1. Yini lesiyoyizuza nangabe sikhonta Nkulunkulu ngendlela leyemukelekile kuye?

NKULUNKULU JEHOVA usikhatsalela ngendlela lejulile futsi ufuna sizuze esicondzisweni sakhe selutsandvo. Nangabe simkhonta ngendlela lemukelekile kuye, siyojabula futsi siyokhweshelana netinkinga tekuphila letinyenti. Siyotfola tibusiso futsi uyosisita. (Isaya 48:17) Noko-ke, kunetinkholo letinyenti letitsi tifundzisa liciniso ngaNkulunkulu. Nobe kunjalo, kwehluke kakhulu letikufundzisako ngekutsi Nkulunkulu ungubani nekutsi yini lafuna siyente.

2. Singayifundza njani indlela lelungile yekukhonta Jehova, futsi singakufananisa njani loku kute sikucondze?

² Ungayati njani indlela lelungile yekukhonta Jehova? Akudzingeki kutsi ufundze bese ucatsanisa timfundziso tetinkholo letinyenti. Kuphela nje, kudzingeka ufundze loko liBhayibheli lelikufundzisako mbambambamba ngekukhonta kweliciniso. Kute sifananise: Emaveni lamanyenti, kunenkinga yemali mbumbulu. Ase sitsi bewuniketwe umsebenti wekuhlola kutsi nguyiphi imali lengakalungi, bewungakwenta njani loko? Ngekutati tonkhe yini tinhlobo temali mbumbulu? Cha. Sikhatsi sakho bewungasisebentisa ncono ngekufundza ngemali sibili. Nasewati kutsi injani imali sibili, kungaba  lula kubona imali mbumbulu. Ngendlela lefananako, ngekufundza ngendlela yekubona inkholo yeliciniso, singakwati kubona inkholo yemanga.

3. Ngekusho kwaJesu, yini lekufanele siyente kute Nkulunkulu asemukele?

³ Kubalulekile kutsi sikhonte Jehova ngendlela layemukelako. Bantfu labanyenti bakholwa kutsi tonkhe tinkholo tiyamjabulisa Nkulunkulu, kodvwa liBhayibheli alikufundzisi loko. Akukeneli kumane sitibite ngekutsi singemaKhristu. Jesu watsi: “Akusibo bonkhe labatsi kimi: ‘Nkhosi, Nkhosi,’ labayawungena embusweni welizulu, kodvwa ngulabo labenta intsandvo yaBabe losezulwini.” Ngako-ke, kute Nkulunkulu asemukele kufanele sifundze ngaloko lakufunako futsi sikwente. Jesu wabita labo labangayenti intsandvo yaNkulunkulu ngekutsi “benti balokubi.” (Matewu 7:21-23) Njengemali mbumbulu, inkholo yemanga ayisiti ngalutfo. Lokubi nakakhulu, inkholo lenjalo iyalimatana.

4. Emavi aJesu ngetindlela letimbili asho kutsini, futsi indlela ngayinye iholela kuphi?

⁴ Jehova uniketa bonkhe bantfu emhlabeni litfuba lekuzuza kuphila lokuphakadze. Noko-ke, kute sitfole kuphila lokungapheli ePharadisi, kufanele sikhonte Nkulunkulu ngendlela lelungile futsi nyalo siphile ngendlela layemukelako. Kuyadzabukisa kutsi labanyenti abafuni kwenta njalo. Ngaleso sizatfu, Jesu watsi: “Ngenani ngelisango lelincane, ngobe lisango libanti nendlela ibanti leyisa ekubhujisweni, banyenti labangena ngalo. Kepha lisango lincane nendlela yincane leyisa ekuphileni, nebantfu labayitfolako bambalwa.” (Matewu 7:13, 14) Inkholo yeliciniso iholela ekuphileni lokungapheli. Inkholo yemanga iholela ekubhujisweni. Jehova akafuni kutsi kubhujiswe namunye umuntfu, futsi ngaleso sizatfu uniketa bantfu etindzaweni tonkhe litfuba lekufundza ngaye. (2 Phetro 3:9) Ngako-ke, indlela lesikhonta ngayo Nkulunkulu iyoholela ekuphileni nobe ekufeni.

5. Singababona njani labo labasenkholweni yeliciniso?

⁵ Ingatfolakala njani ‘indlela leya ekuphileni?’ Jesu watsi inkholo yeliciniso iyobonakala emphilweni lephilwa bantfu labakuyo. Watsi: “Niyawubati ngemisebenti yabo. . . Sihlahla lesimnandzi sitsela titselo letimnandzi.” (Matewu 7:16, 17) Ngalamanye emavi, labo labasenkholweni yeliciniso bayobonakala ngetinkholelo tabo nangendlela labatiphatsa ngayo. Nanobe tikhonti teliciniso tingakapheleli, tenta emaphutsa, njengelicembu, tetama kwenta intsandvo yaNkulunkulu. Ase sifundze ngetici letisitfupha lesingabona ngato bantfu labasenkholweni yeliciniso.

6, 7. Tikhonti taNkulunkulu tilibheka njani liBhayibheli, futsi Jesu wasibeka njani sibonelo kuloku?

⁶ Tikhonti taNkulunkulu tisekela letikufundzisako eBhayibhelini. LiBhayibheli litsi: “Yonkhe imiBhalo iphefumulelwe nguNkulunkulu; ilungele kufundzisa, nekusola, nekucondzisa, nekuyala ngekulunga, kuze umuntfu waNkulunkulu atewuhlonyiswa alungele kwenta wonkhe umsebenti lomuhle lamiselwe wona.” (2 Thimothi 3:16, 17) Kulamanye emaKhristu, umphostoli Pawula watsi: “Nanemukela livi laNkulunkulu lenaliva kitsi, nalemukela, hhayi njengelivi lemuntfu nje kodvwa njengobe linjalo lilivi laNkulunkulu.” (1 Thesalonika 2:13) Tinkholelo nendlela tintfo letentiwa ngayo enkholweni yeliciniso, akukasekelwa emibonweni nobe emasikweni ebantfu. Kunaloko, konkhe kusekelwe eVini laNkulunkulu, liBhayibheli.

⁷ Jesu Khristu wabeka sibonelo lesihle ngekusekela timfundziso takhe eVini laNkulunkulu. Athandaza kuBabe wakhe wasezulwini, watsi: “Livi lakho liliciniso.” (Johane 17:17) Jesu abelikholwa liVi laNkulunkulu, futsi konkhe abekufundzisa bekuvumelana nemiBhalo. Jesu abevame kutsi: “Kubhaliwe.” (Matewu 4:4, 7, 10) Ngemuva kwaloko Jesu abecaphuna umbhalo. Ngendlela lefananako, bantfu baNkulunkulu lamuhla abafundzisi imibono yabo. Bakholwa kutsi  liBhayibheli liVi laNkulunkulu futsi basekela timfundziso tabo kakhulu kuloko lelikushoko.

8. Kukhonta Jehova kufaka ekhatsi ini?

⁸ Labo labasenkholweni yeliciniso bakhonta Jehova kuphela futsi batisa labanye libito lakhe. Jesu watsi: “Ubokhonta iNkhosi, Nkulunkulu wakho, umkhotsamele yena yedvwa!” (Matewu 4:10) Kungako tinceku taNkulunkulu tingamkhonti lomunye Nkulunkulu ngephandle kwaJehova. Kumkhonta kuhlanganisa nekwatisa bantfu kutsi lingubani libito lakhe nekutsi ungumuntfu lonjani. Tihlabelelo 83:18 titsi: “Shangatsi bangati kutsi nguwe wedvwa lolibito lakhe [“linguJehova,” NW], nguwe Losetikwako Konkhe.” Jesu wasibekela sibonelo ngekusita bantfu kutsi bati ngaNkulunkulu, njengobe asho emthandazweni wakhe: “Ligama lakho ngilatisile kulabo longiphe bona.” (Johane 17:6) Ngendlela lefananako, tikhonti teliciniso lamuhla tifundzisa labanye ngelibito laNkulunkulu, ngetinjongo takhe, kanye netimfanelo takhe.

9, 10. Ngutiphi tindlela emaKhristu eliciniso langabonisa ngato lutsandvo kulabanye?

⁹ Bantfu baNkulunkulu babonisa lutsandvo lolujulile kulomunye nalomunye. Jesu watsi: “Nanitsandzanako, bonkhe bantfu bayawunati kutsi nibafundzi bami.” (Johane 13:35) EmaKhristu asendvulo abetsandzana. Lutsandvo ngaNkulunkulu lucedza kubandlululana, kanye nebuve futsi lubagcogcela ndzawonye bantfu esibophweni sebuzalwane mbamba. (Kholose 3:14) Emalunga enkholo yemanga ete lutsandvo lolunjalo lwebuzalwane. Sikwati njani loko? Ngobe babulalana bodvwa ngekutsi babuve nobe luhlanga lolwehlukene. EmaKhristu eliciniso awatiphatsi tikhali kute abulale lamanye emaKhristu nobe labanye bantfu. LiBhayibheli litsi: “Bantfwana baNkulunkulu nebantfwana baSathane babonakala ngaloku: Umuntfu longenti kulunga nalongatsandzi umzalwane wakhe, akasiye waNkulunkulu. . . . Kufanele sitsandzane. Singabi njengaKhayini labe waLomubi, wabulala umnakabo.”—1 Johane 3:10-12; 4:20, 21.

 ¹⁰ Ecinisweni, lutsandvo lolucotfo lusho lokungetulu nje kwekungabulali labanye. EmaKhristu eliciniso asebentisa sikhatsi sawo, emandla awo, nanobe yini lenye lanayo kute akhutsate labanye. (Hebheru 10:24, 25) Ayasitana ngetikhatsi tekucindzeteleka, futsi asebentelana nalabanye ngekulunga. Asebentisa neseluleko seliBhayibheli ekuphileni kwawo lesitsi “asente lokuhle kubo bonkhe bantfu.”—Galathiya 6:10.

11. Kungani kubalulekile kutsi semukele Jesu Khristu njengendlela yaNkulunkulu yekusindzisa?

¹¹ EmaKhristu eliciniso emukela Jesu Khristu njengendlela yaNkulunkulu yekusindzisa. LiBhayibheli litsi: “Kute kusindziswa ngalomunye; ngobe kute lelinye libito ngaphansi kwelizulu lelinikwe nguNkulunkulu kubantfu, lesingasindziswa ngalo.” (Imisebenti 4:12) Njengobe sifundzile eSehlukweni 5, Jesu wanikela ngekuphila kwakhe kwaba sihlengo sebantfu labalalelako. (Matewu 20:28) Ngetulu kwaloko, Jesu uyiNkhosi lekhetfwe nguNkulunkulu yeMbuso wasezulwini letawubusa umhlaba wonkhe. Nkulunkulu ulindzele kutsi simlalele Jesu futsi sitisebentise timfundziso takhe kute sitfole kuphila lokuphakadze. Kungako liBhayibheli litsi: “Lokholwa yiNdvodzana, unekuphila lokuphakadze.”—Johane 3:36.

12. Kuhlanganisani kungabi yincenye yalelive?

¹² Tikhonti teliciniso atisito talelive. Ngalesikhatsi atekiswa licala embikwembusi waseRoma longuPhilatu, Jesu watsi: “Umbuso wami awusiwo wakulelive.” (Johane 18:36) Nobe ngabe bahlala kuliphi live, balandzeli baJesu beliciniso bayincenye yeMbuso wasezulwini, futsi abahlanganyeli etindzabeni tembangave. Abahlanganyeli emphini. Tikhonti taJehova atingeni etindzabeni tekutsi bantfu bakhetsa liphi licembu letembangave, ekufuneni sikhundla lesisetulu kuhulumende, nobe tivote. Nobe tikhonti teliciniso taNkulunkulu tingatingeneli tindzaba tembangave, tiyayilalela imitsetfo. Kungani tikwenta loko? Kungobe liVi laNkulunkulu lititjela kutsi ‘titfobele tiphatsimandla’ tahulumende. (Roma 13:1) Kodvwa nangabe tiphatsimandla titsi atente loko lokuphambene netinjongo taNkulunkulu, tikhonti teliciniso tilandzela  sibonelo sebaphostoli, labatsi: “Kufanele silalele Nkulunkulu kunekulalela bantfu.”—Imisebenti 5:29; Makho 12:17.

13. Balandzeli baJesu beliciniso bawubheka njani uMbuso waNkulunkulu, futsi ngesizatfu saloko, yini labayentako?

¹³ Balandzeli baJesu beliciniso bashumayela ngekutsi uMbuso waNkulunkulu, kuphela kwelitsemba lebantfu. Jesu watsi: “LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika  kuphela.” (Matewu 24:14) Kunekukhutsata bantfu kutsi betsembele kubabusi balelive njengalabo labangacatulula tinkinga tabo, balandzeli baJesu Khristu beliciniso bamemetela uMbuso waNkulunkulu wasezulwini njengalokuphela kwelitsemba lebantfu. (Tihlabelelo 146:3) Jesu wasifundzisa kutsi siwuthandazele lombuso loncono kunayo yonkhe nakatsi: “Umbuso wakho awute. Intsandvo yakho ayentiwe emhlabeni njengobe yentiwa ezulwini.” (Matewu 6:10) LiVi laNkulunkulu labiketela kutsi uMbuso wasezulwini “uyawupitjita yonkhe leminye imibuso [lekhona nyalo] uyicedze, kodvwa wona uyawukuma kuze kube phakadze.”—Danyela 2:44.

14. Nguyiphi inkholo lokholwa kutsi ngiyo lefinyelela letimfuneko tekukhonta kweliciniso?

¹⁴ Kuloko lesesikufundzile ase utibute: ‘Nguyiphi inkholo lesekela timfundziso tayo eBhayibhelini futsi leyenta libito laJehova latiwe? Nguliphi licembu lelibonisa lutsandvo, lelinekukholwa kuJesu, lelingasiyo incenye yalelive, lelimemetela kutsi nguMbuso waNkulunkulu kuphela lolitsemba lebantfu? Kuto tonkhe tinkholo letisemhlabeni, nguyiphi lehlangabetana nato tonkhe letimfuneko?’ Kuyaticacela kutsi yinkholo yaboFakazi BaJehova.—Isaya 43:10-12.

15. Yini Nkulunkulu layifunako ngetulu kwekumane sati nje kutsi ukhona?

¹⁵ Kumane nje sikholwe kutsi Nkulunkulu ukhona, akukeneli kute simjabulise. Ngisho neliBhayibheli liyasho kutsi nemadimoni ayakholwa kutsi Nkulunkulu ukhona. (Jakobe 2:19) Kepha liciniso kutsi akayenti intsandvo yaNkulunkulu futsi akawemukeli. Kute semukelwe nguNkulunkulu, akufanele sigcine ngekwati kutsi ukhona, kodvwa kufanele sente nentsandvo yakhe. Kufanele sehlukane nenkholo yemanga futsi singene enkholweni yeliciniso.

16. Yini lokufanele yentiwe ngekuhlanganyela enkholweni yemanga?

¹⁶ Umphostoli Pawula washo kutsi akukafaneli sitimbandzakanye nekukhonta kwemanga. Ngako-ke, wabhala watsi:  “INkhosi yaphindza yatsi: ‘Phumani emkhatsini wabo, nehlukane nabo. Ningakutsintsi lokungcolile, ngiyawube sengiyanemukela.’” (2 Khorinte 6:17; Isaya 52:11) EmaKhristu eliciniso abalekela konkhe lokutsintsana nenkholo yemanga.

17, 18. Liyini ‘liBhabhulona Lelikhulu,’ futsi kungani kuphutfuma kutsi ‘siphume kulo’?

¹⁷ LiBhayibheli likhombisa kutsi tonkhe letinkholo letinyenti kangaka tiyincenye ‘yeliBhabhulona Lelikhulu.’ * (Sembulo 17:5) Leligama lisikhumbuta ngelidolobha laseBhabhulona lasendvulo, lapho kukhonta kwemanga kwacala khona ngemuva kwaZamcolo wesikhatsi saNowa. Timfundziso letinyenti kanye nemikhuba leminyenti etinkholweni temanga, kudzabuka eBhabhulona lasendvulo. Sibonelo saloku kutsi bantfu baseBhabhulona bebakhonta nkulunkulu loMtsatfu amunye. Lamuhla, imfundziso leyinhloko yetinkholo letinyenti itsi Nkulunkulu Mtsatfu amunye. Kodvwa liBhayibheli likubeka ebaleni kutsi kunaNkulunkulu munye weliciniso, Jehova, nekutsi Jesu Khristu yiNdvodzana yakhe. (Johane 17:3) BaseBhabhulona bebakholwa nekutsi bantfu banemphefumulo longafi, losindzako lapho kufa umtimba futsi ungahlupheka endzaweni letsite yekuhlushwa. Lamuhla, inkholelo yekungafi kwemphefumulo nobe umoya nekutsi kungenteka uhlushwe esihogweni semlilo, ifundziswa tinkholo letinyenti.

¹⁸ Njengobe indlela yekukhonta kwaseBhabhulona lasendvulo yasakateka kuwo wonkhe umhlaba, liBhabhulona Lelikhulu lalamuhla lingabitwa kufanele ngekutsi ngumbuso welive wenkholo yemanga. Nkulunkulu washo kutsi lombuso wenkholo yemanga masinyane utawuphela. (Sembulo 18:8) Uyabona kutsi kungani kubalulekile kuvele  utehlukanise kwaphela neliBhabhulona Lelikhulu? Nkulunkulu Jehova ufuna kutsi ‘uphume kulo’ masinyane kusenesikhatsi.—Sembulo 18:4.

19. Yini loyoyitfola ngekukhonta Jehova?

¹⁹ Njengobe sewuncume kwehlukana nenkholo yemanga, labanye bangase bakhetse kuyekela kukukhulumisa. Ngekuchubeka ukhonta Jehova kanye nebantfu bakhe, loyawukutfola kunyenti kakhulu kunaloko lokungakulahlekela. Njengebafundzi baJesu bekucala labashiya letinye tintfo kute balandzele yena, nawe utawuba nabomnakenu nabodzadze wenu labanyenti ebandleni. Utawuba lilunga lemndeni lomkhulu lonetigidzi letisemhlabeni wonkhe temaKhristu eliciniso, latakubonisa lutsandvo sibili. Utawuba nelitsemba lekuphila phakadze ‘esikhatsini lesitako.’ (Makho 10:28-30) Mhlawumbe ngekuhamba kwesikhatsi, labo labakulahlele tinkholelo takho, batakufundza loko lokufundziswa liBhayibheli nabo bakhonte Jehova.

20. Banaliphi likusasa labo labasenkholweni yeliciniso?

²⁰ LiBhayibheli lifundzisa kutsi masinyane Nkulunkulu utalibhubhisa lelive lelibi aletse live lelisha lelinekulunga lelitawubuswa nguMbuso wakhe. (2 Phetro 3:9, 13) Cabanga nje kutsi lelo live liyobe lilihle njani! Kulelive lelisha lelinekulunga, kutawube kunenkholo yinye-vo yeliciniso. Kukuhlakanipha ngawe nyalo kutsi utihlanganise nalabo labakhonta ngeliciniso.