Nine Lenitsandza Jehova:

Bekungumnyaka wa-1971. Labo lebebakhona emhlanganweni wesifundza lowawunesihloko lesitsi: “Divine Name,” ngaloyo mnyaka bajabula kakhulu nabatfola tincwadzi letinsha letimbalwa. Letincwadzi tachazwa ngekutsi “tiyintfo lenhle kakhulu nalebeyingakalindzeleki.” Mayelana nalenye yaletincwadzi letakhululwa, lomunye umzalwane watsi: “Itichaza kahle tintfo letisatokwenteka.” Bekakhuluma ngayiphi incwadzi? Bekuyincwadzi lenesihloko lesitsi “The Nations Shall Know That I Am Jehovah”—How? Kodvwa kungani lencwadzi beyijabulisa kangaka? Kungenca yekutsi beyicuketse tinchazelo letitfutfukisiwe tetiphrofetho letitfolakala encwadzini yeliBhayibheli yaHezekeli, lokutiphrofetho letitsintsa likusasa labo bonkhe bantfu.

Eminyakeni leyalandzela ngemuva kwekukhululwa kwalencwadzi, linani lebantfu baNkulunkulu lakhula ngekushesha lasuka kubantfu labangu-1.5 million laya kubantfu labangetuku kwa-8 million. (Isa. 60:22) Letigidzi tetinceku taJehova tikhuluma tilwimi letehlukahlukene letingetulu kwa-900. (Zak. 8:23) Labanyenti abakase babe nelitfuba lekudadisha incwadzi letichaza kabanti tiphrofetho letiphefumulelwe letabhalwa ngumphrofethi Hezekeli.

Ngetulu kwaloko, emashumini eminyaka kusukela nga-1971, indlela lesicondza ngayo emaciniso lamanyenti laseBhayibhelini seyitfutfuke kakhulu njengobe kukhanya kuchubeka kukhanya kakhulu. (Taga 4:18) Nga-1985 sacala kubona ngalokucacile kutsi kungani “letinye timvu” kutsiwa tilungile njengobe tibangani baNkulunkulu. (Joh. 10:16; Rom. 5:18; Jak. 2:23) Nga-1995 sacala kucondza kutsi sehlulelo sekugcina ‘setimvu netimbuti’ sitawenteka ngesikhatsi ‘sekuhlupheka lokukhulu.’ (Mat. 24:21; 25:31, 32) Lonkhe lolushintjo lube nesandla endleleni lesicondza ngayo incwadzi yaHezekeli.

Eminyakeni yakumuva, kukhanya kuchubeke kukhanya nakakhulu. Cabanga ngetifundvo lesititfola emifanekisweni yaJesu. Letinyenti taletifundvo nyalo seticaca kakhulu etingcondvweni nasetinhlitiyweni tetfu. Imifanekiso leminyenti ikhuluma ngetintfo letitawenteka madvutane ngesikhatsi sekuhlupheka lokukhulu. Ngendlela lefanako, indlela lebesicondza ngayo tiphrofetho letitsite letitfolakala encwadzini Hezekeli seticacisiwe. Letiphrofetho tifaka ekhatsi lesikhuluma ngaGogi wakaMagogi (tehluko 38 na-39), semsebenti wendvodza lenesipatji samabhalane setintfo tekubhala (sehluko 9), sihosha sematsambo lomile kanye nekuhlanganiswa kwetindvuku letimbili letingekwemfanekiso (sehluko 37). Konkhe lokucaciswa kutfutfukisa loko bekubhalwe kulencwadzi letsi ‘Know Jehovah’ kuleminyaka leyendlulile.

Akumangalisi-ke kutsi bantfu baJehova labanyenti bebabuta lombuto lotsi: “Sitayitfola nini incwadzi leniketa kucaciswa lokutfutfukisiwe kwetiphrofetho taHezekeli?” Incwadzi letsi Kukhonta Jehova Ngendlela Lehlantekile—Kuyabuyiselwa Ekugcineni! yentelwe leyo njongo. Njengobe ufundza tehluko tayo letingu-22 futsi uzindla ngemifanekiso lemihle letfolakala kuyo, itakumangalisa indlela lokwentiwe ngayo lucwaningo ngekucophelela nakusalungiselelwa lencwadzi. Sicitse sikhatsi lesinyenti sithantaza futsi sizindla kuze siciniseke kutsi kungani Jehova asinikete lencwadzi yeliBhayibheli yaHezekeli lemangalisako. Besicabangisisa ngemibuto lefana naletsi: Ngitiphi tifundvo letitfolakala kulencwadzi yaHezekeli letatfolwa ngulabo bebaphila ngesikhatsi saHezekeli kanye naletifanele titfolwe ngitsi lamuhla? Ngutiphi tiphrofetho letikhuluma ngetentakalo letisatokwenteka esikhatsini lesitako? Kufanele yini sibuke indzaba lengumfanekiso naloko  lekumelelako kuletiphrofetho taHezekeli? Timphendvulo talemibuto tisiniketa kucondza lokucace kakhulu ngalencwadzi yeliBhayibheli lokusijabulisa kakhulu kuyifundza.

Njengobe ufundza lencwadzi yaHezekeli kusukela ekucaleni uze uyoyicedza, itakumangalisa indlela lengayo incenye lesezulwini yenhlangano yaJehova. Asingabati kutsi utawumangala nawubona kutsi Jehova ubeke timiso takhe letiphakeme kuze tilandzelwe ngulabo labasezulwini nalabasemhlabeni labafisa kumkhonta ngendlela layemukelako. Lencwadzi letsi Kukhonta Lokuhlantekile itakwenta utfutfukise indlela lombonga ngayo Jehova ngaloko lasavele akwentele bantfu bakhe kanye naloko lasatabentela khona kudze madvutane. Utawunaka kutsi lencwadzi ikhuluma kakhulu ngetintfo letimbili. Kwekucala, kute sijabulise Jehova, kufanele sati futsi sivume kutsi unguMbusi Wendzawo yonkhe. Kwesibili, kufanele sikhonte Jehova ngendlela layemukelako futsi sivumelanise kuphila kwetfu netimiso takhe letiphakeme.

Kusifiso setfu lesisuka enhlitiyweni kutsi lencwadzi icinise kutimisela kwakho ekukhonteni Jehova ngendlela ledvumisa libito lakhe lelikhulu nalelingcwele. Ngesikhatsi lesifanako, shengatsi lencwadzi ingakukhutsata kutsi uchubeke ulindzele sikhatsi lapho khona tonkhe tive titawukwati kutsi yena unguJehova.—Hez. 36:23; 38:23.

Shengatsi Babe wetfu lonelutsandvo Jehova angayibusisa kakhulu imetamo yakho yekucondza lencwadzi laphefumulela umphrofethi Hezekeli kutsi ayibhale.