SIFUNDVO 52
Libutfo LaJehova Lelesabekako
Inkhosi yaseSiriya Bheni-hadadi, beyihlasela ema-Israyeli. Kodvwa umphrofethi Elisha wecwayisa iNkhosi yaka-Israyeli, ngako yakhona kubaleka. Bheni-hadadi wabese utfumba Elisha. Weva kutsi Elisha usedolobheni laseDothani, wabese utfumela libutfo laseSiriya kutsi liyomtfumba.
EmaSiriya efika eDothani ebusuku. Ngakusasa ekuseni inceku ya-Elisha yaphumela ngephandle yabona libutfo lelikhulu litungelete lelidolobha. Yetfuka kakhulu yamemeta yatsi: ‘Elisha sitakwenta njani?’ Elisha watsi kuyo: ‘Banyenti labanatsi kunalabo labanabo.’ Ngekushesha nje Jehova wenta inceku ya-Elisha yabona tintsaba lebetitungelete lidolobha tigcwele emahhashi netincola temphi temlilo.
Ngesikhatsi emasotja aseSiriya etama kumbamba, Elisha wathantaza watsi: ‘Jehova ngicela ushaye lesive ngebumphumphutse.’ Nanobe lamasotja abebona kodvwa abengati kutsi akuphi. Elisha watsi kulamasotja: ‘Leli akusilo lelidolobha lenilifunako. Ngilandzeleni, ngitanimikisa
kulendvodza leniyifunako.’ Lamasotja alandzela Elisha aze ayofika eSamariya lakuhlala khona iNkhosi yema-Israyeli.Ngelikadze, emaSiriya ase ayabona kutsi akuphi. Inkhosi yaka-Israyeli yabuta Elisha yatsi: ‘Ngiwabulale yini?’ Elisha wasebentisa lelitfuba kuze atiphindziselele yini kulamasotja lebeketama kumlimata? Cha. Elisha watsi: ‘Ungawabulali. Wanike kudla bese abuyela enkhosini yawo.’ Ngako leNkhosi yabentela lidzili lelikhulu, yase ibabuyisela enkhosini yabo.
“Naku kuciniseka lesinako kuye, kutsi kunobe yini lesiyicela ngekwentsandvo yakhe, uyasiva.”—1 Johane 5:14