INCWADZI yeSembulo icuketse tindzaba lokungakafanele ticondvwe njengobe tibhaliwe. (Sembulo 1:1) Nasi sibonelo: Ikhuluma ngemfati lokubhalwe ebuntini lakhe ligama lelitsi “iBhabhulona Lenkhulu.” Lomfati kutsiwa uhleti ‘etikwebantfu netive.’ (Sembulo 17:1, 5, 15) Njengobe kute umuntfu lomsikati longenta loku, kumelwe kutsi iBhabhulona Lenkhulu lifananiswa nalokutsite. Ngako, lengwadla lokukhulunywa ngayo ifananisani?

KuSembulo 17:18, lomfati lokufananiswa ngaye uchazwa ngekutsi “lidolobha lelikhulu lelibusa emakhosi emhlaba.”  Ligama lelitsi “lidolobha” lisho licembu lebantfu labahlelekile. Njengobe ‘lelidobha lelikhulu’ libusa “emakhosi emhlaba,” kufanele kube lomfati lobitwa ngekutsi iBhabhulona Lenkhulu iyinhlangano lehuhako emhlabeni wonkhe. Kufanelekile kutsi ibitwe ngekutsi ngumbuso welive. Iluhlobo lolunjani lwembuso? Ingumbuso wenkholo. Caphela indlela lamanye emavesi encwadzini yeSembulo lasiholela ngayo kulesiphetfo.

Umbuso ungaba wetembusave, wetetsengiselwane nobe wenkholo. Lomfati lobitwa ngekutsi iBhabhulona Lenkhulu akasuye umbuso wetembusave ngobe liVi laNkulunkulu litsi “emakhosi emhlaba” nobe tihlangano tembusave tasemhlabeni ‘tiphingana naye.’ Kugwadla kwakhe kubhekiselwe etivumelwaneni latente nebabusi balelive futsi kuchaza kutsi kungani abitwa ngekutsi ‘yingwadla lenkhulu.’—Sembulo 17:1, 2; Jakobe 4:4.

IBhabhulona Lenkhulu angeke ibe ngumbuso wetetsengiselwane, ngobe ‘bahwebi bemhlaba’ labamelele tinhlangano tetetsengiselwane, bayawukhala lapho libhujiswa. Ecinisweni, kutsiwa emakhosi nebahwebi bayibukela “bucalu” iBhabhulona Lenkhulu. (Sembulo 18:3, 9, 10, 15-17) Ngako-ke, kunegcondvo kuphetsa ngekutsi iBhabhulona Lenkhulu ingumbuso wenkholo, hhayi wetembusave nobe wetetsengiselwane.

Lokutsi iBhabhulona Lenkhulu iyinkholo, kuphindze kufakazelwe kutsi idukisa tonkhe tive ‘ngebutsakatsi bayo.’ (Sembulo 18:23) Njengobe tonkhe tinhlobo tekusebentelana nemimoya tihlobene nenkholo futsi tivela emadimonini, akumangalisi kutsi liBhayibheli libita iBhabhulona Lenkhulu ngekutsi “likhaya lemadimoni.” (Sembulo 18:2; Dutheronomi 18:10-12) Lombuso uphindze uchazwe ngekutsi uphikisa labo labakhonta ngeliciniso, uhluphe ‘baphrofethi nalabagcwele.’ (Sembulo 18:24) Ecinisweni, iBhabhulona Lenkhulu iyenyanya kakhulu inkholo yeliciniso kangangekutsi ibahlupha ngebudlova iphindze ibabulale labo ‘labafakaza ngaJesu.’ (Sembulo 17:6) Ngako-ke, lomfati lobitwa ngekutsi iBhabhulona Lenkhulu kuyacaca kutsi umelela umbuso welive wenkholo yemanga, lohlanganisa tonkhe tinkholo letimelene naNkulunkulu Jehova.