1. Ngumuphi umthantazo lowatiwako lesitawucoca ngawo?

TIGIDZI tebantfu tiyawati umthantazo lowatiwa kakhulu ngekutsi nguBabe Wetfu Wasezulwini nobe Umthantazo WeNkhosi. Jesu wasebentisa lomthantazo losibonelo kute afundzise bafundzi bakhe kuthantaza. Wathantazela ini? Ubaluleke ngani kitsi lomthantazo?

2. Ngutiphi tintfo letintsatfu letibalulekile Jesu lasifundzisa kutithantazela?

² Jesu watsi: “Ngako-ke kufanele nithantaze ngalendlela: ‘Babe wetfu losezulwini, alingcweliswe libito lakho. UMbuso wakho awute. Intsandvo yakho ayentiwe emhlabeni njengasezulwini.’” (Fundza Matewu 6:9-13.) Yini leyenta Jesu wasifundzisa kuthantazela letintfo letintsatfu?​—Fundza liphuzu 20 ngephasi kwesihloko lesitsi Imininingwane Lesekugcineni.

3. Yini lokufanele siyati ngeMbuso waNkulunkulu?

³ Sesifundzile kutsi libito laNkulunkulu nguJehova. Sesicocile ngekutsi iyini injongo yaNkulunkulu ngemhlaba nangebantfu. Kodvwa Jesu bekasho kutsini nakatsi: “UMbuso wakho awute”? Nyalo sitawufundza ngaloko uMbuso waNkulunkulu longiko, naloko lotawusentela kona nekutsi utalingcwelisa kanjani libito laNkulunkulu.

4. Uyini uMbuso waNkulunkulu futsi ngubani iNkhosi yawo?

⁴ Jehova wasungula hulumende wasezulwini, wakhetsa Jesu kutsi abe yiNkhosi yawo. LiBhayibheli libita lohulumende ngekutsi nguMbuso waNkulunkulu. Jesu  “uyiNkhosi yemakhosi neMbusi webabusi.” (1 Thimothi 6:15) Jesu unelikhono lekwenta lokuhle kwendlula nobe ngumuphi lomunye umbusi, futsi unemandla kuwendlula onkhe emakhosi ngisho nome ahlanganisiwe ndzawonye.

5. Umbuso waNkulunkulu utawubusa ukuphi? Utawubusa ini?

⁵ Ngemuva kwemalanga langu-40 Jesu avusiwe, wabuyela ezulwini. Ngemuva kwaloko, Jehova wambeka waba yiNkhosi yeMbuso wakhe. (Imisebenti 2:33) Njengobe hulumende waNkulunkulu utawube usezulwini utawubusa umhlaba. (Sembulo 11:15) Kungako liBhayibheli liwubita ngekutsi ‘nguMbuso wasezulwini.’​—2 Thimothi 4:18.

6, 7. Yini leyenta Jesu ehluke kulamanye emakhosi labantfu?

⁶ LiBhayibheli litsi Jesu mkhulu kunawo onkhe emakhosi ngobe nguye “yedvwa longafi.” (1 Thimothi 6:16) Babusi lababantfu bayafa kepha Jesu akayuze afe. Tonkhe tintfo letinhle Jesu latawusentela tona titawuhlala phakadze.

⁷ Naku lokwashiwo liBhayibheli naliphrofetha kutsi Jesu utawuba yiNkhosi lengakhetsi nalenemusa: “Moya waSimakadze uyawubasetikwakhe, Moya wekuhlakanipha newekucondza, Moya wekweluleka newemandla, Moya welwati newekwesaba Simakadze, uyawutijabulisa ekwesabeni Simakadze. Angeke ehlulele ngalakubona ngemehlo akhe, nome ente sincumo ngalakuve ngetindlebe takhe; kodvwa labeswele uyawubehlulela ngekwemtsetfocotfo.” (Isaya 11:2-4) Uyafisa yini kuba neNkhosi lenjengalena?

8. Sati ngani kutsi Jesu angeke abuse yedvwa?

⁸ Nkulunkulu ukhetse bantfu labambalwa kutsi babuse naJesu kuhulumende wasezulwini. Sibonelo saloko  kutsi Pawula watjela Thimothi kutsi: “Nasichubeka sibeketela, sitawubusa kanye kanye njengemakhosi.” (2 Thimothi 2:12) Bangakhi labatawuba ngemakhosi kanye naJesu?

9. Bangakhi labatawubusa naJesu? Wacala nini Nkulunkulu kubakhetsa?

⁹ Njengobe sifundzile esehlukweni 7, umphostoli Johane wabona umbono lapho khona Jesu asayiNkhosi ezulwini akanye nalamanye emakhosi langu-144 000. Babobani lalabangu-144 000? Johane uyachaza kutsi wabona ‘emabuntini abo kubhalwe libito lakhe [Jesu] neleYise.’ Uyachubeka atsi: Laba “bachubeka balandzela liWundlu [lokunguJesu] nobe ngukuphi lapho liya khona. Batsengwa kubantfu.” (Fundza Sembulo 14:1, 4.) Laba labangu-144 000 bangemaKhristu letsembekile lakhetfwa nguNkulunkulu kutsi abuse “njengemakhosi etikwemhlaba.” Nabafa bavuselwa kuyophila ezulwini. (Sembulo 5:10) Kusukela ngesikhatsi sebaphostoli, Jehova abesolo akhetsa emaKhristu letsembekile latawuba kulaba labangu-144 000 labayobusa ezulwini.

10. Yini lesenta sitsi Jehova uyasicabangela ngekubeka Jesu nalabangu-144 000 kutsi basibuse?

¹⁰ Jehova uyasikhatsalela kakhulu kangangekutsi wente lilungiselelo lekutsi bantfu bayobusa naJesu. Jesu utawuba ngumbusi lokahle ngobe uyasati. Uyakwati kuhlupheka kanye nekutsi kunjani kuba ngumuntfu. Pawula watsi Jesu uneluvelo ngebantfu, “ngeke angavelani nebutsakatsaka betfu” futsi “kuto tonkhe tintfo uvivinywe njengatsi.” (Hebheru 4:15; 5:8) Laba labangu-144 000 nabo bayati kutsi kunjani kuba ngumuntfu. Nabo bebalwa nesono nekugula. Singaciniseka kutsi Jesu kanye nalaba labangu-144 000 batawuyati indlela lesitiva ngayo kanye netinkinga lesilwisana nato.

11. Yini leyenta Jesu wafundzisa balandzeli bakhe kutsi bathantazele intsandvo yaNkulunkulu kutsi yenteke ezulwini?

¹¹ Jesu wafundzisa balandzeli bakhe kutsi bathantazele intsandvo yaNkulunkulu kutsi yenteke ezulwini. Wabafundziselani? Sifundzile eSehlukweni 3 kutsi Sathane wavukela Jehova. Ngemuva kwalokuvukela, Jehova wamyekela Sathane wachubeka ahlala ezulwini sikhashana akanye netingilosi takhe lokutsiwa ngemadimoni. Akusibo bonkhe ezulwini lebebenta intsandvo yaNkulunkulu. ESehlukweni 10 sitawufundza kabanti ngaSathane nemadimoni.

12. UmBhalo weSembulo 12:10 usichazela ngatiphi tintfo letimbili letenteka?

¹² LiBhayibheli liyasichazela kutsi Jesu walwa naSathane masinyane ngemuva kwekubekwa kutsi abe yiNkhosi eMbusweni waNkulunkulu. (Fundza Sembulo 12:7-10.) Livesi 10 lisichazela nganati tintfo letimbili letibaluleke kakhulu: UMbuso waNkulunkulu uyacala kubusa, Jesu uyiNkhosi yawo; Sathane uyacoshwa ezulwini ulahlelwa emhlabeni. Njengobe sitofundza, letintfo leti setenteka.

13. Kwentekani ezulwini ngemuva kwekucoshwa kwaSathane?

¹³ LiBhayibheli lisichazela ngenjabulo tingilosi letetsembekile letaba nayo ezulwini ngemva kwekucoshwa kwaSathane nemadimoni akhe. Litsi: “Jabulani nine mazulu nani lenihlala kuwo!” (Sembulo 12:12) Sekunekuthula nebunye ezulwini ngobe sekwenteka intsandvo yaNkulunkulu.

14. Kwentekani emhlabeni ngemuva kwekutsi Sathane asalahlelwe kuwo?

¹⁴ Kuphila emhlabeni kwehluke kakhulu kunekwasezulwini. Bantfu behlelwa tintfo letimbi ‘ngobe Develi wehlele emhlabeni atfukutsele kakhulu ngobe ati kutsi  unesikhatsi lesincane.’ (Sembulo 12:12) Sathane utfukutsele kakhulu ngobe ucoshiwe ezulwini futsi uyati kutsi utawubhujiswa masinyane. Wenta konkhe lokusemandleni akhe kute abangele tinkinga, buhlungu nekuhlupheka emhlabeni wonkhe.

15. Iyini intsandvo yaNkulunkulu ngemhlaba?

¹⁵ Intsandvo yaNkulunkulu ngemhlaba solo ayikashintji. Usafuna kutsi bantfu labete sono bahlale phakadze emhlabeni loliPharadisi. (Tihlabelelo 37:29) UMbuso waNkulunkulu utakwenta kanjani konkhe loku?

16, 17. UmBhalo waDanyela 2:44 usitjelani ngeMbuso waNkulunkulu?

¹⁶ Siphrofetho lesisemBhalweni waDanyela 2:44 sitsi: “Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.” Sisifundzisani lesiphrofetho ngeMbuso waNkulunkulu?

¹⁷ Kwekucala, sisitjela kutsi uMbuso waNkulunkulu utawucala kubusa “ngesikhatsi salawo makhosi.” Loku kusho kutsi leminye imibuso itawube isabusa nawucala kubusa loMbuso. Kwesibili, sisitjela kutsi uMbuso waNkulunkulu uyawukuma kuze kube phakadze unganikwa labanye bantfu. Kwesitsatfu, uMbuso waNkulunkulu utakulwa nalemibuso lelamhlabeni, uncobe kube ngiwo kuphela lobusa emhlabeni wonkhe. Bantfu batawubese babuswa nguhulumende lokahle kunabo bonkhe labake baba khona.

18. Ibitwa ngekutsi yini imphi yaNkulunkulu nabohulumende bemhlaba?

¹⁸ UMbuso waNkulunkulu utayincoba njani lemibuso yalamhlabeni? Ngaphambi kwekutsi kucale imphi yekugcina lebitwa ngekutsi yi-Amagedoni, emadimoni  atawudukisa ‘emakhosi emhlaba wonkhe, kuze awabutsele ndzawonye emphini yelilanga lelikhulu laNkulunkulu Somandla.’ Bohulumende bebantfu batokulwa neMbuso waNkulunkulu.—Sembulo 16:14, 16; fundza liphuzu 10 ngephasi kwesihloko lesitsi Imininingwane Lesekugcineni.

19, 20. Yini lesenta sidzinge uMbuso waNkulunkulu?

¹⁹ Yini lesenta siwudzinge uMbuso waNkulunkulu? Kunetizatfu leticishe tibe tintsatfu taloko. Sekucala kutsi sinesono, ngako siyagula futsi siyafa. Kodvwa-ke, liBhayibheli liyasho kutsi ngaphansi kweMbuso waNkulunkulu sitawuphila kuze kube phakadze. Ecinisweni Johane 3:16 utsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”

²⁰ Sizatfu sesibili lesisenta sifune uMbuso waNkulunkulu kutsi bantfu lesiphila nabo benta tintfo letimbi. Linyenti labo litiphatsa kabi, licamba emanga futsi aliketsembeki. Kute lesingakwenta kute sibasuse kodvwa Nkulunkulu utawubasusa. Bantfu labachubeka nekwenta bubi batawubhujiswa baphele nya nge-Amagedoni. (Fundza Tihlabelelo 37:10.) Sizatfu sesitsatfu kutsi bohulumende bebantfu abakhoni kusenetisa, baneludlame nebudlova futsi bakhohlakele. Abakatimiseli kusita bantfu kutsi balalele Nkulunkulu. LiBhayibheli litsi: “Umuntfu usuke atihlisibete etikwalabanye kantsi utilimata yena.”​—Umshumayeli 8:9.

21. Yini letawentiwa nguMbuso waNkulunkulu kute ucinisekise kutsi intsandvo yakhe iyentiwa emhlabeni?

²¹ Ngemuva kwe-Amagedoni, uMbuso waNkulunkulu utawucinisekisa kutsi intsandvo yaNkulunkulu iyentiwa emhlabeni. Sibonelo saloko kutsi loMbuso  utawususa Sathane nemadimoni akhe. (Sembulo 20:1-3) Ekugcineni kute lotawugula nobe afe. Ngenca yenhlawulo, bonkhe bantfu labetsembekile batawuphila phakadze ePharadisi. (Sembulo 22:1-3) LoMbuso utawungcwelisa libito laNkulunkulu. Kusho kutsini loko? Kusho kutsi nasekubusa hulumende waNkulunkulu lamhlabeni, bonkhe bantfu batawuhlonipha libito laJehova.​—Fundza liphuzu 21 ngephasi kwesihloko lesitsi Imininingwane Lesekugcineni.

22. Sati ngani kutsi Jesu abengasiyo iNkhosi ngesikhatsi alamhlabeni nobe masinyane ngemuva kwekuvuswa kwakhe?

²² Jesu wafundzisa bafundzi bakhe kutsi bathantaze batsi: “UMbuso wakho awute.” Loko kwakwenta kwacaca kutsi uMbuso waNkulunkulu bewutawufika esikhatsini lesitako. Jehova abetawucala ngekusungula hulumende wakhe bese ubeka Jesu kutsi abe yiNkhosi yawo. Jesu wabekwa waba yiNkhosi masinyane nakabuyela ezulwini yini? Cha, kwadzingeka eme sikhashana. Ngemuva kwekuvuswa kwaJesu, boPhetro naPawula bacacisa lobekushiwo siphrofetho lesikhuluma ngaJesu lesisemBhalweni  weTihlabelelo 110:1. Kulesiphrofetho Jehova utsi: “Hlala ngesekudla sami, ngidzimate ngente titsa takho tibe senabelo setinyawo takho.” (Imisebenti 2:32-35; Hebheru 10:12, 13) Kwakutodzingeka kutsi Jesu eme sikhatsi lesingakanani ngaphambi kwekutsi Jehova ambeke abe yiNkhosi?

23. (a) Jesu wacala nini kubusa eMbusweni waNkulunkulu? (b) Sitawufundza ngani esehlukweni lesilandzelako?

²³ Kusesele iminyaka leminyenti ngaphambi kwekufika kwa-1914, emaKhristu eliciniso beketsemba kutsi leso bekutoba sikhatsi lesibaluleke kakhulu sekugcwaliseka kwesiphrofetho seliBhayibheli. Tintfo letenteka kusukela nga-1914 tiyakufakazela loko. Jesu waba yiNkhosi ngalowo mnyaka. (Tihlabelelo 110:2) Ngemuva kwaloko, Sathane walahlelwa phansi emhlabeni futsi manje “unesikhatsi lesincane.” (Sembulo 12:12) Esehlukweni lesilandzelako sitawufundza kabanti ngebufakazi bekutsi sesiphila kuleso sikhatsi. Sitawuphindze sifundze kutsi masinyane uMbuso waNkulunkulu utawucinisekisa kutsi intsandvo yaNkulunkulu iyenteka lamhlabeni.​—Fundza liphuzu 22 ngephasi kwesihloko lesitsi Imininingwane Lesekugcineni.