SEHLUKO 11
“Bajabula Kakhulu Futsi Bagcwala Umoya Longcwele”
Sibonelo saPawula sendlela lenta ngayo ngesikhatsi bantfu bangamlaleli
Lesehluko sisekelwe encwadzini yeMisebenti 13:1-52
1, 2. Yini leyehlukile ngaloluhambo lwaSawula naBhanabasi, futsi umsebenti wabo bewutawusita njani ekugcwaliseni emavi lasencwadzini yeMisebenti 1:8?
LILANGA lelijabulisako ebandleni lase-Antiyokhi, ngobe kubo bonkhe baphrofethi nebafundzisi bakulelibandla, umoya longcwele ukhetse Bhanabasi naSawula kutsi bahambise tindzaba letimnandzi etindzaweni letikhashane. a (Imis. 13:1, 2) Kuliciniso kutsi emadvodza lafanelekako bekake atfunywa kutsi ayoshumayela etindzaweni letikhashane, kodvwa bekashumayela etindzaweni lapho khona bantfu besebativile tindzaba letimnandzi. (Imis. 8:14; 11:22) Nobe kunjalo, boBhanabasi naSawula kanye naJohane lobekutsiwa nguMakho lobekabasita, bebatawutfunywa etindzaweni lapho khona bantfu labanyenti bebangakase beva tindzaba letimnandzi.
2 Eminyakeni lengu-14 leyendlulile, Jesu watsi kubalandzeli bakhe: “Nitawuba bofakazi bami eJerusalema, kuyo yonkhe iJudiya neSamariya, nakuto tonkhe tincenye temhlaba.” (Imis. 1:8) Kubekwa kwaBhanabasi naSawula kutsi babe titfunywa telivangeli bekutawusita ekugcwaliseni lamavi aJesu lasiphrofetho! b
Ngibatsatsile “Kuze Bente Umsebenti” (Imisebenti 13:1-12)
3. Yini lebeyenta luhambo loludze lube matima ngelikhulu lekucala?
3 Lamuhla sekumelula kuhamba emabanga lamadze ngesikhashana nje, ngenca yetintfo tekuhamba lesetakhiwe, njengetimoto netindiza. Kodvwa bekungasinjalo ngelikhulu lekucala leminyaka C.E. Ngaleso sikhatsi bekuhanjwa ngetinyawo, futsi ngalokuvamile bekuhanjwa etindzaweni lokumatima kuhamba kuto. Luhambo lwelilanga linye, mhlawumbe lebelingatsatsa emakhilomitha langu-30, belungenta umuntfu akhatsale kakhulu! c Ngako, ngisho nobe Bhanabasi naSawula bebakubuke ngalabovu kuya esabelweni sabo lesisha, bebabona kutsi loku bekutawudzinga umetamo kanye nekutidzela.—Mat. 16:24.
4. (a) Yini leyacondzisa kukhetfwa kwaBhanabasi naSawula, futsi labo lebebakhonta nabo bativa njani ngalokukhetfwa kwabo? (b) Singabasekela njani labo labatfola tabelo ebandleni lebuKhristu?
4 Yini leyenta umoya longcwele wakhetsa boBhanabasi naSawula “kuze bente umsebenti”? (Imis. 13:2) LiBhayibheli alisho. Siyati kutsi ngumoya longcwele lowacondzisa kukhetfwa kwalamadvodza. Kute lokukhombisa kutsi baphrofethi kanye nebafundzisi e-Antiyokhi bamelana nalesincumo. Kunaloko, bakusekela ngalokugcwele kukhetfwa kwalamadvodza. Cabanga indlela Bhanabasi naSawula labativa ngayo nababona kutsi labazalwane ababadleli umona. Kunaloko, labazalwane bazila kudla bathantaza, “bababeka tandla base bayabakhulula.” (Imis. 13:3) Ngendlela lefanako, natsi kufanele sibasekele labo labanikwe tabelo letitsite ebandleni lebuKhristu, lokufaka ekhatsi emadvodza labekwe kutsi abe ngulabadzala bemabandla. Kunekutsi sibadlele umona labo labatfola tabelo letinjengaleti, kufanele ‘sibacabangele kakhulu ngelutsandvo ngenca yemsebenti labawentako.’—1 Thes. 5:13.
5. Chaza kutsi bekufaka ekhatsi ini kushumayela esichingini saseSiphrosi.
5 Ngemuva kwekuhamba ngetinyawo baye eSeluyisiya, lokusikhumulo semikhumbi lesidvutane ne-Antiyokhi, boBhanabasi naSawula bahamba ngemkhumbi baya esichingini saseSiphrosi, lokuluhambo lolungaba ngemakhilomitha langu-200. d Njengobe Bhanabasi bekawekutalwa eSiphrosi, asingabati kutsi bekakulangatelela kuyoshumayela tindzaba letimnandzi kubantfu lebebahlala kulelidolobha lakubo. Nabefika eSalamisi, lokulidolobha lelingaselugwini lolusemphumalanga yalesichingi, lamadvodza awaphotisanga maseko. Ngekushesha “bashumayela livi laNkulunkulu emasinagogeni emaJuda.” e (Imis. 13:5) BoBhanabasi naSawula bashumayela kusuka kulomunye umkhawulo waseSiphrosi kuya kulomunye, lokungenteka bebashumayela emadolobha lamakhulu njengobe bachubeka neluhambo lwabo. Letitfunywa telivangeli kungenteka tahamba emakhilomitha langu-160, kuye ngekutsi tahamba ngayiphi indlela!
6, 7. (a) Abengubani Segiyusi Pawulusi, futsi yini leyenta Bhajesu wetama kumvimba kutsi alalele tindzaba letimnandzi? (b) Sawula wakuncandza njani lokuphikisa kwaBhajesu?
6 ISiphrosi yangelikhulu lekucala beyigcwele kukhonta kwemanga. Loku kwabonakala kahle ngesikhatsi Bhanabasi naSawula bafika ePhafosi, elugwini lolungasenshonalanga yalesichingi saseSiphrosi. Nabefika lapho, bahlangana nendvodza lengumJuda lokutsiwa nguBhajesu. “Beyisangoma futsi ingumphrofethi wemanga. Lendvodza beyinaSegiyusi Pawulusi lobekangumbusi wesifundza futsi ahlakaniphile.” f Ngelikhulu lekucala leminyaka, emaJuda lamanyenti lanjingile, lafaka ekhatsi “indvodza lehlakaniphile” lefana naSegiyusi Pawulusi, bewavame kuya etangomeni nobe kulabafundza tinkhanyeti kuze ayofuna lusito ekwenteni tincumo letibalulekile. Nobe kunjalo, Segiyusi Pawulusi wamangala nakeva umlayeto weMbuso, futsi waba nesifiso lesikhulu sekuva livi laNkulunkulu. Loku akuzange kumehle kahle Bhajesu lobekaphindze atiwa ngekutsi ngu-Elimasi, lokusho ‘Sangoma.’—Imis. 13:6-8.
7 Bhajesu bekamelene nemlayeto weMbuso. Indlela lokukuphela kwayo Bhajesu lebekangavikela ngayo sikhundla sakhe sekuba ngumeluleki waSegiyusi Pawulusi bekukutsi avimbe “lombusi kuze angakholwa.” (Imis. 13:8) Kodvwa Sawula bekangeke amvumele lomenti wemilingo avimbe Segiyusi Pawulusi kutsi alalele tindzaba letimnandzi. Ngako yini Sawula layenta? Lokulandzisa kutsi: “Sawula . . . wagcwala umoya longcwele futsi wasibukisisa lesangoma [lesinguBhajesu] watsi kuso, ‘Wena logcwele yonkhe inhlobo yekukhohlisa nabo bonkhe bubi. Ndvodzana yaDeveli nesitsa sako konkhe lokulungile, yekela kukhuluma kabi ngetindlela taJehova letilungile. Ngako, Jehova utakujezisa futsi utawuba yimphumphutse kuphele sikhatsi ungakuboni kukhanya.’ Ngekushesha inkhungu nebumnyama kwehlela kuso, futsi sahambahamba setama kutfola umuntfu lobekangasibamba ngesandla.” g Waba yini umphumela walesentakalo lesisimangaliso? “Lombusi watsi nakabona loko lobekwentekile, waba likholwa ngobe bekamangaliswe nguloko lebekakufundza ngaJehova.”—Imis. 13:9-12.
NjengaPawula, silivikela ngesibindzi liciniso nasiphikiswa
8. Singakulingisa njani kuba nesibindzi kwaPawula lamuhla?
8 Pawula akazange esatjiswe nguBhajesu. Natsi akukafaneli sesabe nangabe baphikisi betama kuvimba labo labatsandza kulalela tindzaba teMbuso. Kuliciniso kutsi emavi etfu kufanele “ngaso sonkhe sikhatsi abe nemusa futsi avangwe ngeluswayi.” (Khol. 4:6) Ngesikhatsi lesifanako, akukafaneli singabafundzisi bantfu liciniso ngobe nje sesaba kuphikiswa, futsi akukafaneli sesabe kukhuluma emaciniso ngenkholo yemanga lechubeka ikhuluma “kabi ngetindlela taJehova” letilungile njengobe kwenta Bhajesu. (Imis. 13:10) Shengatsi njengaPawula singatishumayela ngesibindzi tindzaba letimnandzi futsi sisite bantfu labanetinhlitiyo leticotfo kutsi bative. Ngisho nobe indlela Nkulunkulu lasisekela ngayo ingabonakali njengobe yabonakala kuPawula, kodvwa singaciniseka kutsi Jehova utawusebentisa umoya wakhe longcwele kuze advonse labo labatimisele kwemukela liciniso.—Joh. 6:44.
‘Leningabakhutsata Ngako’ (Imisebenti 13:13-43)
9. BoPawula naBhanabasi bababekela njani sibonelo lesihle labo labaholako emabandleni lamuhla?
9 Kuyacaca kutsi kwaba nelushintjo ngesikhatsi lamadvodza ashiya iPhafosi aya ePhega, leselugwini lwase-Asia Minor futsi lekhashane ngemakhilomitha langu-250 nawuhamba ngemkhumbi. KuMisebenti 13:13, lelicembu lichazwa ngekutsi ‘nguPawula kanye nalebekahamba nabo.’ Lamavi aveta kutsi besekunguPawula lobekahola lelicembu. Nobe kunjalo, kute lasibona khona kutsi Bhanabasi waba nemona ngaPawula. Kunaloko, lamadvodza lamabili achubeka asebenta ndzawonye kuze ente intsandvo yaNkulunkulu. BoPawula naBhanabasi bababekela sibonelo lesihle labo labaholako ebandleni lamuhla. Kunekutsi alwele tikhundla, emaKhristu akhumbula emavi aJesu latsi: “Nine nibazalwane.” Wengeta watsi: “Nobe ngubani lotiphakamisako utawutfotjiswa. Kodvwa nobe ngubani lotitfobako, utawuphakanyiswa.”—Mat. 23:8, 12.
10. Chaza luhambo lolusuka ePhega luye e-Antiyokhi lesePhisidiya.
10 Atsi lamadvodza nawefika ePhega, Johane lokutsiwa nguMakho washiya Pawula naBhanabasi wabuyela eJerusalema. Sizatfu sekubashiya kwakhe asatiwa. BoPawula naBhanabasi bachubeka basuka ePhega baya e-Antiyokhi lesePhisidiya, lidolobha lelisesifundzeni saseGalathiya. Loluhambo belungesimelula ngobe i-Antiyokhi lesePhisidiya beyiphakeme ngemakhilomitha langu-1 100 kusuka elwandle. Lendlela beyiyiyimbi ngobe beyisetintsabeni letiyingoti naletatiwa ngekutsi tigcwele tigebengu. Lokubi nakakhulu kutsi kungenteka Pawula besekanetinkiga temphilo. h
11, 12. Pawula wayivusa njani inkhaphunkhaphu kulabo lebebamlalele esinagogeni lelise-Antiyokhi lesePhisidiya?
11 E-Antiyokhi lesePhisidiya boPawula naBhanabasi bangena esinagogeni ngeliSabatha. Lokulandzisa kutsi: “Nasekufundvwe uMtsetfo netincwadzi tebaPhrofethi, tikhulu telisinagoge tatfumela umlayeto kubo tatsi: ‘Banaketfu, nangabe kukhona leningabakhutsata ngako bantfu, sicela nikusho.’” (Imis. 13:15) Pawula wasukuma wakhuluma.
12 Pawula wacalisa inkhulumo yakhe ngekutsi atsi: “Nine ma-Israyeli nani nine labanye lenesaba Nkulunkulu.” (Imis. 13:16) Labo lebebalalele Pawula bekungemaJuda nebantfu labagucukele enkholweni yebuJuda. Pawula wayivusa njani inkhaphunkhaphu yekulalela kulabantfu lebebangayati indzima yaJesu enjongweni yaNkulunkulu? Wacala ngekuchaza kafishane umlandvo wesive semaJuda. Wachaza indlela Jehova ‘labenta ngayo baba sive lesinemandla ngesikhatsi batihambi eveni laseGibhithe,’ nekutsi ngemuva kwekukhululwa kwabo, Nkulunkulu ‘wababeketelela’ njani iminyaka lengu-40. Pawula waphindze wachaza nendlela ema-Israyeli lalitsatsa ngayo Live Lesetsembiso kanye nendlela Jehova lalehlukanisa ngayo. (Imis. 13:17-19) Labanye batsi kungenteka Pawula bekakhuluma ngemavesi lebekasandza kufundvwa ngalokuvakalako kulomkhosi weliSabatha. Nangabe kunjalo, lesi ngulesinye setizatfu lesikhombisa kutsi Pawula bekakwati “kuba ngiko konkhe kuto tonkhe tinhlobo tebantfu.”—1 Khor. 9:22.
13. Ungatitsintsa njani tinhlitiyo talabo lobashumayelako?
13 Natsi kufanele silwele kuvusa inkhaphunkhaphu kulabo lesibashumayelako. Sibonelo nje, kwati tinkholelo temuntfu kungasisita sikhetse sihloko latawujabulela kucoca ngaso. Singaphindze sicaphune emavesi latsite eliBhayibheli lokungenteka utayelene nawo, futsi kungasita nekumtjela kutsi afundze emavesi eBhayibhelini lakhe. Funa tindlela tekutsintsa tinhlitiyo tabo kuze bafune kwati lokunyenti ngaJehova.
14. (a) Pawula watetfula njani tindzaba letimnandzi letimayelana naJesu, futsi wabecwayisa ngani labo lebebamlalele? (b) Labantfu benta njani nabeva inkhulumo yaPawula?
14 Pawula wabese ukhuluma ngeluhla lwemakhosi aka-Israyeli lolwaholela ‘kumsindzisi longuJesu’ lowandvulelwa nguJohane uMbhabhatisi. Wachaza nendlela Jesu labulawa ngayo nalavuswa ngayo ekufeni. (Imis. 13:20-37) Pawula watsi: “Ngako-ke banaketfu, yatini kutsi tono titawutsetselelwa ngaloyo muntfu futsi nguloko lesikumemetela kini, nekutsi ngaloyo muntfu bonkhe labakholwako kutsiwa bete licala.” Lomphostoli wabese wecwayisa labo lebebamlalele watsi: “Caphelani kutsi kunganehleli loko lokushiwo baPhrofethi, nabatsi: ‘Nine tedzeleli, bukani nimangale, bese niyanyamalala, ngobe ngenta umsebenti emalangeni enu, lokungumsebenti leningeke nize niwukholwe ngisho nobe umuntfu anganichazela ngawo.’” Lenkhulumo yaPawula yabamangalisa kakhulu labantfu. LiBhayibheli litsi: “Bantfu babancenga kutsi bakhulume nabo ngaletintfo ngeliSabatha lelilandzelako.” Ngetulu kwaloko, nasewuphelile lomhlangano lebewusesinagogeni, “emaJuda lamanyenti kanye nalabo lebebagucukele enkholweni yebuJuda futsi bakhonta Nkulunkulu, balandzela boPawula naBhanabasi.”—Imis. 13:38-43.
“Sesiya Kubantfu Betive” (Imis. 13:44-52)
15. Yini leyenteka ngeliSabatha lelalandzela inkhulumo yaPawula?
15 NgeliSabatha lelilandzelako, “cishe bonkhe bantfu edolobheni” bahlangana kuze balalele Pawula. Loko akuzange kuwajabulise lamanye emaJuda ngobe “acala kuhlambalata, aphikisa loko lobekukhulunywa nguPawula.” Ngesibindzi, boPawula naBhanabasi batsi kubo: “Bekufanele kutsi livi laNkulunkulu likhulunywe kini kucala. Kodvwa njengobe ningalemukeli futsi nitiveta ningulabangakufaneli kutfola kuphila lokuphakadze, sesiya kubantfu betive. Ngobe Jehova usiyale watsi: ‘Ngikubeke kutsi ube kukhanya kwetive, kuze uletse insindziso kuto tonkhe tincenye temhlaba.’”—Imis. 13:44-47; Isa. 49:6.
“Bacala kubaphatsa kabi boPawula naBhanabasi . . . Bafundzi bachubeka bajabula kakhulu futsi bagcwala umoya longcwele.”—Imisebenti 13:50-52
16. EmaJuda enta njani naweva emavi lashubile aletitfunywa telivangeli, futsi boPawula naBhanabasi benta njani nabaphikiswa?
16 Bantfu Betive lebebalalele inkhulumo yaPawula bajabula, futsi “bonkhe lebebatimisele kutfola kuphila lokuphakadze baba ngemakholwa.” (Imis. 13:48) Ngekushesha livi laJehova lagcwala kulo lonkhe lelo live. EmaJuda wona enta ngendlela leyehlukile. Ecinisweni letitfunywa telivangeli bekufana nekutsi tibatjela kutsi ngisho nobe livi laNkulunkulu belifike kuwo kucala, kodvwa wona akhetsa kungamemukeli Mesiya, ngako afanelwe sijeziso saNkulunkulu. LamaJuda abangela kutsi bafati labatiwako kanye nemadvodza lasetikhundleni kulelidolobha babaphatse “kabi boPawula naBhanabasi, babakhiphela ngephandle kwalendzawo yabo.” Base benta njani boPawula naBhanabasi? “Batsintsitsa lutfuli etinyaweni tabo, base baya e-Ikhoniyumi.” Loku besekusho kuphela kwenkholo yebuKhristu yini e-Antiyokhi lesePhisidiya? Cha akusinjalo! Bafundzi labasala ngemuva “bachubeka bajabula kakhulu futsi bagcwala umoya longcwele.”—Imis. 13:50-52.
17-19. Singasilingisa ngatiphi tindlela sibonelo lesihle lesabekwa nguPawula naBhanabasi, futsi kwenta njalo kungasenta njani sijabule?
17 Indlela boPawula naBhanabasi labenta ngayo nabaphikiswa isifundzisa sifundvo lesibalulekile. Asiyekeli kushumayela ngisho nobe bantfu labasemagunyeni betama kusiyekelisa. Phindze unake kutsi boPawula naBhanabasi “batsintsitsa lutfuli etinyaweni tabo” ngesikhatsi labantfu bangatemukeli tindzaba letimnandzi. Lesento besingakhombisi kutsi boPawula naBhanabasi batfukutsele, kepha besisho kutsi bebangeke baze babe nelicala kunobe yini lebeyitawukwenteka kulabantfu. Letitfunywa telivangeli tabona kutsi betingeke tize tiyilawule indlela labanye bantfu labasabela ngayo, kodvwa betingakhona kulawula kutsi tiyachubeka yini tona nekushumayela, futsi nguloko kanye letakwenta. Taya e-Ikhoniyumi!
18 Kwentekani kubafundzi lebebahlala e-Antiyokhi? Kuliciniso kutsi bantfu bakulendzawo bebangatitsandzi tindzaba letimnandzi. Nobe kunjalo, injabulo yalabafundzi lebebahlala kulelidolobha beyingayi ngekutsi labanye bayatemukela yini tindzaba letimnandzi nobe cha, ngobe Jesu watsi: “Bayajabula labo labeva livi laNkulunkulu futsi baligcine!” (Luk. 11:28) Nguloko kanye labafundzi base-Antiyokhi lesePhisidiya labancuma kukwenta.
19 NjengaPawula naBhanabasi, shengatsi natsi singahlale sikhumbula kutsi umsebenti wetfu kushumayela tindzaba letimnandzi. Batatincumela bona labo lesibashumayelako kutsi bayatemukela nobe abatemukeli tindzaba letimnandzi. Singafundza sifundvo kubafundzi bangelikhulu lekucala nangabe bantfu lesibashumayelako bangatemukeli tindzaba letimnandzi. Ngekutsandza liciniso kanye nekuvumela umoya longcwele kutsi usihole, natsi singajabula ngisho nobe siphikiswa.—Gal. 5:18, 22.
a Buka libhokisi lelitsi “ Bhanabasi—’Lokhutsata Labanye’”
b Kulesikhatsi, emabandla besekatfolakala etindzaweni letikhashane letinjenge-Antiyokhi leseSiriya lebeyikhashane neJerusalema ngemakhilomitha langaba ngu-550 nawubheka enyakatfo.
c Buka libhokisi lelitsi “ Emgwacweni.”
d Ngelikhulu lekucala, umkhumbi bewungahamba libanga lelingaba ngemakhilomitha langu-150 ngelilanga, nangabe umoya uhhusha kahle. Kodvwa nangabe umoya umkhulu futsi uphambana nawo, loluhambo belungatsatsa sikhatsi lesidze.
e Buka libhokisi lelitsi “ Emasinagogeni EmaJuda.”
f ISiphrosi beyingephansi kwesigungu lesengamele saseRoma. Lesichingi besibuswa ngumengameli lonesikhundla lesilingana nesembusi wesifundza.
g Kusukela ngaleso sikhatsi kuchubeke, Sawula wabese ubitwa ngekutsi nguPawula. Labanye bebacabanga kutsi watsatsa leligama lesiRoma kuze ahloniphe Segiyusi Pawulusi. Nobe kunjalo, lokutsi wasebentisa leligama lelitsi Pawula ngisho sekasukile eSiphrosi kuveta inchazelo leyehlukile, lekutsi bekatawuba ‘ngumphostoli etiveni,’ futsi kungako kusukela ngaleso sikhatsi wasebentisa ligama lakhe lesiRoma. Kungenteka wasebentisa ligama lakhe lelitsi Pawula ngenca yekutsi indlela ligama lakhe lesiHebheru lelitsi Sawula lelibitwa ngayo ngesiGriki lisho intfo lembi.—Rom. 11:13.
