1-3. (a) Yini leyenta umphostoli Pawula akhatsateke kakhulu nakafika e-Athene? (b) Yini lesingayifundza nasidadisha sibonelo saPawula?

 PAWULA ukhatsateke kakhulu. Use-Athene, eGrisi, lokuyindzawo yetemfundvo, lapho Socrates, Plato kanye na-Aristotle bake bafundzisa khona. I-Athene lidolobha leligcwele bantfu labatsandza inkholo. Kuyo yonkhe indzawo lapho abuka khona, Pawula utungeletwe ngemathempeli etindzaweni tawonkhewonkhe kanye nasemigwacweni. Ubona tithico letinyenti ngobe bantfu base-Athene bakhonta bonkulunkulu labanyenti. Pawula uyati kutsi Jehova, longuNkulunkulu weliciniso, utiva njani ngekukhonta tithico. (Eks. 20:4, 5) Lomphostoli lowetsembekile utiva ngendlela Jehova lativa ngayo ngetithico​—uyatenyanya!

² Loko Pawula lakubona nakangena emakethe kwametfusa kakhulu. Ekoneni lelisenyakatfo nenshonalanga, ngasegedeni lelikhulu lekungena kunetithico letinkhulu tankulunkulu Hemisi longcunu. Kulemakethe kugcwele tindzawo tekukhontela. Lomphostoli loshisekako utawushumayela njani kulendzawo legcwele kukhontwa kwetithico lokungaka? Utawukhona yini kulawula indlela lativa ngayo futsi atfole loko labavumelana ngako nalabantfu balendzawo? Utawuphumelela yini ekubasiteni bafune Nkulunkulu weliciniso futsi bamtfole?

³ Inkhulumo yaPawula kulamadvodza lafundze kakhulu ase-Athene, njengobe ibhalwe encwadzini yeMisebenti 17:22-31, isibonelo sekutsi bekasikhulumi lesihle, anelikhono kanye nekucondza. Ngekudadisha sibonelo saPawula singafundza lokunyenti ngendlela yekutfola lesivumelana ngako, kuze sisite labo labasilalele bacabange.

4, 5. Pawula washumayela ngakuphi ne-Athene, futsi nguyiphi inkinga layitfola kulabo labamlalela?

⁴ Pawula wavakashela i-Athene eluhambeni lwakhe lwesibili asitfunywa selivangeli, cishe nga-50 C.E. a Njengobe bekamele boSilasi naThimothi  kutsi befike babuya eBheriya, Pawula “wacala kubonisana nemaJuda lebekasesinagogeni,” njengobe bekahlale enta. Waphindze waya emakethe kuze afune bantfu base-Athene labangasiwo emaJuda. (Imis. 17:17) Imakethe yase-Athene beyicishe ibe ngema-hactare langu-5 futsi beyisenyakatfo nenshonalanga ye-Acropolis. Lemakethe beyingasiyo indzawo yekutsenga nekutsengisa nje kuphela, kodvwa beyiphindze ibe yindzawo lapho bantfu bebahlangana khona. Lenye incwadzi iveta kutsi kulendzawo kulapho bekutfolakala khona “tekutsengiselana, tepolitiki netindzaba temasiko takulelidolobha.” Bantfu base-Athene bebatsandza kuhlangana lapho kuze bacoce ngetindzaba temfundvo.

⁵ Bantfu Pawula labatfola kulemakethe bebangafuni kulalela. Kulabantfu lebebalalele Pawula bekunema-Ephikhuri nemaStoyiki, lokungemalunga etikolwa tefilosofi letingevani. b Ema-Ephikhuri bekakholelwa kutsi kuphila kwaba khona ngengoti. Kuphila bekakutsatsa kanje: “Kute lokufanele kwesatjwe kuNkulunkulu, Kute longakuva ekufeni; Buhle bungafinyeleleka; Bubi bungabeketeleleka.” EmaStoyiki bewagcizelela kuba nengcondvo kanye nemgomo lotsite futsi bewangakholelwa kutsi Nkulunkulu unguMuntfu. Omabili lamacembu, ema-Ephikhuri kanye nemaStoyiki, bekangakholelwa ekuvusweni kwebantfu labafile, loko lebekufundziswa bafundzi baKhristu. Kuyacaca kutsi imibono yefilosofi yalamacembu lamabili beyishayisana nemaciniso laphakeme ebuKhristu mbamba, lawo Pawula bekashumayela ngawo.

6, 7. Bantfu labafundze kakhulu labangemaGriki benta njani nabeva loko Pawula bekakufundzisa, futsi loko kufana njani netintfo bantfu labatishoko ngaboFakazi lamuhla?

⁶ Letifundziswa letingemaGriki tenta njani nativa loko Pawula bekakufundzisa? Labanye bebambita ngeligama lelitsi ‘incavitsi.’ (Imis. 17:18) Lesinye sati sisho naku ngaleligama lesiGriki: “Leligama lacala kusetjentiswa enyonini lencane lebeyihambahamba icobonga lokutinhlavu futsi ngekuhamba kwesikhatsi lase lisetjentiswa kubantfu labahamba badobha kudla kanye naletinye tintfo emakethe. Lagcine selisetjentiswa ngekwemfanekiso kuze kuchazwe umuntfu lohamba abutsa imininingwane, ikakhulukati longati kutsi angayihlanganisa njani kuze kuphume intfo lenengcondvo.” Ecinisweni lamadvodza bewatsi Pawula ungumuntfu longati lutfo lohamba aphindzaphindza tintfo lative kulabanye. Nobe kunjalo, lokwetfukwa akuzange kumesabise Pawula njengobe sitawubona.

⁷ Kwenteka intfo lefanako nalamuhla. Njengobe siBoFakazi BaJehova, esikhatsini lesinyenti bantfu bayasetfuka nobe basibite ngemagama lamabi ngenca yetinkholelo tetfu letisekelwe eBhayibhelini. Sibonelo nje, labanye bothishela bafundzisa kutsi kutigucukela kwemvelo kuliciniso futsi batsi nangabe uhlakaniphile, kufanele ukukholelwe. Ecinisweni baze batsi labo labangakukholelwa kutigucukela kwemvelo abakahlakaniphi. Letifundziswa tenta bantfu bacabange kutsi tsine boFakazi sihamba sibutsa kwatiswa lesingakwati nekukusebentisa nasiveta loko liBhayibheli lelikushoko nanasiveta bufakazi bekutsi tonkhe tintfo tadalwa. Nobe kunjalo, loko akusetfusi. Kunaloko, sikhuluma ngesibindzi nasivikela tinkholelo tetfu tekutsi kuphila emhlabeni kwaba khona ngeMdali lohlakaniphile, Jehova Nkulunkulu.​—Semb. 4:11.

8. (a) Labanye bantfu benta njani nabeva loko Pawula bekakhuluma ngako? (b) Kungenteka bekushoni kumikiswa kwaPawula e-Ariyophagusi? (Buka umbhalo longentasi ekhasini 142.)

 ⁸ Labanye nabeva Pawula ashumayela emakethe benta ngendlela leyehlukile. Batsi, “Kubonakala shengatsi umemetela bonkulunkulu labangatiwa.” (Imis. 17:18) Pawula wakhuluma ngabonkulunkulu labasha yini vele kulabantfu base-Athene? Lena bekuyindzaba lematima lefana naleyo Socrates labekwa licala ngayo futsi wagwetjelwa kufa eminyakeni leminyenti leyendlulile. Akumangalisi kutsi Pawula wamikiswa e-Ariyophagusi futsi wacelwa kutsi achaze letimfundziso lebetingakajwayeleki kubantfu base-Athene. c Bekatawuvikela njani lomlayeto wakhe kubantfu lebebangaketayelani nemiBhalo?

9-11. (a) Pawula wetama njani kutfola lavumelana ngako nalabo lebebamlalele? (b) Singasilingisa njani sibonelo saPawula nasisemsebentini wetfu wekushumayela?

⁹ Khumbula kutsi Pawula wakhatsateka kakhulu ngekukhontwa kwetithico  lakubona. Kunekutsi ahlasele lokukhontwa kwaletithico, wehlisa umoya. Ngekuhlakanipha lokukhulu, wetama kufuna loko labavumelana ngako netilaleli takhe. Wacala ngemavi latsi: “Bantfu base-Athene, ngiyabona kutsi kuto tonkhe tintfo nine nitinikele kakhulu kwendlula labanye ekukhonteni bonkulunkulu.” (Imis. 17:22) Ngalamanye emavi, Pawula bekatsi, ‘Ngiyabona kutsi nibantfu labakholwa kakhulu.’ Ngekuhlakanipha, Pawula wabancoma ngekutsi babantfu labatsandza inkholo. Bekabona kutsi labanye labayengwe yinkholo yemanga, kungenteka banetinhlitiyo letitsandza liciniso. Ngetulu kwaloko, Pawula bekati kutsi ngisho naye wake wentiswa ‘kungati futsi bekangakholwa.’​—1 Thim. 1:13.

¹⁰ Asusela kuloko labavumelana ngako, Pawula waveta kutsi bekabone bufakazi bekukholwa kwebantfu base-Athene ngobe bebaneli-al’thare labalinikele “Kunkulunkulu Longatiwa.” Ngekusho kwalomunye umtfombo, “bekuyintfo leyetayelekile ngemaGriki kanye nalabanye kutsi babe nema-al’thare labawanikele ‘kubonkulunkulu labangatiwa,’ ngobe besaba kutsi kunankulunkulu lokungenteka abamkhonti futsi angahle abatfukutselele.” Ngekutsi babe nalama-al’thare, bantfu base-Athene bebavuma kutsi ukhona Nkulunkulu labangamati. Pawula wasebentisa kuba khona kwaleli-al’thare kuze ente singeniso nakakhuluma ngetindzaba letimnandzi lebekatishumayela. Wachaza: “Ngako loko lenikukhonta ningakwati, ngiko lelengikumemetela kini.” (Imis. 17:23) Indlela Pawula labonisana nabo ngayo beyingabagceki kodvwa beyinemandla. Bekangashumayeli kubo ngankulunkulu lomusha nobe longatiwa njengobe labanye bebasho. Bekabachazela ngaNkulunkulu bona lebebangamati​—Nkulunkulu weliciniso.

¹¹ Singasilingisa njani sibonelo saPawula emsebentini wetfu wekushumayela? Nangabe sinakisisa, singabona bufakazi bekutsi umuntfu lotsite uyayitsandza inkholo, mhlawumbe ngekunaka intfo letsite lemelela inkholo, lokungenteka uyigcokile, isendlini yakhe nobe ebaleni lakhe. Singase sitsi: ‘Ngiyabona kutsi ungumuntfu lokholwako. Bengifisa kukhuluma nemuntfu loyitsandzako inkholo.’ Ngekuvuma ngekuhlakanipha kutsi lomuntfu uyayitsandza inkholo, singatfola lokutsite lesivumelana ngako kuze sicalise incociswano. Khumbula kutsi umgomo wetfu akusiko kwehlulela labanye ngenca yetinkholelo tabo. Labanyenti lesikholwa nabo bake baba senkholweni yemanga.

12. Pawula wayishintja njani indlela lebekakhuluma ngayo naletilaleli takhe?

¹² Njengobe Pawula besekakutfolile loko lebebavumelana ngako, bekatawuchubeka yini akusebentisa kuze anikete bufakazi? Njengobe bekati kutsi tilaleli takhe betifundziswe ifilosofi yemaGriki futsi tingakajwayelani nemiBhalo, washintja indlela yakhe yekushumayela tikhatsi letinyenti. Kwekucala, waveta timfundziso teliBhayibheli ngaphandle kwekucaphuna ngalokucondzile emiBhalweni. Kwesibili, watifanisa netilaleli takhe ngekutsi asebentise ligama lelitsi “kitsi.” Kwesitsatfu, wacaphuna etincwadzini tesiGriki kuze abakhombise kutsi letinye tintfo lebekafundzisa ngato betibhaliwe etincwadzini tabo. Nyalo asesihlolisise lenkhulumo yaPawula lenemandla. Ngumaphi emaciniso labalulekile lawaveta ngaNkulunkulu lebebangawati bantfu base-Athene?

13. Yini Pawula layichaza ngemvelaphi yato tonkhe tintfo, futsi emavi akhe bewasho kutsini?

 ¹³ Nkulunkulu wadala indzawo yonkhe. Pawula watsi: “Nkulunkulu lowadala umhlaba nako konkhe lokukuwo, loyiNkhosi yelizulu nemhlaba, akahlali emathempelini lentiwe ngetandla.” d (Imis. 17:24) Konkhe lokukhona akuzange kube khona ngengoti. Nkulunkulu weliciniso unguMdali wato tonkhe tintfo. (Hla. 146:6) Ngalokungafani na-Athena nobe labanye bonkulunkulu inkhatimulo yabo letfolakala ethempelini, etindzaweni tekukhontela nobe ema-al’thare, iNkhosi Lephakeme leyadala emazulu nemhlaba ayihlali emathempelini lakhiwe ngetandla. (1 Khos. 8:27) Lomlayeto waPawula bewucacile: Nkulunkulu weliciniso mkhulu kakhulu kunanobe ngutiphi tithico letakhiwe bantfu naletihlala emathempelini lakhiwe bantfu.​—Isa. 40:18-26.

14. Pawula wakhombisa njani kutsi Nkulunkulu akadzingi lutfo kubantfu?

¹⁴ Kute Nkulunkulu lakudzinga kubantfu. Labantfu lebebakhonta tithico bebavamise kutigcokisa timphahla letinhle, batiphe tipho letidulile nobe batiletsele kudla nekwekunatsa, kube ngatsi letithico betitidzinga letintfo! Nobe kunjalo, letinye tati tefilosofi letingemaGriki lebetilalele Pawula, kungenteka betati kutsi bonkulunkulu bebangeke badzinge lutfo kubantfu. Nangabe kunjalo, kungenteka kutsi betivumelana nemavi aPawula latsi, Nkulunkulu “akadzingi kusitwa bantfu shengatsi kukhona lakweswele.” Kuliciniso kutsi kute intfo lephatsekako bantfu labangayiniketa uMdali! Kunaloko, yena uniketa bantfu loko labakudzingako​—“kuphila, umoya, nato tonkhe tintfo,” letifaka ekhatsi lilanga, imvula kanye nemhlabatsi lokhicitako. (Imis. 17:25; Gen. 2:7) Ngako Nkulunkulu, uMuphi, akadzingi lutfo kubantfu labaphiwako.

15. Pawula wayisingatsa njani indzaba yekutsi bantfu base-Athene bebakholelwa kutsi bancono kakhulu kunebantfu labangasiwo emaGriki, futsi ngusiphi sifundvo lesibalulekile lesisifundzako esibonelweni sakhe?

¹⁵ Nkulunkulu wadala bantfu. Bantfu base-Athene bebakholelwa kutsi bancono kunebantfu labangasiwo emaGriki. Nobe kunjalo, kutigcabha ngebuve nobe  buhlanga akuvumelani neliciniso leliseBhayibhelini. (Dut. 10:17) Pawula waveta lendzaba ngebuciko nangelikhono. Nakatsi, ‘[Nkulunkulu] watenta tonkhe tive ngemuntfu munye,’ asingabati kutsi wenta tilaleli takhe tacabanga. (Imis. 17:26) Pawula bekabhekisela ku-Adamu, loyo bonkhe bantfu labavela kuye. (Gen. 1:26-28) Njengobe bonkhe bantfu bavela kukhokho munye, kute luhlanga nobe sive lesincono kunalesinye. Kute lebekangeke awutfole umcondvo waloko bekushiwo nguPawula. Sibonelo sakhe sisifundzisa sifundvo lesibalulekile. Ngisho nobe sifuna kushumayela ngebuciko futsi sicabangele, asifuni kululata emaciniso eliBhayibheli kuze nje bantfu bawemukele.

16. Iyini injongo yeMdali ngebantfu?

¹⁶ Injongo yaNkulunkulu bekukutsi bantfu basondzele kuye. Ngisho nobe tati tefilosofi lebetilalele Pawula besekusikhatsi lesidze tiphikisana ngenjongo yekuba khona kwebantfu, betingeke tikhone kuyichaza ngendlela leyenetisako. Nobe kunjalo, Pawula waveta ngalokucacile kutsi injongo yeMdali ngebantfu ikutsi “bafune Nkulunkulu ngekutimisela futsi bamtfole, nanobe ecinisweni angekho khashane kuloyo naloyo kitsi.” (Imis. 17:27) Labantfu base-Athene bebangakhona kumati loNkulunkulu lebebasengakamati. Ecinisweni, akekho khashane nalabo labamfunako futsi labafuna kufundza ngaye. (Hla. 145:18) Naka kutsi Pawula usebentisa ligama lelitsi “kitsi,” ngaleyondlela uyatifaka kulabo labadzinga “kufuna” nobe “kuphenyisisa” kuze batfole Nkulunkulu.

17, 18. Yini lokufanele yente bantfu bative basondzelene naNkulunkulu, futsi sifundzani endleleni Pawula lenta ngayo tilaleli takhe tamlalela?

¹⁷ Bantfu kufanele bative basondzelene naNkulunkulu. Pawula watsi: “Siyaphila, siyanyakata, futsi sikhona,” ngenca yaKhe. Letinye tati titsi Pawula  bekabhekisela emavini a-Epimenides, lobekangusonkondlo waseCreta ngelikhulu lesi-6 B.C.E. aphindze abe ngumuntfu “lowatiwako emasikweni enkholo e-Athene.” Pawula waphindze waveta lesinye sizatfu lesenta bantfu bafune kutiva basondzelene naNkulunkulu. Watsi: “Njengobe nje letinye timbongi tenu tisho titsi: ‘Ngobe sibantfwana bakhe.’” (Imis. 17:28) Umuntfu kufanele ative anebuhlobo naNkulunkulu ngobe nguye lowadala umuntfu wekucala, bonkhe bantfu labavela kuye. Kuze ajabulise letilaleli takhe, Pawula wacaphuna ngalokucondzile etincwadzini tesiGriki lokungenteka tilaleli takhe betitihlonipha. e Ngekuvumelana nesibonelo saPawula, natsi ngalesinye sikhatsi singacaphuna emlandvweni kuma-encyclopedia nobe kuletinye tincwadzi letatiwako. Sibonelo nje, kucaphuna encwadzini letsite lehlonishwako kungasita umuntfu longasuyeFakazi ati ngemvelaphi yaletinye tintfo letentiwa yinkholo yemanga.

¹⁸ Kuze kube ngunyalo, enkhulumeni yakhe, Pawula sewuvete emaciniso labalulekile ngaNkulunkulu futsi ngekuhlakanipha wavumelanisa lebekakusho netilaleli takhe. Yini lomphostoli bekafuna letilaleli takhe tase-Athene tiyente ngalokwatiswa lokubalulekile? Ngaphandle kwekuphotisa emaseko, wavele watitjela njengobe achubeka nalenkhulumo yakhe.

19, 20. (a) Pawula wabuveta njani bulima bekukhonta tithico letentiwe bantfu? (b) Ngusiphi sinyatselo tilaleli taPawula bekufanele tisitsatse?

¹⁹ Pawula bekakulungele kwenta tilaleli takhe titsatse sinyatselo. Abuyela kuloko lakucaphuna etincwadzini tesiGriki, watsi: “Ngako-ke njengobe sibantfwana baKhe, akukafaneli sicabange kutsi Nkulunkulu unjengeligolide, lisiliva, litje, nobe intfo leyakhiwe ngekuhlakanipha nekucabanga kwebantfu.” (Imi 17:29) Ecinisweni, nangabe bantfu badalwa nguNkulunkulu, kwenteka kanjani-ke kutsi Nkulunkulu abe sithico, sona lesakhiwe ngibo bantfu? Indlela Pawula labonisana ngayo nalabantfu ngekuhlakanipha yaveta bulima bekukhonta tithico letakhiwe bantfu. (Hl 115:4-8; Isa 44:9-20) Ngekutsi atsi, “akukafaneli sicabange,” kungenteka Pawula bekanciphisa buhlungu leseluleko sakhe lebesingabubanga.

²⁰ Lomphostoli wakwenta kwacaca kutsi bekudzingeka batsatse sinyatselo. Watsi: “Nkulunkulu akatinakanga tikhatsi lapho bantfu bebenta ngekungati khona [ngekucabanga kutsi kuyamjabulisa Nkulunkulu kusebentisa tithico nabamkhonta], kodvwa nyalo utjela bantfu kuto tonkhe tindzawo kutsi abaphendvuke.” (Imi 17:30) Kungenteka labanye balabantfu lebebalalele Pawula bamangala nabeva kutsiwa kufanele baphendvuke. Lenkhulumo yakhe lenemandla yaveta ngalokucacile kutsi bebakweleta Nkulunkulu ngekuphila futsi bekufanele balandzise kuye. Bekudzingeka bafune Nkulunkulu, bafundze liciniso ngaye futsi baphile kuphila kwabo konkhe ngekuvumelana nalelociniso. Kubantfu  base-Athene, loko bekusho kubona sidzingo sekugucuka futsi bashiye sono sabo sekukhonta tithico.

21, 22. Ngumaphi emavi lanemandla Pawula lephetsa ngawo inkhulumo yakhe lenemandla, futsi lamavi asho kutsini kitsi lamuhla?

²¹ Pawula waphetsa lenkhulumo yakhe lenemandla ngemavi latsi: “[Nkulunkulu] ubeke lilanga latawehlulela ngalo umhlaba ngekulunga asebentisa loyo lamkhetsa, futsi unike bonkhe bantfu sicinisekiso saloku ngekutsi amvuse ekufeni.” (Imi 17:31) Lilanga Lekwehlulela lelitako lisizatfu lesivakalako sekutsi sifune futsi sitfole Nkulunkulu weliciniso! Pawula akazange asho kutsi leliJaji lelibekiwe lingubani. Kunaloko, washo intfo leyetfusako ngaleliJaji: Laphila njengemuntfu, lafa, futsi Nkulunkulu walivusa ekufeni!

²² Lesiphetfo lesitsintsa inhlitiyo sisifundzisa lokunyenti natsi lamuhla. Siyati kutsi leliJaji lelimiswe nguNkulunkulu nguJesu Khristu lovusiwe. (Joh 5:22) Siyati nekutsi Lilanga Lekwehlulela litawutsatsa iminyaka leyinkhulungwane futsi lisondzela ngekushesha. (Sem 20:4, 6) Asilesabi leLilanga Lekwehlulela ngobe siyacondza kutsi litawubaletsela tibusiso letinyenti labo labatawutsi nabehlulelwa, batfolakale betsembekile. Kugcwaliseka kwelitsemba letfu ngelikusasa lelihle kucinisekiswa simangaliso lesikhulu kunato tonkhe​—kuvuswa kwaJesu Khristu ekufeni!

23. Ngutiphi tindlela letehlukahlukene bantfu labasabela ngato enkhulumeni yaPawula?

²³ Bantfu basabela ngetindlela letingafani kulenkhulumo yaPawula. “Labanye bamhleka bulima” nabeva ngekuvuswa kwalabafile, kantsi labanye ngemusa, bebangafuni kutibophetela, futsi bebatsi: “Sitakulalela ngalesinye sikhatsi.” (Imis. 17:32) Nobe kunjalo, labanye basabela ngendlela lekahle: “Batihlanganisa naye futsi baba ngemakholwa. Emkhatsini wabo bekunaDiyonisiyusi, lobekangumehluleli enkantolo yase-Ariyophagusi, nemfati lokutsiwa nguDamarisi kanye nalabanye.” (Imis. 17:34) Kwenteka lokufanako nasemsebentini wetfu wekushumayela. Labanye bantfu bahlekisa ngatsi, kantsi labanye banemusa, kodvwa abanendzaba nemlayeto wetfu. Nobe kunjalo, siyajabula nangabe labanye bawemukela umlayeto weMbuso futsi baba ngemakholwa.

24. Yini lesingayifundza kuloko Pawula lakusho nakeme embikwe-Ariyophagusi?

²⁴ Njengobe sicabanga ngenkhulumo yaPawula, natsi singafundza lokunyenti mayelana nekucocisana nebantfu ngendlela lenengcondvo naletawubenta bakholelwe loko lesikushoko futsi sikuvumelanise netimo tabo. Ngetulu kwaloko, singafundza ngesidzingo sekubeketela kanye nebuciko nasicoca nebantfu labayengwe yinkholo yemanga. Singaphindze sifundze nasi sifundvo lesibalulekile: Akukafaneli silulate liciniso leliseBhayibhelini ngobe nje sifuna kujabulisa labo labasilalele. Nobe kunjalo, ngekulingisa sibonelo semphostoli Pawula, singaba bafundzisi labaphumelelako emsebentini wekushumayela. Ngetulu kwaloko, babonisi bangakufanelekela kancono kufundzisa ebandleni. Ngaleyondlela, sitakufanelekela kancono kusita labanye kutsi “bafune Nkulunkulu . . . futsi bamtfole.”​—Imis. 17:27.