SIFUNDVO 47
Sewukulungele Yini Kubhajatiswa?
Setinyenti tintfo lotifundzile ngaJehova njengobe utadisha liBhayibheli. Kungenteka wente lushintjo nasendleleni lophila ngayo ngenca yaloko lokufundzile. Nobe kunjalo, kungenteka kunaletinye tizatfu letikwenta utive shengatsi usengakakulungeli kutinikela futsi ubhajatiswe. Kulesifundvo sitawucoca ngetintfo letivamile letingakuvimba kutsi ubhajatiswe nekutsi ungatincoba njani.
1. Kungakanani lokufanele ukwati ngaphambi kwekutsi ubhajatiswe?
Kuze ubhajatiswe, kudzingeka ube “nelwati lolungulonalona lweliciniso.” (1 KuThimothi 2:4) Loko akusho kutsi kufanele wati tonkhe timphendvulo temibuto bantfu labangahle bakubute yona mayelana neliBhayibheli ngaphambi kwekutsi ubhajatiswe. Ngisho nemaKhristu lasanesikhatsi lesidze abhajatisiwe achubeka afundza. (KubaseKholose 1:9, 10) Nobe kunjalo, udzinga kwati timfundziso letisisekelo teliBhayibheli. Labadzala belibandla batakusita utfole kutsi unelwati lolwenele yini.
2. Ngutiphi letinye tinyatselo lokufanele utitsatse ngaphambi kwekutsi ubhajatiswe?
Ngaphambi kwekutsi ubhajatiswe, kufanele ‘uphendvuke . . . futsi ugucuke.’ (Fundza Imisebenti 3:19.) Loko kusho kutsi utisola kakhulu ngetono lotente esikhatsini lesendlulile futsi ucela Jehova kutsi akucolele. Kuphindze kusho kutsi uyilahle yonkhe imikhuba lemibi futsi utimisele kuphila ngendlela lejabulisa Nkulunkulu. Ngetulu kwaloko, uba khona emihlanganweni yelibandla uphindze uhlanganyele emsebentini wekushumayela njengemmemeteli longakabhajatiswa.
3. Kungani kungakafaneli uvumele kwesaba kukuvimbe?
Labanye bayesaba kutsi ngeke bakhone kukwenta loko labakwetsembise Jehova. Kuliciniso kutsi ngaletinye tikhatsi utawenta emaphutsa njengemadvodza nebafati labetsembekile lokukhulunywa ngabo eBhayibhelini. Jehova akakalindzeli kutsi tikhonti takhe tingawenti emaphutsa. (Fundza Tihlabelelo 103:13, 14.) Uyajabula nawenta konkhe lokusemandleni akho, futsi utakusita! Ecinisweni Jehova uyasicinisekisa kutsi kute ‘lokutasehlukanisa nelutsandvo [lwakhe]’.—Fundza KubaseRoma 8:38, 39.
CHUBEKA UFUNISISA
Tfola kutsi kwati Jehova kancono nekwemukela lusito lwakhe, kungakusita njani uncobe tintfo letikuvimbela kutsi ubhajatiswe.
4. Mati kancono Jehova
Kufanele umati kahle kangakanani Jehova ngaphambi kwekutsi ubhajatiswe? Kufanele umati ngalokwanele kutsi ungamtsandza futsi ufune kumjabulisa. Dlala le-VIDEO kuze ubone kutsi bantfu labatadisha liBhayibheli emhlabeni wonkhe bakwente njani loko, bese nicoca ngalemibuto lelandzelako.
-
Kule-video, yini lesite labantfu kutsi babhajatiswe?
Fundza KubaseRoma 12:2, bese nicoca ngalemibuto:
-
Kukhona yini kungabata lonako ngaloko lokufundziswa liBhayibheli nobe uyangabata kutsi loko lokufundziswa BoFakazi BaJehova kuliciniso?
-
Nangabe kunjalo, yini longayenta?
5. Ncoba tintfo letingakuvimbela kutsi ubhajatiswe
Sonkhe sibhekana netinkinga nasikhetsa kutinikela kuJehova futsi sibhajatiswe. Kuze utfole sibonelo, dlala le-VIDEO, bese nicoca ngalemibuto lelandzelako.
-
Kule-video, ngutiphi tinkinga Narangerel lokwadzingeka atincobe kuze akhonte Jehova?
-
Indlela lamtsandza ngayo Jehova yamsita njani kutsi ancobe letinkinga?
Fundza Taga 29:25 na-2 KuThimothi 1:7, bese nicoca ngalombuto:
-
Yini lesenta sibe nesibindzi sekuncoba tinkinga?
6. Yetsembela kuJehova kuze akusite
Jehova utakusita kutsi umjabulise. Dlala le-VIDEO, bese nicoca ngalemibuto lelandzelako.
-
Kule-video, yini leyavimba lomfundzi weliBhayibheli kutsi abhajatiswe?
-
Yini layifundza leyamsita wacinisa kwetsembela kwakhe kuJehova?
Fundza Isaya 41:10, 13, bese nicoca ngalombuto:
-
Yini lengakwenta uciniseke kutsi utasifeza setsembiso losenta nawutinikela?
7. Julisa kubonga kwakho ngendlela Jehova lakutsandza ngayo
Nawuhlale ucabanga ngendlela Jehova lakutsandza ngayo, utawuhlale ubonga futsi ufune kumkhonta kuze kube phakadze. Fundza Tihlabelelo 40:5, bese nicoca ngalombuto:
-
Ngutiphi tibusiso lotibonga ngalokukhetsekile letivela kuJehova?
Umphrofethi Jeremiya bekamtsandza kakhulu Jehova nelivi lakhe, futsi bekabonga kakhulu ngelilungelo lekubitwa ngeligama lakhe. Watsi: “Emavi akho . . . enta inhlitiyo yami yajabula kakhulu futsi yatfokota, ngoba ngibitwa ngelibito lakho, wena Jehova Nkulunkulu.” (Jeremiya 15:16) Phendvula lemibuto:
-
Yini leyenta kuba nguFakazi waJehova kube lilungelo lelikhetsekile?
-
Uyafuna yini kubhajatiswa kuze ube ngulomunye waBoFakazi BaJehova?
-
Kukhona yini lokukuvimbako kutsi wente njalo?
-
Ucabanga kutsi yini lokudzingeka uyente kuze ugcine ubhajatisiwe?
LABANYE BANTFU BATSI: “Ngiyesaba kutsi ngeke ngikhone kukwenta konkhe lengetsembise kukwenta nangibhajatiswa.”
-
Utiva kanjalo yini nawe?
LOKO LESICOCE NGAKO
Ngekusitwa nguJehova, ungancoba nobe ngabe yini lekuvimba kutsi ubhajatiswe.
Yini Loyifundzile?
-
Kudzingeka wati lokungakanani ngeliBhayibheli kuze ubhajatiswe?
-
Nguluphi lushintjo lokutawudzingeka kutsi ulwente ngaphambi kwekutsi ubhajatiswe?
-
Kungani kungakafaneli uvumele kwesaba kutsi kukuvimbe?
LOKUNYE LONGAKUHLOLA
Tfola kutsi kufanele sisekelwe kuphi sincumo sakho sekubhajatiswa.
“Ukulungele Yini Kubhajatiswa?” (Sicongosekulindza, saMarch 2020)
Tfola kutsi ungatincoba kanjani tinkinga letitsite letingakuvimbela kutsi ubhajatiswe.
‘Yini Lengivimbela Kutsi Ngibhajatiswe?’ (Sicongosekulindza, saMarch 2019)
Tfola kutsi lendvodza yatincoba njani tinkinga letinkhulu letatiyivimba kutsi ibhajatiswe.
Ekucaleni, indvodza lokutsiwa ngu-Ataa beyingabata kubhajatiswa. Tfola kutsi yini leyamsita watsatsa lesinyatselo lesibalulekile.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
