Kubuyeketwa Kwemaphuzu Lacacisiwe
Kuleminyaka leyendlulile, Sicongosekulindza siyitfutfukisile indlela lebesicondza ngayo tincenye letitsite tesiphrofetho saHezekeli. Kulencwadzi lena letsi Kukhonta Jehova Ngendlela Lehlantekile—Kuyabuyiselwa Ekugcineni!, kuvetwe emaphuzu lamanyenti lacacisiwe. Asesibone kutsi ungakhona yini kuyiphendvula lemibuto lelandzelako.
Bumelelani buso lobune betidalwa letiphilako?
Indlela lebesicondza ngayo: Buso ngabunye baletidalwa letiphilako nobe emakherubi, bumelela buntfu baJehova lobune lobuhamba embili.
Kucaciswa: Nanobe buso ngabunye baletidalwa letiphilako bumelela buntfu ngabunye baJehova lobuhamba embili, nabubukwa kanyekanye, bumelela bonkhe buntfu baJehova. Lobuso lobune buphindze busente sibone kutsi Jehova unemandla lamakhulu kakhulu futsi uyakhatimula.
Sizatfu salolushintjo: EVini laNkulunkulu inombolo yesine ivamise kumelela kuphelela. Ngako, nangabe lobuso lobune bubukwa kanyekanye, abakhi nje kuphela buntfu lobune lobumangalisako, kodvwa busisekelo sebuntfu baJehova lobumangalisa kakhulu. Lokunye kutsi buso ngabunye baletidalwa letine bumelela ligunya kanye nemandla. Nobe kunjalo, tonkhe letidalwa letine letiphilako, tingaphansi kwesihlalo sebukhosi saJehova, lokuveta kutsi nguye uMbusi losetikwako konkhe.
Imelela bani lendvodza lenesipatji samabhalane setintfo tekubhala?
Indlela lebesicondza ngayo: Lendvodza lenesipatji setintfo tekubhala imelela labagcotjiwe labasele. Ngekwenta umsebenti wekushumayela nekwenta bantfu babe bafundzi, labagcotjiwe babeka luphawu lolungekwemfanekiso emabuntini alabo labayincenye ‘yesicumbi lesikhulu.’—Semb. 7:9.
Kucaciswa: Lendvodza lenesipatji samabhalane setintfo tekubhala imelela Jesu Khristu. Utawubeka sicumbi lesikhulu luphawu nakasehlulela njengetimvu ngesikhatsi ‘sekuhlupheka lokukhulu.’—Mat. 24:21.
Sizatfu salolushintjo: Jehova uwunikete iNdvodzana yakhe umsebenti wekwehlulela. (Joh. 5:22, 23) Ngekusho kwaMatewu 25:31-33, nguJesu lotawukhipha sehlulelo sekugcina sekutsi bobani bantfu ‘labatimvu nalabatimbuti.’
Labosisi labatingwadla, bo-Ohola na-Oholiba, bamelela Tinkholo Letitsi TebuKhristu nemacembu ato, lokuyinkholo yemaKatolika neyemaPhrotestani yini?
Indlela lebesicondza ngayo: Ohola (iSamariya leyinhloko-dolobha yaka-Israyeli), longusisi lomdzala, umelela inkholo yebuKatolika; Oholiba (iJerusalema leyinhloko-dolobha yakaJuda), longusisi lomncane, umelela inkholo yebuPhrotestani.
Kucaciswa: Labosisi labatingwadla abameleli emacembu latsite eTinkholo Letitsi TebuKhristu. Kunaloko, kuba khona kwabo kusifundzisa indlela Jehova lativa ngayo nangabe bantfu bakhe labacotfo bakhonta labanye bonkulunkulu futsi bangetsembeki kuye. Utiva ngendlela lefanako ngawo onkhe emacembu enkholo yemanga.
Sizatfu salolushintjo: Kute sizatfu lesisekelwe emiBhalweni lesikhombisa kutsi bo-Ohola na-Oholiba bamelela Tinkholo Letitsi TebuKhristu. Ema-Israyeli nemaJuda ake aba bafati baJehova labetsembekile, kodvwa Tinkholo Letitsi TebuKhristu atikaze tibe nebuhlobo lobuhle njengalobu naJehova. Ngetulu kwaloko, kufananiswa kwebantfu baNkulunkulu labangaketsembeki netingwadla kusehluko 16 na-23 sencwadzi yaHezekeli kuniketa litsemba lekutsi bebatawuphindze bashintje futsi babe nebuhlobo lobuhle naNkulunkulu. Kepha ngalokwehlukile, kute litsemba lekutsi Tinkholo Letitsi TebuKhristu njengobe tiyincenye yeBhabhulona Lenkhulu, tingake tishintje.
Tinkholo Letitsi TebuKhristu timelelwa bantfu baseJerusalema lebesebahlubukile yini?
Indlela lebesicondza ngayo: Ngekwesiphrofetho, bantfu baseJerusalema labangaketsembeki bamelelwa Tinkholo Letitsi TebuKhristu. Ngako kubhujiswa kweJerusalema bekubiketela kutsi Tinkholo Letitsi TebuKhristu titawubhujiswa.
Kucaciswa: Timo tebantfu labangaketsembeki baseJerusalema, letifaka ekhatsi kukhonta tithico kanye nekukhohlakala lebesekwandzile, kusikhumbuta loko lokwenteka eTinkholweni Letitsi TebuKhristu, kodvwa asisasho kutsi Tinkholo Letitsi TebuKhristu timelelwa yiJerusalema.
Sizatfu salolushintjo: Kute sizatfu lesiphatsekako lesisemiBhalweni sekutsi lesiphrofetho simelela lokutsite. Ngalokungafani neJerusalema yasendvulo, Tinkholo Letitsi TebuKhristu, atikaze tikhonte Jehova ngendlela lehlantekile. Nanobe Jehova ayicolela iJerusalema ngekuhamba kwesikhatsi, kodvwa kute litsemba lekutsi Tinkholo Letitsi TebuKhristu tiyoke ticolelwe esikhatsini lesitako.
Wagcwaliseka njani umbono wesihosha lesinematsambo lomile?
Indlela lebesicondza ngayo: Nga-1918 amaKhristu lagcotjiwe aphatfwa kabi futsi atfunjwa yiBhabhulona Lenkhulu, aba sesimeni lesifana nekufa njengobe bewangakhoni kwenta imisebenti lephatselene nekukhonta Jehova. Lokutfunjwa kwesikhashana kwaphela nga-1919 ngesikhatsi Jehova abavuselela kuze babe bashumayeli beMbuso.
Kucaciswa: Lesimo salabantfu labatfunjiwe lebesifana nekufa lokwatsatsa sikhatsi lesidze kakhulu futsi lokwacala emuva kakhulu ngaphambi kwa-1918. Kwacala ngelikhulu lesibili C.E. kwaphela nga-1919 C.E. futsi loko kuhambelana nemfanekiso waJesu lomayelana nakolo nelukhula lokwatsatsa sikhatsi lesidze kukhula.
Sizatfu salolushintjo: Kutfunjwa kwema-Israyeli asendvulo kwatsatsa sikhatsi lesidze, futsi kwacala nga-740 B.C.E. kwaphela nga-537 B.C.E. Siphrofetho saHezekeli lesichaza lamatsambo “lomile” nobe “lome kheshe,” siveta kutsi labo lebebamelelwa ngulamatsambo besebanesikhatsi lesidze bafile. Kubuyiselwa kwalamatsambo kuchazwa njengesentakalo lesitawenteka kancane kancane futsi lesitawutsatsa sikhatsi lesidze.
Kusho kutsini kuhlanganiswa kwetindvuku letimbili?
Indlela lebesicondza ngayo: Ngemuva kwekwehlukana lokwatsatsa sikhatsi lesincane ngesikhatsi seMphi Yelive Yekucala, bazalwane labagcotjiwe labetsembekile lebebasele baphindze baba nebunye nga-1919.
Kucaciswa: Lesiphrofetho siveta kutsi Jehova utawubangela tikhonti takhe kutsi tibe nebunye. Ngemuva kwa-1919, njengobe sikhatsi sichubeka, labasele labagcotjiwe bahlangana nelinani lelikhulako lalabo labanelitsemba lekuphila emhlabeni. Lamacembu lamabili akhonta Jehova ngebunye njengesive sinye.
Sizatfu salolushintjo: Lesiphrofetho asichazi indvuku yinye leyephulwe emkhatsini yaba tindvuku letimbili yabese iyahlanganiswa ngekuhamba kwesikhatsi. Ngako, lesiphrofetho asichazi licembu linye lebelitawuhlukana bese ngekuhamba kwesikhatsi liba munye. Kunaloko, sichaza kutsi emacembu lemabili lehlukene atawuba munye ngayiphi indlela.
Ungubani Gogi wakaMagogi?
Indlela lebesicondza ngayo: Gogi wakaMagogi ligama lelisetjentiswa kuSathane kusukela acoshwa ezulwini.
Kucaciswa: Gogi wakaMagogi umelela licembu letive letihlangene letitawuhlasela tikhonti letihlantekile ngesikhatsi sekuhlupheka lokukhulu.
Sizatfu salolushintjo: Indlela lesiphrofetho saGogi lesichazwe ngayo, siveta kutsi Gogi uba kudla kwemangce futsi uniketwa nendzawo yekungcwatjwa emhlabeni, kukhombisa kutsi Gogi akasiso sidalwa semoya. Ngetulu kwaloko, kuhlasela kwaGogi kuhambisana naloko lokushiwo yincwadzi yaDanyela neyeSembulo mayelana nekuhlaselwa kwebantfu baNkulunkulu lokutawentiwa tive tasemhlabeni.—Dan. 11:40, 44, 45; Semb. 17:14; 19:19.
Hezekeli wabona futsi wahambahamba ethempelini laJehova lelikhulu yini, lelo lelachazwa ngumphostoli Pawula ngekuhamba kwesikhatsi?
Indlela lebesicondza ngayo: Lithempeli lelabonwa nguHezekeli embonweni liyafana nelithempeli laNkulunkulu lelachazwa ngumphostoli Pawula.
Kucaciswa: Hezekeli akazange abone lithempeli laNkulunkulu lelacala kuba khona nga-29 C.E., kodvwa wabona umbono lomayelana nekutsi kukhonta lokuhlantekile lokukhulunywa ngako eMtsetfweni waMosi bekutawubuyiselwa njani nakuphela kutfunjwa. Inchazelo yaPawula lephefumulelwe lemayelana nelithempeli laNkulunkulu ikhuluma ngemsebenti lowentiwa nguJesu, kusukela nga-29 kuya ku-33 C.E., njengobe anguMphristi Lophakeme Kakhulu. Umbono waHezekeli welithempeli awukhulumi ngemphristi lophakeme, kunaloko ukhuluma ngekubuyiselwa kwemaciniso lokwacala nga-1919. Ngako-ke, asibuki yonkhe imininingwane kutsi imelela ini kuto tonkhe tintfo kanye netintfo letikaliwe letitfolakala kulombono waHezekeli welithempeli. Kunaloko, sibuka kakhulu tifundvo lombono waHezekeli losifundzisa tona mayelana netimiso taJehova tekukhonta lokuhlantekile.
Sizatfu salolushintjo: Lithempeli lelabonwa nguHezekeli embonweni lihlukile ethempelini laNkulunkulu ngetindlela letibalulekile. Nasi sibonelo, ethempelini laHezekeli bekwentiwa imihlatjelo leminyenti yetilwane, kantsi ethempelini laNkulunkulu, munye kuphela umhlatjelo lowanikelwa “kwaba kanye kuphela.” (Heb. 9:11, 12) Bekungasiso sikhatsi saJehova sekwembula emaciniso lajulile ngelithempeli lakhe, ngobe lelithempeli laHezekeli laba khona emakhulwini eminyaka leminyenti ngaphambi kwekutsi kufike Khristu.
