LIBHOKISI LEKUFUNDZISA 19B
Umfudlana Uba Ngumfula Lomkhulu!
Hezekeli ubona umfudlana logeleta usuka endzaweni yaJehova lengcwele futsi ngalokusimangaliso uba ngumfula lomkhulu naloshonako, usagelete emakhilomitha langaba mabili nje kuphela! Elusentseni lwalomfula ubona tihlahla letinkhulu letiluhlata letikhicita kudla futsi letingumutsi wekwelapha. Kusho kutsini konkhe loku?
Lomfula Uletsa Tibusiso
ENDVULO: Ngemuva kwekutsi labantfu labatfunjiwe babuyele eveni labo, tibusiso tageletela kubo njengobe baba nencenye ekubuyiseleni kukhonta lokuhlantekile ethempelini
LAMUHLA: Nga-1919, kukhonta lokuhlantekile kwabuyiselwa, lokwenta kutsi imfundvo levela kuNkulunkulu igeletele etikhontini takhe letetsembekile ngelizinga lelikhulu kakhulu
ESIKHATSINI LESITAKO: Ngemuva kwe-Amagedoni, Jehova utasibusisa ngetindlela letinyenti, lokufaka ekhatsi kusisita kutsi sibe bete sono futsi asifundzise emaciniso lamasha
Emanti Laniketa Kuphila
ENDVULO: Jehova wababusisa ngelizinga lelikhulu bantfu bakhe labalalelako, njengobe bebandza ngelinani futsi bamkhonta ngendlela layemukelako
LAMUHLA: Njengobe umndeni waNkulunkulu wandza, bantfu labanyenti bazuzile kulokugeleta kwemaciniso laseBhayibhelini, futsi bafundze ngaJehova babese bahlanganyela nalabanye labamkhonta ngendlela layemukelako
ESIKHATSINI LESITAKO: Labasindze ku-Amagedoni batawuba kanye netigidzi tebantfu labavuswe ekufeni, futsi tibusiso letivela kuJehova titawuba tinyenti kubo bonkhe
Tihlahla Letidliwako Naletingumutsi Wekwelapha
ENDVULO: Jehova ufundzise bantfu bakhe emaciniso lasekelwe eVini lakhe kuze bamkhonte ngendlela layemukelako; uphindze wabasita kutsi bayekele kukhonta tithico nanobe yini lenye lehlobene nekukhonta kwemanga
LAMUHLA: Tinchazelo letinyenti temaciniso laseBhayibhelini tisite bantfu baNkulunkulu bahlala betsembekile kuye kuze babalekele kwenta tono letinkhulu futsi bangacabangi ngendlela bantfu balelive labacabanga ngayo
ESIKHATSINI LESITAKO: Khristu kanye nalabangu-144 000 latawubusa nabo batawusita bonkhe bantfu labalalelako kutsi babe bete sono futsi babe nemphilo lenhle nalejabulisako kuze kube phakadze!
