Ngekuhamba kwesikhatsi Bhelshasari waba yinkhosi yaseBhabhulona. Ngalobunye busuku, wamema bantfu labanyenti labasetikhundleni letisetulu kutsi bete edzilini. Watfuma tinceku takhe kutsi tilandze tinkomishi tegolide letatitsetfwe nguNebukhadnezari ethempelini laJehova eJerusalema. Bhelshasari netivakashi takhe banatsa ngaletinkomishi futsi badvumisa bonkulunkulu babo. Kwatsi kusenjalo kwabonakala sandla sibhala elubondzeni lwalapho bebahlangane khona.

Bhelshasari wetfuka kakhulu. Wabita bantfu labenta imilingo watsi kubo: ‘Nome ngubani longafundza lombhalo, angitjele kutsi usho kutsini, ngitawumenta abe ngumbusi wesitsatfu embusweni waseBhabhulona.’ Betama kodvwa kute lowakhona kuwachaza lamagama. Indlovukazi yafika yatsi: ‘Kunendvodza lokutsiwa nguDanyela lebeyivame kuchazela Nebukhadnezari tintfo. Ingakuchazela lamagama.’

Danyela waya enkhosini, yafike yatsi kuye: ‘Nawungafundza lamagama bese uyangichazela kutsi asho kutsini, ngitakunika umgaco wegolide ngiphindze ngikwente ube ngumbusi wesitsatfu embusweni waseBhabhulona.’ Danyela watsi: ‘Angitifuni tipho takho, kodvwa ngitakutjela kutsi lamagama asho kutsini. Babe wakho Nebukhadnezari abetigcabha, futsi Jehova wamtfobisa. Uyakwati konkhe lakwenta kodvwa ukhombise kutsi awumhloniphi Jehova ngekutsi unatse liwayini ngetinkomishi tegolide tasethempelini lakhe. Ngako Nkulunkulu ubhale lamagama latsi: Mene, Mene, Thekeli, Pharisini. Lamagama asho kutsi emaMede nemaPheresiya atawuncoba iBhabhulona futsi wena ngeke usaba yiNkhosi.’

Kubonakala ngatsi kute bekangancoba iBhabhulona. Lelidolobha belivikelwe lubondza lolucinile nemfula lomkhulu. Kodvwa ngalobo busuku emaMede  nemaPheresiya alihlasela. Khuresi, inkhosi yasePheresiya waphambukisa lamanti kuze emasotja akhe atawukhona kungena kulelidolobha. Nawefika lapho atfola iminyango ingakavalwa. Lelibutfo langena lancoba lelidolobha futsi labulala nenkhosi. Khuresi wabese uba yinkhosi yaseBhabhulona.

Kungakapheli umnyaka, Khuresi wakhipha simemetelo lesitsi: ‘Jehova utse kimi asakhe kabusha lithempeli lakhe leliseJerusalema. Nome ngubani kubantfu bakhe lofuna kusita angaya kuyawusita.’ Njengobe Jehova abetsembisile, emaJuda lamanyenti abuyela ekhaya ngemuva kweminyaka lengu-70 iJerusalema yabhujiswa. Khuresi wamikisa tinkomishi tegolide netesiliva nato tonkhe tintfo lebetitsetfwe nguNebukhadnezari ethempelini. Uyayibona yini indlela Jehova lasebentisa ngayo Khuresi kuze asite bantfu bakhe?