SEHLUKO 17
“Wabonisana Nabo NgemiBhalo”
Sisekelo sekufundzisa ngendlela lephumelelako; sibonelo lesihle sebantfu baseBheriya
Lesehluko sisekelwe encwadzini yeMisebenti 17:1-15
1, 2. Bobani labasuka eFiliphi baya eThesalonika, futsi yini lokungenteka beyisetingcondvweni tabo?
BANGANI labatsatfu Pawula, Silasi naThimothi bahamba emakhilomitha langu-130 emgwacweni lophitsitelako lowakhiwa bonjiniyela labangemaRoma, njengobe besuka eFiliphi baya eThesalonika. Lomgwaco udzabula etintsabeni futsi kuwo kuvakala imisindvo leminyenti, umsindvo wetimbongolo, umsindvo wetincola letidvonswa ngemahhashi nemsindvo webantfu labahamba ngetinyawo, lokufaka ekhatsi emasotja, batsengisi kanye nalabanye nje bantfu. Loluhambo alusimelula, ikakhulukati kuPawula naSilasi ngobe basanesa tilondza labatitfole ngekushaywa eFiliphi.—Imis. 16:22, 23.
2 Yini lesita lamadvodza akhone kubeketelela loluhambo loludze lasetaluhamba? Siyaciniseka kutsi basitwa kucoca kanye nekukhumbula lokujabulisako lokwenteke eFiliphi, ngesikhatsi umgcini welijele kanye nemndeni wakhe baba ngemakholwa. Lolokwentekile kwente lamadvodza atimisela nakakhulu kuchubeka amemetela livi laNkulunkulu. Nobe kunjalo, njengobe asondzela kulelidolobha laseThesalonika, kungenteka bekatibuta kutsi lamaJuda akulelidolobha bekatabaphatsa njani. Bebatawuhlaselwa yini nobe bashaywe njengobe bekwenteke eFiliphi?
3. Sibonelo saPawula sekuba nesibindzi sekushumayela singasisita njani tsine lamuhla?
3 Ngekuhamba kwesikhatsi, Pawula waveta indlela lebekativa ngayo encwadzini layibhalela emaKhristu aseThesalonika nakatsi: “Njengobe nati, ngemuva kwekuhlupheka nekuphatfwa kabi eFiliphi, Nkulunkulu wetfu wasisita saba nesibindzi sekunitjela ngetindzaba letimnandzi takhe nangetulu kwekuphikiswa lokukhulu.” (1 Thes. 2:2) Ngalamavi, kungenteka Pawula bekangabata kungena edolobheni laseThesalonika ikakhulukati ngenca yaloko bekwenteke kubo eFiliphi. Uyavelana yini naPawula? Kuke kwenteke yini ukutfole kumatima kumemetela tindzaba letimnandzi? Pawula wetsembela kuJehova kutsi amcinise, futsi amsite abe nesibindzi lebekasidzinga. Kufundza ngesibonelo saPawula kungasisita natsi kutsi sente lokufanako.—1 Khor. 4:16.
“Wabonisana Nabo NgemiBhalo” (Imisebenti 17:1-3)
4. Yini lekhombisa kutsi kungenteka Pawula wahlala eThesalonika emaviki langetulu kwalamatsatfu?
4 Lokulandzisa kusitjela kutsi ngesikhatsi Pawula aseThesalonika washumayela emasinagogeni emaSabatha lamatsatfu. Loku kusho kutsi wahlala kulelidolobha emaviki lamatsatfu yini? Akubonakali kanjalo. Asati kutsi Pawula wahlala sikhatsi lesidze kangakanani kulelidolobha ngaphambi kwekutsi aye kwekucala esinagogeni. Ngetulu kwaloko, incwadzi Pawula layibhala ngesikhatsi aseThesalonika iveta kutsi yena kanye nalabo lebekahamba nabo basebenta kuze batisekele. (1 Thes. 2:9; 2 Thes. 3:7, 8) Kabili, bazalwane baseFiliphi batfumelela Pawula tintfo lebekatidzinga ngesikhatsi aseThesalonika. (Fil. 4:16) Ngako kubonakala shengatsi wahlala eThesalonika emaviki langetulu kwalamatsatfu.
5. Pawula wabonisana njani nalabantfu lebebamlalele?
5 Njengobe besekanesibindzi sekushumayela, Pawula wase ukhuluma nalabo lebebasesinagogeni. Njengobe bekahlale enta, ‘wabonisana nabo ngemiBhalo . . . wabachazela kutsi bekufanele Khristu ahlupheke futsi avuswe ekufeni, waphindze wakufakazela ngemibhalo loko. Bekatsi: “LoJesu lengimmemetela kini, unguKhristu.”’ (Imis. 17:2, 3) Naka kutsi umgomo waPawula bewungesiko nje kutsintsa tinhlitiyo talabo lebebamlalele, kodvwa bewukubenta bacabange. Bekati kutsi labo lebebasesinagogeni bebatayelene nemiBhalo, bayihlonipha, kodvwa bebangayicondzi. Ngako Pawula wabonisana nabo, wabachazela kutsi Jesu waseNazaretha bekanguMesiya lowetsenjisiwe nobe Khristu, njengobe kusho imiBhalo.
6. Jesu wabonisana njani nebafundzi bakhe ngemiBhalo, futsi waba yini umphumela?
6 Pawula walandzela sibonelo saJesu, lowasebentisa imiBhalo kuze asekele loko bekakufundzisa. Sibonelo nje, ngesikhatsi enta umsebenti wekushumayela, Jesu watjela balandzeli bakhe kutsi ngekusho kwemiBhalo, iNdvodzana yemuntfu bekufanele ihlupheke, ife, futsi ivuswe ekufeni. (Mat. 16:21) Ngemuva kwekuvuswa kwakhe, Jesu wabonakala kubafundzi bakhe. Siyaciniseka kutsi loko kukodvwa nje kwakhombisa kutsi bekakhuluma liciniso. Nobe kunjalo, Jesu wabaniketa lokungetulu kwaloko. Nakukhulunywa ngaloko lakusho kulabanye bafundzi, kutsiwa: “Wabachazela tintfo lebetimayelana naye letisemiBhalweni, wacala kulokwabhalwa nguMosi wayofika kulokwabhalwa ngibo bonkhe baPhrofethi.” Waba yini umphumela? Bafundzi bamangala futsi batsi: “Angitsi sivele satsintseka tinhlitiyo ngesikhatsi akhuluma natsi endleleni, asichazela imiBhalo?”—Luk. 24:13, 27, 32.
7. Kubaluleke ngani kutsi lesikufundzisako kusekelwe emiBhalweni?
7 Umlayeto weliVi laNkulunkulu unemandla. (Heb. 4:12) Nalamuhla, emaKhristu asekela lakufundzisako eVini laNkulunkulu njengobe kwenta Jesu, Pawula kanye nalabanye baphostoli. Natsi sibonisana nebantfu, sibachazele loko lokushiwo yimiBhalo futsi sinikete bufakazi balesikufundzisako ngekutsi sikhombise banikati bemakhaya loko liBhayibheli lelikushoko. Ngetulu kwakokonkhe, lomlayeto lesiwushumayelako awusiwo wetfu. Ngekusebentisa liBhayibheli ngekukhululeka, sisita bantfu babone kutsi simemetela timfundziso taNkulunkulu, hhayi imibono yetfu. Ngetulu kwaloko, senta kahle kukhumbula kutsi umlayeto lesiwushumayelako usekelwe ngalokuphelele eVini laNkulunkulu. Ngako singaletsemba. Kwati loku akukuniki yini sibindzi sekuchubeka ushumayela ngalomlayeto njengobe kwenta Pawula?
“Labanye Baba Ngemakholwa” (Imisebenti 17:4-9)
8-10. (a) Bantfu baseThesalonika benta njani nabeva tindzaba letimnandzi? (b) Yini leyenta lamanye emaJuda adlela Pawula umona? (c) Yini leyentiwa ngemaJuda lebekaphikisa Pawula?
8 Pawula besekavele akubonile kuba liciniso kwemavi aJesu latsi: “Sisebenti asisikhulu kunenkhosi yaso. Nangabe bangiphetse kabi mine, bataniphatsa kabi nani; nangabe balilalele livi lami, batalilalela nelenu.” (Joh. 15:20) EThesalonika, Pawula watfola bantfu labasabela ngetindlela letingafani. Labanye bebatimisele kulalela livi, kantsi labanye bebamphikisa. Mayelana nalabo labalalela, Lukha wabhala watsi: “Labanye [emaJuda] baba ngemakholwa [emaKhristu] futsi batihlanganisa naPawula naSilasi. EmaGriki lamanyenti lebekakhonta Nkulunkulu, kanye nalabanye bafati lababalulekile labambalwa nabo benta lokufanako.” (Imis. 17:4) Siyaciniseka kutsi labafundzi labasha bajabula kakhulu nabasitwa kutsi bayicondze kahle imiBhalo.
9 Ngisho nobe labanye bajabula ngalamavi aPawula, labanye batfukutsela bagcwala kokana. Lamanye emaJuda aseThesalonika adlela Pawula umona ngenca yekutsi “emaGriki lamanyenti” bewamlalela. Umgomo walamaJuda bekukwenta labantfu bagucukele enkholweni yebuJuda, kungako bebafundzise Bantfu Betive labangemaGriki timfundziso temiBhalo yesiHebheru futsi babatsatsa njengebantfu labaphetfwe ngiwo. Kusenjalo, babona shengatsi Pawula besekabebela labantfu bawo ngetimfundziso takhe khona lapho esinagogeni! Loko kwawatfukutselisa kakhulu lamaJuda.
“Afuna kutsi boPawula naSilasi bakhishelwe ngephandle kulesicumbi.”—Imisebenti 17:5
10 Lukha usitjela naku lokwabese kuyenteka: “EmaJuda aba nemona, ase ahlanganisa emadvodza lakhohlakele lebekayingayinga emakethe, futsi asusa siphitsiphitsi kulelidolobha. Ahlasela indlu yaJasoni afuna kutsi boPawula naSilasi bakhishelwe ngephandle kulesicumbi. Atsi nakangabakhandzi, ahudvula Jasoni nalabanye bazalwane abayisa kubaphatsi belidolobha, amemeta atsi: ‘Lamadvodza lahlupha kuyo yonkhe indzawo sekalapha, futsi Jasoni uwemukele endlini yakhe. Onkhe lamadvodza amelene nemitsetfo yaKhesari, atsi kunalenye inkhosi, lenguJesu.’” (Imis. 17:5-7) Lokuhlasela kwalesicumbi sebantfu bekutawubatsintsa njani boPawula kanye nalabo lebekahamba nabo?
11. Ngumaphi emacala Pawula nalabo lebekashumayela nabo umlayeto weMbuso lababekwa wona, futsi ngumuphi umtsetfo lokungenteka labamangaleli babo bebacabanga ngawo? (Buka umbhalo longentasi.)
11 Akusiyo intfo lemelula kuhlaselwa sicumbi sebantfu lesitfukutsele. Sihlasela njengemfula logola tintsetse, sinesibhuku futsi asilawuleki. Lena yindlela leyasetjentiswa ngemaJuda kuze etame kucedza ngaPawula naSilasi. Ngemuva ‘kwekususa siphitsiphitsi kulelidolobha,’ lamaJuda etama kwenta lababusi babone shengatsi lamacala bekabekwe boPawula bekamakhulu kakhulu. Licala lekucala belikutsi Pawula kanye nalabo lebekashumayela nabo umlayeto weMbuso ‘bebahlupha kuyo yonkhe indzawo,’ ngisho nobe bebangakase babanga siphitsiphitsi eThesalonika! Licala lesibili lona belilibi nakakhulu. LamaJuda bekatsi letitfunywa telivangeli timemetela kutsi kunalenye iNkhosi, lenguJesu, ngaleyondlela tephula umtsetfo wembusi lomkhulu. a
12. Yini lekhombisa kutsi emacala emaKhristu aseThesalonika labekwa wona bekangaletsa imiphumela lebuhlungu?
12 Khumbula kutsi baholi benkholo betfwesa Jesu licala lelifanako. Batsi kuPilatu: “Lomuntfu simtfole adukisa sive sakitsi, atjela nebantfu kutsi bangatseli kuKhesari, futsi atibita ngekutsi unguKhristu inkhosi.” (Luk. 23:2) Kungenteka Pilatu bekesaba kutsi umbusi waseRoma utawubona shengatsi uvuna bantfu labavukela umbuso, ngako watsi Jesu akabulawe. Ngendlela lefanako, emacala labekwa emaKhristu eThesalonika bekangaletsa imiphumela lebuhlungu. Lenye incwadzi itsi: “Kulukhuni kuchaza ingoti lebebalengela kuyo, ngobe ‘umuntfu losolwa ngekuvukela umbuso waseRoma bekangabulawa.’” Lokuhlasela lokuhambisana nenzondo kwaphumelela yini?
13, 14. (a) Yini leyenta lesicumbi sebantfu sangaphumeleli kulokuhlasela kwaso? (b) Pawula wakukhombisa njani kucaphela njengaKhristu, futsi tsine singasilingisa njani sibonelo sakhe?
13 Lesicumbi sehluleka kuvimba umsebenti wekushumayela eThesalonika. Leni? Kwekucala nje, asizange sibatfole boPawula naSilasi. Ngetulu kwaloko, babusi balelidolobha bebangaciniseki ngekuba liciniso kwaletinsolo. Ngemuva kwekutfola “sibambiso lesenele,” lokungenteka yimali yekuhlawula, lababusi bakhulula Jasoni kanye nalabanye bazalwane lebebaletfwe kubo. (Imis. 17:8, 9) Alandzela seluleko saJesu lesitsi, “caphelani njengetinyoka kepha nibe msulwa njengematuba,” ngekuhlakanipha Pawula wayibalekela ingoti kuze achubeke ayoshumayela kulenye indzawo. (Mat. 10:16) Kuyacaca kutsi sibindzi Pawula bekanaso asizange simente angasacapheli. EmaKhristu lamuhla angasilingisa njani sibonelo sakhe?
14 Esikhatsini salamuhla, baholi betinkholo letitsi tebuKhristu bavamise kwenta ticumbi tebantfu kutsi tiphikise BoFakazi BaJehova. Benta babusi bamelane natsi ngekutsi batsi sivukela umbuso. Njengalabantfu labahlupha emaKhristu ngelikhulu lekucala, nebaphikisi kulesikhatsi salamuhla bachutjwa ngumona. Kunobe ngusiphi simo, emaKhristu eliciniso awatifaki engotini ngemabomu. Nakungenteka, siyakubalekela kuphikisana nebantfu labatfukutsele nalabangacabangeli. Sibashiya ngekuthula kuze siyoshumayela kulenye indzawo, mhlawumbe singaphindze sibuyele nangabe simo sesincono.
“Bebanesimo Lesihle” (Imisebenti 17:10-15)
15. Bantfu baseBheriya benta njani nabeva tindzaba letimnandzi?
15 Kuze baphephe, boPawula naSilasi batfunyelwa eBheriya, lebeyikhashane ngemakhilomitha langu-65. Batsi nabefika lapho, Pawula waya esinagogeni futsi wakhuluma nebantfu lebebabutsene lapho. BoPawula bajabula kakhulu ngesikhatsi labantfu bemukela tindzaba letimnandzi! Lukha wabhala kutsi emaJuda aseBheriya ‘bekanesimo lesihle kwendlula aseThesalonika, ngobe bekakulangatelela kakhulu kuva livi, ahlolisisa imiBhalo malanga onkhe kuze abone kutsi letintfo lebekativile tiliciniso yini.’ (Imis. 17:10, 11) Lamavi asho kutsi bantfu baseThesalonika labemukela liciniso bebete yini simo lesihle? Cha, akusinjalo. Ngekuhamba kwesikhatsi Pawula wababhalela watsi: “Simbonga singacedzi Nkulunkulu, ngobe ngesikhatsi nemukela livi lakhe lenaliva kitsi, anilemukelanga njengelivi lebantfu, kodvwa nalemukela njengelivi laNkulunkulu, njengobe lingilo sibili, futsi lokungilo lelisebenta kini nine makholwa.” (1 Thes. 2:13) Pho, yini leyenta lamaJuda aseBheriya aba nesimo lesihle?
16. Yini leyenta kufaneleke kutsi kutsiwe bantfu baseBheriya “bebanesimo lesihle”?
16 Ngisho nobe loku bebakuva bekukusha, bantfu baseBheriya abazange basole nobe bagceke ngalokwendlulele futsi ngesikhatsi lesifanako abazange babe bovumazonke. Bacale balalelisisa loko Pawula bekakusho. Ngemuva kwaloko bacinisekisa kutsi loko labakuvile kunjalo yini vele ngekutsi bavule imiBhalo, leyo Pawula lebekabente bayicondza. Ngetulu kwaloko, batadisha liVi laNkulunkulu onkhe malanga, hhayi nje ngeliSabatha kuphela. Loko bakwenta ‘ngekulangatelela lokukhulu,’ batimisela kutfola lokushiwo yimiBhalo ngalemfundziso lensha labayivile. Base bakhombisa kutsi batfobekile ngobe benta lushintjo futsi “labanyenti baba ngemakholwa.” (Imis. 17:12) Kungako Lukha atsi “bebanesimo lesihle”!
17. Yini leyenta sibonelo sebantfu baseBheriya sincomeke, futsi singachubeka njani sisilingisa ngisho nangemuva kwesikhatsi lesidze sesibe ngemakholwa?
17 Bantfu baseBheriya bebangati kutsi loko labakwenta nabeva tindzaba letimnandzi bekutawubhalwa eVini laNkulunkulu njengesibonelo sekulingiswa, sekuba nesimo lesihle etintfweni letiphatselene naNkulunkulu. Benta loko Pawula bekafisa kutsi bakwente, futsi benta ngendlela Jehova Nkulunkulu lebekafuna bente ngayo. Nguloko kanye natsi lamuhla lesikhutsata bantfu kutsi bakwente, lokukuhlolisisa liBhayibheli ngekucophelela kuze kukholwa kwabo kusekelwe ngalokuphelele eVini laNkulunkulu. Ngako, nase singemakholwa, sidzingo sekuba nesimo lesihle sibese siyaphela yini? Asipheli. Kunaloko kubaluleka nakakhulu kutsi sitimisele kuchubeka sifundza ngaJehova futsi sikusebentise ngekushesha loko lesikufundzako. Ngaleyondlela sivumela Jehova kutsi asibumbe futsi asiceceshe ngekuvumelana nentsandvo yakhe. (Isa. 64:8) Ngako sitawuchubeka sisetjentiswa nguBabe wetfu losezulwini, futsi sihlale simjabulisa.
18, 19. (a) Pawula wesukelani eBheriya, futsi wasibekela njani sibonelo lesihle sekubeketela? (b) Bobani Pawula besekatobashumayela nyalo, futsi bakuphi?
18 Pawula akazange ahlale sikhatsi lesidze eBheriya. Sifundza kutsi: “Ngesikhatsi emaJuda aseThesalonika eva kutsi Pawula umemetela livi laNkulunkulu eBheriya, aya khona kuze asuse siphitsiphitsi. Ngekushesha bazalwane batjela Pawula kutsi ahambe aze ayofika elwandle, kodvwa boSilasi naThimothi basala. Labo lebebaphekeletela Pawula bahamba naye baze befika e-Athene. Bajika ngesikhatsi Pawula sekabatfume kutsi batjele Silasi naThimothi kutsi bete kuye masinyane.” (Imis. 17:13-15) Letitsa tetindzaba letimnandzi betiphikelela! Atizange tenetiseke ngekucosha Pawula eThesalonika, taphindze taya eBheriya kuze tiyosusa siphitsiphitsi nakhona, kodvwa atizange tiphumelele. Pawula bekati kutsi indzawo lebekufanele ashumayele kuyo beyiyinkhulu, ngako wesuka lapho wayoshumayela kulenye. Shengatsi nalamuhla singatimisela kucedza imetamo yalabo labafuna kumisa umsebenti wekushumayela!
19 Njengobe besekafakaze ngalokuphelele kumaJuda aseThesalonika newaseBheriya, siyaciniseka kutsi kunyenti Pawula besekakufundzile ngekubaluleka kwekushumayela ngesibindzi kanye nangekubonisana nebantfu ngemiBhalo. Natsi futsi kanjalo. Nobe kunjalo, nyalo Pawula bese kufanele ashumayele lolunye luhlobo lwebantfu, lokuBantfu Betive base-Athene. Tintfo betitamhambela njani kulelidolobha? Sitawubona esehlukweni lesilandzelako.
a Ngekusho kwalesinye sati, ngaleso sikhatsi bekunemtsetfo lebewushaywe nguKhesari lebewalela bantfu kutsi bakhulume “ngekuta kwenkhosi lensha nobe umbuso, ikakhulukati nangabe utawutsatsa sikhundla nobe wehlulele umbusi lokhona.” Kungenteka letitsa taPawula tagucula lomlayeto bewushunyayelwa ngulomphostoli tase titsi wephule lomtsetfo. Buka libhokisi lelitsi “ BoKhesari Kanye Nencwadzi YeMisebenti.”
