1, 2. (a) Sivakashi sambingelela njani Mariya? (b) Ngusiphi sincumo Mariya lokwadzingeka kutsi asente futsi sakushintja njani kuphila kwakhe?

MARIYA wabuka etulu futsi wamangala njengobe abona sivakashi singena ekhaya lakubo. Asizange sifike sifune uyise nobe unina. Kodvwa besite kuye! Labeciniseka ngako Mariya kutsi besingahlali eNazaretha. Kulelidolobha lelincane labehlala kulo, bekumelula kubona umuntfu longamati. Lesivakashi sakhe besingavele sisheshe sinakeke. Sabingelela Mariya ngendlela lebeyingakavami, satsi: “Sawubona wena lobusiseke kakhulu, Jehova unawe.”​—Fundza Lukha 1:26-28.

² Ngalendlela, liBhayibheli lisetfula kuMariya, indvodzakati yaHeli, lebeyihlala eGalile edolobheni laseNazaretha. Licala kulandzisa ngaye ngesikhatsi kufanele ente sincumo lesibaluleke kakhulu. Mariya abetawushada naJosefa umbati, labeyindvodza lengakanjingi kodvwa lenekukholwa. Bekubonakala shengatsi kuphila kwakhe bekutawuhamba kahle​—abetawuphila imphilo lemelula njengemfati waJosefa futsi amsekele, bakhulise nebantfwana babo babobabili. Kodvwa angakalindzeli, lesivakashi samtjela ngemsebenti lebekufanele awente lobewuvela kuNkulunkulu, futsi lobewutawushintja kuphila kwakhe.

3, 4. Kute simati kahle Mariya yini lokudzingeka singayinaki, futsi yini lokufanele siyinakisise?

³ Labanyenti bayamangala nababona kutsi liBhayibheli alisitjeli lokunyenti kangako ngaMariya. Lisitjela lokuncane ngendlela lakhuliswa ngayo nebuntfu bakhe, futsi alisitjeli lutfo ngekutsi abebukeka njani. Nobe kunjalo, loko liVi laNkulunkulu lelisitjela kona ngaye kusembulela lokunyenti.

⁴ Kute simati kahle Mariya, kudzingeka singakunaki loko tinkholo letehlukahlukene letikushoko ngaye. Asingayinaki nemifanekiso yakhe lependiwe, leyentiwe ngemabuli nangasimende. Asitibekele eceleni timfundziso letingacondzakali naletingemanga letitsi lomfati lotfobekile “Ungumake WaNkulunkulu” futsi “Uyindlovukazi Yasezulwini.” Tsine asinake loko liBhayibheli lelikufundzisako. Lisenta sikucondze kahle kukholwa kwakhe nekutsi singamlingisa njani.

5. (a) Yini lesingayifundza endleleni Mariya lenta ngayo nakabingelelwa nguGabhriyeli? (b) Ngusiphi sifundvo lesibalulekile lesingasifundza kuMariya?

⁵ Lesivakashi saMariya besingasuye umuntfu. Besiyingilosi lenguGabhriyeli. Ngesikhatsi imbita ngekutsi ‘ungulobusiseke kakhulu,’ “lamavi amkhatsata kakhulu” Mariya futsi amenta watibuta ngalendlela yekubingelela lengakavami. (Luk. 1:29) Abebusiswe ngubani? Mariya abengakalindzeli kubusiswa ngumuntfu. Kodvwa lengilosi beyikhuluma ngekutsi ubusiswe nguJehova Nkulunkulu, futsi loko bekuyintfo lebaluleke kakhulu kuye. Nobe kunjalo, akazange atigcabhe ngekutsi abebusiswe nguNkulunkulu. Nangabe silwela kutfola sibusiso saNkulunkulu, futsi singatigcabhi sicabange kutsi sesitfolile kakadze, sitawufundza sifundvo lesibalulekile Mariya labesicondza kahle. Nkulunkulu umelene nalabatigcabhako, kodvwa uyabatsandza aphindze abasekele labanemoya lophansi nalabatfobekile.​—Jak. 4:6.

6. Ngumuphi umsebenti lobalulekile lengilosi leyawunika Mariya?

⁶ Mariya abetakudzinga kutfobeka lokufanana naloku ngobe lengilosi beyimphatsele umsebenti lobaluleke kakhulu. Yachaza kutsi abetawutfola umntfwana labetawuba ngumuntfu lobaluleke kakhulu kunabo bonkhe. Gabhriyeli watsi: “Jehova Nkulunkulu utayinika sihlalo sebukhosi seyise Davide, itawubusa njengeNkhosi endlini yaJakobe kute kube phakadze, neMbuso wayo ngeke uphele.” (Luk. 1:32, 33) Mariya bekati ngalesetsembiso Nkulunkulu lasenta kuDavide eminyakeni lengetulu kwaleyinkhulungwane ngembikwaloko—kutsi lomunye wentalo yaDavide abetawubusa phakadze. (2 Sam. 7:12, 13) Ngako indvodzana yakhe beyitawuba nguMesiya bantfu baNkulunkulu lebebasolo bamlindzele emakhulu eminyaka.

7. (a) Umbuto waMariya wavetani ngaye? (b) Bantfu labasha lamuhla bangafundzani kuMariya?

⁷ Ngetulu kwaloko, lengilosi yamtjela kutsi indvodzana yakhe itawubitwa ngekutsi “yiNdvodzana yaLosetikwako Konkhe.” Umuntfu lovamile abengayitala njani iNdvodzana yaNkulunkulu? Ecinisweni, Mariya abengayitfola njani indvodzana? Phela abetsembisene umshado naJosefa kodvwa bebasengakashadi. Mariya wawubuta ngalokucondzile lombuto watsi: “Loku kutawukwenteka njani, njengobe ngingakase ngilale nendvodza?” (Luk. 1:34) Naka kutsi Mariya wakhuluma ngekuba kwakhe yintfombi ngaphandle kwemahloni. Ngako abekutsatsa njengalokuligugu kuba msulwa kwakhe. Bantfu labasha labanyenti lamuhla bajaka kucedza bumsulwa babo futsi ngekushesha bacale kuhleka labo lababugcinile. Lomhlaba sewushintje kakhulu. Nobe kunjalo, Jehova akakashintji. (Mal. 3:6)  Njengasemalangeni aMariya, usabatsatsa njengalababalulekile labo labaphila ngetimiso takhe tekutiphatsa.​—Fundza Hebheru 13:4.

8. Njengobe Mariya abenesono, abengamtfola njani umntfwana lote sono?

⁸ Nanobe abeyincekukati yaNkulunkulu leyetsembekile, Mariya abenesono. Ngako-ke abengamtfola njani umntfwana lote sono, loyiNdvodzana yaNkulunkulu? Gabhriyeli wachaza watsi: “Umoya longcwele utakwehlela kuwe, futsi emandla aLosetikwako Konkhe atakusibekela. Ngaleso sizatfu, loyo lotamtala kutawutsiwa ungcwele futsi uyiNdvodzana yaNkulunkulu.” (Luk. 1:35) Kuba ngcwele kusho “kuhlanteka” “nekuba msulwa.” Ngalokuvamile, bantfu bendlulisela sono labanaso kubantfwana babo. Kodvwa kulesimo, Jehova abetawenta simangaliso lesingakavami. Abetawususa kuphila kweNdvodzana yakhe ezulwini akufake esibeletfweni saMariya, bese usebentisa emandla akhe lasebentako nobe umoya longcwele kute ‘asibekele’ Mariya, kuze lomntfwana angatfoli sono. Mariya wasikholelwa yini lesetsembiso salengilosi? Waphendvula njani?

9. (a) Kungani baphikisi benta liphutsa ngekungabata kulandzisa lokumayelana naMariya? (b) Gabhriyeli wakucinisa njani kukholwa kwaMariya?

⁹ Baphikisi, lokufaka ekhatsi naletinye tati teTinkholo Letitsi TebuKhristu, bakutfola kumatima kukholwa kutsi umuntfu loyintfombi angabeleka umntfwana. Ngisho nobe bafundzile, bayehluleka kucondza leliciniso lelimelula Gabhriyeli lalisho nakatsi: “Lokushiwo nguNkulunkulu kuyagcwaliseka.” (Luk. 1:37) Mariya wakholwa kutsi lamavi aGabhriyeli abeliciniso, ngobe abeyintfombi lenekukholwa lokukhulu. Nobe kunjalo, kukholwa kwakhe bekungasiko kwekutsatseka. Njenganobe ngumuphi umuntfu locabangako, Mariya abedzinga bufakazi bekusekela kukholwa kwakhe. Gabhriyeli abekulungele kumnika lobo bufakazi. Wamtjela ngesihlobo sakhe lesikhulile Elizabethe, lebesekusikhatsi lesidze atiwa ngekutsi ute imbeleko. Nkulunkulu abemente watetfwala ngalokusimangaliso!

10. Kungani kungakafaneli siphetse ngekutsi umsebenti waMariya awuzange umente esabe nobe umbangele bumatima?

¹⁰ Mariya abetawukwenta njani-ke nyalo? Abenemsebenti lebekufanele awente futsi aciniseka kutsi Nkulunkulu abetakwenta konkhe lokushiwo nguGabhriyeli. Akukafaneli siphetse ngekutsi lomsebenti awuzange umente esabe nobe umbangele bumatima. Kwekucala bekufanele acabange ngekutsi abetsembisene umshado naJosefa. Bebasatawuchubeka yini bashade Josefa nakeva kutsi utetfwele? Kwesibili lomsebenti wakhe bewubonakala umkhulu kakhulu. Mariya bekufanele atetfwale atale umuntfu lobaluleke kakhulu kunato tonkhe tidalwa taNkulunkulu​—iNdvodzana yakhe letsandzekako! Bekufanele ayinakekele nayiseluswane, aphindze ayivikele kulelive lelibi. Lona kwakungumsebenti lomkhulu mbamba!

11, 12. (a) Emadvodza letsembekile futsi lanesibindzi abetiva njani ngaletinye tikhatsi ngemisebenti lematima Nkulunkulu labewanika yona? (b) Yini Mariya layiveta ngaye endleleni laphendvula ngayo Gabhriyeli?

 ¹¹ LiBhayibheli liveta kutsi ngisho nemadvodza letsembekile futsi lanesibindzi, ngaletinye tikhatsi abengabata kwenta imisebenti lematima Nkulunkulu labewanike yona. Mosi wakhala ngekutsi uyehluleka kukhuluma kahle ngako abengeke akwati kuba ngumkhulumeli waNkulunkulu. (Eks. 4:10) Jeremiya watsi ‘abesangumntfwana’ futsi amncane kakhulu kutsi angenta umsebenti Nkulunkulu lamnike wona. (Jer. 1:6) NaJona wawubalekela umsebenti labenikwe wona. (Jona 1:3) Mariya abetawukwenta njani-ke yena?

¹² Emavi akhe lakhombisa kutfobeka nekulalela, atiwa ngibo bonkhe bantfu labanekukholwa. Watsi kuGabhriyeli: “Mine ngiyincekukati yaJehova! Shengatsi kungenteka njengobe ushito.” (Luk. 1:38) Incekukati bekusisebenti lesiphansi kakhulu; kuphila kwayo bekusetandleni tenkhosi yayo. Nguleyo indlela Mariya labetiva ngayo ngeNkhosi yakhe, Jehova. Bekati kutsi abevikelekile etandleni takhe, nekutsi wetsembekile kulabo labetsembekile kuye, futsi utambusisa nangabe enta konkhe lokusemandleni akhe kulomsebenti lomatima.​—Hla. 18:25.

13. Nangabe kwenta loko Nkulunkulu lasicela kona kubonakala kumatima nobe kungeke kwenteke, singazuza njani esibonelweni saMariya?

¹³ Ngaletinye tikhatsi Nkulunkulu angasicela kutsi sente intfo lesingase siyibone imatima, nobe lebonakala ingeke seyenteke. Nobe kunjalo, eVini lakhe usinika tizatfu letenele tekutsi simetsembe futsi sibeke kuphila kwetfu etandleni takhe, njengobe kwenta Mariya. (Taga 3:5, 6) Sitawumetsemba yini? Nangabe senta njalo, utawusibusisa, asente sibe netizatfu tekuba nekukholwa lokucinile kuye.

14, 15. (a) Jehova wambusisa njani Mariya ngesikhatsi avakashela Elizabethe naZakhariya? (b) Emavi aMariya latfolakala kuLukha 1:46-55 avetani ngaye?

¹⁴ Emavi Gabhriyeli lawasho nga-Elizabethe abebaluleke kakhulu kuMariya. Kubo bonkhe bantfu labebakhona emhlabeni, ngu-Elizabethe labengasicondza kahle simo labekuso. Ngako ngekushesha Mariya waya eveni lakaJuda lebelinetintsaba, lobekuluhambo lolungatsatsa emalanga lamatsatfu nobe lamane. Watsi Mariya nakefika ekhaya la-Elizabethe naZakhariya umphristi, Jehova waphindze wamnika lobunye bufakazi lobenta kukholwa kwakhe kwacina. Elizabethe weva Mariya ambingelela futsi ngekushesha lomntfwana labesesiswini sakhe wagcuma ngenca yenjabulo. Wagcwala umoya longcwele  futsi wabita Mariya ngekutsi ‘ngunina weNkhosi yami.’ Nkulunkulu abembulele Elizabethe kutsi indvodzana yaMariya beyitawuba yiNkhosi yakhe, lenguMesiya. Ngetulu kwaloko, waphefumulelwa kutsi advumise Mariya ngekulalela kwakhe ngekwetsembeka, atsi: “Uyajabula naloyo lobe nekukholwa.” (Luk. 1:39-45) Ngako-ke, konkhe Jehova labekwetsembise Mariya bekutawugcwaliseka.

¹⁵ Ngemuva kwaloko naMariya wakhuluma. Emavi akhe agcinwe ngekucophelela eVini laNkulunkulu. (Fundza Lukha 1:46-55.) Lawa ngemavi aMariya lamadze kuwendlula onkhe lawasho latfolakala eBhayibhelini, futsi laveta lokunyenti ngaye. Aveta umoya wakhe wekubonga njengobe abedvumisa Jehova ngekumbusisa ngemsebenti wekuba ngunina waMesiya. Aphindze avete kukholwa kwakhe lokucinile  njengobe atsi Jehova wehlisa labatigcabhako nalabanemagunya futsi asite labaphansi nalabeswele labafuna kumkhonta. Asikhombisa nekutsi abenelwati lolunyenti. Kulinganiselwa kutsi wacaphuna emiBhalweni yesiHebheru tikhatsi letingetulu kwaletingu-20. *

16, 17. (a) Mariya nendvodzana yakhe basiveta njani simo sengcondvo lokufanele natsi sisilingise? (b) Kuvakasha kwaMariya avakashela Elizabethe kusikhumbuta ngasiphi sibusiso?

¹⁶ Kuyacaca kutsi Mariya abecabangisisa ngeliVi laNkulunkulu. Nobe kunjalo, wachubeka atfobekile, wavumela imiBhalo kutsi itikhulumele kunekutsi akhulume loko lokwakucatjangwa nguye. Lendvodzana lebeyisolo ikhula esibeletfweni sakhe nayo beyitawubonisa umoya lofanako, itsi: “Loko lengikufundzisako akusiko kwami, kodvwa kwaloyo longitfumile.” (Joh. 7:16) Senta kahle ngekutibuta: ‘Mine ngiyalihlonipha yini liVi laNkulunkulu futsi ngititfobe kulo? Nobe ngitsandza kusebentisa imibono netimfundziso tami?’ Mariya yena abenesimo sengcondvo lesihle.

¹⁷ Mariya wachubeka ahleti na-Elizabethe tinyanga letingaba tintsatfu, futsi akungabateki kutsi bebakhutsatana kakhulu. (Luk. 1:56) Lokulandzisa kweliBhayibheli lokumnandzi lokumayelana nekuvakasha kwaMariya kusikhumbuta ngesibusiso sekuba nebangani. Nangabe sifuna bangani labamtsandza mbamba Nkulunkulu wetfu Jehova, singaciniseka kutsi buhlobo betfu naye butawukhula siphindze sisondzelane naye. (Taga 13:20) Ekugcineni, sefika sikhatsi sekutsi Mariya abuyele ekhaya. Abetawutsini Josefa nakeva ngaloko lebekwenteke kuye?

18. Yini Mariya layitjela Josefa, futsi Josefa wentani?

¹⁸ Kungenteka kutsi Mariya akazange alindze kwaze kwaba ngulapho sekubonakala kutsi utetfwele. Bekufanele akhulume naJosefa. Kodvwa ngembikwekutsi ente njalo, kungenteka watibuta kutsi lendvodza lehloniphekile futsi leyesaba Nkulunkulu beyitawukwenta njani nayiva loko layitjela kona. Nobe kunjalo, waya kuye wafike wamtjela konkhe lobekwenteke kuye. Njengobe nawe ungase ucabange, Josefa wakhatsateka kakhulu. Abefuna kumkholwa Mariya, kodvwa abebona shengatsi ukhombise kungetsembeki kuye. LiBhayibheli alisitjeli kutsi ngumiphi imicabango leyafika engcondvweni yakhe nobe kutsi watsini. Nobe kunjalo, lisitjela kutsi wakhetsa kumdivosa, ngobe ngaleso sikhatsi bantfu labetsembisene umshado bebatsatfwa njengalabo lesebavele bashadile. Kodvwa-ke akazange afune kumtsela ngelihlazo nobe kumbangela tinkinga ngako wakhetsa kwehlukana  naye ngasese. (Mat. 1:18, 19) Kufanele kutsi kwamvisa buhlungu Mariya kubona Josefa akhatsatwa nguloko lobekwenteke kuye. Kepha akazange amtfukutselele.

19. Jehova wamsita njani Josefa kutsi ente intfo lefanele?

¹⁹ Ngemusa, Jehova wasita Josefa kutsi ente intfo lefanele. Ephusheni, ingilosi yaNkulunkulu yamtjela kutsi Mariya abetetfwele ngendlela lesimangaliso. Kungenteka kutsi loko kwenta Josefa wativa akhululekile. Ngako wenta loko Mariya labekwentile ekucaleni​—wenta intfo lebeyifunwa nguJehova. Watsatsa Mariya waba ngumkakhe, futsi walungela umtfwalo lobalulekile wekunakekela iNdvodzana yaJehova.​—Mat. 1:20-24.

20, 21. Bantfu labashadile nalabo labacabangela kushada bangafundzani kuMariya naJosefa?

²⁰ Bantfu labashadile kanye nalabo labacabangela kushada, benta kahle ngekufundza esibonelweni saJosefa naMariya labaphila eminyakeni lengu-2 000 leyengcile. Njengobe Josefa abebona umfati wakhe losemusha anakekela imisebenti nemitfwalo yekuba ngumake, wajabula kakhulu ngekutsi ingilosi yaJehova beyimcondzisile. Kufanele kutsi wakubona kubaluleka kwekwetsembela kuJehova nawenta tincumo letinkhulu. (Hla. 37:5; Taga 18:13) Asingabati kutsi wachubeka enta tincumo ngekucophelela nangemusa njengenhloko yemndeni.

²¹ Ngakulokunye, yini lesingayifundza ngekutsi Mariya abekulungele kushada naJosefa? Nanobe ekucaleni Josefa akutfola kumatima kucondza lendzaba yakhe, Mariya walindzela kutsi kube nguJosefa lotsatsa sincumo ngobe nguye labetawuba yinhloko yemndeni wabo. Leso bekusifundvo lesibalulekile kuMariya njengobe kunjalo nangebafati labangemaKhristu lamuhla. Lokunye kutsi letintfo letenteka tafundzisa Josefa naMariya lokunyenti mayelana nekubaluleka kwekukhulumisana ngekwetsembeka nangekukhululeka.​—Fundza Taga 15:22.

22. Besinjani sisekelo semshado waboJosefa naMariya, futsi ngumuphi umsebenti lobewubahlalele?

²² Kuyacaca kutsi umshado waboJosefa naMariya bewunesisekelo lesihle kakhulu. Bobabili bebatsandza Jehova Nkulunkulu kwendlula konkhe lokunye, futsi bebafisa kumjabulisa njengebatali labakahle nalabakhatsalelako. Ecinisweni, tinyenti tibusiso lebetibalindzele, kantsi futsi tinyenti netinsayeya lebetiseta. Bebahlalelwe ngumsebenti wekukhulisa Jesu, labetawukhula abe ngumuntfu lomkhulu kunabo bonkhe labake baba khona emhlabeni.