1. Ngubani lokufanele asitjele indlela lekahle yekukhonta Nkulunkulu?

TINKHOLO letinyenti titsi tifundzisa liciniso ngaNkulunkulu. Kodvwa loko angeke kwenteke, ngobe tinkholo tifundzisa tintfo letehlukene kakhulu mayelana nekutsi ungubani Nkulunkulu, nendlela lokufanele simkhonte ngayo. Singayati njani indlela lengiyo yekukhonta Nkulunkulu? NguJehova kuphela longasitjela kutsi kufanele simkhonte njani.

2. Yini lokufanele uyente kute wati indlela lekahle yekukhonta Nkulunkulu?

² Jehova usinikete liBhayibheli kute sifundze indlela lekahle yekumkhonta. Chubeka udadisha liBhayibheli kute utfole lusito kuloko Jehova lakufundzisa kona ngobe unendzaba kakhulu nawe.​—Isaya 48:17.

3. Yini Nkulunkulu lafuna siyente?

³ Labanye bantfu batsi Nkulunkulu wemukela tonkhe tinkholo, kodvwa Jesu akazange asifundzise loko. Watsi: “Akusibo bonkhe labatsi kimi: ‘Nkhosi, Nkhosi,’ labatawungena eMbusweni welizulu, kodvwa nguloyo lowenta intsandvo yaBabe.” Ngako kudzingeka sifundze kutsi iyini intsandvo yaNkulunkulu bese siyayenta. Loku kubalulekile ngobe Jesu wafananisa bantfu labangamlaleli Nkulunkulu netephula mtsetfo, nakatsi ‘babenti balokubi.’​—Matewu 7:21-23.

4. Yini Jesu layisho mayelana nekwenta intsandvo yaNkulunkulu?

⁴ Jesu wasecwayisa ngebulukhuni lesitawuhlangabetana nasifuna kwenta intsandvo yaNkulunkulu. Watsi:  “Ngenani ngelisango lelincane, ngobe ibanti futsi ivulekile indlela leya ekubhujisweni, banyenti labahamba kuyo; kantsi lincane lisango kanye nendlela leya ekuphileni, futsi bambalwa labayitfolako.” (Matewu 7:13, 14) Lendlela lencane, nobe lendlela lekahle yekukhonta Nkulunkulu, iyisa ekuphileni lokuphakadze. Kantsi lendlela lenkhulu nobe lendlela lekabi yekukhonta Nkulunkulu, iyisa ekubhujisweni. Jehova uvulele bonkhe bantfu litfuba lekufundza ngaye ngoba akafisi kutsi bantfu bafe.​—2 Phetro 3:9.

5. Ungababona njani bantfu labakhonta Jehova ngendlela layemukelako?

⁵ Jesu watsi singakhona kubona bantfu labakhonta Nkulunkulu ngendlela layemukelako. Loko singakwenta ngekutsi sihlolisise labakukholelwako nalabakwentako. Watsi: “Labo nitawubabona ngetitselo tabo.” Wachubeka watsi: “Tonkhe tihlahla letinhle titsela titselo letinhle.” (Matewu 7:16, 17) Loko akusho kutsi bantfu labakhonta Nkulunkulu abawenti emaphutsa, kodvwa ngaso sonkhe sikhatsi betama kwenta tintfo ngendlela lejabulisa Nkulunkulu. Ase sifundze ngalokungasisita sikhone kubona bantfu labakhonta Nkulunkulu ngendlela layemukelako.

6, 7. Yini leyenta kukhonta kweliciniso kusekelwe eBhayibhelini? Yini lesiyifundzako nasibuka lokwentiwa nguJesu?

⁶ Kukhonta kwetfu kufanele kusekelwe eBhayibhelini. LiBhayibheli litsi: “Yonkhe imiBhalo iphefumulelwe nguNkulunkulu, ilusito ekufundziseni, ekukhalimeni, ekulungiseni, nasekuyaleni ngekulunga, kuze umuntfu waNkulunkulu akulungele ngalokuphelele, futsi akufanele kahle kwenta yonkhe imisebenti lemihle.” (2 Thimothi 3:16, 17) Umphostoli Pawula wabhalela  emaKhristu watsi: “Ngesikhatsi nemukela livi lakhe lenaliva kitsi, nalemukela, hhayi njengelivi lebantfu, kodvwa njengelivi laNkulunkulu.” (1 Thesalonika 2:13) Kukhonta kweliciniso kusekelwe kulokushiwo liVi laNkulunkulu liBhayibheli, akukasekelwa kulokucatjangwa bantfu, emasikweni nobe kunobe yini lenye.

⁷ Konkhe Jesu labekufundzisa abekususela kulokushiwo liVi laNkulunkulu. (Fundza Johane 17:17.) Abevame kukhuluma emavi lasemiBhalweni. (Matewu 4:4, 7, 10) EmaKhristu eliciniso alingisa Jesu futsi konkhe lakufundzisako kusekelwe eBhayibhelini.

8. Yini Jesu layifundzisa mayelana nekukhonta Jehova?

⁸ Kufanele sikhonte Jehova kuphela. UmBhalo weTihlabelelo 83:18 utsi: “Wena, lolibito lakho lingu [Jehova, NW] nguwe Losetikwako Konkhe, lophakeme abuse umhlaba wonkhe.” Jesu abefuna bantfu bamati kahle Nkulunkulu lokufanele bamkhonte, futsi wabafundzisa ligama lakhe. (Fundza Johane 17:6.) Naku lakusho: “Kufanele ukhotsamele Jehova Nkulunkulu wakho, futsi nguye yedvwa lokufanele umkhonte.” (Matewu 4:10) Njengoba sibantfu labakhonta Nkulunkulu, silingisa Jesu. Sikhonta Jehova kuphela, siyalisebentisa ligama lakhe siphindze sifundzise bantfu kutsi balati futsi bati naloko latasentela kona.

9, 10. Sikhombisa njani kutsi siyatsandzana?

⁹ Kufanele sibatsandze mbamba bantfu. Jesu wafundzisa balandzeli bakhe kutsi batsandzane. (Fundza Johane 13:35.) Akuyi ngekutsi sivela kuphi noma kutsi litsini lisiko letfu futsi akuyi nangekutsi sinjingile yini nome seswele. Lutsandvo kufanele lusihlanganise sibe njengebantfwana bemfati munye. (Kholose 3:14) Ngako-ke asiyi kuyobulala labanye bantfu etimphini. LiBhayibheli litsi: “Bantfwana baNkulunkulu nebantfwana baDeveli  babonakala ngaloku: Nobe ngubani longakwenti lokulungile akaveli kuNkulunkulu, kunjalo nangaloyo longamtsandzi umnakabo.” Lichubeka litsi: “Kufanele sitsandzane; singabi njengaKhayini, lobekavela kulomubi wabulala nemnakabo.”​—1 Johane 3:10-12; 4:20, 21.

¹⁰ Sisebentisa sikhatsi setfu, emandla etfu netintfo lesinato kute sisitane futsi sikhutsatane. (Hebheru 10:24, 25) ‘Senta lokuhle kubo bonkhe’ bantfu.​—Galathiya 6:10.

11. Yini lesenta semukele kutsi Jesu uyindlela leya kuNkulunkulu?

¹¹ Kufanele silalele Jesu ngoba uyindlela leya Nkulunkulu. LiBhayibheli litsi: “Insindziso ngeke ite ngalomunye umuntfu, ngobe kute lelinye libito ngephansi kwelizulu lelinikwe bantfu, nalabangasindziswa ngalo.” (Imisebenti 4:12) ESehlukweni 5 salencwadzi sifundze kutsi Jehova watfuma Jesu kutsi atonikela ngekuphila kwakhe kube yinhlawulo yebantfu labalalelako. (Matewu 20:28) Jehova ukhetse Jesu kutsi abe yiNkhosi abuse lomhlaba. Kungako liBhayibheli litsi kufanele simlalele Jesu nasifuna kuphila phakadze.​—Fundza Johane 3:36.

12. Yini lesenta singatingeneli tepolitiki?

¹² Akukafaneli singenele tindzaba tepolitiki. Jesu abengatingeni tepolitiki. Ecaleni lakhe watjela Pilatu umbusi waseRoma watsi: “Umbuso wami awusiyo incenye yalelive.” (Fundza Johane 18:36.) NjengaJesu, setsembekile eMbusweni waJehova losezulwini, kungaleso sizatfu singatingeni tepolitiki noma ngabe sihlala kuphi. Nanobe kunjalo, liBhayibheli lisiyala kutsi sitfobele “tiphatsimandla,” lokuyimibuso lekhona. (Roma 13:1) Siyayihlonipha imitsetfo yelive lesihlala kulo, kodvwa nangabe umtsetfo welive uphikisana nalokushiwo ngumtsetfo waNkulunkulu silingisa baphostoli labatsi: “Kufanele silalele Nkulunkulu njengobe angumbusi  kunekutsi silalele bantfu.”​—Imisebenti 5:29; Makho 12:17.

13. Yini lesiyifundzisa bantfu ngeMbuso waNkulunkulu?

¹³ Sikholelwa kutsi uMbuso waNkulunkulu ngiwo kuphela lotawucedza tinkinga letisemhlabeni. Jesu watsi “letindzaba letimnandzi teMbuso” betiyawushunyayelwa emhlabeni wonkhe. (Fundza Matewu 24:14.) Kute umbuso losemhlabeni longasentela lokutawentiwa nguMbuso waNkulunkulu. (Tihlabelelo 146:3) Jesu wasifundzisa kutsi sithantazele uMbuso waNkulunkulu nakatsi: “UMbuso wakho awute. Intsandvo yakho ayentiwe emhlabeni njengasezulwini.” (Matewu 6:10) LiBhayibheli lisitjela kutsi uMbuso waNkulunkulu utawubhubhisa yonkhe imibuso yebantfu lekhona lamuhla bese ‘wona uma kuze kube phakadze.’​—Danyela 2:44.

14. Bobani locabanga kutsi bakhonta Nkulunkulu ngendlela layemukelako?

¹⁴ Ngemuva kwekufundza ngaletintfo tibute: ‘Bobani labasekela loko labakufundzisako eBhayibhelini? Bobani labafundzisa labanye ngeligama laNkulunkulu? Bobani labatsandzana mbamba nalabakholelwa kutsi Jehova watfumela Jesu watosisindzisa? Bobani labangatingeneli tepolitiki? Bobani labafundzisa kutsi nguMbuso waNkulunkulu kuphela lotawucedza tinkinga tetfu?’ BoFakazi BaJehova kuphela.​—Isaya 43:10-12.

15. Yini lokufanele siyente nasifuna kwemukelwa nguNkulunkulu?

¹⁵ Akukeneli kumane nje ukholelwe kutsi Nkulunkulu ukhona. Ngisho nemadimoni ayakholwa kutsi Nkulunkulu ukhona, kodvwa awamlaleli. (Jakobe 2:19) Nangabe sifuna kutsi Nkulunkulu asemukele nasimkhonta, kufanele singagcini nje ngekukholwa kutsi ukhona, kepha kufanele sente lasifundzisa kona.

16. Kubaluleke ngani kutsi sishiye inkholo yemanga?

 ¹⁶ Nasifuna Nkulunkulu asemukele, kufanele siyishiye inkholo yemanga. Umphrofethi Isaya watsi: “Phumani kulelo dolobha, nitihlambulule nibe msulwa.” (Isaya 52:11; 2 Khorinte 6:17) Kungako kufanele silahle noma yini lephatselene nekukhonta kwemanga.

17, 18. Iyini ‘iBhabhulona Lenkhulu,’ futsi kubaluleke ngani kutsi uyishiye kusengakephuti?

¹⁷ Iyini inkholo yemanga? Ngunoma ngabe nguyiphi inkholo lesifundzisa kutsi sikhonte Jehova ngendlela lephikisana nalokushiwo liBhayibheli. EBhayibhelini inkholo yemanga kutsiwa ‘YiBhabhulona Lenkhulu.’ (Sembulo 17:5) Ibitwelani kanjalo? Kungoba ngemuva kwaZamcolo wangesikhatsi saNowa, timfundziso temanga letinyenti tacala edolobheni laseBhabhulona. Leto timfundziso tabese tigcwala emhlabeni wonkhe. Sibonelo saloko kutsi, bantfu baseBhabhulona bebakhonta nkulunkulu lomutsatfu amunye. Nalamuhla, tinkholo letinyenti tifundzisa kutsi Nkulunkulu unguMtsatfu Amunye, kodvwa liBhayibheli lifundzisa lokwehlukile. Lifundzisa kutsi munye kuphela Nkulunkulu weliciniso, nguJehova, lifundzisa nekutsi Jesu uyiNdvodzana yakhe. (Johane 17:3) Bantfu baseBhabhulona bebatsi umphefumulo uchubeka uphila nakufe umtimba, futsi ungase uhlushwe esihogweni. Lawo ngemanga laluhlata.​—Fundza liphuzu 14, 17 kanye na-18 ngephasi kwesihloko lesitsi Imininingwane Lesekugcineni.

¹⁸ Nkulunkulu usitjela kutsi sekusedvute kutsi inkholo yemanga ibhujiswe. (Sembulo 18:8) Uyabona yini kutsi kubaluleke ngani kutsi usheshe uyishiye inkholo yemanga? Jehova ufuna uyishiye kusengakephuti.​—Sembulo 18:4.

19. Utakunakekela njani Jehova nawukhetsa kumkhonta?

 ¹⁹ Nawukhetsa kukhonta Jehova ushiye inkholo yemanga, kungenteka bangani bakho noma umndeni wakho bangavumelani nesincumo sakho futsi bakuphatse kabi. Kodvwa Jehova ngeke akulahle. Utawuba lilunga lemndeni lowakhiwa tigidzi tebantfu labatsandzana mbamba labasemhlabeni wonkhe futsi utawuba nelitsemba lekuphila phakadze emhlabeni lomusha waNkulunkulu. (Makho 10:28-30) Kusenekwenteka kutsi labanye batawucale bakuphikise, kodvwa ngekuhamba kwesikhatsi nabo bagcine bakhetse kudadisha liBhayibheli futsi bakhonta Jehova.

20. Yini leyenta kubaluleke kutsi sikhonte Jehova ngendlela lekahle?

²⁰ Sekusedvute kutsi Jehova acedze bonkhe bubi bese uletsa uMbuso wakhe lotawubusa umhlaba. (2 Phetro 3:9, 13) Leso kuyoba sikhatsi lesijabulisa kakhulu! Bonkhe bantfu batawukhonta Jehova ngendlela lafuna simkhonte ngayo. Ngako kubaluleke kakhulu kutsi nyalo ukhetse kukhonta Jehova ngendlela layemukelako.