1, 2. (a) Yini lebeyenta Hana angakujabuleli kulungiselela luhambo? (b)  Yini lesingayifundza endzabeni yaHana?

HANA abematasatasa alungiselela luhambo, angafuni kucabanga ngetinkinga takhe. Bekufanele ngabe kuba sikhatsi lesijabulisako ngobe indvodza yakhe Elkhana, beyivamise kuhamba nemndeni wayo wonkhe minyaka yonkhe iyokhonta Jehova ethendeni lekukhontela eShilo. Jehova abehlose kutsi tikhatsi letinjalo tijabulise. (Fundza Dutheronomi 16:15.) Akungabateki kutsi kusukela asengumntfwana, Hana abeyijabulela leyo mikhosi. Kepha kuleminyaka yamuva tintfo tacala kugaya ngalomunye umhlatsi.

² Abebusiswe ngendvodza lebeyimtsandza kakhulu. Nobe kunjalo, Elkhana abenalomunye umfati. Libito lakhe bekunguPhenina, futsi lomfati abebonakala atimisele kwenta kuphila kwaHana kube matima. Phenina abesatfole indlela yekwenta lemikhosi yaminyaka yonkhe ibe ngumtfombo webuhlungu kuHana. Njani? Kukholwa Hana labenako kuJehova kwamsita njani kutsi akhone kubeketelela lesimo lebesibonakala singetulu kwemandla akhe? Nangabe ubhekene netinsayeya letikwemuka injabulo ekuphileni, lendzaba yaHana itakukhutsata kakhulu.

3, 4. Ngutiphi tinkinga letinkhulu letimbili Hana labebhekene nato, futsi kungani ngayinye yato beyiyinsayeya?

³ LiBhayibheli lembula tinkinga letinkhulu letimbili Hana labebhekene nato. Bekukuncane kakhulu labengakwenta ngaleyekucala kantsi bekute sanhlobo labengakwenta ngalena yesibili. Kwekucala nje, abendze esitsenjini, anazakwabo lobekamtondza. Kwesibili, abengabatfoli bantfwana. Kungabatfoli bantfwana kusimo lesimatima kunome ngumuphi umfati lofisa kuba nebantfwana, kodvwa ngesikhatsi saHana nangekwemihambo yakubo, loku bekubanga lusizi lolukhulu kakhulu. Umndeni ngamunye bewetsembela kubantfwana kutsi bachubekisele embili sibongo sawo. Kungatali bekubonakala kulihlazo lelikhulu.

⁴ Kungenteka Hana abengakhona kubeketelela lesimo labebhekene naso kube bekungasiko loko lobekwentiwa nguPhenina. Kuba  sesitsenjini akuzange kuletse injabulo. Bekuhlala kunebutsa, kucabana, kanye nelusizi. Lomkhuba bewungahambisani nhlobo neluhlelo lebelwentiwe nguNkulunkulu ensimini yase-Edeni, lekutsi indvodza ibe nemfati munye. (Gen. 2:24) Ngako, liBhayibheli alisikhutsati sitsembu, futsi lesimo lebesikulomndeni wa-Elkhana sibonisa kahle kutsi kungani sitsembu singakalungi.

5. Abefunelani Phenina kutsi Hana aphatseke kabi, futsi wentani kuze amvise buhlungu?

⁵ Hana abeyintsandvokati ku-Elkhana. Ngekusho kwemlandvo wemasiko akaJuda, Elkhana watsatsa Hana kucala kwase kutsi ngemuva kweminyaka letsite watsatsa Phenina. Phenina, lobekanemona lomkhulu, wenta lokunyenti kuze avise zakwabo buhlungu. Lobekwenta Phenina atibone ancono kunaHana, kutsi yena abenentalo. Abelamisa bantfwana bakhe edvute, futsi kutigcabha kwakhe bekusolo kukhula njengobe linani labo landza. Kunekutsi avelane naHana aphindze amdvudvute kulolusizi labekulo, Phenina wachubekisela linyeva ekhatsi. LiBhayibheli litsi Phenina abemchukuluta “khona atewuphatseka kabi.” (1 Sam. 1:6) Phenina abekwenta konkhe loko ngemabomu kuze nje avise Hana buhlungu, futsi waphumelela.

6, 7. (a) Ngetulu kwemetamo ya-Elkhana yekudvudvuta Hana, yini lokungenteka yavimba Hana kutsi achaze lesimo labebhekene naso? (b) Kungatfoli kwaHana bantfwana bekusho kutsi Jehova abengamjabuleli yini? Chaza. (Fundza umbhalo longentansi.)

⁶ Litfuba Phenina labevele alifisa kakhulu kubonakala shengatsi lefika ngesikhatsi semkhosi waminyaka yonkhe wekuyokhonta Nkulunkulu eShilo. Elkhana bekabela ngamunye ngamunye ‘wemadvodzana nemadvodzakati’ aPhenina incenye yemhlatjelo loya kuJehova. Kodvwa Hana labengenamntfwana, wavele watfola incenye yakhe nje kuphela. Phenina abesolo atiphakamisa kuHana amkhumbuta ngekubabete kwakhe imbeleko kwaze kwafika lapho Hana adzindza khona sililo wangete wadla ngisho nekudla. Bekusebaleni ku-Elkhana kutsi Hana, umfati wakhe lamtsandzako abecindzetelekile, futsi angasakufuni nalokuya etfunjini. Ngako wetama kumdvudvuta, wambuta watsi: “Hana, ukhalelani? Awudli ngani? Ukhatsateke leni? Mine angincono kakhulu yini kuwe kunemadvodzana lalishumi?”​—1 Sam. 1:4-8.

⁷ Elkhana wavele wabona kutsi kucindzeteleka kwaHana bekubangelwa kungabatfoli kwakhe bantfwana. Hana kwamjabulisa kakhulu kubona kutsi indvodza yakhe iyamtsandza. * Kodvwa Elkhana akazange  akhulume ngelunya lwaPhenina, futsi akukho lapho liBhayibheli liveta khona kutsi naHana wamtjela lokutsite mayelana naloko. Mhlawumbe wabona kutsi kuceba Phenina bekutawubangela simo sakhe sibe sibi kakhulu. Kukhona yini Elkhana labengakwenta kuze ashintje lesimo? Phenina abengeke yini amtondze kakhulu Hana, mhlawumbe aze atondvwe ngisho nabantfwana balomfati lonelunya kanye netisebenti takhe? Hana abetativa avaleleke ngaphandle kepha abe akhona lapho emtini wakhe.

8. Nawuphatfwa kabi nome ngendlela lengakalungi, kungani kudvudvuta kukhumbula kutsi Jehova unguNkulunkulu wekulunga?

⁸ Ngisho nome Elkhana bekati ngalolunya lwaPhenina nome cha, Jehova Nkulunkulu yena wakubona konkhe lobekwenteka. LiVi lakhe lembula konkhe lebekwenteka. Loku-ke kuletsa secwayiso lesicinile kunome ngubani lonemona nome lunya. Ngakulolunye luhlangotsi, labo labangenacala futsi labalungile njengaHana bangatfola indvudvuto ngekwati kutsi Nkulunkulu wekulunga ulungisa tonkhe tintfo ngesikhatsi sakhe nangendlela yakhe. (Fundza Dutheronomi 32:4.) Kungenteka Hana abekwati kamhlophe loko ngobe watikhalela kuJehova kute atfole lusito.

9. Yini lesingayifundza ekutseni Hana abekulungele kuhamba aye eShilo nanome ayati indlela zakwabo labetamphatsa ngayo?

⁹ Ekuseni kuseluvivi, bekuphitsitela kulelikhaya. Wonkhe wonkhe abelungiselela luhambo, lokufaka ekhatsi nebantfwana. Lomndeni bekufanele uhambe emakhilomitha langetulu kwalangu-32 udzabula eveni laka-Efrayimi lelitintsabantsaba uze uyofika eShilo. * Bekutabatsatsa lilanga lonkhe nome mabili bahamba ngetinyawo. Hana abekwati loko lobekutakwentiwa nguzakwabo lobekamtondza. Nanobe kunjalo, Hana akazange asale ekhaya. Ngekwenta njalo, utibekela sibonelo lesihle tikhonti taNkulunkulu lamuhla. Akusiko kuhlakanipha kuvumela kutiphatsa kabi kwalabanye kuphatamise kukhonta kwetfu Nkulunkulu. Nangabe singenta njalo, singalahlekelwa tibusiso lokungutona sitidzinga kuze tisicinise sikhone kubeketelela leso simo lesimatima lesisuke sibhekene naso.

10, 11. (a) Yini leyabangela Hana waphutfuma waya ethendeni lekukhontela? (b) Hana wayitfulula njani inhlitiyo yakhe kuBabe wakhe wasezulwini ngemthantazo?

¹⁰ Ngemuva kwekuhamba indlela lendze lejikeleta entsabeni, lomndeni wachamukela eShilo. IShilo beyisentsatjaneni, ikakwe nguletinye tintsatjana letiphakeme. Njengobe basondzela, kungenteka kutsi Hana abesolo acabanga kutsi utayibeka atsini indzaba yakhe nakathantaza kuJehova. Lomndeni watsi ungefika, wabese udla kudla ndzawonye. Masinyane, Hana wabashiya waya ethendeni lekukhontela laJehova.  Eli, umPhristi Lophakeme, abelapho ahleti ngasemnyango walelithende. Kepha Hana akazange ambone nekumbona Eli, ngobe ingcondvo yakhe yonkhe beyisemthantazweni wakhe. Abeciniseka kutsi nakanjani umthantazo wakhe utawuviwa njengobe abethantazela endlini yaJehova. Nangabe kute lomunye labengacondza simo lesibucayi labebhekene naso, Babe wakhe losemazulwini yena abetasicondza. Inhlitiyo yakhe yagcwala lusizi, wase sewuyasidzindza sililo.

¹¹ Njengobe umtimba waHana ucala kuchachatela ngesizatfu sekutsi abesolo akhala, wacala kukhuluma naJehova ngenhlitiyo. Tindzebe takhe betisolo tinyakata njengobe ingcondvo yakhe ihlanganisa emagama langendlulisela kahle buhlungu labebuva. Wathantaza sikhatsi lesidze, atfulula sifuba sakhe kuBabe wakhe wasezulwini. Wenta lokungetulu kwekumane nje acele Nkulunkulu kutsi amsite atfole bantfwana. Hana abengafisi nje kutfola tibusiso kuNkulunkulu kodvwa abefisa kumniketa loko labengakhona kumnika kona. Wenta sifungo sekutsi nangabe angatfola indvodzana abetawunikela ngayo kutsi iyofeza umsebenti waJehova konkhe kuphila kwayo.​—1 Sam. 1:9-11.

12. Njengobe sibonelo saHana sibonisa, yini lokufanele sihlale siyikhumbula mayelana nemthantazo?

¹² Hana utibekela sibonelo lesihle tonkhe tinceku taNkulunkulu endzabeni yemthantazo. Jehova ubamema ngemusa bonkhe bantfu bakhe kutsi bakhulume naye ngekukhululeka nangekungesabi, batfulule konkhe lokubakhatsatako kuye ngendlela lokungenta ngayo umntfwana kumtali wakhe lametsembako. (Fundza Tihlabelelo 62:8; 1 Thesalonika 5:17.) Umphostoli Phetro waphefumulelwa kutsi abhale nankha emavi ladvudvutako mayelana nekuthantaza kuJehova: “Phonsani konkhe kukhatsateka kwenu kuye, ngobe uyanikhatsalela.”​—1 Phet. 5:7.

13, 14. (a) Eli washeshe waphetsa ngaliphi mayelana naHana futsi ngani? (b) Imphendvulo Hana layisho ku-Eli yasibeka njani sibonelo lesihle sekukholwa?

¹³ Nanobe kunjalo, bantfu bete kucondza lokunjengekwaJehova neluvelo njengaye. Kwatsi Hana asabibitseka athantaza, wetfuswa livi lalotsite. Kwakungu-EIi, umphristi lophakeme, lobekasolo ambuka njengobe athantaza. Watsi kuye: “Utawuchubeka kuhlala udzakiwe kuze kube ngunini? Yekela leliwayini lakho.” Eli abebone tindzebe taHana tinyakata, aloku abibitseka, futsi alusizi. Kunekutsi abute kutsi bekwente njani, Eli wavele washeshe waphetsa ngelekutsi udzakiwe.​—1 Sam. 1:12-14.

¹⁴ Ungacabanga nje kutsi weva buhlungu kanjani Hana ngekutsi atsi aselusizini, kusuke umuntfu losesikhundleni lesihloniphekile amsole ngentfo lengekho! Nanobe kunjalo, Hana waphindze wabeka sibonelo lesihle sekukholwa. Akazange avumele emaphutsa alomunye umuntfu aphatamise kukhonta kwakhe Jehova. Waphendvula Eli ngenhlonipho, waphindze wamchazela ngesimo labebhekene naso. Abona kutsi wente liphutsa, Eli waphendvula, mhlawumbe ngaleliphansi, watsi: “Hamba ngekuthula, shangatsi Nkulunkulu wema-Israyeli angakupha loko lokucele kuye.”​—1 Sam. 1:15-17.

15, 16. (a) Kwamtsintsa njani Hana kutfululela sifuba sakhe kuJehova nekuyomkhonta ethendeni lekukhontela? (b) Singasilandzela njani sibonelo saHana nasitiva siphatseke kabi?

 ¹⁵ Waba yini umphumela kuHana ngemuva kwekutsi atfulule sifuba sakhe kuJehova futsi wamkhonta asethendeni lekukhontela? Lendzaba iyasitjela: “Wabe sewuyahamba wayakudla, nebuso bakhe abuzange buphindze bubonakale bujabhile.” (1 Sam. 1:18) I-“The Jerusalem Bible” itsi: “Buso bakhe besebungasabonakali bukhatsatekile.” Hana wativa asakhululekile. Besekufana nekutsi utsetse lusizi lwakhe lolukhulu lebelusemahlombe akhe walutsi cu etikwemahlombe lamakhulu futsi lanemandla kunewakhe, eYise losezulwini. (Fundza Tihlabelelo 55:22.) Ikhona yini inkinga Jehova langeke aze akhone kuyetfwala? Cha ayikho, futsi akuyuze kwenteke ibe khona.

¹⁶ Nasitiva siphatseke kabi futsi sicindzetelekile kuze kube shengatsi setfwele umtfwalo lomkhulu, sitawube senta kahle nangabe silandzela sibonelo saHana, sikhulume ngenkhululeko naLoyo liBhayibheli lelitsi ‘uva imithantazo ayiphendvule.’ (Hla. 65:2) Nangabe loko sikwenta ngekukholwa, natsi singase sibone buhlungu betfu butsatselwa indzawo “kuthula kwaNkulunkulu lokwendlula konkhe kwati.”​—Fil. 4:6, 7.

17, 18. (a) Elkhana wakhombisa njani kutsi uyasisekela sifungo saHana? (b) Nguwaphi emandla lalahlekela Phenina?

¹⁷ Ngakusasa ekuseni, Hana wabuyela ethendeni lekukhontela akanye na-Elkhana. Kungenteka abesamtjelile ngesicelo labesentile kanye nangesifungo sakhe, ngobe uMtsetfo waMosi bewutsi indvodza inalo lilungelo lekusicitsa sifungo umfati lasente ngephandle kwemvume yayo. (Num. 30:10-15) Lendvodza leyetsembekile ayizange ikwente loko. Kunekutsi ente njalo, yena kanye naHana bakhonta Jehova kanye kanye ethendeni lekukhontela ngembikwekutsi babuyele ekhaya.

¹⁸ Wabona nini Phenina kutsi kunyembenya kwakhe besekushaya ebaleni kuHana? Lendzaba ayisitjeli lutfo ngaloko, kodvwa lamavi latsi “buso bakhe abuzange buphindze bubonakale bujabhile,” aveta kutsi Hana akazange aphindze akhatsateke kusukela ngaleso sikhatsi. Kuyacaca kutsi Phenina washeshe wabona kutsi lunya lwakhe beselungamtsintsi ndzawo Hana. LiBhayibheli libese alisaphindzi likhulume ngaye ngemuva kwaloko.

19. Ngusiphi sibusiso Hana lasitfola, futsi wakhombisa njani kutsi bekasati kahle kutsi sibuya kubani?

¹⁹ Njengobe tinyanga tichubeka, Hana wagcwala injabulo lenkhulu. Abesatetfwele! Nanome abejabule kangaka, Hana akazange akhohlwe nakancane kutsi lesibusiso besibuya kuphi. Ngalesikhatsi lendvodzana yakhe italwa, wakhetsa kuyetsa libito atsi nguSamuweli, lokusho kutsi “Ligama LaNkulunkulu,” futsi loku kungenteka kusho kubita ligama laNkulunkulu njengobe Hana abentile. Ngalowo mnyaka akazange ahambe na-Elkhana nemndeni wakhe kuya eShilo. Wahlala nalomntfwana iminyaka lemitsatfu waze walunyulwa. Ngemuva kwaloko  wacala kulungela lilanga labetawehlukana ngalo nendvodzana yakhe layitsandzako.

20. BoHana na-Elkhana basigcwalisa njani setsembiso lebebasente kuJehova?

²⁰ Kwehlukana nendvodzana yakhe kubonakala shengatsi bekungeke kube yintfo lemelula. Kuliciniso kutsi Hana bekati kutsi Samuweli utawuba sekhatsi kwemhlane nembeleko eShilo, mhlawumbe abetawunakekelwa ngulabanye balabafati labebasebenta ethendeni lekukhontela. Nanome kunjalo, lomfana abesemncane kakhulu, futsi ngumuphi nje make longafisi kuhlala nemntfwana wakhe? Ngetulu kwaleso simo, boHana na-Elkhana bammikisa lomfana ethendeni lekukhontela, bangabubuli nakancane, kodvwa bagcwele injabulo. Benta imihlatjelo endlini yaNkulunkulu, base betfula Samuweli ku-Eli, bamkhumbuta ngalesifungo Hana labesente eminyakeni letsite lendlulile.

21. Umthantazo Hana labewenta kuJehova wakwembula njani kujula kwekukholwa kwakhe? (Fundza nelibhokisi lelitsi “ Imithantazo Lemibili Lemnandzi Kakhulu.”)

²¹ Hana wase wenta umthantazo, Nkulunkulu lawubona ufanele kutsi ufakwe eVini lakhe leliphefumulelwe. Njengobe ufundza emavi akhe labhalwe ku-1 Samuweli 2:1-10, utawubona indlela kukholwa kwakhe lokujulile lokuvetwa ngayo emushweni ngamunye. Wadvumisa Jehova mayelana nendlela lemangalisako lasebentisa ngayo emandla akhe, lokulikhono lakhe lelingeke licatsaniswe lekutfobisa labatikhukhumetako, kubusisa labacindzetelekile, kanye nekubhubhisa nobe kusindzisa. Wadvumisa Babe wakhe wasezulwini ngebungcwele bakhe, kulunga, kanye nekwetsembeka. Hana abenetizatfu letinhle tekutsi atsi: “Kute lidvwala lelinjengaNkulunkulu wetfu.” Jehova wetsembekile, akagucuki, futsi usiphephelo sabo bonkhe labacindzetelekile nalabakhatsatekile labatikhalela kuye.

22, 23. (a) Yini lesenta siciniseke kutsi Samuweli wakhula ati kutsi batali bakhe bayamtsandza? (b) Jehova wachubeka ambusisa njani Hana?

²² Samuweli umfana losemncane, abebusiseke kakhulu ngekuba namake lonekukholwa lokungaka kuJehova. Nanome abemkhumbula unina njengobe akhula, akazange sekative  shengatsi ulahliwe. Umnyaka ngamunye, Hana abeya eShilo, amphatsele lijazi lelincane lelingenamikhono kuze alisebentise nakenta imisebenti yasethendeni lekukhontela. Kumtfungela kwakhe lelo jazi kwakubufakazi bekutsi uyamtsandza futsi uyamnakekela. (Fundza 1 Samuweli 2:19.) Ungase umcabange nje asagcokisa umfana wakhe lelijazi lelisha, alelula kahle futsi ambuke ngemehlo lagcwele lutsandvo njengobe amtjela emavi lanemusa nalakhutsatako. Samuweli abebusiseke kakhulu ngekuba namake lonje, futsi naye wakhula waba sibusiso kubatali bakhe nakuwo onkhe ema-Israyeli.

²³ Jehova abengakamkhohlwa naHana. Wambusisa ngentalo, futsi watalela Elkhana labanye bantfwana labasihlanu. (1 Sam. 2:21) Kodvwa kungenteka kutsi sibusiso lesikhulu saHana bekubudlelwane labenabo naBabe wakhe Jehova, lobebusolo bukhula njengobe iminyaka ichubeka. Shengatsi kungenteka lokufanako nakuwe njengobe ulingisa kukholwa kwaHana.