ETILWIMINI talo tekucala, liBhayibheli lisebentisa ligama lesiHebheru lelitsi sheʼohlʹ nalelifananako nelesiGriki lelitsi haiʹdes tikhatsi letingetulu kwaletingu-70. Omabili lamagama ahlobene nekufa. Lamanye emahumusho eliBhayibheli awahumusha atsi “lithuna,” “sihogo” nobe “umgodzi.” Nobe kunjalo, kuletinye tilwimi awekho emagama lachaza lamagama esiHebheru nesiGriki ngalokucacile. Kungako i-New World Translation isebentisa ligama lelitsi “Shiyoli” nalelitsi “Hayidesi.” Asho kutsini mbambambamba lamagama? Ase sicale sibone kutsi asetjentiswa njani eBhayibhelini.

Umshumayeli 9:10 utsi: “Ngobe ethuneni [Shiyoli, NW] lapho uya khona, kute kusebenta, nekucabanga, nelwati kanye nekuhlakanipha.” Loku kusho kutsi iShiyoli lithuna lapho kungenteka singcwabe khona sihlobo setfu yini? Cha, akusinjalo. Lapho liBhayibheli likhuluma ngendzawo letsite yekugcwaba, nobe lithuna, lisebentisa lamanye emagama esiHebheru nawesiGriki, hhayi lelitsi sheʼohlʹ nobe haiʹdes. (Genesisi 23:7-9; Matewu 28:1) LiBhayibheli alilisebentisi leligama lelitsi “Shiyoli” nalikhuluma ngelithuna lelikhulu lapho kungcwatjwa khona bantfu labanyenti.—Genesisi 49:30, 31.

Leligama lelitsi “Shiyoli” lisho indzawo lenjani? LiVi laNkulunkulu likhombisa kutsi “iShiyoli” nobe “iHayidesi” isho lokungetulu kwelithuna lelikhulu lelingcwabe bantfu labanyenti. Nasi sibonelo: Umbhalo wa-Isaya 5:14 utsi iShiyoli ‘seyandzise kakhulu seyivule umlomo wayo ngalokwengcile.’ Nanobe iShiyoli seyigwinye bantfu labanyenti, ngaso sonkhe sikhatsi ayesutsi. (Taga 30:15, 16) Ngalokungefani nelithuna lelivamile, lelingcwaba bantfu labambalwa kuphela labafile, “[‘iShiyoli,’ NW] nekufa kungeke kweneliswe.” (Taga 27:20) IShiyoli ayigcwali. Ayinamkhawulo. IShiyoli nobe iHayidesi akusiwo umgodzi losendzaweni letsite lekungcwatjwe kuwo umuntfu lotsite, kunaloko iyindzawo lengumfanekiso lapho bantfu labanyenti labafile balala khona. Bantfu labanyenti nabafa kuba shengatsi bangena kulendzawo lengumfanekiso.

Imfundziso yeliBhayibheli yeluvuko isisita kutsi siyicondze ngalokwengetiwe inchazelo yeligama lelitsi “Shiyoli” nalelitsi  “Hayedesi.” LiVi laNkulunkulu lifananisa iShiyoli, iHayidesi nekufa lapho bantfu batawuvuswa khona. * (Jobe 14:13; Imisebenti 2:31; Sembulo 20:13) LiVi laNkulunkulu liphindze likhombise kutsi labo labaseShiyoli nobe eHayidesi, akuhlanganisi kuphela labakhonte Jehova, kodvwa nalabanyenti labangazange bamkhonte. (Genesisi 37:35; Tihlabelelo 55:15) Ngako-ke, liBhayibheli lisifundzisa kutsi kutawuba ‘neluvuko lwalabalungile nalabangakalungi.’—Imisebenti 24:15.