EMAKHRISTU ayalwa kutsi abekhona eSikhumbutweni sekufa kwaKhristu. Lesikhumbuto sibitwa ngekutsi ‘sidlo seNkhosi sakusihlwa.’ (1 Khorinte 11:20) Yini lebaluleke kangaka ngaso? Kufanele sentiwe nini futsi njani?

Jesu Khristu wacala lesikhumbuto ngebusuku beliPhasika lemaJuda nga-33 C.E. LiPhasika ngumkhosi lobewuba khona njalo ngemnyaka, ngelilanga lesi-14 enyangeni yemaJuda yaNisan. Kute abale lelilanga, emaJuda abelindza kuze kube yintfwasahlobo. Lesi sikhatsi lapho imini iba nema-awa langu-12, futsi kube mnyama ema-awa langu-12. Sikhatsi sekubonakala kwekwetfwasa kwenyanga besisho kucala kwaNisan. LiPhasika lalilandzela ngemuva kwemalanga langu-14, ngemuva kwekushona kwelilanga.

Jesu wagubha liPhasika nebaphostoli bakhe, wacosha Judasi Skariyothi, wabese ucalisa Sidlo seNkhosi Sakusihlwa. Lesidlo sangena esikhundleni seliPhasika lemaJuda, ngako bekufanele sentiwe kanye ngemnyaka.

Livangeli laMatewu litsi: “Jesu watsatsa sinkhwa, wasibusisa, wasihlephula,  wasinika bafundzi, watsi: ‘Tsatsani nidle, loku ngumtimba wami.’ Wase utsatsa indzebe uyabonga, wabanika watsi: ‘Natsani kuyo nonkhe, ngobe loku kuyingati yami yesivumelwane, lecitselwe labanyenti kube kutsetselelwa kwetono.’”—Matewu 26:26-28.

Labanye bakholwa kutsi Jesu wagucula lesinkhwa saba yinyama yakhe neliwayini laba yingati yakhe. Noko-ke, Jesu abenemtimba wakhe lapho abanika lesinkhwa. Ngalesikhatsi baphostoli baJesu badla, bebadla inyama yakhe yini futsi banatsa nengati yakhe? Nangabe bebenta njalo, loko bekuyosho kutsi bangemazimu futsi abawulaleli umtsetfo waNkulunkulu. (Genesisi 9:3, 4; Levithikhusi 17:10) Ngekusho kwaLukha 22:20, Jesu watsi: “Lendzebe sivumelwane lesisha sengati yami lecitselwe nine.” Lendzebe yaba “sivumelwane lesisha” sibili yini? Loko bekungeke kwenteke, ngobe sivumelwane sisho kuvumelana ngentfo letsite, hhayi intfo lephatsekako.

Ngendlela lefananako, sinkhwa kanye neliwayini kumane nje kuyafanekisa. Sinkhwa sifanekisela umtimba waKristu lophelele. Jesu wasebentisa sinkhwa lebesisele emkhosini weliPhasika. Lesinkhwa besingakentiwa ngembiliso. (Eksodusi 12:8) LiBhayibheli livamise kusebentisa imbiliso njengeluphawu lwesono nobe kubola. Ngako lesinkhwa besimelela umtimba lophelele lowo Jesu lanikela ngawo. Lomtimba bewute sono.—Matewu 16:11, 12; 1 Khorinte 5:6, 7; 1 Phetro 2:22; 1 Johane 2:1, 2.

Liwayini lelibovu limelela ingati yaJesu. Leyo ngati icinisekisa lesivumelwano lesisha. Jesu watsi ingati yakhe yacitsekela “kutsetselelwa kwetono.” Ngaleso sizatfu, bantfu bebangaba ngulabahlantekile emehlweni aNkulunkulu futsi bangene esivumelwaneni lesisha naJehova. (Hebheru 9:14; 10:16, 17) Lesivumelwane sivula litfuba lekutsi emaKhristu latsembekile langu-144 000 aye ezulwini. Lapho atawukhonta njengemakhosi nebaphristi kute kubusiswe bonkhe bantfu.—Genesisi 22:18; Jeremiya 31:31-33; 1 Phetro 2:9; Sembulo 5:9, 10; 14:1-3.

Bobani lokufanele badle letifanekiselo teSikhumbuto? Kulindzeleke kutsi kudle labo labasesivumelwaneni lesisha kuphela—lokusho kutsi labo labanelitsemba lekuphila ezulwini—kufanele badle lesinkhwa banatse naleliwayini. Umoya longcwele waNkulunkulu ucinisekisa laba kutsi bakhetselwe kuba ngemakhosi  asezulwini. (Roma 8:16) Baphindze babe sesivumelwaneni seMbuso naJesu.—Lukha 22:29.

Kutsiwani ngalabo labanelitsemba lekuphila phakadze emhlabeni loliPharadisi? Balalela umyalo waJesu futsi babekhona eSidlweni SeNkhosi Sakusihlwa, abatidli letifanekiselo, bamane nje babe tibukeli. Njalo ngemnyaka, ngaNisan 14 ngemuva ngekushona kwelilanga, boFakazi BaJehova baba neSidlo SeNkhosi Sakusihlwa. Nobe nje emhlabeni wonkhe batinkulungwane letimbalwa labanelitsemba lekuphila ezulwini, lomkhosi uba ligugu kuwo onkhe emaKhristu. Lesi kuba sikhatsi lapho onkhe emaKhristu angakhumbula lutsandvo lolukhetsekile lolwaboniswa nguNkulunkulu Jehova kanye naJesu Khristu.—Johane 3:16.