1, 2. Yini lekwenta ucabange kutsi umthantazo usipho lesiligugu, futsi kubaluleke ngani kwati lokufundziswa liBhayibheli ngawo?

UMHLABA mncane kakhulu nawucatsaniswa nendzawo yonkhe. Nakabuka umhlaba, Jehova ubona bantfu betive tonkhe bafanana nelitfonsi lemanti ebhakedeni. (Tihlabelelo 115:15; Isaya 40:15) Ngisho noma sibancane kangakanani nasicatsaniswa nendzawo yonkhe, Tihlabelelo 145:18, 19 titsi: Jehova “usedvute nabo bonkhe labambitako, bonkhe labambita ngeliciniso. Wesutsisa kufisa kwabo bonkhe labamesabako, uyabeva nabakhalako, abasindzise.” Lelo lilungelo lelikhulu kakhulu! Jehova uMdali longusomandla ufisa kuba sedvute natsi futsi alalele imithantazo yetfu. Kuliciniso kutsi umthantazo ulilungelo futsi usipho lesiligugu sonkhe Jehova lasiphe sona.

² Jehova utasilalela kuphela nasikhuluma naye ngendlela layemukelako. Singakwenta njani loko? Ase sicoce ngaloko liBhayibheli lelikushoko ngekuthantaza.

3. Kungani kufanele uthantaze kuJehova?

³ Jehova ufuna uthantaze, noma ukhulume naye. Sikwati njani loko? Sicela ufundze Filiphi 4:6, 7. Cabanga ngaleso simemo semusa. UMbusi wendzawo yonkhe unendzaba nawe futsi ufuna umtjele ngendlela lotiva ngayo kanye netinkinga takho.

4. Kuthantaza njalo kuJehova kubucinisa njani bungani bakho naye?

⁴ Umthantazo usisita sibe bangani baJehova labakhulu.  Ngalesikhatsi bangani bavame kucoca ngalabakucabangako, ngalokubakhatsatako kanye nangendlela labativa ngayo, bungani babo buyakhula. Nasithantaza kuJehova kwenteka lokufanako. EBhayibhelini Nkulunkulu ukutjela loko lakucabangako, indlela lativa ngayo nangaloko latakwenta esikhatsini lesitako. Ungamtfululela sifuba sakho ngekutsi ukhulume naye ngaso sonkhe sikhatsi. Nawuchubeka ukwenta loku, bungani bakho naye butawukhula.​—Jakobe 4:8.

5. Sati ngani kutsi akusiyo yonkhe imithantazo Jehova layilalelako?

⁵ Jehova uyilalela yonkhe yini imithantazo? Cha. Ngesikhatsi kusaphila umphrofethi Isaya, Jehova watjela ema-Israyeli kutsi: “Nome senenta imithandazo leminyenti kangakanani, ngingeke ngiyilalele. Tandla tenu tigcwele ingati.” (Isaya 1:15) Nasingakagadzi, singatikhandza senta tintfo letingasenta sikhweshe kuJehova lokungaba nemphumela wekutsi angayilaleli imithantazo yetfu.

6. Kubaluleke ngani kukholwa? Ungakhombisa njani kutsi uyakholwa?

 ⁶ Nangabe sifuna Jehova alalele imithantazo yetfu kufanele sikholwe kuye. (Makho 11:24) Umphostoli Pawula uyachaza: “Ngaphandle kwekukholwa ngeke kwenteke kutsi umuntfu amjabulise Nkulunkulu, ngobe loyo loya kuye kufanele akholwe kutsi ukhona nekutsi ubanika umvuzo labo labamfuna ngekutimisela.” (Hebheru 11:6) Kodvwa akukeneli kumane sitsi siyakholwa. Kudzingeka sikhombise kutsi siyakholwa ngekulalela Jehova onkhe malanga.​—Fundza Jakobe 2:26.

7. (a) Kubaluleke ngani kutsi sititfobe futsi sihloniphe nasithantaza kuJehova? (b) Singakhombisa njani kutsi asigcini licala nasithantaza kuJehova?

⁷ Nasithantaza kuJehova kufanele sititfobe siphindze sihloniphe. Leni? Nakungatsiwa siyokhuluma nenkhosi noma namengameli, singafike sikhulume ngenhlonipho. Njengobe Jehova anguNkulunkulu Somandla, kufanele simhloniphe siphindze sititfobe kakhulu nasikhuluma naye. (Genesisi 17:1; Tihlabelelo 138:6) Lesikushoko kuJehova nasithantaza kufanele kusuke enhlitiyweni, singagcini licala ngekumane nje siphindzaphindze emagama lafanako.​—Matewu 6:7, 8.

8. Nangabe kukhona lesikuthantazele, yini lenye lokufanele siyente?

⁸ Ngetulu kwaloko, nasithantazela lokutsite kufanele sente konkhe lokusemandleni kuze sihambisane naloko lesikuthantazele. Sibonelo saloko kutsi nangabe sithantazela tidzingo tetfu tamalanga onkhe kuJehova, akukafanele sivilaphe sigadze kutsi Jehova utasinika ngisho netintfo lesingakhona kutisebentela. Kufanele sisebente matima futsi semukele noma ngumuphi umsebenti lesingakhona kuwenta. (Matewu 6:11; 2 Thesalonika 3:10) Nangabe sithantaza kuJehova simcela asisite siyekele umkhuba lomubi, kufanele sikubalekele kuba sesimeni  lesingasifaka esilingweni. (Kholose 3:5) Ase sicoce ngaleminye imibuto bantfu labavame kuyibuta mayelana nemthantazo.

9. Kufanele sithantaze kubani? UmBhalo waJohane 14:6 usifundzisani ngemthantazo?

⁹ Kufanele sithantaze kubani? Jesu wafundzisa balandzeli bakhe kutsi bathantaze ‘kuBabe wetfu losezulwini.’ (Matewu 6:9) Waphindze watsi: “Mine ngiyindlela neliciniso nekuphila. Kute umuntfu lota kuBabe ngaphandle kwekutsi ete ngami.” (Johane 14:6) Ngaleso sizatfu nguJehova kuphela lokufanele sithantaze kuye futsi sithantaze egameni laJesu. Kusho kutsini kuthantaza egameni laJesu? Kusho kutsi kuze Jehova amukele imithantazo yetfu kudzingeka sisihloniphe sikhundla lesikhetsekile lasinike Jesu. Njengoba sifundzile, Jesu weta emhlabeni kute asisindzise esonweni nasekufeni. (Johane 3:16; Roma 5:12) Jehova uphindze wakhetsa Jesu kutsi abe ngumPhristi Lomkhulu kanye neMehluleli.​—Johane 5:22; Hebheru 6:20.

10. Kufanele sibe sesimeni semtimba lesikhetsekile yini nasithantaza? Chaza.

¹⁰ Kufanele sibe sesimeni semtimba lesikhetsekile yini nasithantaza? Cha, Jehova akasho kutsi kufanele siguce, sihlale noma sime nasithantaza. LiBhayibheli lisifundzisa kutsi singathantaza sikunoma ngabe ngusiphi simo nangabe nje sikhombisa inhlonipho. (1 Tikhronike 17:16; Nehemiya 8:6; Danyela 6:10; Makho 11:25) Nasithantaza, Jehova akanaki simo semtimba wetfu kodvwa lokubaluleke kakhulu kuye kutsi sitfobeke. Singathantaza siphumisele noma sithantaze ngenhlitiyo ngisho noma sikuphi, noma nini, kungaba semini noma ebusuku. Nasithantaza kuJehova setsemba  kutsi utasilalela ngisho noma ngabe kute lomunye losilalelako.​—Nehemiya 2:1-6.

11. Ngutiphi tintfo lesingatithantazela kuJehova?

¹¹ Yini lesingayithantazela? Singathantazela noma ngabe yini leyemukelekako kuJehova. LiBhayibheli litsi: “Kunobe yini lesiyicela ngekwentsandvo yakhe, uyasiva.” (1 Johane 5:14) Singatithantazela yini tintfo leticondzene natsi? Yebo. Kuthantaza kuJehova kufanele kufanane nekucoca nemngani lomkhulu. Singamtjela Jehova noma ngabe yini lesiyicabangako naloko lokusetinhlitiyweni tetfu. (Tihlabelelo 62:8) Singamcela kutsi asiphe umoya wakhe longcwele lonemandla ekusisita sente lokulungile. (Lukha 11:13) Singamcela Jehova nekutsi asiphe kuhlakanipha kuze sente tincumo letinhle futsi singathantazela emandla ekubeketelela bumatima. (Jakobe 1:5) Kufanele sicele Jehova asitsetselele tono tetfu. (Efesu 1:3, 7) Kufanele sithantazele nalabanye lokufaka ekhatsi imindeni yetfu kanye nemaKhristu lesikanye nawo.​—Imisebenti 12:5; Kholose 4:12.

12. Yini lokufanele ihambe embili emithantazweni yetfu?

¹² Yini lokufanele ihambe embili emithantazweni yetfu? NguJehova kanye nentsandvo yakhe. Kufanele simbonge ngenhlitiyo yetfu yonkhe ngako konkhe lasentele kona. (1 Tikhronike 29:10-13) Loko sikwati kahle ngoba ngesikhatsi Jesu asemhlabeni wafundzisa balandzeli bakhe kuthantaza. (Fundza Matewu 6:9-13.) Watsi kwekucala kufanele bathantazele kutsi ligama laNkulunkulu lingcweliswe, lokusho kuliphatsa ngendlela lengcwele. Jesu wabese utsi kufanele sithantazele uMbuso waNkulunkulu nekutsi intsandvo yakhe yentiwe emhlabeni wonkhe. Ngemuva kwekuthantazela letintfo letibaluleke kakhulu, Jesu watsi singabese siyatithantazela tidzingo tetfu. Sisuke sikhombisa kutsi yini lebaluleke kakhulu kitsi  nasibeka Jehova kanye nentsandvo yakhe kucala emithantazweni yetfu.

13. Kufanele ibe midze kangakanani imithantazo yetfu?

¹³ Kufanele ibe midze kangakanani imithantazo yetfu? LiBhayibheli alisho. Imithantazo yetfu ingaba midze noma ibe mifishane kuye ngesimo lesikuso. Sibonelo saloko kutsi ungasho umthantazo lomfishane nasewutawudla, kodvwa ungathantaza sikhatsi lesidze nawubonga Jehova nobe umtjela ngetintfo letikukhatsatako.  (1 Samuweli 1:12, 15) Asifisi kusho imithantazo lemidze ngoba sifuna kubukisa kubantfu njengoba kwenta labanye ngesikhatsi Jesu asemhlabeni. (Lukha 20:46, 47) Imithantazo lenjalo ayimjabulisi Jehova. Lokubalulekile kuJehova kutsi sithantaze ngalokusuka enhlitiyweni.

14. Kufanele sithantaze kangakhi futsi loko kusifundzisani ngaJehova?

¹⁴ Kufanele sithantaze kangakhi? Jehova usikhutsata kutsi sikhulume naye njalo. LiBhayibheli litsi: “Nichubeke nithantaza,” “phikelelani emthantazweni,” liphindze litsi: “Thandazani ningayekeli.” (Matewu 26:41; Roma 12:12; 1 Thesalonika 5:17) Jehova uhlala akulungele kusilalela. Singambonga onkhe malanga ngetipho lasipha tona nangekutsi uyasitsandza. Singaphindze simcele asicondzise, asinike emandla aphindze asidvudvute. Nasilitsatsa njengalelibalulekile lilungelo lekuthantaza kuJehova  kufanele sisebentise sikhatsi lesisitfolako kuze sikhulume naye.

15. Kubaluleke ngani kutsi “amen” ekwephetseni umthantazo?

¹⁵ Kubaluleke ngani kutsi sitsi “amen” nasephetsa umthantazo? Ligama lelitsi “amen” lisho kutsi “noma kanjani” nobe “akube njalo.” Yindlela yekukhombisa kutsi lesikushoko kusuka enhlitiyweni futsi kuliciniso. (Tihlabelelo 41:13) LiBhayibheli litsi kuhle kutsi sitsi “amen” ekwephetseni kwemthantazo lesiwentelwa ngulomunye. Loku singakusho siphumisele noma sikusho ngenhlitiyo kuze sikhombise kutsi siyavumelana nalakushito.​—1 Tikhronike 16:36; 1 Khorinte 14:16.

16. Jehova uyiphendvula mbamba yini imithantazo yetfu? Chaza.

¹⁶ Jehova uyiphendvula mbamba yini imithantazo yetfu? Yebo uyayiphendvula. LiBhayibheli litsi ‘uyayiva imithandazo.’ (Tihlabelelo 65:2) Jehova uva imithantazo yetigidzi tebantfu aphindze ayiphendvule, loko ukwenta ngetindlela letinyenti.

17. Jehova utisebentisa njani tingilosi netikhonti takhe letisemhlabeni kuze aphendvule imithantazo yetfu?

¹⁷ Jehova usebentisa tingilosi netikhonti takhe letisemhlabeni kuze aphendvule imithantazo yetfu. (Hebheru 1:13, 14) Banyenti bantfu labathantazela lusito lwekucondza liBhayibheli, kwabese kutsi ngemuva kwesikhashana bavakashelwa BoFakazi BaJehova. LiBhayibheli liveta kutsi tingelosi tiyasita ekumemeteleni ‘tindzaba letimnandzi’ emhlabeni wonkhe. (Fundza Sembulo 14:6.) Ngetulu kwaloko, linyenti letfu like lathantaza kuJehova ngenkinga lelihlangabetene nayo noma ngalelikudzingako lase lisitwa ngulomunye webazalwane lesikholwa nabo.​—Taga 12:25; Jakobe 2:16.

18. Jehova uwusebentisa njani umoya wakhe longcwele kanye neliBhayibheli kuze aphendvule imithantazo?

 ¹⁸ Jehova usebentisa umoya wakhe longcwele kuze aphendvule imithantazo yetfu. Nasithantazela lusito lwekubeketelela inkinga, angasebentisa umoya longcwele kuze asinike emandla futsi asicondzise. (2 Khorinte 4:7) Jehova uphindze asebentise liBhayibheli kuze aphendvule imithantazo yetfu aphindze asisite sente tincumo letihlakaniphile. Nasifundza liBhayibheli singatfola imiBhalo lengasisita. Jehova angaphindze asebentise umuntfu lesinaye emihlanganweni yebuKhristu kutsi asho imphendvulo letasikhutsata, nobe asebentise lomdzala ebandleni kuze avete liphuzu leliseBhayibhelini.​—Galathiya 6:1.

19. Yini lengenta kubonakale shengatsi Jehova akayiphendvuli imithantazo yetfu?

¹⁹ Ngalesinye sikhatsi, ungatibuta kutsi, ‘Yini leyenta kutsi Jehova angayiphendvuli imithantazo yami?’ Khumbula kutsi nguye lowati sikhatsi lesikahle sekuphendvula imithantazo yetfu nekutsi kufanele ayiphendvule njani. Uyakwati lesikudzingako. Kungase kudzingeke sichubeke sithantaza kuze sikhombise kutsi sitimisele ngalesikushoko nekutsi sikholwa mbamba kuye. (Lukha 11:5-10) Ngalesinye sikhatsi Jehova uphendvula imithantazo yetfu ngendlela labesingakayigadzi. Sibonelo saloko kutsi singase sithantazele inkinga lesinayo kodvwa kunekutsi ayisuse, angasinika emandla ekuyibeketelela.​—Fundza Filiphi 4:13.

20. Kubaluleke ngani kuchubeka sithantaza kuJehova?

²⁰ Ase ucabange nje ngalelilungelo lelikhulu kangaka Jehova lasinike lona lekuthantaza kuye! Singaciniseka kutsi utasilalela. (Tihlabelelo 145:18) Ngetulu kwaloko, nasichubeka sithantaza kuJehova ngalokusuka enhlitiyweni bungani betfu naye buyacina.