1. Ngubani lowasinika kuphila?

JEHOVA “unguNkulunkulu lophilako.” (Jeremiya 10:10) UnguMdali wetfu losinika kuphila. LiBhayibheli litsi: “Wadala tonkhe tintfo, nangentsandvo yakho taba khona futsi tadalwa.” (Sembulo 4:11) Kuliciniso, Jehova abefuna kutsi siphile. Kuphila kusipho lesiligugu lesivela kuye.​—Fundza Tihlabelelo 36:9.

2. Yini lesingayenta kute siphumelele ekuphileni?

² Jehova usipha lesikudzingako kute sichubeke siphila, lokufaka ekhatsi kudla nemanti. (Imisebenti 17:28) Ngetulu kwaloko, ufuna sijabule. (Imisebenti 14:15-17) Kute siphumelele ekuphileni, kufanele siyilalele imitsetfo yaNkulunkulu.​—Isaya 48:17, 18.

3. Yini Jehova layenta ngesikhatsi Khayini abulele Abela?

³ LiBhayibheli lisifundzisa kutsi kuphila kwetfu nekwalabanye kuligugu kuJehova. Sibonelo saloko kutsi Jehova wamekhuta Khayini, indvodzana yabo-Adamu na-Eva, ngesikhatsi atfukutselele Abela umnakabo, wamtjela kutsi abambe intfukutselo yakhe. Kodvwa Khayini akazange alalele, esikhundleni saloko watfukutsela kakhulu “wesukela umnakabo, wambulala.” (Genesisi 4:3-8) Jehova wamjezisa Khayini ngekubulala Abela. (Genesisi 4:9-11) Ngako-ke intfukutselo nekwenyanya labanye bantfu kuyingoti kakhulu ngoba kungasenta sibe nelunya noma sibe tidlova, futsi kungasenta singakutfoli kuphila lokuphakadze. (Fundza 1 Johane 3:15.) Nasifuna  kujabulisa Jehova, kufanele sitsandze bonkhe bantfu.​—1 Johane 3:11, 12.

4. Lomunye wemiyalo Nkulunkulu lawunika ema-Israyeli usifundzisani ngekuphila?

⁴ Ngemuva kwetinkhulungwane teminyaka, Jehova wakhombisa kutsi kuphila kuligugu kuye ngesikhatsi anika Mosi iMiyalo Lelishumi. Lomunye walemiyalo bewutsi: “Ungabulali.” (Dutheronomi 5:17) Nangabe umuntfu abulala lomunye umuntfu ngenhloso, naye abebulawa.

5. Utsini Nkulunkulu ngekukhipha sisu?

⁵ Utsini Nkulunkulu ngekukhipha sisu? Ngisho nekuphila kwemntfwana losengakatalwa kuligugu kuJehova. Kulomyalo lawuniketa ema-Israyeli waphindze watsi nakwenteka umuntfu alimata make lotetfwele bese kufa lomntfwana, loyo muntfu bekufanele abulawe. (Fundza Eksodusi 21:22, 23; Tihlabelelo 127:3.) Loku kusifundzisa kutsi kukhipha sisu kubi.​—Fundza liphuzu 28 ngephasi kwesihloko lesitsi Imininingwane Lesekugcineni.

6, 7. Simkhombisa njani Jehova kutsi kuphila sikutsatsa njengalokuligugu?

⁶ Singamkhombisa njani Jehova kutsi kuphila kwetfu nekwalabanye sikutsatsa njengalokuligugu? Singamkhombisa ngekubalekela nome yini lengafaka kuphila kwetfu nekwalabanye engotini. Ngako-ke ngeke sibheme insangu nobe lugwayi futsi ngeke sisebentise nome ngutiphi tidzakamiva letingekho emtsetfweni ngobe tiyingoti futsi tingasibulala.

⁷ Nkulunkulu usiphe umtimba lophilile nemphilo lenhle, futsi kufanele sikuphatse ngendlela yena lafuna ngayo. Ngako-ke kufanele siyinakekele kahle imitimba yetfu. Nasingakwenti loko sitawuba babi kuNkulunkulu. (Roma 6:19; 12:1; 2 Khorinte 7:1) Nangabe kuphila  singakutsatsi njengalokuligugu angeke sikhone kukhonta Jehova lokunguye lowasipha kuphila. Ngisho nome kungaba lukhuni kuyekela imikhuba lemibi, Jehova utasisita nasetama ngobe sitsatsa kuphila njengalokuligugu.

8. Yini lesingayenta kute singabeki kuphila kwetfu nekwalabanye engotini?

⁸ Sesifundzile kutsi kuphila kusipho lesiligugu. Jehova uyasetsemba kutsi sitawenta konkhe lokusemandleni etfu kute singabeki kuphila kwetfu nekwalabanye engotini. Sikhombisa loko ngendlela lesishayela ngayo timoto tetfu, tidududu noma lokunye kwekuhamba. Siyayibalekela nemidlalo leyingoti nalenebudlova. (Tihlabelelo 11:5) Siphindze sente konkhe lokusemandleni etfu kute sigcine emakhaya etfu aphephile. Jehova wayala ema-Israyeli watsi: “Nawakha indlu lensha, ubocaphela kutsi wakhe lutsango lolutawutungeleta luphahla lwakho, khona indlu yakho ungetiyehlisela licala lengati ngekutsi kube khona longahle awe kuyo.”​—Dutheronomi 22:8.

9. Kufanele sitiphatse njani tilwane?

⁹ Indlela lesiphatsa ngayo tilwane nayo ibalulekile kuJehova. Uyasivumela kutsi sibulale tilwane kute sitfole kudla netimphahla futsi singasibulala silwane lesiyingoti ekuphileni kwetfu. (Genesisi 3:21; 9:3; Eksodusi 21:28) Kodvwa ngeke sitiphatse ngelunya tilwane nome sidlale ngekutibulala.​—Taga 12:10.

10. Sati ngani kutsi ingati imelela kuphila?

¹⁰ Ingati ingcwele kuJehova ngoba imelela kuphila. Ngemuva kwekutsi Khayini asabulele Abela, Jehova wamtjela kutsi: “Livi lengati yemnakenu liyakhala kimi, lisemhlabatsini.” (Genesisi 4:10) Ingati ya-Abela beyimelela kuphila kwakhe futsi Jehova wamjezisa Khayini ngekubulala Abela. Ngemuva kwaZamcolo wangesikhatsi  saNowa, Jehova waphindze wakhombisa kutsi ingati imelela kuphila. Wavumela Nowa nemndeni wakhe kutsi badle tilwane. Wabatjela watsi: “Tonkhe tilwane letiphilako tiyawuba kudla kwenu; ngininika kona njengobe nganinika tibhidvo.” Nobe kunjalo, kunentfo Jehova lebekabayale kutsi bangayidli, watsi kubo: “Ningayidli inyama lesenengati; loko ngikusho ngobe kuphila kusengatini.”​—Genesisi 1:29; 9:3, 4.

11. Ngumuphi umyalo lomayelana nengati Jehova lawuniketa ema-Israyeli?

¹¹ Ngemuva kweminyaka lengu-800 Jehova atjele Nowa kutsi angayidli ingati, waphindze wayala bantfu bakhe watsi: “Wonkhe um-Israyeli nome wetive lohlala nani lotingela inyamatane nome inyoni ledliwako, kufanele aphomphise yonkhe lengati yayo, bese uyigcibedzela ngemhlaba.” Wabese ubatjela kutsi ‘bangayidli ingati.’ (Levithikhusi 17:13, 14) Jehova abesafuna kutsi bantfu bakhe bayihloniphe ingati ngoba ingcwele. Bebangayidla inyama kodvwa hhayi ingati. Nababulala silwane kute basidle bekufanele baphomphise ingati yaso emhlabatsini.

12. EmaKhristu anamuphi umbono ngengati?

¹² Ngemuva kweminyaka lembalwa Jesu afile, baphostoli nemadvodza lamadzala ebandleni lebuKhristu bahlangana eJerusalema kute bakhetse imiyalo lebeyisasebenta kumaKhristu. (Fundza Imisebenti 15:28, 29; 21:25.) Jehova wabasita babona kutsi ingati beyisolo ibalulekile kuye futsi bekusafanele bayihloniphe ngobe ingcwele. EmaKhristu angelikhulu lekucala bekangeke ayinatse ingati noma adle inyama lengakaphomphiswa kahle. Kwenta loku, bekukubi njengekukhonta titfombe noma kutiphatsa kabi ngekwelicasi. Kusukela ngaleso sikhatsi emaKhristu eliciniso akayidli ingati futsi akayinatsi.  Namuhla-ke? Jehova usafuna siyihloniphe ingati ngoba ingcwele.

13. Yini leyenta emaKhristu ale kufakwa ingati?

¹³ Loku kusho kutsi emaKhristu kufanele angafakwa yini ingati? Yebo. Jehova usiyala kutsi singayidli ingati futsi singayinatsi. Dokotela nakangatsi ungabunatsi tjwala, ungabufaka yini ngemjovo emtimbeni wakho? Ngeke sewucale! Ngalokufanako-ke lomyalo lotsi singayidli ingati usho kutsi singavumi nekufakwa ingati.​—Fundza liphuzu 29 ngephasi kwesihloko lesitsi Imininingwane Lesekugcineni.

14, 15. Kubaluleke kangakanani kutsi umKhristu ahloniphe kuphila futsi alalele Jehova?

¹⁴ Kufanele sente njani nakatsi dokotela sitakufa nasingavumi kufakwa ingati? Umuntfu kufanele atikhetsele yena kutsi utawulalela yini umyalo waNkulunkulu lomayelana nengati. EmaKhristu akuhlonipha kakhulu kuphila ngobe kusipho lesivela kuNkulunkulu. Singakhetsa letinye tindlela tekwelashwa kunekutsi sifakwe ingati.

¹⁵ Senta konkhe lokusemandleni etfu kute sihlale siphilile, kodvwa ngenca yekutsi kuphila kusipho lesiligugu Nkulunkulu lasiphe sona ngeke sivume kufakwa ingati. Lokubaluleke kakhulu kutsi silalele Jehova kunekutsi setame kuphila sikhatsi lesidze ngekutsi singamlaleli. Jesu watsi: “Ngobe nobe ngubani lofuna kusindzisa umphefumulo wakhe uyawulahlekelwa nguwo, kodvwa nobe ngubani lolahlekelwa ngumphefumulo wakhe ngenca yami utawutfola.” (Matewu 16:25) Sitimisele kulalela Jehova ngobe siyamtsandza. Ukwati kahle lokusilungelako, ngako siyakuhlonipha kuphila njengobe kuligugu kuye futsi kungcwele.​—Hebheru 11:6.

16. Yini leyenta tinceku taNkulunkulu timlalele?

¹⁶ Bantfu baNkulunkulu labetsembekile batimisele kulalela  umyalo wakhe lomayelana nengati. Angeke badle ingati noma bayinatse, futsi angeke bavume nekwelashwa ngayo. * Nanobe kunjalo, bayatemukela letinye tindlela tekwelashwa kute basindzise kuphila kwabo. Bayati kutsi Nkulunkulu nguye lowadala ingati nekuphila, ngako ukwati kahle lokubalungelako. Uyakholelwa yini wena kutsi Nkulunkulu ukwati kahle lokukulungelako?

17. Nguyiphi indlela Jehova labevumele ngayo ema-Israyeli kutsi asebentise ingati?

¹⁷ EMtsetfweni Nkulunkulu lawuniketa Mosi, watjela ema-Israyeli kutsi: “Kuphila kwemtimba kusengatini; mine ngininike ingati kutsi ifeze inkonzo yekuhlenga [noma yekucela kucolelwa] timphilo tenu etikwelilati.” (Levithikhusi 17:11) Ngalesikhatsi ema-Israyeli ona, abengacela kucolelwa nguJehova ngekutsi anikele ngesilwane bese acela umphristi kutsi atsele lenye ingati yaso elatini lelisethempelini. Lena bekukuphela kwendlela Jehova labevumele ema-Israyeli kutsi asebentise ngayo ingati.

18. Yini lesingayitfola ngemhlatjelo waJesu?

¹⁸ Ngalesikhatsi Jesu alamhlabeni, wavula lenye indlela yekutsetselelwa kwetono tetfu, ngekunikela ngekuphila kwakhe nobe ngengati yakhe esikhundleni sekusebentisa ingati yetilwane. (Matewu 20:28; Hebheru 10:1) Kuphila kwaJesu bekuligugu kakhulu kangangekutsi bonkhe bantfu batfola litfuba lekuphila phakadze ngemuva kwekutsi Jehova amvusele ezulwini.​—Johane 3:16; Hebheru 9:11, 12; 1 Phetro 1:18, 19.

19. Yini lokufanele siyente kute ‘sibe msulwa engatini yabo bonkhe bantfu’?

 ¹⁹ Simbonga kakhulu Jehova ngesipho sekuphila lesimangalisako! Ngako sifuna kutjela labanye kutsi nabakholwa kuJesu batawutfola kuphila lokuphakadze. Siyabatsandza bantfu, futsi sitakwenta konkhe lokusemandleni etfu kute sibafundzise kutsi bangakutfola njani kuphila. (Hezekeli 3:17-21) Nasenta njalo, singakhona kusho njengobe kwasho umphostoli Pawula lowatsi: “Ngimsulwa engatini yabo bonkhe bantfu, ngobe nonkhe anginigodlelanga kunitjela intsandvo yaNkulunkulu.” (Imisebenti 20:26, 27) Sikhombisa kutsi siyayihlonipha ingati nekuphila nasitjela labanye ngaJehova nekutsi kubaluleke kangakanani kuphila kuye.