Jehova lomhlaba wawuniketa bantfu. Umhlaba ulikhaya letfu. Ngako bantfu bekucala, bo-Adamu na-Eva bebangakadalelwa kuhlala ezulwini, ngobe Nkulunkulu abesavele adale tingilosi kutsi tihlale khona. (Jobe 38:4, 7) Esikhundleni saloko, Nkulunkulu watsatsa umuntfu wambeka epharadisi lelihle lelalibitwa ngekutsi yinsimi yase-Edeni. (Genesisi 2:15-17) Jehova waniketa lomuntfu kanye nebantfwana bakhe labetawubatala litsemba lekuphila phakadze emhlabeni.​—Fundza Tihlabelelo 37:29; 115:16.

Ekucaleni, bekuyinsimi yase-Edeni kuphela lebeyilipharadisi. Labantfu bekucala bekufanele bagcwalise lomhlaba ngebantfwana babo. Ngekuhamba kwesikhatsi bekufanele bawunakekele wonkhe lomhlaba futsi bawente lipharadisi. (Genesisi 1:28) Umhlaba awusoze wabhujiswa. Utawuhlala ulikhaya lebantfu.​—Fundza Tihlabelelo 104:5.

Bo-Adamu na-Eva abazange bamlalele Nkulunkulu, ngako wabacosha kulensimi. Lipharadisi labese liyabalahlekela, futsi kute umuntfu lowakwati kuphindze alitfole. LiBhayibheli litsi: ‘Live liniketelwe etandleni tebantfu lababi’​—Jobe 9:24.​—Fundza Genesisi 3:23, 24.

Jehova sewuyishintjile yini injongo yakhe yasekucaleni ngebantfu? Cha! UnguSomandla, ngako-ke angeke ehluleke. (Isaya 45:18) Utawubuyisela bantfu, kute babe nguloko labekuhlosile ekucaleni.​—Fundza Tihlabelelo 37:11, 34.

Lomhlaba utawentiwa lipharadisi Ngalesikhatsi Jesu asabusa njengeNkhosi yaNkulunkulu. Emphini lebitwa ngekutsi yi-Amagedoni, Jesu utawuhola tingilosi taNkulunkulu abhubhise bonkhe labaphikisana naNkulunkulu. Ngemuva kwaloko,  Jesu utawubopha Sathane iminyaka lengu-1 000. Bantfu baNkulunkulu batawusindza kulokubhujiswa, ngobe Jesu utawubahola futsi abavikele. Batawujabulela kuphila lokuphakadze emhlabeni loliPharadisi.​—Fundza Sembulo 20:1-3; 21:3, 4.

Nkulunkulu utawubucedza nini bubi emhlabeni? Jesu washo tintfo lebetiyawukhombisa kutsi kuphela sekusedvute. Timo letibucayi naletibeka kuphila kwebantfu engotini lamuhla tikhombisa kutsi sesiphila ‘ekupheleni kwetikhatsi.’​—Fundza Matewu 24:3, 7-14, 21, 22.

Kuleminyaka lengu-1 000 yekubusa kwakhe asezulwini, Jesu utawucedza konkhe kuhlupheka emhlabeni. (Isaya 9:6, 7; 11:9) Ngetulu kwekuba yiNkhosi, Jesu utawuba nguMphristi Lophakeme, futsi utawesula tonkhe tono talabo labatsandza Nkulunkulu. Ngako Nkulunkulu utawusebentisa Jesu kute acedze kugula, kuguga kanye nekufa.​—Fundza Isaya 25:8; 33:24.

Bantfu labalalela Nkulunkulu ngibo labatawuhlala ePharadisi. (1 Johane 2:17) Jesu watfuma balandzeli bakhe kutsi bayofuna bantfu labatfobekile, futsi babafundzise kutsi yini lokufanele bayente kute bemukeleke kuNkulunkulu. Lamuhla, Jehova usita tigidzi tebantfu kute titewuphila ePharadisi emhlabeni esikhatsini lesitako. (Zefaniya 2:3) EmaHholweni eMbuso aboFakazi BaJehova, bantfu bafundziswa tindlela tekuba madvodza, bobabe, bafati kanye nabomake labakahle. Bantfwana kanye nebatali babo bakhonta Nkulunkulu ndzawonye, baphindze bafundze nekutsi bangazuza njani kuletindzaba letimnandzi.​—Fundza Mikha 4:1-4.