LICINISO leliphatselene nani? Liciniso leliphatselene nemibuto lemcoka bantfu labayibutako. Mhlawumbe nawe ike yakuhlupha imibuto lenjengale:

• Nkulunkulu unendzaba yini natsi vele?

• Imphi nekuhlupheka kuyoke kuphele yini?

• Kwentekani kubantfu nabafa?

• Likhona yini litsemba lelikhona ngalabafile?

• Ngingathandaza kanjani futsi ngiviwe nguNkulunkulu?

• Ngingayitfola kanjani injabulo ekuphileni?

Ungatifuna kuphi timphendvulo talemibuto? Uma ungaya emitatjeni yetincwadzi nobe etitolo letitsengisa tincwadzi, utawutfola tinkhulungwane tetincwadzi letitsi tinetimpendvulo kulemibuto. Kodvwa, kuvame kutsi tiphikisane. Letinye tivamise kubonakala tisebenta kwangalesosikhashana lokutsi masinyane bese tiphelelwa sikhatsi bese tiyabuyeketwa nobe kubhalwe letinye.

Kepha ke, kukhona yinye incwadzi lenetimpendvulo letitsembekile. Yincwadzi lengawakhulumi emanga. Jesu Khristu athandaza kuNkulunkulu watsi: “Livi lakho liliciniso.” (Johane 17:17) Lamuhla leloLivi silati ngekutsi liBhayibheli leliNgcwele. Emakhasini lalandzelako alelipheshana, utawutfola kafishane timphendvulo letikhanyako naleticinisile teliBhayibheli kulemibuto lengenhla.

LOKWENTA BANTFU BABUTE LOMBUTO: Siphila eveni leligcwele lunya nekungalungi. Tinkholo letinyenti tifundzisa kutsi kuhlupheka lokusivelelako kuyintsandvo yaNkulunkulu.

LOKUFUNDZISWA LIBHAYIBHELI: Nkulunkulu akake akubangele lokubi. Incwadzi yaJobe 34:10 itsi: “Nkulunkulu weliciniso akakucabangi ngisho nekukucabanga kwenta lokubi, futsi Somandla akabenti bubi!” Nkulunkulu unenjongo lenhle ngebantu ngoba uyabatsandza. Kungako Jesu wasifundzisa kutsi sithandaze sitsi: “Babe wetfu losezulwini, . . . umbuso wakho awute. Intsandvo yakho ayentiwe emhlabeni njengasezulwini.” (Matewu 6:9, 10) Nkulunkulu unendzaba natsi, kangangekutsi uye wenta lokukhulu kuze aciniseke kutsi iyagcwaliseka lenjongo yakhe.—Johane 3:16.

Fundza futsi kuGenesisi 1:26-28; Jakobe 1:13; na 1 Phetro 5:6, 7.

LOKWENTA BANTFU BABUTE LOMBUTO: Timphi tichubeka tibulala emakhulukhulu langenakubalwa ebantfu. Sonkhe siyatsintseka ngekuhlupheka kwebantfu.

LOKUFUNDZISWA LIBHAYIBHELI: Nkulunkulu wabiketela sikhatsi lapho atakwenta kube nekuthula emhlabeni wonkhe. Ngephansi kweMbuso waNkulunkulu, lokungu hulumende wakhe wasezulwini, tive “ngeke tiphindze ticeceshelwe kulwa imphi.” Esikhundleni saloko, “Tiyawugucula tinkemba tato tibe ngemakhuba.” (Isaya 2:4) Nkulunkulu uyophelisa konkhe kungalungi nekuhlupheka. LiBhayibheli liyatsembisa: “[Nkulunkulu] uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba khona. Tintfo letindzala [lokuhlanganisa kungalungi nekuhlupheka lokukhona manje] setendlulile.”—Sembulo 21:3, 4.

Fundza futsi Tihlabelelo 37:10, 11; 46:9; na Mikha 4:1-4.

LOKWENTA BANTFU BABUTE LOMBUTO: Tinkholo temave ngemave tifundzisa kutsi kukhona lokungekhatsi kumuntfu lokusindzako nakafa, kuchubeke kuphila. Labanye babambelele ekutseni labafile bangabalimata labaphilako nobe kutsi Nkulunkulu ujezisa lababi ngekubalahlela ekuhlushweni kwaphakadze esihogweni lesivutsa umlilo.

LOKUFUNDZISWA LIBHAYIBHELI: Nabantfu bafa bayaphela nya, bangabikhona. “Labafile abati lutfo,” kusho Umshumayeli 9:5. Njengoba labafile bangenakwati, bangenamiva, futsi bangeva lutfo ngeke bakwati kulimata​—nobe kusita—​labaphilako.​—Tihlabelelo 146:3, 4.

Fundza futsi kuGenesisi 3:19 neMshumayeli 9:6, 10.

LOKWENTA BANTFU BABUTE LOMBUTO: Sifuna kuphila, futsi sikujabulele kuphila nalabo lesibatsandzako. Silangatelela kuphindze sibone lesibatsandzako labafile bavusiwe, size sitsi nasihlangana nemuntfu lekadze samgcina “kube nasekufeni kunje.”

LOKUFUNDZISWA LIBHAYIBHELI: Bantfu labanyenti labafile batawuvuswa. Jesu watsembisa kutsi ‘labasemathuneni bayawuvuka.’ (Johane 5:28, 29) Kuhambisana nenjongo yakhe yasekucaleni, Nkulunkulu uyobavusa ngemitimba yenyama bantfu kuze batfole litfuba lekuphila emhlabeni lolipharadisi. (Lukha 23:43) Lesikhatsi lesitako lesetsenjisiwe sihlanganisa nekuphila lokuphelele nalokuphakadze kubantfu labalalelako. LiBhayibheli litsi: “Labalungile batawudla lifa lemhlaba, futsi bahlale kuwo kuze kube phakadze.”—Tihlabelelo 37:29.

Fundza futsi kuJobe 14:14, 15; Lukha 7:11-17; naku-Misebenti Yebaphostoli 24:15.

LOKWENTA BANTFU BABUTE LOMBUTO: Cishe bantfu bato tonkhe tinkholo bayathandaza. Kodvwa labanyenti beva kungatsi imithandazo yabo ayiphendvulwa.

LOKUFUNDZISWA LIBHAYIBHELI: Jesu wasifundzisa kutsi sikubalekele kwenta imithandazo yetfu ibe njengesilandzelo. Watsi: “Nawuthantaza, ungaphindzaphindzi intfo yinye.” (Matewu 6:7) Nangabe sifuna Nkulunkulu alalele imithandazo yetfu, kufanele sithandaze ngendlela levumelekako kuye. Kuze sente njalo, kudzingeka sifundze kutsi iyini intsandvo yaNkulunkulu bese sithandaza ngekuhambisana nayo. Incwadzi yaJohane wekuCala sehluko 5:14 ichaza kanje: “Nobe yini lesiyicelako kuNkulunkulu levumelana nentsandvo yakhe, yena uyasiva.”

Fundza futsi Tihlabelelo 65:2; Johane 14:6, 14; na 1 Johane 3:22.

LOKWENTA BANTFU BABUTE LOMBUTO: Bantfu labanyenti bakholelwa kutsi imali, ludvumo, nobe buhle kungabenta bajabule. Ngalesosizatfu baphishanekela letotintfo—lokuphumela ekudvumaleni kwabo ngekutsi injabulo ayitfolakali lapho.

LOKUFUNDZISWA LIBHAYIBHELI: Jesu waveta kutsi sikhiya senjabulo siyini lapho atsi: “Bayajabula labo labanakisisa tintfo letiphatselene naNkulunkulu.” (Matewu 5:3) Injabulo mbamba ingatfolakala kuphela nangabe sitsatsa tinyatselo tekunakekela lesosidzingo setfu lesikhulu—sifiso sekwati Nkulunkulu nenjongo yakhe ngatsi. Lwati lolunjalo lutfolakala eBhayibhelini. Kwati lamaciniso laseBhayibhelini kungasisita sikwati kwehlukanisa tintfo letingutona tibalulekile netintfo letingakabaluleki. Kuvumela emaciniso eBhayibheli acondzise tincumo tetfu netento kuholela ekuphileni lokunenjongo kakhulu.—Lukha 11:28.

Fundza futsi Taga 3:5, 6, 13-18 na 1 Thimothi 6:9, 10.

 Losandza kukufundza bekumane kukubuka kafishane timphendvulo teliBhayibheli kulemibuto lesitfupha. Uyafuna yini kwati kabanti kunaloku lose ukufundzile? Nangabe ungulomunye walabo “labanakisisa tintfo letiphatselene naNkulunkulu” nakanjani uyafuna. Kungenteka kunemibuto lekucakako njengekutsi: ‘Uma Nkulunkulu anendzaba natsi, kungani umlandvo ugcwele bubi lobunyenti kangaka nekuhlupheka? Ngingayitfutfukisa kanjani imphilo yemndeni wami?’ LiBhayibheli liyiphendvula ngalokugcwele nangendlela leyenetisako lemibuto naleminye leminyenti.

Kepha ke, linyenti lebantfu lamuhla limatsintsanyawo kufundza liBhayibheli. Liyitsatsa njengencwadzi lendze lokumatima kuyicondza ngaletinye tikhatsi. Ungatsandza yini kwemukela lusito lwekutfola timphendvulo teliBhayibheli? BoFakazi baJehova banemathuluzi lamabili langakusita.

Lekucala, yincwadzi letsi Lingasifundzisani LiBhayibheli? leyentelwe kusita bantfu labamatasa kutsi bahlole timphendvulo letikhanyako emibutweni lemcoka. Lithuluzi lesibili luhlelo lwesifundvo seliBhayibheli sasekhaya samahhala. Fakazi waJehova endzaweni lokuyo futsi lofanelekela ku fundzisa liBhayibheli angeta emtini wakho, nobe lenye indzawo lelungele wena, abenesikhatsi acoca nawe liviki neliviki ngeliBhayibheli ngaphandle kwekukubhadalisa. Tigidzi tebantfu emhlabeni wonkhe tisitakele ngaloluhlelo. Labanyenti babo bafike kulesiphetfo lesijabulisako: “Ngilitfolile liciniso!”

Kute umcebo lomkhulu lowengca lo longatfolakala. Liciniso leBhayibheli lisikhulula ekukholelweni eteni, ekudidekeni nasekwesabeni lokucedzana emandla. Lisiniketa litsemba, injongo kanye nenjabulo. Jesu watsi: “Nitawulati liciniso, futsi liciniso litanikhulula.”—Johane 8:32.