LIBHAYIBHELI alikhulumi lutfo ngemaholidi latiwako etinkholo nalawo langesiwo etinkholo lagujwako etincenyeni letinyenti temhlaba lamuhla. Ngako-ke, kusukelaphi kugujwa kwalamaholidi? Nangabe kunendzawo lenemtapo wetincwadzi, utawutfola kujabulisa kwati loko tincwadzi letikushoko  ngalamaholidi lagujwako endzaweni lohlala kuyo. Ase ubuke nati tibonelo.

Ema-Easter. I-The Encyclopædia Britannica itsi: “Akukho lapho sibona khona eThestamenteni Lelisha kutsi ema-Easter abegujwa.” Acala njani ema-Easter? Asukela ekukhonteni kwemahedeni. Nobe kucatjangwa kutsi ngaleliholidi kugujwa lilanga lekuvuswa kwaJesu, lamasiko lahlobene nema-Easter awasiwo ebuKhristu. Nasi sibonelo: Mayelana ‘nalogwaja wema-Easter,’ i-The Catholic Encyclopedia itsi: “Logwaja luphawu lwebuhedeni futsi bewusolo uluphawu lwentalo.”

Kugubha Ncibijane. Lelilanga lekugubha Ncibijane kanye nemasiko lahlobene nalo, lwehlukile emaveni lamanyenti. Macondzana nemtfombo walomkhosi, i-The World Book Encyclopedia itsi: “Umbusi wemaRoma Julius Caesar wamisa January 1 njengelilanga lekugubha Ncibijane nga-46 B.C. EmaRoma aniketela lelilanga kuJanus, longunkulunkulu wemasango, weminyango, kanye neticalo. Inyanga yaJanuary yetsiwa isuselwa kuJanus, labenebuso lobubili—lobunye bubuke embili kantsi lobunye bubuke emuva.” Ngako imikhosi yaNcibijane isukela kumahedeni.

Kugubha I-Halloween. I-The Encyclopedia Americana itsi: “Emasiko lahlobene neHalloween asukela emkhosini wemaDruid [baphristi bakadzeni bemaCeltic] ngesikhatsi sangembi kwebuKhristu. EmaCelts abegubha imikhosi lemibili yabonkulunkulu lababalulekile—nkulunkulu welilanga kanye nankulunkulu walabafile (labebitwa ngekutsi nguSamhain), umkhosi wakhe bewentiwa ngaNovember 1, ekucaleni kwaNcibijane wemaCeltic. Umkhosi walabafile wangena kancane kancane kumaKhristu.”

Lamanye Emaholidi. Angeke sikwati kukhuluma ngayo yonkhe imikhosi leyentiwa emhlabeni wonkhe. Kodvwa, emaholidi ladvumisa bantfu nobe tinhlangano tabo, Jehova akawemukeli. (Jeremiya 17:5-7; Imisebenti 10:25, 26) Khumbula kutsi umtfombo walemikhosi nguwo loncumako kutsi iyamjabulisa yini Nkulunkulu nobe ayimjabulisi. (Isaya 52:11; Sembulo 18:4) Timiso teliBhayibheli letichazwe eSehlukweni 16 kulencwadzi tiyokusita ubone kutsi Nkulunkulu ukubheka kanjani kugubha emaholidi langesiwo enkholo.