1, 2. Singayitfola kuphi lamuhla indzawo lesingabalekela kuyo lephephile?

ASE uticabange uhamba emgwacweni ngelilanga lesivunguvungu. Liya lisibekela. Licale kushaya umbane, lidvume bese liyayitsela. Uyagijima ufune indzawo longakhosela kuyo. Lapha eceleni kwemgwaco ubona indzawo longabalekela kuyo. Ibonaka ikahle, futsi yomile. Cabanga indlela longayijabulela ngayo leyo ndzawo!

² Siphila esikhatsini sesivunguvungu. Simo selive lesiphila kulo siya siba matima. Kodvwa kunendzawo lephephile, lesingabalekela kuyo kute sivikeleke nobe singalimali siphelwane. Nguyiphi leyo ndzawo? Caphela loko lokufundziswa liBhayibheli. Litsi: “Angasho kuSimakadze [Jehova] atsi: ‘Wena usiphephelo sami nenqaba yami, unguNkulunkulu wami lengetsembele kuye.’”—Tihlabelelo 91:2.

3. Singamenta njani Jehova kutsi abe siphephelo setfu?

³ Cabanga nje! Jehova, uMdali neMbusi wendzawo yonkhe, angaba yindzawo lesingaphephela  kuyo. Angasenta sitive siphephile, ngobe unemandla kwendlula nobe ngubani nanobe yini lengasihlupha. Ngisho nobe singalimala, Jehova angasigucula leso simo lesibi. Kodvwa singamenta njani Jehova abe siphephelo setfu? Kufanele setsembele kuye. Ngetulu kwaloko, liVi laNkulunkulu liyasicelisisa: “Tigcineni elutsandvweni lwaNkulunkulu.” (Juda 21) Sidzinga kuhlala elutsandvweni lwaNkulunkulu, sakhe buhlobo lobucinile naBabe wetfu wasezulwini. Singaciniseka kakhulu kutsi usiphephelo setfu. Kodvwa singabakha njani buhlobo lobunjalo?

4, 5. Ngutiphi letinye tindlela Jehova lakhombise ngato kutsi uyasitsandza?

⁴ Kute sihlale elutsandvweni lwaNkulunkulu, kudzingeka sicondze indlela Jehova lasibonise ngayo lutsandvo. Cabanga ngaletinye timfundziso teliBhayibheli lotifundzile ngelusito lwalencwadzi. NjengeMdali, Jehova usinikete lomhlaba njengelikhaya letfu lelijabulisako. Uwugcwalise ngekudla lokunyenti, emanti, umcebo welive, tilwane letinhle, kanye netindzawo letibukekako. NjengeMbhali weliBhayibheli, Nkulunkulu usikhombise libito lakhe kanye netimfanelo takhe. Ngetulu kwaloko, liVi lakhe lembula kutsi watfumela iNdvodzana yakhe layitsandzako emhlabeni, Jesu, wavuma kutsi ihlupheke futsi isifele. (Johane 3:16) Leso sipho sisho kutsini kitsi? Sisiniketa litsemba lelikusasa lelijabulisako.

⁵ Litsemba letfu lelikusasa lisime kulokunye Nkulunkulu lakwentile. Jehova ubeke hulumende wasezulwini, uMbuso waMesiya. LoMbuso utawucedza konkhe kuhlupheka futsi uletse lipharadisi lapha emhlabeni. Cabanga nje ngaloku! Sesiphila lapha emhlabeni ngekuthula nekujabula kuze kube phakadze. (Tihlabelelo 37:29) Kwanyalo, Nkulunkulu usinikete sicondziso sendlela lencono lesingaphila ngayo. Usinikete nesipho semthandazo, lesiyindlela levulekile yekuchuma naye. Leti kumane nje nguletinye tindlela Jehova lakhombise ngato kutsi uyabatsandza bonkhe bantfu ngisho nawe cobo lwakho.

6. Kufanele sibonise njani kutsi siyambonga Jehova ngekusitsandza kwakhe?

 ⁶ Umbuto lobalulekile lokufanele kutsi utibute wona ngulona: Ngitawusabela njani elutsandvweni lwaJehova? Labanyenti bavele batsi: “Nami kudzingeka ngimtsandze Jehova.” Nawe ucabanga njalo yini? Jesu watsi, umyalo lomkhulu kunayo yonkhe ngulona: “Uboyitsandza iNkhosi, Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.” (Matewu 22:37) Kucinisekile kutsi unetizatfu letinyenti tekutsandza Nkulunkulu Jehova. Kodvwa kwanele yini kuba nemuva nje kuphela wekutsi uyamtsandza Jehova ngayo yonkhe inhlitiyo yakho, umphefumulo, kanye nengcondvo yakho?

7. Kunalokwengetiwe yini ekutsandzeni Nkulunkulu kunekumane sigcine ngekuba nemiva yekutsi siyamtsandza? Chaza.

⁷ Njengobe kuchaziwe eBhayibhelini, kutsandza Nkulunkulu kungetulu kwekumane nje sibe nemiva yekutsi siyamtsandza. Ecinisweni, nobe umuva wekutsi siyamtsandza Jehova ubalulekile, loyo muva usicalo selutsandvo sibili ngaye. Inhlanyelo yelihhabhula ibalulekile kute kumile sihlahla semahhabhula latselako. Noko, nangabe ufuna lihhabhula ungajabula yini nangabe lotsite angakunika ihlanyelo yalo? Cha, bewungeke! Ngendlela lefananako, umuva wekutsandza Nkulunkulu Jehova umane nje usicalo. LiBhayibheli litsi: “Ngobe kutsandza Nkulunkulu kugcina imiyalo yakhe. Imiyalo yaNkulunkulu ayimatima kitsi.” (1 Johane 5:3) Kute kube lutsandvo mbamba, lutsandvo ngaNkulunkulu kufanele lutsele titselo. Kufanele luboniswe ngetento.—Matewu 7:16-20.

8, 9. Singabonisa njani kutsi siyamtsandza Nkulunkulu nekutsi siyabonga ngaloko lasentele kona?

⁸ Sibonisa kutsi siyamtsandza Nkulunkulu nasigcina imiyalo yakhe futsi siphila ngetimiso takhe. Akusiyo intfo lematima kugcina imiyalo yakhe. Kunekutsi ibe ngumtfwalo losindzako, imiyalo  yaJehova ilungiselelwe kusisita siphile kuphila lokuhle, lokujabulisako nalokwenetisako. (Isaya 48:17, 18) Ngekuphila ngekuvumelana neticondziso taJehova, sisuke simkhombisa Babe wetfu wasezulwini kutsi siyabonga ngako konkhe lasentele kona. Kuyadzabukisa kutsi bambalwa kakhulu bantfu eveni lesiphila kulo lamuhla lababonisa kubonga ngaloko. Asifuni kuba bantfu labangabongi, silingise labanye bantfu labaphila ngalesikhatsi Jesu alapha emhlabeni. Jesu welapha bantfu labalishumi labebanebulephelo, kodvwa munye kuphela lowabuya watewubonga. (Lukha 17:12-17) Kuliciniso kutsi sifuna kufanana nalona lowabonga, hhayi nalaba labayimfica labangazange babonge.

⁹ Ngumiphi imiyalo yaJehova lokufanele siyigcine? Sicoce ngaleminyenti kulencwadzi, kodvwa ase sibukete leminye yayo. Kugcina imiyalo yaNkulunkulu kutasisita sihlale elutsandvweni lwakhe.

10. Chaza kutsi kungani kubalulekile kuchubeka uzuza lwati ngaNkulunkulu Jehova.

¹⁰ Kufundza ngaJehova sinyatselo lesibaluleke kakhulu sekusondzela kuye. Kuyintfo lokungafanele siyekele  nanini kuyenta. Ase sitsi bewungaphandle ngebusuku lobubandzako utama kutifutfumeta ngekutsi wotse umlilo, bewungawuyekela yini lomlilo ucime? Cha, bewungeke uwuyekele. Bewungachubeka uwukhwetela kute uchubeke uvutsa futsi ushisa. Kuphila kwakho kungaba sengotini. Njengetinkhuni letigcina umlilo uvutsa, “kwati Nkulunkulu” kwenta lutsandvo lwetfu ngaJehova lucine.—Taga 2:1-5.

11. Timfundziso taJesu taba namuphi umphumela kubalandzeli bakhe?

¹¹ Jesu abefuna balandzeli bakhe bachubeke benta lutsandvo lwabo ngaJehova nangeliVi lakhe leliligugu luphila futsi luvutsa ngemandla. Ngemuva kwekuvuswa kwakhe, Jesu wafundzisa bafundzi bakhe lababili ngaletinye tetiphrofetho letisemiBhalweni yesiHebheru letagcwaliseka kuye. Waba yini umphumela waloko? Ngemuva kwaloko batsi: “Angitsi sivele satsintseka etinhlitiyweni tetfu ngesikhatsi akhuluma asichazela imiBhalo endleleni?”—Lukha 24:32.

12, 13. (a) Yini leyentekako lamuhla kubantfu labanyenti ngelutsandvo labanalo ngaNkulunkulu nangeliBhayibheli? (b) Singaluvikela njani lutsandvo lwetfu lungapholi?

¹² Ngalesikhatsi ucala kufundza ngaloko mbamba lokufundziswa liBhayibheli, wacaphela yini kutsi inhlitiyo yakho yacala kuvutsa ngenjabulo, ngenshiseko, nangelutsandvo ngaNkulunkulu? Akungabateki kutsi loko kwaba njalo. Nalabanye bativa ngaleyo ndlela. Nyalo, kufanele kutsi ugcine lolotsandvo lolujulile luphila futsi ulukhulise. Asifuni kulandzela tindlela tekuphila talelive lalamuhla. Jesu wabiketela: “Kuyawuphola lutsandvo kulabanyenti.” (Matewu 24:12) Ungaluvikela njani lutsandvo lwakho ngaJehova kanye nelwemaciniso eliBhayibheli kutsi lungapholi?

¹³ Chubeka uzuza lwati ngaNkulunkulu Jehova kanye naJesu Khristu. (Johane 17:3) Zindla nobe ucabange ngalokujulile ngaloko lokufundza eVini laNkulunkulu, bese uyatibuta: ‘Kungifundzisani loku ngaNkulunkulu Jehova? Ngusiphi lesinye sizatfu lelinginiketa sona sekumtsandza ngayo yonkhe inhlitiyo, ingcondvo, kanye nemphefumulo wonkhe?’ (1 Thimothi 4:15)  Kuzindla lokunjalo kutawugcina lutsandvo kwakho ngaJehova luvutsa kakhulu.

14. Umthandazo ungasisita njani kutsi sigcine lutsandvo lwetfu ngaJehova luvutsa?

¹⁴ Lenye indlela yekugcina lutsandvo lwetfu ngaJehova luvutsa kakhulu, kuthandaza njalo. (1 Thesalonika 5:17) ESehlukweni 17 salencwadzi, sifundze ngekutsi umthandazo usipho lesiligugu lesivela kuNkulunkulu. Njengobe nebuhlobo bebantfu bukhula nabakhuluma njalo ngalokukhululekile, kanjalo nebuhlobo betfu naJehova buba ngulobusedvute nalobuphilako nangabe sithandaza kuye njalo. Kubalulekile kutsi nasithandaza singenti imilolotelo—siloku siphindzaphindza emagama langasho lutfo. Kudzingeka sikhulume naJehova ngendlela umntfwana lakhuluma ngayo nababe wakhe lamtsandzako. Kufanele sikhulume ngenhlonipho, ngalokukhululekile, ngebucotfo nangalokusuka enhlitiyweni. (Tihlabelelo 62:8) Sifundvo seliBhayibheli semuntfu kanye nemthandazo losuka enhlitiyweni tintfo letibalulekile ekukhonteni kwetfu, futsi tisisita kutsi sitigcine elutsandvweni lwaNkulunkulu.

15, 16. Kungani umsebenti wekushumayela ngeMbuso kufanele siwutsatse njengelilungelo neligugu?

¹⁵ Sifundvo seliBhayibheli semuntfu kanye nemthandazo, kutintfo umuntfu langatenta ayedvwa. Ngako, nyalo ase sifundze ngendlela yekukhonta leyentiwa embikwebantfu: kukhuluma nalabanye ngaloko lesikukholwako. Sewuke wakhuluma yini nalabanye ngemaciniso eliBhayibheli? Nangabe uke wakwenta loko, ulijabulele lelo lungelo lelikhulu. (Lukha 1:74) Nasicocela labanye ngemaciniso lesiwafundzile ngaNkulunkulu Jehova, sisuke senta sabelo lesibaluleke kakhulu lesiniketwe onkhe emaKhristu eliciniso—kushumayela livangeli leMbuso waNkulunkulu.—Matewu 24:14; 28:19, 20.

¹⁶ Umphostoli Pawula abetsatsa umsebenti wakhe njengalowo lobalulekile, awubita ngekutsi ligugu. (2 Khorinte 4:7) Kukhuluma nebantfu ngaNkulunkulu Jehova nangetinjongo takhe kungumsebenti lobaluleke kakhulu longawenta.  Ngumsebenti lokhetsekile lesiwentela iNkhosi, futsi uletsa umvuzo lomkhulu. Ngekuhlanganyela kulomsebenti, usita bantfu labanetinhlitiyo leticotfo kutsi basondzele kuBabe wetfu wasezulwini futsi babe sendleleni leholela ekuphileni lokuphakadze. Awukho lomunye umsebenti lojabulisa njengalona.  Ngetulu kwaloko, kufakaza ngaJehova nangeliVi lakhe kukhulisa kukholwa kwakho kuphindze kucinise nelutsandvo lwakho ngaye. Jehova uyawujabulela umetamo wakho. (Hebheru 6:10) Kuchubeka wenta lomsebenti ngenkhutsalo kutakusita uhlale elutsandvweni lwaNkulunkulu.—1 Khorinte 15:58.

17. Kungani umsebenti wemaKhristu wekushumayela uphutfuma lamuhla?

¹⁷ Kubalulekile kukhumbula kutsi kushumayela ngeMbuso kungumsebenti lophutfumako. LiBhayibheli litsi: “Shumayela livi, [“ngalokuphutfumako,” NW].” (2 Thimothi 4:2) Kungani kwenta lomsebenti kuyintfo lephutfumako lamuhla? LiVi laNkulunkulu liyasitjela: “Lilanga lelikhulu laSimakadze [Jehova] selisondzele, yebo lisedvute, futsi lita ngekushesha.” (Zefaniya 1:14) Lelo langa lita ngekushesha lapho Jehova atawucedza lonkhe loluhlelo lwanyalo. Bantfu badzinga kwecwayiswa! Kufanele bati kutsi nyalo sikhatsi sekukhetsa Jehova njengeMbusi wabo. Siphelo “ngeke sephute.”—Habakhuki 2:3.

18. Kungani kufanele sikhonte Jehova sibutsene ndzawonye nalamanye emaKhristu eliciniso?

¹⁸ Jehova ufuna simkhonte sihlangene nalamanye emaKhristu eliciniso. Kungako liVi lakhe litsi: “Ngako-ke asinakane, sisitane ngekukhutsatana elutsandvweni nasemisebentini lemihle. Singakuyekeli kuhlangana ndzawonye, njengobe labanye sebanemkhuba wekungahlangani; kodvwa asikhutsatane kakhulu, njengobe nani niyabona kutsi lilanga selisondzele.” (Hebheru 10:24, 25) Nasibutsene ndzawonye nalabanye lesikhonta nabo emihlanganweni yebuKhristu, siba nesikhatsi lesijabulisako sekudvumisa nekukhonta Nkulunkulu wetfu lesimtsandzako. Siyakhana siphindze sikhutsatane.

19. Singenta njani kute sikhulise bunye belutsandvo ebandleni lebuKhristu?

¹⁹ Njengobe sitihlanganisa nalabanye labakhonta Jehova, sikhulisa bunye belutsandvo kanye nebungani ebandleni. Kubalulekile kutsi sibuke lokuhle labanye bantfu labakwentako, njengobe naJehova abuka lokuhle kitsi. Akukafaneli silindzele kutsi labo lesikhonta nabo baphelele. Khumbula kutsi indlela labakhula ngayo etintfweni takamoya ayifanani, nekutsi sonkhe  siyawenta emaphutsa. (Kholose 3:13) Kufanele wakhe buhlobo lobusedvute nalabo labatsandza Jehova ngalokuphelele, futsi utawukhula ngakamoya. Kukhonta Jehova nabomnaketfu kanye nabodzadzewetfu labangemaKhristu, kutasisita sihlale elutsandvweni lwaNkulunkulu. Jehova ubabusisa njani labo labamkhonta ngekwetsembeka futsi bahlale elutsandvweni lwakhe?

20, 21. Kuyini ‘kuphila lokunguko sibili,’ futsi kungani kulitsemba lelijabulisako?

²⁰ Jehova ubusisa tinceku takhe letetsembekile ngekuphila. Utibusisa ngekuphila lokunjani? Unekuphila lokunguko sibili yini nyalo? Labanyenti betfu bangase batsi imphendvulo icace bha. Ecinisweni siyaphefumula, siyadla, futsi siyanatsa. Ngako siyaciniseka kutsi siyaphila. Ngisho nangetikhatsi letijabulisako singasho sitsi, “Loku kuphila sibili!” Noko-ke, liBhayibheli likhombisa kutsi ngemcondvo lophelele, akekho umuntfu lonekuphila lokunguko sibili lamuhla.

²¹ LiVi laNkulunkulu lisikhutsata kutsi ‘sinamatsele ekuphileni lokunguko sibili.’ (1 Thimothi 6:19) Lamavi abonisa kutsi ‘kuphila lokunguko sibili’ kuyintfo lesinelitsemba lekuyitfola esikhatsini lesitako. Nasesiphelele, siyobe siphila kuphila lokunguko sibili, ngobe siyobe siphila ngendlela Nkulunkulu abefise kutsi siphile ngayo ekucaleni. Ngalesikhatsi sesiphila epharadisi emhlabeni sinemphilo lephelele, kunekuthula, kanye nenjabulo, sitawube sesiphila ‘kuphila lokunguko sibili’—kuphila lokuphakadze. (1 Thimothi 6:12) Lelo litsemba lelijabulisako.

22. Yini longayenta kute ‘unamatsele ekuphileni lokunguko sibili’?

²² Yini lesingayenta kute ‘sinamatsele ekuphileni lokunguko sibili’? Asakhuluma ngaleyo ndzaba, Pawula wakhutsata emaKhristu kutsi ‘ente lokuhle’ futsi ‘acebe emisebentini lemihle.’ (1 Thimothi 6:18) Ngako-ke, kuyacaca kutsi lokunyenti kuya ngekutsi tsine siwasebentisa njani lamaciniso lesiwafundze eBhayibhelini. Kodvwa Pawula abesho kutsi sitfola ‘kuphila lokunguko sibili’ yini ngekwenta imisebenti lemihle? Cha, abengasho njalo, ngobe litsemba lelinjalo liya ngekutsi siyawemukela yini “umusa waNkulunkulu.” (Roma 5:15) Nobe kunjalo, Jehova uyakujabulela  kubusisa labo labamkhonta ngekwetsembeka. Ufuna kukubona uphila ‘kuphila lokunguko sibili.’ Kuphila lokujabulisako lokunekuthula, kanye nekuphila lokuphakadze, kutawutfolwa ngulabo labahlala elutsandvweni lwaNkulunkulu.

23. Kungani kubalulekile kutigcina elutsandvweni lwaNkulunkulu?

²³ Ngamunye wetfu kufanele atibute, ‘Ngikhonta Nkulunkulu ngendlela leshiwo liBhayibheli yini?’ Nangabe onkhe malanga, lombuto siwuphendvula ngekutsi, yebo, siyobe sikhonta Nkulunkulu ngendlela layemukelako, futsi siyobe sisendleleni lefanele. Singaciniseka kutsi Jehova usiphephelo setfu. Utawuvikela bantfu bakhe labatsembekile kute basindze kulamalanga ekugcina alelive lelidzala lelinetinkinga. Jehova utawuphindze asisindzise singene eveni lesisha lelihle kakhulu lelisedvute. Siyojabula kubona leso sikhatsi sesifikile. Sitawutfokota ngekutsi sente kukhetsa lokuhle ngalesikhatsi salamalanga ekugcina. Nangabe wente sincumo lesinjalo nyalo, utawutfola ‘kuphila lokunguko sibili’ kuphila Nkulunkulu Jehova abefuna sikuphile, kuze kube phakadze.