Siyaciniseka kutsi Hezekeli bekake watibona titfombe letinkhulu letibatiwe tetinkunzi letinetimphiko nemabhubesi lanetinhloko tebantfu kume embikwetigodlo nemathempeli. Letitfombe letibatiwe betitfolakala kuyo yonkhe i-Asiriya neBhabhulona yasendvulo. Njengabo bonkhe bantfu, naye abetibukisisa amangele letitfombe letesabekako, futsi letinye tato betingaba ngemamitha lasitfupha budze. Nanobe letitfombe betesabeka, kepha betingaphili, betimane nje tilitje lelibatiwe.

Ngalokwehlukile, letidalwa letine Hezekeli latibona embonweni, ‘betitidalwa letiphilako.’ Lomehluko bewumkhulu kakhulu! Loku kwammangalisa kakhulu Hezekeli kangangekutsi lamavi latsi ‘tidalwa letiphilako,’ wawasho tikhatsi letingu-11 esetfulweni sesiphrofetho sakhe. (Hez. 1:5-22) Lombono wetidalwa letine letiphilako letiya ndzawonye futsi tihamba ngesikhatsi lesifanako ngaphansi kwesihlalo sebukhosi saNkulunkulu, kungenteka wenta Hezekeli wabona kutsi nguJehova locondzisa yonkhe indalo yakhe. Nalamuhla, lombono usenta sibone ngalokucacile kutsi Jehova unemandla lamakhulu kakhulu nebukhosi bakhe bukhulu kakhulu.—1 Khr. 29:11.