Ucabanga kutsi kuphila kunayo yini injongo? William B. Provine, losati sekutiphendvukela kwemvelo watsi: “Loko lesiye sakufundza ngalenchubo yekutiphendvukela kwemvelo kunetinkinga letinkhulu kitsi, kutsintsa umuva wetfu ngenjongo yekuphila.” Saba yini siphetfo sakhe? Watsi: “Angiyiboni injongo lokunguyonayona ekuphileni kwebantfu.”³²

Cabanga ngaloko lokushiwo ngulawo mavi. Nangabe kuphila bekute mbamba injongo, bewungeke ube nemigomo ekuphileni ngephandle nje kwekwetama kwenta lokuhle, mhlawumbe wendlulisele lufuto esitukulwaneni lesitako. Nawufa, bewungeke uphindze ube khona. Bekungasho kutsi ingcondvo yakho, nemandla ayo ekucabanga, nekuzindla ngenjongo yekuphila kwaba khona ngenhlanhla nobe ngengoti nje.

Akusiko loko kuphela. Bantfu labanyenti labakholelwa ekutiphendvukeleni kwemvelo bayagomela ngekutsi Nkulunkulu akekho nobe ngeke atingenele nobe atifake etindzabeni tebantfu. Kunobe ngukuphi, likusasa letfu beliyawuba setandleni tebaholi betembusave, betemfundvo, kanye nebenkholo. Ngekwaloko labakufezile esikhatsini lesendlulile, tintfo leticitsa umhlaba njengetiphitsiphitsi, tincabano nenkhohlakalo betiyawuchubeka. Kube kutiphendvukela kwemvelo bekuliciniso mbamba, bekuyoba netizatfu letenele tekuphila ngesicubulo lesite ingcondvo lesitsi: “Kuncono sidle sinatse, ngobe kusasa sitawufa.”​—1 Khorinte 15:32.

LiBhayibheli lisho lokwehlukile, ngobe naku lelikufundzisako: “Ngobe nguwe [Nkulunkulu] umtfombo wekuphila.” (Tihlabelelo 36:9) Lawo mavi anenchazelo lebanti.

Nangabe loko liBhayibheli lelikushoko kuliciniso, kuphila-ke kunayo injongo. UMdali wetfu unenjongo yelutsandvo letfolwa ngibo bonkhe labakhetsa kuphila ngekuvumelana nentsandvo yakhe. (Umshumayeli 12:13) Leyo njongo ifaka ekhatsi sitsembiso sekuphila emhlabeni lote tiphitsiphitsi, kucabana, nenkhohlakalo​—lote ngisho nekufa.​—Tihlabelelo 37:10, 11; Isaya 25:6-8.

Ngesizatfu lesihle, tigidzi tebantfu emhlabeni wonkhe tikholelwa ekutseni kufundza ngaNkulunkulu kanye nekumlalela kwenta kuphila kube nenjongo lengeke icatsaniswe nalutfo. (Johane 17:3) Inkholelo lenjalo ayikasekelwa ekucabangeni nje lokulite. Bufakazi busebaleni​—kuphila kwadalwa.