UMPHROFETHI DANYELA waphila eminyakeni lengetulu kwalengu-500 ngembi kwekutalwa kwaJesu. Nobe kunjalo, Jehova wamchazela Danyela loko lobekuyomsita kute akwati kukhomba sikhatsi Jesu labeyogcotjwa nobe amiswe ngaso kutsi abe nguMesiya nobe Khristu. Danyela watjelwa loku: “Yati loku ukucondzisise: Kusukela ekumisweni kwesimiso sekutsi kubuye kuvuswe kabusha  iJerusalema yakhiwe, kuze kufike umbusi Logcotjiwe, kuyawuba netikhatsi letisikhombisa netikhatsi letingema-62.”—Danyela 9:25.

Kute sicondze sikhatsi sekufika kwaMesiya, kwekucala, sidzinga kutfola lapho sicala khona kubala sikhatsi lesiholela kuMesiya. Ngekusho kwesiphrofetho, sicala “kusukela ekumisweni kwesimiso sekutsi kubuye kuvuswe kabusha iJerusalema yakhiwe.” ‘Lesimiso samiswa’ nini? Ngekusho kwembhali wencwadzi yeliBhayibheli Nehemiya, simiso sekuphindze kwakhiwe tindvonga taseJerusalema samiswa “emnyakeni wema-20 wekubusa kwenkhosi Athazeksesi.” (Nehemiya 2:1, 5-8) Tati temlandvo ticinisekisa kutsi loku kwenteka nga-474 B.C.E. lapho Athazeksesi abesabuse umnyaka  munye lophelele. Ngako-ke, umnyaka wema-20 wekubusa kwakhe kwakungu-455 B.C.E. Nyalo sesinaso sikhatsi lapho singacala khona kubala siphrofetho saDanyela lesimayelana naMesiya, lokusho kutsi ngemnyaka wa-455 B.C.E.

Danyela wasichazela kutsi sikhatsi lesiholela ekufikeni ‘kwembusi Logcotjiwe’ sasiyoba sikhatsi lesingakanani. Lesiphrofetho sitsi “kuyawuba netikhatsi letisikhombisa netikhatsi letingema-62”—tikhatsi letingu-69 nasetiphelele. Leso sikhatsi lesidze kangakanani? Emahusho eliBhayibheli lamanyenti akhombisa kutsi letikhatsi atisiwo emalanga lasikhombisa lakha liviki, kodvwa ngemaviki lakha iminyaka. Lokusho kutsi liviki ngalinye lisho iminyaka lesikhombisa. Lendlela yekubala emaviki eminyaka, nobe iminyaka lesikhombisa yetikhatsi, yayetayelekile kumaJuda esikhatsi sasendvulo. Sibonelo saloku kutsi emaJuda abegubha umnyaka weliSabatha njalo ngemnyaka wesikhombisa. (Eksodusi 23:10, 11) Ngaleso sizatfu, tikhatsi letingu-69 tesiphrofetho, tiyiminyaka lengu-69 lephindvwe ka-7, leyakha iminyaka lengu-483.

Nyalo sidzinga nje kubala. Nangabe sibala sisuka ku-455 B.C.E., iminyaka lengu-483 isifikisa emnyakeni wa-29 C.E. Lona ngumnyaka Jesu labhajatiswa ngawo futsi waba nguMesiya. * (Lukha 3:1, 2, 21, 22) Lesiphrofetho seliBhayibheli sagcwaliseka ngendlela lemangalisako!