvumo, futsi siyetsemba kutsi nguye lotawucatulula tinkinga letisemhlabeni.
-
Lokwentiwa kulemicimbi kuphambene yini netimiso teliBhayibheli? Kufanele sitiphatse ngendlela lehlantekile.
5. Sita bantfu bahloniphe loko lokukholelwako
Kungase kube matima kwala nangabe labanye bakucindzetela kutsi uhlanganyele emicimbini lengamjabulisi Jehova. Bani nesineke nekuhlakanipha njengobe ubachazela ngesincumo sakho. Kuze ubone sibonelo sekutsi ungakwenta njani loku, dlala le-VIDEO.
Fundza Matewu 7:12, bese nicoca ngalemibuto:
-
Ngekusho kwalelivesi, kufanele yini utjele emalunga emndeni wakho langasibo boFakazi kutsi bangaligubhi liholidi lelitsite?
-
Yini longayenta kuze ucinisekise umndeni wakho kutsi ngisho nobe ungabi khona nawugubha emaholidi, solo usawutsandza?
6. Jehova ufuna sijabule
Jehova ufuna sijabulele tikhatsi letimnandzi sikanye nemindeni yetfu kanye nebangani. Fundza Umshumayeli 8:15, bese nicoca ngalombuto:
-
Lelivesi likhombisa njani kutsi Jehova ufuna sijabule?
Jehova ufuna kutsi bantfu bakhe bajabule futsi babe netikhatsi letimnandzi bandzawonye. Dlala le-VIDEO kuze ubone kutsi loku kubonakale njani emihlanganweni yetfu yetive.
Fundza KubaseGalathiya 6:10, bese nicoca ngalemibuto:
-
Kuyadzingeka yini kutsi sigubhe emaholidi kuze ‘sentele labanye lokuhle’?
-
Yini lengakwenta ujabule, kupha ngenca yekutsi liholidi nobe kupha ngobe ufuna kwenta kanjalo?
-
BoFakazi labanyenti ngaletinye tikhatsi bentela bantfwana babo imibutsano nobe babaphe tipho bangakagadzi. Nangabe unebantfwana, ngutiphi letinye tintfo letikhetsekile longabentela tona?
LABANYE BANTFU BATSI: “Akukabaluleki kutsi liholidi lacala kanjani. Lokubalulekile kujabula ndzawonye nemndeni nebangani.”
-
Wena ungatsini?
LOKO LESICOCE NGAKO
Jehova ufuna sibe nesikhatsi sekujabula nemindeni yetfu nebangani, kodvwa ufuna siyibalekele imicimbi lengamjabulisi.
Yini Loyifundzile?
-
Ngumiphi imibuto lesingatibuta yona kuze sibone kutsi umcimbi lotsite uyamjabulisa yini Jehova?
-
Singayisita njani imindeni yetfu nebangani kutsi bacondze sincumo setfu endzabeni yemaholidi?
-
Wati njani kutsi Jehova ufuna sijabule?
LOKUNYE LONGAKUHLOLA
Fundza ngalamanye emaholidi emaKhristu langawagubhi.
“Yini Leyenta BoFakazi BaJehova Bangawagubhi Emaholidi?” (Sihloko lesiku-internet)
Fundza ngetizatfu letine letisenta siciniseke kutsi kugubha tinsuku tekutalwa akumjabulisi Nkulunkulu?
“Yini Leyenta BoFakazi BaJehova Bangatigubhi Tinsuku Tekutalwa?” (Sihloko lesiku-internet)
Buka kutsi lomunye losemusha wakuncoba njani kuhlekwa esikolweni ngenca yekutsi bakangamgubhi Khisimusi.
Tigidzi temaKhristu tikhetse kungamgubhi Khisimusi. Ativa njani ngalesincumo sawo?
“Bathola Okuncono KunoKhisimusi” (Sicongosekulindza, saDecember 1, 2012 lesitfolakala ngesiZulu)
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
