1-6. Landzisa lokwentekile lokukhombisa kutsi boFakazi bashumayela ngephansi kwetimo letinyenti letehlukahlukene.

 REBECCA, Fakazi waJehova losemusha eGhana, bekatsatsa sikolwa lafundza kuso njengensimu yakhe. Bekahlale aphetse tincwadzi letisekelwe eBhayibhelini esikhwameni sakhe sesikolwa. Ngesikhatsi selikhefu, bekahlale afuna ematfuba ekushumayela labo lafundza nabo. Rebecca wacalisa tifundvo teliBhayibheli letinyenti nalabo lafundza nabo eklasini.

² Esichingini iMadagascar, nawusuka nje elugwini lolusemphumalanga ne-Afrika, emahlahlandlela lamabili lashadene bewavamise kuhamba emakhilomitha langu-25 elangeni lelishisako aya endzaweni lokungafikeki melula kuyo kuze ayofundza nebantfu liBhayibheli.

³ Kuze bafike kubantfu labahlala elusentseni lwemfula iParaguay nemfula iParaná, boFakazi labahlala eParaguay kanye nalamanye emavolontiya labuya emaveni langu-15 bebasebenta ndzawonye kuze bakhe sikebhe. Lesikebhe lesingemakhilogremu langu-40 823 singalayisha bantfu labangu-12. Labamemeteli beMbuso basebentisa lesikebhe lebebaphindze bahlale kuso kuze batishumayele ngemdlandla tindzaba letimnandzi etindzaweni lebekungafikeki kuto.

⁴ E-Alaska, boFakazi babanelitfuba lelingakavami lekushumayela tivakashi letinyenti letifika kulelo live ehlobo. Simo selitulu lesifutfumele senta kutsi kufike imikhumbi leminyenti legcwele tivakashi letibuya emaveni lehlukahlukene. BoFakazi BaJehova bema esikhumulweni semikhumbi kuze balungele kucoca nalabantfu baphindze bakhangise tincwadzi letisekelwe eBhayibhelini letingetilwimi letehlukahlukene. Kuze bazalwane bakuleyondzawo bakhone kushumayela nasetindzaweni lokungafikeki melula kuto, bavame kusebentisa indiza futsi loko kwente tindzaba letimnandzi tefika emiphakatsini yase-Aleut, e-Athabascan, eTsimshian naseKlinket.

⁵ Larry, lobekahlala endzaweni lakunakekelwa khona lasebakhulile kanye nalabakhubatekile eTexas, e-U.S.A., bekatsatsa lendzawo njengensimu yakhe lekhetsekile. Ngisho nobe bekasebentisa i-wheelchair ngenca yekukhubateka lokwabangelwa yingoti, bekahlale amatasa. Bekacocela labanye ngemlayeto weMbuso, lofaka ekhatsi litsemba lanalo lekutsi ngalelinye lilanga nasekubusa uMbuso waNkulunkulu utawuphindze akhone kuhamba.​—Isa. 35:5, 6.

 ⁶ Kuze licembu laboFakazi liye emhlanganweni wesigodzi eMyanmar, lahamba emalanga lamatsatfu ngemkhumbi lisuka eMandalay. Ngenca yekutsi lelicembu belilangatelela kushumayela tindzaba letimnandzi, lahamba netincwadzi letisekelwe eBhayibhelini, futsi belitiniketa labo lebeligibele nabo. Nobe ngabe ngukuphi lapho lomkhumbi bewufike ume khona, edolobheni nobe endzaweni lesemakhaya, laboFakazi labanemdlandla bebehla ngekushesha bashumayele kuleyondzawo futsi banikete bantfu letincwadzi. Njengobe labanye bantfu bebehla kulomkhumbi, bekuphindze kugibele labanye futsi loko bekwenta kutsi labamemeteli beMbuso nababuya kuyoshumayela kuleyo ndzawo, bakhandze labanye bantfu labangabashumayela kulomkhumbi.

7. Ngutiphi tindlela tikhonti taJehova letitisebentisako kuze tifakaze ngeMbuso waNkulunkulu, futsi uyini umgomo wato?

⁷ Njengobe sibonile kuletibonelo letimbalwa letingenhla, tikhonti taJehova letikhutsele tifakaza “ngalokuphelele ngeMbuso waNkulunkulu” emhlabeni wonkhe. (Imis. 28:23) Letikhonti tishumayela emtini ngemuti, tikhulume nebantfu emigwacweni, tibabhalele tincwadzi, futsi tiphindze tibashayele lucingo. Tihlale tifuna ematfuba ekushumayela ngeMbuso waNkulunkulu, kungaba semabhasini, ema-park nobe emisebentini ngesikhatsi selikhefu. Tindlela tekushumayela tingahle tehluke, kodvwa umgomo munye​—kushumayela tindzaba letimnandzi nobe ngabe ngukuphi lapho kutfolakala khona bantfu.​—Mat. 10:11.

8, 9. (a) Yini lesenta sitsi kwandza kwemsebenti wekushumayela ngeMbuso kusimangaliso? (b) Ngumuphi umbuto lophakamako losenta sicabange, futsi yini lokudzingeka siyente kuze sitfole imphendvulo?

⁸ Wena mfundzi walencwadzi lotsandzekako, ungulomunye yini webamemeteli beMbuso labanyenti labashumayela emaveni langetulu kwa-235? Nangabe kunjalo, udlala indzima lebalulekile ekwandziseni umsebenti wekushumayela ngeMbuso! Lesekufeziwe emsebentini wekushumayela emhlabeni wonkhe kusimangaliso. Ngetulu kwebumatima kanye netinkinga letinkhulu letifaka ekhatsi kuvinjelwa bohulumende kanye nekuhlushwa, BoFakazi BaJehova bayachubeka bafakaza ngalokuphelele ngeMbuso waNkulunkulu kubantfu bato tonkhe tive.

⁹ Asesicabange nganangu umbuto: Yini leyente tinkinga nobe kuphikiswa lokuvela kuSathane kwehluleka kumisa umsebenti wekushumayela ngeMbuso? Kuze sitfole imphendvulo, kudzingeka sibuyele emuva ekhulwini lekucala leminyaka C.E., ngobe vele BoFakazi BaJehova lamuhla, bachubeka nemsebenti lowacala ngaleso sikhatsi.

10. Ngumuphi umsebenti Jesu latinikela kuwo, futsi yini lebekayati ngalomsebenti?

¹⁰ Jesu Khristu longumsunguli welibandla lebuKhristu, watinikela ekushumayeleni tindzaba letimnandzi teMbuso waNkulunkulu futsi bekaphilela kona. Wake watsi: “Kufanele ngitishumayele letindzaba letimnandzi teMbuso waNkulunkulu, ngobe nguloko lengatfunyelwa kona.” (Luk. 4:43) Jesu bekati kutsi bekacalisa umsebenti lebekangeke akhone kuwucedza ayedvwana. Ngaphambi  nje kwekutsi afe, waphrofetha kutsi umlayeto weMbuso bewutawushunyayelwa “etiveni tonkhe.” (Mak. 13:10) Kodvwa loko bekutawentiwa njani futsi kwentiwe bobani?

11. Ngumuphi umyalo lobalulekile Jesu lawuniketa bafundzi bakhe, futsi ngukuphi kusekelwa lebebatakutfola kuze bawulalele?

¹¹ Ngemuva kwekufa nekuvuswa kwakhe, Jesu wabonakala kubafundzi bakhe futsi wabaniketa nangu umyalo lobalulekile: “Ngako-ke hambani nente bantfu bato tonkhe tive babe bafundzi bami, nibabhabhatise egameni laBabe, neleNdvodzana, nelemoya longcwele, nibafundzise kugcina konkhe lenginitjele kona. Nibowati kutsi mine nginani onkhe emalanga kuze kube sekupheleni kwalelive.” (Mat. 28:19, 20) Emavi latsi “mine nginani” bekaveta kutsi Jesu bekatabasekela bafundzi bakhe kulomsebenti wekushumayela newekwenta bafundzi. Bebatakudzinga lokusekelwa ngobe Jesu bekaphrofethe kutsi ‘bebatawutondvwa tive tonkhe.’ (Mat. 24:9) Labafundzi bebatawuphindze batfole lusito loluvela kulomunye umtfombo. Ngaphambi kwekutsi aye ezulwini, Jesu wabatjela kutsi umoya longcwele bewutabaniketa emandla ekufakaza “nakuto tonkhe tincenye temhlaba.”​—Imis. 1:8.

12. Ngumiphi imibuto lebalulekile lephakamako, futsi kubaluleke ngani kwati timphendvulo tayo?

¹² Manje kuphakama nayi imibuto lebalulekile: Baphostoli, Jesu kanye nalabanye bafundzi bangelikhulu lekucala leminyaka bawutsatsa njengalobalulekile yini umsebenti labaniketwa wona? Lelicembu lelincane lemadvodza nebafati labangemaKhristu lafakaza ngalokuphelele yini ngeMbuso waNkulunkulu ngisho nobe belihlushwa kamatima? Lakutfola yini kusekelwa lokuvela ezulwini nekwemoya longcwele waJehova kulomsebenti walo wekwenta bafundzi? Lemibuto kanye naleminye lefana nayo iyaphendvulwa encwadzini yeliBhayibheli yeMisebenti. Kubalulekile kutsi sitfole timphendvulo tayo. Leni? Jesu wetsembisa kutsi lomsebenti labaniketa wona bewutawuchubeka “kuze kube sekupheleni kwalelive.” Ngako lomyalo wekushumayela bekufanele ulalelwe ngiwo onkhe emaKhristu eliciniso, lokufaka ekhatsi natsi lesiphila kulesikhatsi sekuphela. Kungako sinesifiso lesikhulu sekwati umlandvo lotfolakala encwadzini yeMisebenti.

13, 14. (a) Ngubani lowabhala incwadzi yeMisebenti, futsi lombhali wakutfola njani kwatiswa lokukuyo? (b) Ikhuluma ngani incwadzi yeMisebenti?

¹³ Ngubani lowabhala lencwadzi yeMisebenti? Lencwadzi ayilisho ligama lembhali wayo, kodvwa singeniso sayo senta kucace kutsi lencwadzi kanye neliVangeli laLukha kwabhalwa ngumuntfu munye. (Luk. 1:1-4; Imis. 1:1, 2) Ngako, kusukela kadzeni kucatjangwa kutsi Lukha, “longudokotela lotsandzekako” futsi lobekahlolisisa umlandvo ngekucophelela, nguye lowabhala incwadzi yeMisebenti. (Khol. 4:14) Lencwadzi ikhuluma ngetintfo letenteka ngeminyaka lecishe ibe ngu-28, kusukela nga-33 C.E. ngesikhatsi Jesu enyukela ezulwini kuze kube ngu-61 C.E. ngesikhatsi umphostoli Pawula aboshwa eRoma. Lokutsi Lukha ucale akhulume ngalabanye bantfu bese ngekuhamba kwesikhatsi uyatifaka naye, kukhombisa kutsi bekakhona kuletinyenti taletentakalo lakhuluma ngato. (Imis. 16:8-10; 20:5; 27:1) Lukha, lebekacwaninga ngekucophelela, kungenteka kwatiswa  labhala ngako watitfolela yena matfupha kuPawula, Bhanabasi, Filiphu kanye nalabanye lakhuluma ngabo kulencwadzi.

¹⁴ Ikhuluma ngani lencwadzi yeMisebenti? EVangelini lakhe, Lukha wabhala ngetintfo Jesu latisho nalatenta. Nobe kunjalo, encwadzini yeMisebenti, Lukha usitjela ngetintfo bafundzi baJesu labatisho nalabatenta. Ngako incwadzi yeMisebenti ikhuluma ngebantfu labafeza tintfo letinkhulu ngisho nobe labanyenti babo bebatsatfwa ngekutsi babantfu ‘labangakafundzi lokuyaphi nangekutsi babantfukatana nje.’ (Imis. 4:13) Kafishane nje, lencwadzi lephefumulelwe isitjela ngendlela libandla lebuKhristu lelasungulwa ngayo nendlela lelakhula ngayo. Incwadzi yeMisebenti isikhombisa indlela emaKhristu angelikhulu lekucala leminyaka lebekashumayela ngayo, lokufaka ekhatsi tindlela lebekatisebentisa nendlela lebekacabanga ngayo. (Imis. 4:31; 5:42) Ichaza indlela umoya longcwele lowasita ngayo ekusakatweni kwetindzaba letimnandzi. (Imis. 8:29, 39, 40; 13:1-3; 16:6; 18:24, 25) Lencwadzi ikhuluma ngesihloko seliBhayibheli lesifaka ekhatsi kungcweliswa kwelibito laNkulunkulu kusetjentiswa uMbuso wakhe lobuswa nguKhristu. Iphindze ivete indlela umlayeto weMbuso losakateke ngayo ngisho nangetulu kwekuphikiswa lokumatima.​—Imis. 8:12; 19:8; 28:30, 31.

15. Sitawuzuza ngatiphi tindlela nasihlolisisa incwadzi yeMisebenti?

¹⁵ Ecinisweni kuyajabulisa futsi kucinisa kukholwa kuhlolisisa incwadzi yeliBhayibheli yeMisebenti. Tinhlitiyo tetfu titawutsintseka nasifundza ngesibonelo sebalandzeli baKhristu bangelikhulu lekucala lababa nesibindzi nemdlandla. Sitawukhutsateka kutsi silingise kukholwa kwebazalwane nabodzadze wetfu bangelikhulu lekucala leminyaka, futsi sitakulungela kahle kulalela umyalo lotsi, “hambani nente bantfu . . . babe bafundzi.” Lencwadzi loyifundzako ihlelelwe kukusita uyidadishe ngekucophelela incwadzi yeMisebenti.

16. Ngumiphi imigomo lemitsatfu letawufezwa ngulencwadzi?

¹⁶ Iyini injongo yalencwadzi? Nayi imigomo lemitsatfu letawufezwa ngulencwadzi: (1) kucinisa kukholwa kwetfu kutsi Jehova usebentisa umoya wakhe longcwele kuze asekele umsebenti wekushumayela ngeMbuso newekwenta bafundzi, (2) kuvusetela umdlandla wetfu ngemsebenti wekushumayela ngekutsi sihlolisise sibonelo sebalandzeli baKhristu bangelikhulu lekucala leminyaka, (3) nekukhulisa inhlonipho lesinayo ngenhlangano yaJehova kanye nalabo labaholako emsebentini wekushumayela nasemabandleni.

17, 18. Ihlelwe njani lencwadzi, futsi inatiphi tintfo letitakusita nawutidadishela liBhayibheli?

¹⁷ Ihlelwe njani lencwadzi? Utawunaka kutsi ihlukaniswe yaba tincenye letingu-8, futsi incenye ngayinye ikhuluma ngetehluko letitsite tencwadzi yeMisebenti. Injongo yaletehluko letitawulandzela akusiko kuniketa inchazelo yelivesi ngalinye lalencwadzi yeMisebenti, kodvwa kutfola tifundvo etintfweni letenteka letibhalwe kulencwadzi yeliBhayibheli. Letehluko titawuphindze tisisite sibone kutsi singakusebentisa njani loko lesikufundzako. Ekucaleni kwesehluko ngasinye, kunemusho lokhuluma ngeliphuzu lelimcoka laleso sehluko kanye nemBhalo lokhonjiwe loveta tehluko tencwadzi yeMisebenti lokutawukhulunywa ngato.

 ¹⁸ Kunaletinye tintfo letikulencwadzi letitakusita nawutidadishela liBhayibheli. Kunetitfombe letinhle letikhombisa tentakalo letimangalisako letikulencwadzi yeMisebenti, letitakusita ukubone ngeliso lengcondvo loko lebekwenteka kuleyondzaba. Tehluko letinyenti tinemabhokisi laveta kwatiswa lokwengetiwe lokulusito. Lamanye emabhokisi akhuluma ngemuntfu lotsite eBhayibhelini lesingalingisa kukholwa kwakhe. Lamanye aveta kwatiswa lokwengetiwe ngetindzawo, tentakalo, emasiko, kanye nalabanye bantfu lokukhulunywa ngabo encwadzini yeMisebenti.

19. Ngukuphi kutihlolisisa lokufanele sihlale sikwenta?

¹⁹ Lencwadzi itakusita kutsi utihlolisise ngekwetsembeka. Ngisho nobe unesikhatsi lesidze kangakanani ungummemeteli weMbuso, kudzingeka uhle utihlola kutsi yini lebalulekile ekuphileni kwakho nekutsi utiva njani ngemsebenti wekushumayela. (2 Khor. 13:5) Tibute: ‘Ngisawutsatsa njengalophutfumako yini umsebenti wekushumayela? (1 Khor. 7:29-31) Ngisatishumayela ngekutimisela nangemdlandla yini tindzaba letimnandzi? (1 Thes. 1:5, 6) Ngihlanganyela ngalokugcwele yini emsebentini wekushumayela newekwenta bafundzi?’​—Khol. 3:23.

20, 21. Yini leyenta umsebenti lesiniketwe wona uphutfume, futsi yini lokufanele sitimisele kuyenta?

²⁰ Shengatsi singahlale sikhumbula kutsi siniketwe umsebenti lobalulekile, lokushumayela nekwenta bafundzi. Kuphutfuma kwalomsebenti kuchubeka kukhula njengobe kwendlula lilanga nelilanga. Njengobe kuphela kwalelive kusondzela ngekushesha lokukhulu, kuphila kwebantfu labanyenti akukase kwaba sengotini ngalendlela. Asati kutsi banyenti kanganani bantfu labanetinhlitiyo leticotfo lokungenteka basetawulalela umlayeto wetfu. (Imis. 13:48) Kungumsebenti wetfu kubasita kusengakephuti kakhulu.​—1 Thim. 4:16.

²¹ Ngako, kubaluleke kakhulu kutsi silingise sibonelo sebamemeteli beMbuso lebebakhutsele bangelikhulu lekucala. Shengatsi kudadisha kwakho lencwadzi ngekucophelela kungakwenta ufune kushumayela ngemdlandla lomkhulu nangesibindzi. Shengatsi kutimisela kwakho kuchubeka ufakaza “ngalokuphelele ngeMbuso waNkulunkulu” kungacina.​—Imis. 28:23.