Emaphuzu
1. Indlela Yekubona IBhabhulona Lenkhulu
Sati njani kutsi “iBhabhulona Lenkhulu” imelela tonkhe tinkholo temanga? (Sembulo 17:5) Cabanga nganaku lokulandzelako:
-
Ikhona emhlabeni wonkhe. IBhabhulona Lenkhulu kutsiwa ihleti ‘etikweticumbi tebantfu netive.’ ‘Ibusa etikwemakhosi emhlaba.’—Sembulo 17:15, 18.
-
Ayisiwo umbuso wetepolitiki nobe tekutsengiselana. “Emakhosi emhlaba” ‘nebatsengisi’ bayasindza nayibhujiswa.—Sembulo 18:9, 15.
-
Immelela kabi Nkulunkulu. Ibitwa ngekutsi yingwadla ngobe isebentisana nabohulumende kuze itfole imali nobe letinye tintfo letidzingako. (Sembulo 17:1, 2) Idukisa bantfu bato tonkhe tive futsi ibe nesandla ekubulaweni kwebantfu labanyenti.—Sembulo 18:23, 24.
2. Bekatawuvela Nini Mesiya?
LiBhayibheli laphrofetha kutsi bekatawuvela ngemuva kwemaviki langu-69.—Fundza Danyela 9:25.
-
Acala nini lamaviki langu-69? Ngemnyaka wa-455 B.C.E. Ngaleso sikhatsi, uMbusi Nehemiya wefika eJerusalema ‘kuze atewuvusetela futsi akhe kabusha’ lelidolobha.—Danyela 9:25; Nehemiya 2:1, 5-8.
-
Atsatsa sikhatsi lesidze kangakanani lamaviki langu-69? Kuletinye tiphrofetho teliBhayibheli, lilanga limelela umnyaka. (Numeri 14:34; Hezekeli 4:6) Loku kusho kutsi liviki linye, limelela iminyaka lengu-7. Kulesiphrofetho, emaviki langu-69 akha iminyaka lengu-483 (emaviki langu-69 x 7 wemalanga).
-
Aphela nini lamaviki langu-69? Nasisuka ku-455 B.C.E. sibala iminyaka lengu-483 sifika emnyakeni wa-29 C.E. a Lona ngumnyaka Jesu labhajatiswa ngawo futsi waba nguMesiya!—Lukha 3:1, 2, 21, 22.
3. Tindlela Tekwelashwa Letifaka Ekhatsi Kusebentisa Ingati
Kunetindlela tekwelashwa letisebentisa ingati yalomuntfu lowelashwako. Letinye tato atemukeleki kumaKhristu. Sibonelo nje, labanye bantfu banikela ngengati yabo nobe ibekwe kuze isetjentiswe ngemuva kwemaviki lambalwa nasekahlindvwa. Kodvwa emaKhristu akukafaneli akwente loko.—Dutheronomi 15:23.
Nobe kunjalo, letinye tindlela tekwelashwa tingemukeleka. Letindlela tifaka ekhatsi kuhlola simo sakho sengati, i-hemodialysis, i-hemodilution, nobe kusetjentiswa kwemshini we-cell-salvage nobe we-heart-lung bypass. UmKhristu ngamunye kufanele atikhetsele kutsi ingati yakhe itawusetjentiswa njani nakelashwa, nakenta i-medical test nobe enta i-current therapy. Dokotela ngamunye welapha ngendlela leyehlukile kunalabanye bodokotela. Ngako ngaphambi kwekwemukela nobe ngabe nguyiphi indlela yekuhlindvwa, i-medical test nobe i-therapy, umKhristu kufanele ati kutsi yini letawukwentiwa ngengati yakhe. Cabanga ngalemibuto lelandzelako:
-
Ngitawukwenta njani nangabe ingati yami iphambukiswa emtimbeni wami futsi kuhamba kwayo kuphazamiseke kwesikhashana? Nembeza wami utangivumela yini kutsi ngiphindze ngiyemukele emtimbeni wami nobe kutawudzingeka kutsi itfululelwe “emhlabatsini”?—Dutheronomi 12:23, 24.
-
Ngitawukwenta njani nangabe nangiselashwa ingati yami itawukhishwa kuze ilungiswe iphindze ibuyiselwe kimi? Lendlela yekwelashwa ngitayemukela yini nobe itawulimata nembeza wami loceceshwe liBhayibheli?
4. Kuhlala Ngekwehlukana Kwebantfu Labashadile
LiBhayibheli aliyivumeli indvodza nemfati kutsi bahlale ngekwehlukana futsi likwenta kucace kutsi kuhlala ngekwehlukana akusho kutsi sebangaphindze bashade nalabanye bantfu. (1 KubaseKhorinte 7:10, 11) Nobe kunjalo, kunetimo letente lamanye emaKhristu lashadile ahlala ngekwehlukana.
-
Kungafuni kondla ngemabomu: Indvodza ayifuni kondla umndeni wayo kangangekutsi uze weswele tintfo letisidzingo kuze uchubeke uphila.—1 KuThimothi 5:8.
-
Kuhlukubetwa kamatima: Kuhlukubetwa kungabeka kuphila kwamunye walabashadile engotini.—KubaseGalathiya 5:19- 21.
-
Nangabe buhlobo umuntfu lanabo naJehova busengotini: Loyo loshade naye ukwenta kube matima kutsi ukhonte Jehova.—Imisebenti 5:29.
5. Emaholide Nemicimbi
EmaKhristu akawagumbi emaholide langamjabulisi Jehova. UmKhristu ngamunye kufanele asebentise nembeza wakhe loceceshwe liBhayibheli kuze ancume kutsi utawukwenta njani nangabe labanye bagubha emaholide. Cabanga nganati tibonelo letimbalwa.
-
Lotsite ukufisela kutsi ube neliholide lelihle. Ungase utsi, “Ngiyabonga.” Nangabe lomuntfu afuna kwati lokunyenti, ungamchazela kutsi kungani ungaligubhi leliholide.
-
Loshade naye, longasuye Fakazi waJehova, ukumema kutsi niyokudla netihlobo ngeliholide lelitsite. Ungaya nangabe nembeza wakho ukuvumela, kodvwa ungachazela loyo loshade naye ngusengaphambili kutsi nangabe kutawukwentiwa emasiko laphambene naloko lokushiwo liBhayibheli ngeke uze uhlanganyele kuwo.
-
Ngesikhatsi semaholide, umchashi wakho ukunika ibhonasi. Kufanele uyale yini? Akudzingeki uyale. Umchashi wakho utsatsa lebhonasi njengencenye yekugubha emaholide yini nobe njengendlela yekukubonga ngemsebenti wakho lomuhle?
-
Umuntfu lotsite ukupha sipho ngesikhatsi semaholide. Lolokupha lesipho angase atsi: “Ngiyati kutsi awuligubhi leliholide kodvwa ngicela kukupha naku.” Kungenteka nje lomuntfu unemusa. Ngakulokunye, sikhona yini sizatfu lesingakwenta ucabange kutsi uvivinya kukholwa kwakho nobe uzama kukwenta uhlanganyele ekugubheni leliholide? Ngemuva kwekucabanga ngaloku, kutawuba kuwe kutsi uyasemukela yini lesipho. Kuto tonkhe tincumo lesitentako, sifuna kuba nanembeza lohlantekile futsi setsembeke kuJehova.—Imisebenti 23:1.
6.Tifo Letitsatselwanako
Ngenca yekutsi siyabatsandza bantfu, siyacaphela kutsi singabatseleli tifo letitsatselwanako. Ngako nasati kutsi sinesifo lesitsatselwanako nobe sicabanga kutsi sinaso, nekutsi singasitselela labanye, kufanele sicaphelisise. Loku sikwenta ngobe liBhayibheli liyasiyala, litsi: “Kufanele utsandze makhelwane wakho njengobe utitsandza wena.”—KubaseRoma 13:8-10.
Umuntfu lonesifo lesitsatselwanako angakhombisa njani kutsi uyabatsandza labanye? Akukafaneli ente tintfo letikhombisa lutsandvo njengekuhaga nobe kucabuza. Akukafaneli aphatseke kabi nangabe labanye bangammemi emitini yabo ngenca yekutsi bafuna kuvikela imindeni yabo. Ngaphambi kwekutsi abhajatiswe, kufanele atise umchumanisi wesigungu salabadzala ngalesifo sakhe kuze kutowentiwa emalungiselelo ekutsi abhajatiswe ngendlela letovikela labanye. Ngaphambi kwekutsi aganane nalotsite, loyo lokungenteka unesifo lesitsatselwanako kufanele ayohlola simo sakhe sengati ngekutitsandzela. Ngekwenta njalo, ukhombisa kutsi unendzaba nalabanye ‘futsi akaticabangeli yena kuphela kodvwa ucabangela nalabanye.’—KubaseFiliphi 2:4.
7. Temabhizinisi Netindzaba Temtsetfo
Singavikela tinkinga letinyenti ngekutsi sibhale phansi tonkhe tivumelwane tetimali ngisho nobe letivumelwane sitente nalomunye umKhristu. (Jeremiya 32:9-12) Nobe kunjalo, ngaletinye tikhatsi emaKhritsu angaba netinkinga nalamanye emaKhristu, ngetindzaba tetimali nobe letinye tintfo. Kufanele balungise letinkinga ngekushesha, ngekuthula futsi babodvwana.
Ngako kufanele sitilungise njani tinkinga letinkhulu njengekukhwabanisa nobe kukhulunywa kabi? (Fundza Matewu 18:15-17.) Jesu washo tintfo letintsatfu lokufanele sitente:
-
Yetamani kucatulula lenkinga ninobabili.—Buka vesi 15.
-
Nangabe loko kungasebenti, cela munye nobe babili labavutsiwe ebandleni kutsi bahambe nawe.—Buka vesi 16.
-
Nangabe lenkinga ingalungi, sewungaya kulabadzala belibandla.—Buka vesi 17.
Etimeni letinyenti, akukafaneli simikise bazalwane betfu etikantolo, ngoba loko kungenta bantfu bacabange kabi ngaJehova nangelibandla. (1 KubaseKhorinte 6:1-8) Nobe kunjalo, tikhona letinye tintfo letidzinga kulungiswa enkantolo: njengedivosi, kutsi ngubani lotawunakekela bantfwana, imali yekondla, imali yemshwalensi, tindzaba tema-bankruptcy nobe kuhlola kutsi kwabiwa kwemafa kusenjengobe kwabhalwa yini. UmKhristu losebentisa inkantolo kuze acatulule tinkinga letinjengaleti ngekuthula, kute simiso seliBhayibheli lasephulako.
Nangabe kunelicala lelikhulu, njengekudlwengula, kuhlukubeta umntfwana, kushaywa, kweba lokukhulu nobe kubulala, umKhristu kute simiso seliBhayibheli lasephulako nakabika letindzaba leti kubemtsetfo.
a Kutsatsa iminyaka lengu-454 kusuka ku-455 B.C.E. kuye ku-1 B.C.E. Ngumnyaka munye kusuka ku-1 B.C.E. kuye ku-1 C.E. (bekute umnyaka longu-zero). Ngako kutsatsa iminyaka lengu-28 kusuka ku-1 C.E. kuye ku-29 C.E. Nasihlanganisa iminyaka lengu-454, umnyaka munye, neminyaka lengu-28 sitfola iminyaka lengu-483.
