1-3. (a) Utawuba yini umphumela ‘wentfukutselo lenkhulu’ yaJehova? (Buka sitfombe lesisekucaleni kwalesehluko.) (b) Yini lesitawucoca ngayo nyalo?

EMADVODZA, bafati nebantfwana beme ndzawonye bahlabela ingoma yeMbuso. Ngemuva kwaloko lomdzala welibandla wenta umthantazo losuka enhlitiyweni, uncenga Jehova kutsi abavikele. Emalunga elibandla ayaciniseka kutsi Jehova utawanakekela, nobe kunjalo ayakudzinga kudvudvutwa nekucinisekiswa. Ngephandle, kuvakala umsindvo lomkhulu kakhulu webantfu labalwako. I-Amagedoni seyicalile!—Semb. 16:14, 16.

² Ngesikhatsi se-Amagedoni, Jehova utawubulala bantfu, kepha nanobe atawube ‘atfukutsele kakhulu,’ angeke abulale nobe ngabe ngubani. (Fundza Hezekeli 38:18.) Angeke acondzise intfukutselo yakhe ebutfweni linye nobe esiveni sinye, kodvwa utayicondzisa kubantfu labanyenti kakhulu labahlala kuwo wonkhe umhlaba. Ngalelolanga, tidvumbu talabo labatawube babulewe nguJehova titawugcwala umhlaba, “kusuka ngala kwawo kuye ngale kwawo.”—Jer. 25:29, 33.

³ Yini lebangela Jehova, longuNkulunkulu welutsandvo, lochazwe ngekutsi ‘unesihawu neluvelo’ futsi ‘uyephuta kutfutsela’ kutsi  atsatse lesinyatselo ‘atfukutsele kakhulu’? (Eks. 34:6; 1 Joh. 4:16) Asesibone indlela imphendvulo yalombuto lengasidvudvuta ngayo, isinikete sibindzi futsi isikhutsate emsebentini wetfu wekushumayela lamuhla.

4, 5. Intfukutselo yaNkulunkulu yehluke njani kuyebantfu labanesono?

⁴ Kufanele sicale sati kutsi intfukutselo yaJehova ayifanani neyebantfu labanesono. Nakwentekile umuntfu watfukutsela kakhulu, intfukutselo yakhe ivame kungalawuleki kantsi nemiphumela ayikavami kuba mihle. Nasi sibonelo, Khayini lobekayindvodzana yekucala ya-Adamu, “watfukutsela wabila” ngobe Jehova akazange awemukele umhlatjelo wakhe kodvwa wemukela wa-Abela. Waba yini umphumela? Khayini wabulala umnakabo lobekalungile. (Gen. 4:3-8; Heb. 11:4) Cabanga nangaDavide, lochazwa ngekutsi bekangumuntfu lotsandzekako enhlitiyweni yaJehova. (Imis. 13:22) Ngisho nobe bekayindvodza lekahle, kodvwa wacishe wenta sono lesikhulu kakhulu ngesikhatsi eva kutsi Nabali indvodza lebeyinjingile beyetfuke yena kanye nemadvodza lebekanaye. Atfukutsele agane lunwabu, Davide kanye nemasotja akhe ‘bahloma ngetinkemba tabo’ kuze bayobulala Nabali longabongi kanye nawo wonkhe umuntfu lomdvuna emndenini wakhe. Lokuhle kutsi Abigayili, umfati waNabali wakhona kuncenga Davide kanye nemadvodza lebekanawo kutsi bangatiphindziseleli. (1 Sam. 25:9-14, 32, 33) Ngako Jehova bekanesizatfu lesihle sekuphefumulela Jakobe kutsi abhale atsi: “Intfukutselo yemuntfu ayikuletsi kulunga kwaNkulunkulu.”—Jak. 1:20.

⁵ Ngalokungafani nentfukutselo yemuntfu, Jehova uyakhona kulawula intfukutselo yakhe futsi kuvele kucace kutsi utfukutseliswe yini. Ngisho nobe Jehova atsatsa sinyatselo atfukutsele kakhulu, kodvwa wenta ngekulunga. Nakabhubhisa titsa takhe, akacotfuli “labalungile kanye nalababi.” (Gen. 18:22-25) Ngetulu kwaloko, Jehova usuke anetizatfu letilungile tekutfukutsela. Cabanga nganati tizatfu letimbili kanye netifundvo lesingatitfola kuto.

6. Yini Jehova layentako nangabe ligama lakhe lihlanjalatwa?

⁶ Sizatfu: Ligama laJehova liyahlanjalatwa. Labo labatsi bamelela Jehova kepha babe benta tintfo letimbi, bona lidvumela lakhe futsi bavusa intfukutselo yakhe. (Hez. 36:23) Njengobe kuvetiwe etehlukweni letendlulile, sive saka-Israyeli salihlambalata kakhulu ligama laJehova. Indlela bantfu bakulesive lebebacabanga ngayo kanye netento tabo kwamtfukutselisa Jehova. Nobe kunjalo, wakhona kulawula intfukutselo yakhe, wajezisa bantfu bakhe ngendlela lefanele futsi akazange ecele ngale kwaloko. (Jer. 30:11) Nangabe intfukutselo yaJehova seyiyifezile injongo yayo, ibese iyaphela futsi uyakwendlulisa loko bekumtfukutselisile.—Hla. 103:9.

7, 8. Ngutiphi tifundvo lesitifundzako endleleni Jehova lasebentelana ngayo nema-Israyeli?

 ⁷ Tifundvo: Loko Jehova lakwenta kuma-Israyeli kusiniketa secwayiso lokungakafaneli sisitsatse melula. Njengema-Israyeli asendvulo, natsi siniketwe umsebenti wekufakaza ngeligama laJehova. SiBoFakazi BaJehova. (Isa. 43:10) Indlela lesikhuluma ngayo nalesenta ngayo tintfo iyayitsintsa indlela bantfu labacabanga ngayo ngaJehova. Asifuni kwenta tintfo letimbi ngemabomu futsi sihlambalate ligama laJehova. Kutentisa lokunjalo kutawuvusa intfukutselo yakhe, futsi nakanjani utawutsatsa sinyatselo kuze avikele lidvumela lakhe.—Heb. 3:13, 15; 2 Phet. 2:1, 2.

⁸ ‘Intfukutselo lenkhulu’ yaJehova ingasenta yini kutsi singasasondzeli kuye? Cha. Siyati kutsi Jehova uyabeketela futsi uyatsetselela. (Isa. 55:7; Rom. 2:4) Nobe kunjalo, siphindze sibone kutsi uyasikhipha sijeziso nakudzingekile. Kwati kutsi intfukutselo yaJehova itawehlela bonkhe bantfu labenta tintfo letimbi, nekutsi angeke abavumele kutsi bahlale nebantfu labalungile, kusenta simhloniphe kakhulu. (1 Khor. 5:11-13) Jehova usitjela ngalokucacile kutsi yini lemtfukutselisako. Sekukitsi kutsi siyakugwema yini kucabanga nekwenta tintfo letimtfukutselisako.—Joh. 3:36; Rom. 1:26-32; Jak. 4:8.

9, 10. Yini Jehova layentako nangabe bantfu bakhe labetsembekile basongelwa? Niketa tibonelo.

⁹ Sizatfu: Bantfu baJehova labetsembekile bayasongelwa. Jehova uyatfukutsela nangabe titsa tihlasela labo labakufuna ngekwetsembeka kuba ngephansi kwesivikelo sakhe. Nasi sibonelo, ngemuva kwekutsi ema-Israyeli aphume eGibhithe, Faro kanye nelibutfo lakhe lelinemandla babalandzela labantfu lebebabonakala bangenamsiti futsi babutsene elugwini lweLwandle Lolubovu. Kodvwa ngesikhatsi lelibutfo lelinemandla licosha ema-Israyeli emhlabatsini lowomile lebewusekhatsi elwandle, Jehova wakhumula emasondvo etinkalishi temphi futsi wajika libutfo laseGibhithe ekhatsi elwandle. “Kute ngisho namunye kubo lowasindza.” (Eks. 14:25-28) Intfukutselo yaJehova yabavutsela bantfu baseGibhithe ngenca ‘yelutsandvo lolucotfo’ lanalo ngebantfu bakhe.—Fundza Eksodusi 15:9-13.

¹⁰ Ngalokufanako, indlela Jehova labatsandza ngayo bantfu bakhe yamenta watsatsa sinyatselo ngemalanga eNkhosi Hezekiya. Ema-Asiriya lebekanesibhuku futsi alibutfo lelinemandla kakhulu ngaleto tikhatsi besekafikile eJerusalema kuze ayihlasele. Tinceku taJehova letetsembekile tasongelwa ngekuvinjetelwa lebekutawenta kutsi tife kabuhlungu. (2 Khos. 18:27) Jehova wakuvimba loko ngekutsi atfumele ingilosi; futsi yabulala emasotja ema-Asiriya langu-185 000 ngebusuku bunye! (2 Khos. 19:34, 35) Cabanga nje kutsi besinjani simo enkambu yema-Asiriya ekuseni ngelilanga lelilandzelako. Tikhali, emahawu kanye netinkemba bekutihlalele kungakatsintfwa ngumuntfu. Kute licilongo lelakhala kuze livuse  lamadvodza. Kute livi lelevakala lebelibitela lamabutfo ndzawonye. Bekuthule ngendlela lengakavami kulenkambu futsi tidvumbu betigcwele yonkhe indzawo.

11. Tisidvudvuta tiphindze tisiniketa njani sibindzi tibonelo letisemiBhalweni letikhombisa indlela Jehova lenta ngayo nangabe bantfu bakhe basongelwa?

¹¹ Tifundvo: Letibonelo letikhombisa indlela Jehova lenta ngayo nangabe bantfu bakhe basongelwa, tiniketa titsa tetfu nasi secwayiso lesinemandla: “Kuyintfo leyesabekako kujeziswa nguNkulunkulu lophilako” nangabe atfukutselisiwe. (Heb. 10:31) Kodvwa tsine tiyasidvudvuta letibonelo futsi tisenta sibe nesibindzi. Kuyasidvudvuta kwati kutsi Sathane, lositsa setfu lesikhulu, angeke aphumelele. Ngekushesha nje, ‘sikhatsi sakhe lesincane’ sekubusa sitawuphela! (Semb. 12:12) Kuze kube nguleso sikhatsi, singachubeka sikhonta Jehova ngesibindzi, siciniseka kutsi kute umuntfu, inhlangano nobe hulumende longasivimba kutsi sente intsandvo yaNkulunkulu. (Fundza Tihlabelelo 118:6-9.) Umphostoli Pawula uveta kuciniseka kwetfu nganankha emavi laphefumulelwe latsi: “Nangabe Nkulunkulu angakitsi, ngubani longamelana natsi?”—Rom. 8:31.

12. Ngesikhatsi sekuhlupheka lokukhulu, yini letawubangela intfukutselo yaJehova kutsi iphakame?

 ¹² Ngesikhatsi sekuhlupheka lokukhulu lokutako, Jehova utawutsatsa sinyatselo kuze asivikele, njengobe nje awavikela ema-Israyeli lebekavinjetelwe baseGibhithe, kanye nemaJuda lebekavinjetelwe base-Asiriya eJerusalema. Titsa tetfu titawutsi natetama kusicotfula, lutsandvo Jehova lanalo ngatsi lutawenta kutsi intfukutselo yakhe iphakame. Labo labatawenta bulima bekutsi basihlasele, kutawufana nekutsi batsintsa inhlavu yeliso laJehova. Utawubese utsatsa sinyatselo ngekushesha. (Zak. 2:8, 9) Umphumela waloko kutsi kutawufa bantfu ngelizinga lelingakaze selibonwe. Titsa taNkulunkulu titawuba bete sizatfu lesivakalako sekumangala lapho khona Jehova atfululela intfukutselo yakhe kuto. Kungani?

13. Ngutiphi tecwayiso Jehova latiniketa bantfu?

¹³ Jehova ‘uyephuta kutfukutsela’ futsi unikete tecwayiso letinyenti tekutsi utawubabhubhisa labo labamelene naye nalabasongela bantfu bakhe. (Eks. 34:6, 7) Jehova wasebentisa baphrofethi  labafaka ekhatsi Jeremiya, Hezekeli, Danyela, Khristu Jesu, kanye nebaphostoli labafaka ekhatsi Phetro, Pawula, naJohane kuze becwayise bantfu ngemphi lenkhulu neyekugcina.—Buka libhokisi lelitsi, “Jehova Wecwayisa Ngekuta Kwemphi Lenkhulu.”

14, 15. Ngumuphi umsebenti Jehova lawentile, futsi kungani?

¹⁴ Jehova wenta kutsi letecwayiso tibhalwe eVini lakhe. Uphindze wacinisekisa kutsi liBhayibheli lihunyushelwa etilwimini letinyenti futsi lisakatwe kakhulu kwendlula tonkhe tincwadzi emlandvweni. Emhlabeni wonkhe, Nkulunkulu wente kutsi kube nelibutfo lemavolontiya lasita labanye kutsi bakhe buhlobo lobuhle naye futsi ecwayise ‘ngelilanga laJehova lelikhulu.’ (Zef. 1:14; Hla. 2:10-12; 110:3) Ukhutsate bantfu bakhe kutsi bahumushe tincwadzi tekudadisha liBhayibheli kute titfolakale ngetilwimi letinyenti futsi bacitse ema-awa lamanyenti kakhulu bacoca nebantfu ngetetsembiso letiseVini lakhe nangetecwayiso letitfolakala kulo.

¹⁵ Jehova wente konkhe loku ngobe “akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (2 Phet. 3:9) Sinelilungelo lelikhulu lekumelela Nkulunkulu wetfu  lonelutsandvo futsi lobeketelako, nelekudlala indzima lencane ekumemeteleni umlayeto wakhe! Nanobe kunjalo, sikhatsi sitabaphelela ngekushesha labo labangatilaleli letecwayiso.

16, 17. Chaza kutsi Jehova sewulibekile yini lilanga lemphi yekugcina.

¹⁶ Jehova sewulibekile lilanga lemphi yekugcina. Wati kusengakenteki kutsi bantfu bakhe batawuhlaselwa nini. (Mat. 24:36) Jehova wati njani kutsi titsa takhe titawuhlasela nini?

¹⁷ Njengobe sibonile esehlukweni lesendlulile, Jehova utjela Gogi utsi: ‘Ngitawufaka emahhuka emihlatsini yakho.’ Utawuholela tive emphini yekugcina. (Hez. 38:4) Loku akusho kutsi nguJehova lotawucala lemphi; akusho nekutsi utawemuka labo lamelene naye inkhululeko yabo yekutikhetsela. Kodvwa kuveta kutsi Jehova uyakhona kufundza tinhlitiyo futsi uyati kutsi titsa takhe titawenta njani etimeni letitsite.—Hla. 94:11; Isa. 46:9, 10; Jer. 17:10.

18. Kungani bantfu batawulwa naSomandla?

¹⁸ Nangabe Jehova angeke ayicale lemphi nobe aphocelele titsa takhe kutsi tilwe naye, pho kungani bantfu batatibeka esimeni sekulwa naSomandla? Lesinye setizatfu kutsi ngaleso sikhatsi  bantfu batawube sebatitjela kutsi kute Nkulunkulu nobe kutsi angeke atingene tindzaba tebantfu. Kungenteka lokutawubenta bacabange ngalendlela kutsi batawube sebaticedze tonkhe tinhlangano tenkholo yemanga letisemhlabeni. Ngako kungenteka bacabange kutsi nangabe Nkulunkulu akhona, nakanjani bekatativikela letinhlangano lebetititjela kutsi timelele yena. Angeke babone kutsi ecinisweni nguNkulunkulu lokufake etinhlitiyweni tabo kutsi bacedze tinkholo lebetisolo timmelela kabi kakhulu.—Semb. 17:16, 17.

19. Yini lengahle yenteke ngemuva kwekubhujiswa kwenkholo yemanga?

¹⁹ Ngesikhatsi lesitsite ngemuva kwekubhujiswa kwenkholo yemanga, kungenteka Jehova ayale bantfu bakhe kutsi bamemetele umlayeto lonemandla, loyo incwadzi yeSembulo lewufananisa nesangcotfo, futsi litje laso ngalinye lingaba ngemakhilogremu langu-20. (Semb. 16:21, umbhalo longentasi.) Kungenteka lomlayeto utawube usimemetelo sekutsi tepolitiki netekutsengiselana sekutawubhujiswa. Utawubahlupha labo labatawuva kangangekutsi batawetfuka Nkulunkulu. Kungenteka ngulomlayeto lotawenta tive tiphume liwonkhe tiyohlasela bantfu baNkulunkulu kuze tibathulise ngalokuphelele. Titawucabanga kutsi site umsiti nekutsi singahlaselwa kamelula. Loko kutawube kuliphutsa lelikhulu kakhulu!

20, 21. Ungubani Gogi, futsi yini letawenteka kuye?

²⁰ Njengobe sibonile eSehlukweni 17, Hezekeli usebentisa ligama lelisiphrofetho lelitsi “Gogi waseveni lakaMagogi,” kuze achaze tive letihlangene letitasihlasela. (Hez. 38:2) Kodvwa kutawube kute kahle bunye kuletive letihlangene. Ngisho nobe titawubonakala tihlangene kodvwa titawuchubeka tincintisana, titigcabha futsi titsandza buve. Kutawuba melula ngaJehova kutsi atente ‘tilwe todvwa.’ (Hez. 38:21) Nobe kunjalo, lokubhujiswa kwaletive angeke kube yintfo leyentiwe ngumuntfu.

²¹ Ngaphambi kwekutsi tibhujiswe, titsa tetfu titawubona sibonakaliso sekuba khona kweNdvodzana yemuntfu, lokungenteka kube kubonakaliswa kwemandla lamakhulu aJehova naJesu. Letitsa titawubona tintfo letitawutenta tetfuke kakhulu. Njengobe Jesu abephrofethile, “bantfu batawesaba kakhulu ngenca yaloko labatawube balindzele kutsi kwenteke emhlabeni.” (Luk. 21:25-27) Titawesaba kakhulu natibona kutsi tente liphutsa lelikhulu ngekuhlasela bantfu baJehova. Titawuphoceleleka kutsi tati kutsi sisho kutsini lesicu seMdali lesitsi Jehova wemabutfo. (Hla. 46:6-11; Hez 38:23) Akungabateki kutsi Jehova utawukhipha libutfo lakhe lasezulwini kanye nemandla emvelo kute avikele tikhonti takhe leticotfo aphindze abhubhise netitsa takhe.—Fundza 2 Phetro 2:9.

22, 23. Bobani labatawuvikela bantfu baNkulunkulu, futsi batawutiva njani ngaloko?

²² Cabanga ngendlela Jesu latatimisela ngayo nakahola libutfo lasezulwini kute balwe netitsa taNkulunkulu futsi bavikele bantfu labatsandza Babe wakhe nalabamkhontako. Cabanga nangendlela  labagcotjiwe labatawutiva ngayo. Esikhatsini lesitsite ngaphambi kwekutsi kucale i-Amagedoni, labagcotjiwe labatawube basele lamhlabeni batawuyiswa ezulwini kuze kutsi bonkhe laba labangu-144 000 bahambe naJesu bayokulwa lemphi. (Semb. 17:12-14) Akungabateki kutsi linyenti lalabagcotjiwe litawube linebuhlobo lobuhle nalobusedvute nemalunga aletinye timvu njengobe bebasebenta kanye kanye kulamalanga ekugcina. Nyalo labagcotjiwe batawube sebaneligunya nemandla ekuvikela labo bebabasekela ngekwetsembeka nabavivinywa.—Mat. 25:31-40.

²³ Tingilosi nato titawube tiyincenye yelibutfo laJesu lasezulwini. (2 Thes. 1:7; Semb. 19:14) Tamsita kutsi akhone kucosha Sathane nemadimoni ezulwini. (Semb. 12:7-9) Betisolo tinencenye ekuhlanganiseni bantfu labasemhlabeni labafuna kukhonta Jehova. (Semb. 14:6, 7) Kuyintfo lenhle kutsi Jehova utawuvumela tingilosi kutsi tivikele labantfu labetsembekile. Lokubaluleke kakhulu kutsi lonkhe libutfo laJehova litakujabulela kungcwelisa nekuphakamisa ligama lakhe, ngekutsi lisite ekuncobeni titsa takhe.—Mat. 6:9, 10.

24. Sicumbi lesikhulu saletinye timvu sitawutiva njani?

²⁴ Labo besicumbi lesikhulu saletinye timvu ngeke babe nesizatfu sekwesaba ngobe batawube bavikelwe libutfo lelikhulu nalelinemandla lelitawube lilangatelela kubasita. Ecinisweni, ‘batawusukuma, baphakamise tinhloko tabo, ngobe kusindziswa kwabo kutawube sekusedvute.’ (Luk. 21:28) Kubalulekile kutsi sisite bantfu labanyenti kakhulu kutsi bamati Babe wetfu lonelutsandvo nesihawu ngaphambi kwekutsi lilanga laJehova lifike.—Fundza Zefaniya 2:2, 3.

25. Yini lesitawucoca ngayo esehlukweni lesilandzelako?

²⁵ Timphi tebantfu tidala umonakalo nelusizi. Ngalokwehlukile, umphumela we-Amagedoni utawenta kutsi bantfu bahleleke futsi bajabule. Kutawuba njani naseyitfululekile intfukutselo yaJehova, tinkemba temabutfo akhe setibuyele etikhwameni tato, nemsindvo walemphi lenkhulu sewuphelile? Esehlukweni lesilandzelako sitawucoca ngalelikusasa lelijabulisako.