1, 2. Kungani ngaletinye tikhatsi Jehova asebentisa titfombe nakafundzisa tinceku takhe letisemhlabeni?

CABANGA ngemndeni lonebantfwana labancane uhleti ndzawonye udadisha liBhayibheli. Lobabe usebentisa titfombe kuze asite labantfwana bacondze emaciniso lasemiBhalweni. Lobabe ubona ngekumamatseka nje kulabantfwana nangetimphendvulo tabo labatisho bajabulile kutsi bayalitfola liphuzu. Ngekungeta titfombe kuloku lakushoko usita labantfwana bacondze timfundziso letimayelana naJehova lebebangeke baticondze ngenca yeminyaka yabo.

² Ngalokufanako, naJehova usebentise imifanekiso kuze asite bantfwana bakhe lababantfu kutsi bacondze emaciniso lebebangeke bawacondze. Nasi sibonelo, kuze Jehova achazele Hezekeli emaciniso ngaye, wasebentisa umbono logcwele titfombe letikhangako. Kulesehluko lesendlulile salencwadzi sicoce ngasinye saletitfombe. Nyalo asesicoce ngencenye yinye yalombono lojabulisako futsi sibone kutsi kucondza inchazelo yayo kungasisita njani sisondzele kuJehova.

3. (a) Ngekusho kwaHezekeli 1:4, 5, yini Hezekeli layibona embonweni? (Buka sitfombe lesisekucaleni kwalesehluko.) (b) Yini loyinakako endleleni Hezekeli labhala ngayo lendzaba yaloko lakubona?

³ Fundza Hezekeli 1:4, 5. Hezekeli uchaza “lebekubonakala shengatsi tidalwa letine letiphilako,” futsi ngasinye besinencenye yengilosi, yemuntfu neyesilwane. Naka kutsi Hezekeli wachaza lendzaba ngendlela lecacile, nakatsi wabona lokutsite “lebekubonakala shengatsi tidalwa letine letiphilako.” Njengobe ufundza ngawo wonkhe lombono esehlukweni 1 sencwadzi yaHezekeli, utawubona kutsi ngalokuphindzaphindziwe lomphrofethi usebentisa emavi latsi “lebekubonakala shengatsi,” “besifanana” “lokufanana.” (Hez. 1:13, 24, 26) Kuyacaca kutsi Hezekeli wacondza kutsi letintfo bekatibona betiyimifanekiso nobe titfombe tetintfo letisezulwini.

4. (a) Lombono wamtsintsa njani Hezekeli? (b) Yini lesiciniseka kutsi Hezekeli bekayati ngemakherubhi?

⁴ Kungenteka kutsi Hezekeli tametfusa tintfo latibona kanye nemisindvo layiva kulombono. Letidalwa letine letiphilako betibonakala “njengemalahle lavutsako.” Kuhamba kwato bekungatsi “kumanyata kwembane.” Umsindvo wetimphiko tato, “bekungatsi ngumsindvo wemanti lagijimako” futsi betitsi natihamba kube shengatsi ‘ngumsindvo welibutfo lemphi.’ (Hez. 1:13, 14, 24-28; buka libhokisi lelitsi “Bengibukela Tidalwa Letiphilako.”) Embonweni lawubona ngekuhamba kwesikhatsi, Hezekeli uchaza letidalwa letiphilako ngekutsi ‘ngemakherubhi’ nobe tingilosi letinemandla. (Hez. 10:2) Njengobe Hezekeli bekakhulele emndenini webaphristi, siyaciniseka kutsi bakati kutsi emakherubhi advute naNkulunkulu futsi ayamsebentela.—1 Khr. 28:18; Hla. 18:10.

5. (a) Emakherubhi nebuso bawo lobune, buwaveta njani emandla aJehova lamakhulu kakhulu kanye neludvumo lwakhe? (b) Kungani lencenye yalombono isikhumbuta ngenchazelo yeligama laNkulunkulu (Buka umbhalo longentasi.)

⁵ Fundza Hezekeli 1:6, 10. Hezekeli waphindze wabona kutsi likherubhi ngalinye belinebuso lobune, lokubuso bemuntfu, belibhubesi, benkunzi nebelusweti. Kubona lobuso lobune kungenteka kwenta Hezekeli wabona kutsi Jehova unemandla lamakhulu kakhulu futsi uyakhatimula. Kungani? Kungobe buso ngabunye balesidalwa bumelela ligunya kanye nemandla. Libhubesi lisilwane sesiganga lesineligunya, inkunzi isilwane lesihle, lusweti luyinyoni lenemandla futsi umuntfu uyindalo yaNkulunkulu yasemhlabeni lebalulekile, lebusa tonkhe letinye tidalwa letisemhlabeni. (Hla. 8:4-6) Nanobe kunjalo, kulombono Hezekeli wabona kutsi tonkhe letidalwa letine letinemandla letimelela indalo, njengobe timelela buso belikherubhi ngalinye, betingaphansi kwesihlalo sebukhosi saJehova, lokunguLoyo Lophakeme kuko konkhe. Lena yindlela lekahle lekhombisa kutsi Jehova angakhona kusebentisa indalo yakhe kuze afeze injongo yakhe! * Kunjengobe nje umhlabeleli asho ngaJehova nakatsi: “Bukhosi bakhe bungetulu kwemhlaba nemazulu.”—Hla. 148:13.

6. Yini lokungenteka yasita Hezekeli wacondza kutsi lobuso lobune bumelelani?

 ⁶ Ngemuva kwesikhatsi, sekacabangile ngaloko lakubona, kungenteka Hezekeli wakhumbula kutsi tinceku taNkulunkulu letaphila ngaphambi kwakhe betisebentisa tilwane natenta imifanekiso letsite. Nasi sibonelo, Jakobe wafananisa indvodzana yakhe Juda nelibhubesi futsi wafananisa indvodzana yakhe Bhenjamini nemphisi. (Gen. 49:9, 27) Kungani? Kungobe letilwane letimbili tinalokutsite lebekutawugcama ebuntfwini balamadvodza lamabili. Acabanga ngetibonelo letabhalwa nguMosi, Hezekeli kungenteka waphetsa ngekutsi buso balamakherubhi bebumelela tici letibalulekile. Kodvwa ngutiphi letici?

7, 8. Ngubuphi buntfu lobavamise kuhlotjaniswa nalobuso lobune balamakherubhi?

⁷ Babhali beliBhayibheli labaphila ngaphambi kwaHezekeli bebalihlobanisa nani libhubesi, lusweti kanye nenkunzi? Naka nankha emavi laseBhayibhelini latsi: ‘Umuntfu lonesibindzi njengelibhubesi.’ (2 Sam. 17:10; Taga 28:1) ‘Lusweti lundizela etulu,’ “futsi emehlo alo abona khashane.” (Jobe 39:27, 29) “Emandla enkunzi enta kutsi kube nesivuno lesikhulu.” (Taga 14:4) Kususelwa kulamavesi, buso belibhubesi bumelela kulunga; buso belusweti bumelela kuhlakanipha; buso benkunzi bumelela emandla, njengobe bekusolo kushiwo etincwadzini tetfu.

⁸ Kodvwa bumelelani “buso bemuntfu”? (Hez. 10:14) Bumelela buntfu lobungeke buvetwe silwane, buntfu lobuvetwa bantfu, labentiwe ngemfanekiso waNkulunkulu. (Gen. 1:27) Lobuntfu lobuvetwa bantfu kuphela emhlabeni, bugcizelelwa emtsetfweni waNkulunkulu lotsi: “Kufanele nitsandze Jehova Nkulunkulu wenu ngayo yonkhe inhlitiyo yenu” nalotsi “kufanele umtsandze umuntfu wakini njengobe utitsandza wena.” (Dut. 6:5; Lev. 19:18) Nasilalela lemitsetfo ngekutsi sibe nelutsandvo lolute bugovu, sisuke sikhombisa kutsi sinelutsandvo njengaJehova. Kunjengobe umphostoli Johane abhala, watsi: “Tsine sinelutsandvo, ngobe yena wasitsandza kucala.” (1 Joh. 4:8, 19) Ngako-ke, “buso bemuntfu” bumelela lutsandvo.

9. Buntfu babani lobuvamise kuhlotjaniswa nalamakherubhi?

⁹ Tabobani letici? Njengobe lobuso bubalamakherubhi, letici tona tabo bonkhe labamelelwa ngulamakherubhi, lokungumndeni waJehova wasezulwini, lotidalwa letingumoya. (Semb. 5:11) Ngetulu kwaloko, njengobe kunguJehova longuMtfombo walamakherubhi, uphindze abe nguMtfombo wetici tawo. (Hla. 36:9) Ngako lobuso balamakherubhi bumelela buntfu baJehova lucobo lwakhe. (Jobe 37:23; Hla. 99:4; Taga 2:6; Mik. 7:18) Ngutiphi tindlela letimbalwa Jehova lakhombisa ngato kutsi unalobuntfu?

10, 11. Sizuza njani endleleni Jehova lakhombisa ngayo lobuntfu bakhe lobune lobuhamba embili?

¹⁰ Kulunga. Njengobe anguNkulunkulu ‘lotsandza kulunga,’ Jehova ‘akakhetsi muntfu.’ (Hla. 37:28; Dut. 10:17) Ngako litfuba lekuhlale  sitinceku takhe, futsi sitfole tibusiso taphakadze livulekele wonkhe muntfu, ngisho nobe achamuka kuphi. Kuhlakanipha. Njengobe anguNkulunkulu ‘lohlakaniphile enhlitiyweni,’ Jehova usilungiselele incwadzi legcwele “kuhlakanipha.” (Jobe 9:4; Taga 2:7) Kusebentisa seluleko lesihlakaniphile lesiseBhayibhelini kusisita sikhone kubhekana netinkinga telilanga ngelilanga futsi siphile kuphila lokunenjongo. Emandla. Njengobe anguNkulunkulu ‘lonemandla lamakhulu,’ Jehova usebentisa umoya wakhe longcwele kute asinike “emandla lamakhulu kakhulu.” Lamandla asisita sikhone kubeketelela noma ngutiphi timo letimatima naletibuhlungu lesingahle sibhekane nato.—Nah. 1:3; 2 Khor. 4:7; Hla. 46:1.

¹¹ Lutsandvo. Ngenca yekutsi “lutsandvo lwakhe lolucotfo luyachichima,” Jehova akayuze atilahle tikhonti takhe letetsembekile. (Hla. 103:8; 2 Sam. 22:26) Ngako-ke, nanobe sikhatsatekile ngenca yekutsi kugula nobe kukhula kusenta singasakhoni kwenta lokunyenti emsebentini waJehova njengasesikhatsini lesendlulile, kodvwa kuyasidvudvuta kwati kutsi Jehova uyayikhumbula imisebenti yelutsandvo lesimentele yona esikhatsini lesendlulile. (Heb. 6:10) Kuyacaca-ke kutsi sesivele siyazuza endleleni Jehova lakhombisa ngayo kulunga, kuhlakanipha, emandla kanye nelutsandvo, futsi nasesikhatsini lesitako sitawuchubeka sizuza kulobuntfu bakhe lobune lobuhamba embili.

12. Yini lokufanele siyikhumbule ngelizinga lesikhona kucondza ngalo buntfu baJehova?

¹² Ngako kufanele sikhumbule kutsi loko tsine bantfu lesikhona kukucondza ngebuntfu baJehova, ‘kumane nje kumbalwa.’ (Jobe 26:14) “Angeke size sikwati kumcondza Somandla,” ngobe “kute longabucondza bukhulu bakhe.” (Jobe 37:23; Hla. 145:3) Ngako siyabona kutsi buntfu baJehova angeke sikhone kububala nobe sibubeke ngabolonina. (Fundza KubaseRoma 11:33, 34.) Ecinisweni, umbono waHezekeli uveta kutsi buntfu baNkulunkulu abunasilinganiso. (Hla. 139:17, 18) Nguyiphi incenye yalombono leveta leliciniso lelibalulekile?

13, 14. Bumelelani buso lobune balamakherubhi, futsi kungani sisho njalo?

¹³ Kulombono, Hezekeli wabona kutsi likherubhi ngalinye linebuso lobune. Kusitjelani loko? Khumbula kutsi eVini laNkulunkulu inombolo yesine ivamise kumelela kuphelela. (Isa. 11:12; Mat. 24:31; Semb. 7:1) Lesikunakako kulombono waHezekeli kutsi inombolo yesine uyisho tikhatsi letingetulu kwaletingu-11. (Hez. 1:5-18) Ngako-ke, singaphetsa ngekutsini? Njengobe lamakherubhi lamane amelela tonkhe tidalwa temoya letetsembekile, lobuso lobune balamakherubhi nabubukwa kanyekanye, bumelela bonkhe buntfu baJehova. *

 ¹⁴ Kuze sifanekise kutsi kwenteka njani kutsi buso lobune balamakherubhi bufake ekhatsi lobunye buntfu lobungetulu kwalobu lobune, cabanga ngaloko lokwenteka kulamasondvo lamane lakulombono. Lisondvo ngalinye liyamangalisa, kodvwa omane lamasondvo nawabukwa kanyekanye, awabi nje ngemasondvo lamane lamangalisako, kodvwa asisekelo lokuhlala kuso lenkalishi. Ngendlela lefanako, nangabe lobuso lobune bubukwa kanyekanye, abakhi nje kuphela buntfu lobune lobumangalisako, kodvwa busisekelo sebuntfu baJehova lobumangalisa kakhulu.

15. Nguliphi liciniso lelitsintsa inhlitiyo lelafundvwa nguHezekeli kulombono wakhe wekucala?

¹⁵ Kulombono wekucala, Hezekeli wafundza liciniso lelibalulekile nalelitsintsa inhlitiyo lelimayelana nebuhlobo bakhe naJehova. Belitsini leliciniso? Leliciniso livetwa ekucaleni kwalencwadzi leyabhalwa ngulomphrofethi. Ngemuva kwekusho kutsi ‘bekaseveni lemaKhaledi,’ Hezekeli wakhuluma ngaloko lokwenteka kuye nakatsi: “Kukuleyondzawo lapho emandla aJehova aba setikwakhe khona.” (Hez. 1:3) Naka kutsi Hezekeli watsi lombono akawutfolanga eJerusalema, kepha wawutfola lena eBhabhulona. * Ngako-ke loko  kwamtjelani Hezekeli? Kwamtjela kutsi: Nanobe abetfunjiwe futsi ehlukanisiwe neJerusalema nelithempeli, kepha bekangakehlukaniswa naJehova kanye nekumkhonta. Ngesikhatsi Jehova abonakala kuHezekeli nakaseBhabhulona, waveta kutsi kukhonta lokuhlantekile bekungayi ngekutsi ukuphi nobe ukusiphi simo. Kunaloko, bekuya ngesimo senhlitiyo yaHezekeli kanye nesifiso sakhe sekukhonta Jehova.

16. (a) Ngusiphi sicinisekiso lesidvudvutako lesisitfola kulombono waHezekeli? (b) Yini lekwenta ukhonte Jehova ngenhlitiyo yakho yonkhe?

¹⁶ Kungani lisidvudvuta natsi lamuhla leliciniso lelafundvwa nguHezekeli? Liyasicinisekisa kutsi nasikhonta Jehova ngenhlitiyo yetfu yonkhe, uhlale asedvute natsi ngisho nome sihlala kuphi, sicindzeteleke kangakanani, nobe singaphansi kwatiphi timo ekuphileni. (Hla. 25:14; Imis. 17:27) Ngenca yekutsi Jehova utitsandza ngelutsandvo lolucotfo tinceku takhe, akasheshi alahle litsemba. (Eks. 34:6) Ngako-ke, kute lokungasehlukanisa nelutsandvo lwaJehova lolucotfo. (Hla. 100:5; Rom. 8:35-39) Ngetulu kwaloko, lombono lojabulisako lomayelana nebungcwele baJehova kanye nemandla akhe lamakhulu, usikhumbuta kutsi nguJehova kuphela lokufanele simkhonte. (Semb. 4:9-11) Ngako simbonga kakhulu Jehova kutsi wasebentisa lemibono kute sicondze emaciniso labalulekile ngaye kanye nangebuntfu bakhe! Kubucondza kancono buntfu baJehova lobuhle, kusidvonsela kuye kuphindze kusente simdvumise futsi simkhonte ngenhlitiyo yetfu yonkhe nangemandla etfu onkhe.—Luk. 10:27.

17. Ngumiphi imibuto lesitawucoca ngayo kuletehluko letilandzelako?

¹⁷ Lokubuhlungu kutsi ngemalanga aHezekeli, kukhonta lokuhlantekile besekungasahlonishwa. Kwenteka kanjani loko? Yini Jehova layenta? Yini tsine lamuhla lesingayifundza kuletintfo letenteka kadzeni? Lemibuto kutawucocwa ngayo etehlukweni letilandzelako.