YINI loyicabangako ngeLilanga Lekwehlulela? Labanyenti bacabanga kutsi, umphefumulo nemphefumulo kuleyo letigidzi tetinkhulungwane iyoletfwa embikwesihlalo sebukhosi saNkulunkulu. Lapho, umuntfu nemuntfu uyokwahlulelwa. Labatsite bayozuza injabulo yasezulwini, futsi labanye bayohlushwa phakadze. Noko-ke, liBhayibheli lisiniketa lomunye umcondvo lowehlukile ngalesikhatsi. LiVi laNkulunkulu libonisa kutsi lesi akusiso sikhatsi lesesabekako, kodvwa sikhatsi selitsemba nesekulungiswa kwetintfo.

KuSembulo 20:11, 12, sifundza emavi emphostoli Johane lapho achaza Lilanga Lekwehlulela: “Ngase ngibona lesikhulu sihlalo sebukhosi lesimhlophe, nalohleti kuso. Lizulu nemhlaba kwambalekela kwanyamalala ebusweni bakhe, akuzange kuphindze kutfolakale ndzawo. Ngabona labafile, labakhulu nalabancane, beme embikwaso lesihlalo sebukhosi. Tincwadzi tavulwa. Nalenye incwadzi yavulwa, incwadzi yekuphila. Labafile behlulelwa ngekwemisebenti yabo, ngaloko lokwakubhalwe etincwadzini.” Ngubani loMehluleli lokukhulunywa ngaye lapha?

Nkulunkulu Jehova unguMehluleli lomkhulu webantfu. Noko-ke, lomsebenti wekwehlulela akawenti ngekwakhe. Ngekusho kweMisebenti 17:31, umphostoli Pawula watsi Nkulunkulu  “umisile lilanga lapho ayakwehlulela khona umhlaba wonkhe ngeliciniso lelimsulwa ngemuntfu munye lamkhetsile.” LoMehluleli lokhetsiwe nguJesu Khristu lovusiwe. (Johane 5:22) Noko-ke, leLilanga Lekwehlulela licala nini? Liyotsatsa sikhatsi lesidze kangakanani?

Incwadzi yeSembulo ibonisa kutsi Lilanga Lekwehlulela licala ngemuva kwe-Amagedoni, lapho lesimiso saSathane siyobhujiswa siphele emhlabeni. * (Sembulo 16:14, 16; 19:19–20:3) Ngemuva kwe-Amagedoni, Sathane nemadimoni akhe bayovalelwa emgodzini longenamkhawulo iminyaka leyinkhulungwane. Ngaleso sikhatsi, labangu-144 000 labayoba naye ezulwini ‘bayobusa naKhristu iminyaka leyinkhulungwane.’ (Sembulo 14:1-3; 20:1-4; Roma 8:17) Ngako-ke, Lilanga Lekwehlulela alisiso sikhatsi nje lesisheshe sendlule lesingema-awa langu-24. Litsatsa iminyaka leyinkhulungwane.

Emkhatsini weminyaka leyinkhulungwane, Jesu Khristu ‘utakwehlulela labaphilako nalabafile.’ (2 Thimothi 4:1) “Labaphilako” bayawuba “sicumbi lesikhulu” lesisindze e-Amagedoni. (Sembulo 7:9-17) Umphostoli Johane waphindze wabona ‘labo labafile beme embikwesihlalo sebukhosi’ sekwehlulela. Njengobe Jesu etsembisa, ‘bantfu labasemathuneni bayoliva livi lakhe [Khristu],’ bavuke. (Johane 5:28, 29; Imisebenti 24:15) Kodvwa bayokwehlulelwa ngani?

Ngekusho kwembono wemphostoli Johane, “tincwadzi tavulwa,” futsi “labafile behlulelwa ngekwemisebenti yabo, ngaloko lokwakubhalwe etincwadzini.” Letincwadzi tiyimilandvo yini yaloko bantfu labakwenta esikhatsini lesendlulile? Cha, akusinjalo. Bantfu angeke behlulelwe ngetintfo labatenta basaphila. Sikwati njani loko? LiBhayibheli litsi: “Umuntfu lofile ukhululiwe emandleni esono.” (Roma 6:7) Ngako-ke, labo labavusiwe bacala kuphila bete licala. Kufanele kutsi letincwadzi timelela imiyalo lemisha yaNkulunkulu. Kute baphile phakadze, labo labasindze e-Amagedoni nalabo labavusiwe kuyodzingeka balalele imiyalo yaNkulunkulu, lokufaka ekhatsi naleyo lemisha Jehova lokungenteka  asinikete yona eminyakeni letinkhulungwane. Ngako-ke, bantfu bayokwehlulelwa ngaloko labakwente emkhatsini weLilanga Lekwehlulela.

Lilanga Lekwehlulela litawuniketa tinkhulungwane tetigidzi tebantfu litfuba lekucala lekufundza ngentsandvo yaNkulunkulu futsi baphile ngekuvumelana nayo. Loku kusho kutsi kuyoba nemsebenti lomkhulu wekufundzisa. Ecinisweni, ‘tive temhlaba tiyofundza kulunga.’ (Isaya 26:9) Nobe kunjalo, akusibo bonkhe bantfu labayofuna kuphila ngentsandvo yaNkulunkulu. Isaya 26:10 utsi: “Naloku umusa sewuphiwe lababi, bona solo abakufundzi kulunga; ngisho naseveni lebucotfo bachubeka benta lokubi, bangabunaki bukhosi baSimakadze [Jehova].” Labo lababi bayobulawa phakadze ekhatsi neLilanga Lekwehlulela.—Isaya 65:20.

Ekupheleni kweLilanga Lekwehlulela, bantfu labasindzile ‘bayovuka ekufeni’ njengebantfu labaphelele. (Sembulo 20:5) NgeliLanga Lekwehlulela bantfu bayobuyiselwa esimeni sabo sakucala ngalesikhatsi basephelele. (1 Khorinte 15:24-28) Ngemuva kwaloko kuyocalisa luvivinyo lekugcina. Sathane uyokhululwa esigodzini lesingenamkhawulo aniketwe litfuba lekudukisa bantfu kwekugcina. (Sembulo 20:3, 7-10) Labo labamelana naye bayojabulela kugcwaliseka lokuphelele kwesetsembiso seliBhayibheli lesitsi: “Labalungile bayawudla lifa lemhlaba, bahlale kulo kuze kube phakadze.” (Tihlabelelo 37:29) Nembala, Lilanga Lekwehlulela liyoba sibusiso kubo bonkhe bantfu labatsembekile.